Malagipyo Pay Aya?

Naapresiaryo kadin ti panagbasa kadagiti naglabas a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

◻ Aniat’ pangibatayan nga adda kadagiti naespirituan a papastor iti panangiruanganda ti pannakisango kadagiti sumagmamano a nailaksid tapno makitada no isudat’ matignay nga agbabawi?

Nupay dagiti Israelitas addada iti pannakaidistierro ket dida nagbabawi, ni Jehova, kas maysa a pastor, isut’ immun-una a nangbiruk kadakuada, nga imbaonna dagiti mammadtona kadakuada. Dagiti Kristiano a pastor interesadoda a tumulong iti siasinoman a managbabawi a kasla napukaw a karnero. (idiligyo iti Lucas 15:4-7.)​—4/15, pinanid 21-3.

◻ Kasano a ti ilustrasion ni Jesus iti anak a naiyaw-awan ipakitana no ania koma ti rikna ken tignaytayo no ti maysa ket naisubli iti Krisitiano a kongregasion? (Lucas 15:22-32)

Ti kalattayo masapul nga isut’ panangtuladtayo iti ama, a nangipakitat’ kinaragsak iti panagsubli ti naiyaw-awan nga anakna. Ngarud, masapul a siwayawayatayo a makisao iti naisubli a kabsat ken isut’ paregtaentayo itan a rumang-ay iti kinapudno.​—4/15, panid 25.

◻ Aniada a praktikal a panagannad ti maaramid tapno maliklikan ti panagbalin a biktima ti krimen?

Aginggat’ mabalin, liklikan ti ipapan kadagiti napeggad a lugar iti rabii. Idulinyo dagiti alahasyo, ken ikargayo dagiti bambanag a kas ti kamera iti paggatang a supot. Annadanyo ti pannagna iti igid ti bangketa, nangruna no adda awityo a briefcase wenno bag. (Kitaenyo ti Proverbio 3:21-23.​—5/1, pinanid 5-6.

◻ Apay a ti padto idiay Sofonias 2:3 kunenna a: “Nalabit maitalimengkayto iti aldaw ti pungtot ni Jehova”?

Ti pannakaisalakan agturong iti biag agpannuray iti kinamatalek ken panagibtur. (Mateo 24:13) Ngarud, dagidiay laeng makitunos kadagiti nalinteg a pagalagadan ti Dios ken agtultuloy nga agsao ti nadalus a pagsasao ti maitalimengto iti aldaw ti pungtot ni Jehova. (Sofonias 2:1, 2)​—5/1, panid 14.

◻ Aniat’ nairaman iti panangiyun-una ti Dios iti biag ti pamiliatayo?

Dagiti nagannak ken annakda masapul nga agdayawda ken Jehova ken gaw-atenda dagiti pagalagadanna kas naituyang idiay Biblia.​—5/15, panid 5.

◻ Apay a saan a dagus a dinusa ni Jehova dagiti managbasol?

Maysa a rason ket gapu ta masapul a maipakaammo ti nagan ti Dios iti intero a daga. (Idiligyo iti Roma 9:17.) Ti sabali pay ket tapno palubosan ti tiempo tapno marisut dagiti salisal ti kinasoberano ti Dios ken kinamatalek ti tao, nga imbunga ti iyaalsa idiay Eden. Kasta met, ti mabayag a panagitured ti Dios ipaayanna dagiti nakabasol ti gundaway nga agbabawi ken baliwanda ti biagda. (2 Pedro 3:9)​—5/15, pinanid 11-12.

◻ Aniada a kinapudno ti mangsaksi a ti Biblia nagtaud iti mannakabalin a gubuayan?

Ti Biblia ket insurat ti agarup 40 a nagduduma a mannurat, a naggapu manipud amin a kasasaad ti biag ken nagbiag iti las-ud ti 1,600 a tawen; ngem amin dagitoy a mannurat sinurotda ti maymaysa a kangrunaan a tema. Daytoy a panagtutunos ti linaon ti Biblia ti imposible no nabaybay-an wenno iti laeng panangiwanwan ti tao.​—6/1, panid 5.

◻ Ania a di karkarna nga aramid ken naisangsangayan a trabaho, a naipadto idiay Isaias 28:21, ti itungpal ni Jehova iti panawentayo?

Ti pakdaar idiay Apocalipsis 17:16 ipakitana a dagiti napolitikaan a kaayan-ayat ti Babilonia a Dakkel ti mangbueltanto kenkuana. Kas resultana, ti Kakristianuan naan-anayto a madadael kasta met dagiti amin a sabsabali pay nga ulbod a relihion. Daytoyto ti karkarna nga aramid ni Jehova ken naisangsangayan a trabahona iti panawentayo.​—6/1, pinanid 22-3.

◻ Aniat’ rebbeng a laglagipen dagiti Kristiano a babbai maipapan iti panagusar ti alahas ken pagpapintas?

Saan nga iparit ti Biblia ti panangikapet kadagiti kakasta a pagpapintas. (Exodo 32:2, 3; Ester 2:7, 12, 15) Ngem masapul nga agminar ti kinaemma. Naglaka a tuladen ti maysa a babai dagiti nailubongan nga estilo, a nalabes ti panagusarna iti lipstick, kolorete, wenno eye shadow, kas inaramid ni Jezebel. (2 Ar-ari 9:30) Kasapulan ti panagannad tapno dagiti pagpapintas saanda a mausar nga aglablabes ken dagiti alahas a naikapet ket saan a makagargari.​—6/1, pinanid 30-1.

◻ Kasano a nalasatan dagiti Israelitas “dagiti amin a dakes a sakit ti Egipto” a nakasaksaknap idi unana a tiempo? (Deuteronomio 7:15)

Nabatad a nalasatanda dagidiay a sakit kangrunaanna gapu ti panangalagadda ti adelantado a panagdalus iti bagi a naibilin idiay Linteg ti tulag.​—6/15, panid 4.

◻ Apay nga imbilin ti Dios a di rebbeng a mangan ti tao iti dara? (Genesis 9:3, 4; Levitico 17:10, 11; Aramid 15:22-29)

Ti biag ket maysa a sagut manipud iti Dios ket ti natauan a biag agpannuray iti mangtaginayon-biag a likido a maawagan dara. (Salmo 36:9) Babaen panangibilang iti dara kas napateg, ipakita dagiti tao ti panagpannurayda iti Dios maipaay iti biagda. No kasta, ti kangrunaan a rason iti bilin ti Dios maipapan ti dara ket, saan a gapu ta ti pannangan ti dara ket mangiyeg sakit, ngem gapu ta ti dara addaan naisangsangayan a kaipapanan iti Dios.​—6/15, pinanid 8-9.

◻ Kasano a mapakired dagiti Kristiano a nagannak ken dagiti agtutubo ti dakkel a posibilidad a ti panagkedked iti dara ti maysa nga ubing ti maraem?

Nupay saan pay a nataengan, masapul a kabaelan nga ilawlawag ti maysa a Kristiano nga agtutubo a sibabatad ken sititibker no aniat’ narelihiusuan a panagkedkedna iti panangawat ti dara. Mabalin nga aginsayo dagiti nagannak a kadduada dagiti annakda tapno dagitoy makagun-odda ti kapadasan iti panangilawlawag iti bukodda a pammati.​—6/15, panid 18.

◻ Kasano a nagunggonaan unay dagiti babbai kabayatan ti naindagaan a ministerio ni Jesus?

Rinugian ni Jesus ti trabaho a nangiyeg liwliwa, namnama, ken maysa a baro a dayaw kadagiti babbai iti isuamin a rasa. Insurona dagiti babbai kadagiti nauneg a naespirituan a kinapudno. (Juan 4:7, 24-26) Bayat ti ministeriona, inawatna ti panagministerio dagiti babbai kabayatan a nagdaliasat iti intero a daga. (Marcos 15:40, 41)​—7/1, pinanid 14-15.

◻ Aniada a pamay-an ti panangisuro ni Jesus ti nasarakan dagiti nagannak nga epektibo kadagiti annakda?

Nasayaat nga agusar dagiti nagannak kadagiti ilustrasion tapno maaramidda dagiti Nakristianuan a kinapudno a makaapelo iti puso dagiti ubbingda, ken mabalinda ti agusar kadagiti napagpanunotanen a saludsod tapno maammuanda no ania ti kapanunotan dagiti in-inauna nga annakda. (Idiligyo iti Mateo 17:24-27.)​—7/1, panid 26.

◻ Apay a surotentay ti naayat a kinamanangaasi?

Ti kualidad ti naayat a kinamanangaasi iyasidegnatayo iti Dios ken kadagiti sabsabali. Nayonanna ti kinamanagpadagus ken pagbalinennatayo a naan-anus. Patibkerenna dagiti singgalut ti pamilia ken ti Kristiano a kongregasion. Kangrunaanna, ti naayat a kinamanangaasi mangted dayag ken Jehova.​—7/15, panid 22.

◻ Apay a posible para iti maysa a Kristiano a maallilaw no maipapan iti pannakikadua? (1 Corinto 15:33)

Mabalin nga agparang a mannakigayyem ken nasayaat ti maysa a tao, ngem no isut’ di makiraman iti pannakaseknan ti Kristiano maipaay iti serbisio ni Jehova wenno uray ti panamati iti Biblia, isut’ dakes a kadua. Apay? Gapu ta ti biagna ket naibatay kadagiti naiduma a prinsipio, ken dagiti bambanag a napateg iti maysa a Kristiano ket mabalin a bassit pategda kenkuana.​—7/15, panid 23.

◻ Apay a ti Aldaw ti Panangukom ket tiempo ti inanama?

Ti Aldaw ti Panangukom ket tiempo ti sangaribo a tawen. Daytat’ idauluan ti Dios a mismo ken ti Anakna, ni Kristo Jesus, ti dinutokan ti Dios nga agtignay kas Ukom. Tiemponto daytoy tapno maisubli ti sangatauan iti perpekto a natauan a biag a napukaw ni Adan agpaay kadagiti annakna. (1 Corinto 15:21, 22)​—8/1, pinanid 5-7.