‘Maitayab a Sumabet iti Apo’​—Kasano?

DI MALAPDAN ti panagtulid ti panawen nga agturong iti panungpalan ti agdama a dakes a sistema. Iti panaglabas ti tunggal oras, tunggal minuto, tunggal segundo, umad-adanitayo kadagiti naisalsalumina a pasamak a naipadto adun a siglo ti napalabas. Ti kadi rapture ket maysa kadagitoy? No wen, kaano ken kasanonto a mapasamak dayta?

Saan nga agparang iti Biblia ti sao a “rapture.” Ngem isitar dagidiay mamati iti dayta ti sasao ni apostol Pablo idiay 1 Tesalonica 4:17 kas pangibatayan iti pammatida. Intay sukimaten daytoy a kasuratan agraman ti kontekstona. Insurat ni Pablo:

“Kakabsat, dikami kayat nga awan ti ammoyo maipapan kadagiti matmaturog ken patay; tapno dikayo agladingit a kas kadagiti dadduma nga awan inanamada. Ta no patientayo a ni Jesus natay ket nagungar, kasta met, ti Dios babaen ken Jesus iyegnanto dagiti naturogen ken patay nga ikuyog kenkuana. Ta daytoy ti ibagami kadakayo babaen ti sao ni Jehova, a datayo a sibibiag nga agbati agingga iti kaadda ti Apo saantayonto nga unaan dagiti naturogen ken patay; ta ti Apo met laeng aggapunto sadi langit a buyogen ti ariwawa, ti timek ti arkanghel ken ti trumpeta ti Dios, ket dagiti natay ken Kristo bumangondanto nga umuna. Ket kalpasanna, datayo a sibibiag, datayo a mabati, maitayabtayo a maikuyog kadakuada kadagiti ul-ulep a sumabet iti Apo iti tangatang; ket iti kasta kankanayon nga addatayto iti Apo. Ngarud pangliwliwayo iti maysa ken maysa dagitoy a sasao.”​—1 Tesalonica 4:13-18.

Nabiit pay la a nabuangay ti kongregasion idiay Tesalonica idi damo a nagsurat ni Pablo kadagiti Kristiano sadiay idi agarup 50 K.P. Maladingitan dagiti kameng ti kongregasion gapu ta dadduma kadakuada ti “matmaturog ken patay.” Nupay kasta, iti suratna, liniwliwa ni Pablo dagiti taga Tesalonica babaen ti namnama ti panagungar.

Ti “Kaadda” ni Kristo

Saan laeng a pinatalgedan ni Pablo nga agungarto dagiti matalek a Kristiano a natayen no di ket kinunana pay: “Datayo a sibibiag nga agbati agingga iti kaadda ti Apo saantayonto nga unaan dagiti naturogen ken patay.” (Bersikulo 15) Nakakadkadlaw ti panangtukoy ti apostol iti “kaadda” ti Apo. Iti orihinal a teksto, nausar ditoy ti Griego a sao a pa·rou·siʹan, a literal a kayuloganna “adda iti abay.”

No bumisita ti pangulo ti maysa a pagilian iti sabali a pagilian, kadawyanna a maipakaammo dagiti petsa ti kaaddana sadiay. Pudno met daytoy iti kaadda ni Apo Jesu-Kristo. Adun a tawen a mangidatdatag Ti Pagwanawanan iti pammaneknek kadagiti napudno nga agad-adal ti padto ti Biblia a nangrugi ti kaadda ni Jesus iti nailangitan a pannakabalin ti Pagarian idi 1914. Paneknekan dagiti pasamak manipud iti dayta a tawen ti di makita a kaadda ni Jesus. (Mateo 24:3-14) Isu nga idi imbagana a “maitayabto [ti sumagmamano a Kristiano a sibibiag bayat ti kaadda ti Apo] kadagiti ul-ulep a sumabet iti Apo iti tangatang,” ti kayat a sawen ni Pablo ket dagidiay sibibiag sabtendanto ni Kristo, saan nga iti atmospera ti daga, no di ket iti di makita a nailangitan a disso a sadiay situtugaw ni Jesus iti makannawan ti Dios. (Hebreo 1:1-3) Ngem siasinoda?

“Ti Israel ti Dios”

Adut’ sawen ti Kasuratan maipapan kadagiti nainlasagan nga Israelita ken kasta met sawenna ti naespirituan nga “Israel ti Dios.” Dagiti manamati a Judio ken Gentil ti mangbukel iti kompleto a bilang daytoy a grupo a pinulotan ti nasantuan nga espiritu ti Dios, wenno aktibo a puersa. (Galacia 6:16; Roma 11:25, 26; 1 Juan 2:20, 27) Ipakita ti libro ti Apocalipsis nga agdagup ti bilang ti naespirituan nga Israel iti 144,000, a nailadawanda amin a kadua ti Kordero, ni Jesu-Kristo, iti nailangitan a Bantay Sion. Kaduada ni Kristo kas ar-ari ken papadi sadi langit. (Apocalipsis 7:1-8; 14:1-4; 20:6) Karaman kadakuada dagidiay indibidual a naitimpuyog kadagiti kongregasion idiay Tesalonica ken iti dadduma pay a lugar, aniaman ti nagtaudanda a rasa wenno ili.​—Aramid 10:34, 35.

Sakbay nga awaten dagiti matalek a kameng ti naespirituan nga Israel ti nailangitan a gunggonada, adda mapasaranda pay nga umuna. No kasano a natay nga umuna ni Jesus iti kayo a pagtutuokan sakbay a napagungar iti biag idiay langit, kasta met a masapul a matay nga umuna dagiti Kristiano nga addaan iti nailangitan a namnama sakbay nga inda awaten ti gunggonada. (1 Corinto 15:35, 36) Pudno dayta kadagiti kameng ti naespirituan nga Israel a sibibiag idi umuna a siglo K.P. ken iti kakasta nga indibidual a sibibiag iti kaaldawantayo.

Kalpasan ti panangdakamatna iti “kaadda ti Apo,” intudo ni Pablo ti panawen inton awaten dagiti natayen a matalek a naespirituan nga Israelitas ti nailangitan a gunggonada. Insuratna: “Ti Apo met laeng aggapunto sadi langit a buyogen ti ariwawa, ti timek ti arkanghel ken ti trumpeta ti Dios, ket dagiti natay ken Kristo bumangondanto nga umuna.” (Bersikulo 16) Gapuna, apaman a nangrugi ti kaadda ni Jesus a kas Ari, namnamaentayo a nangrugi metten ti nailangitan a panagungar, a nangrugi kadagidiay kameng ti naespirituan nga Israel a natayen kas manangsalimetmet iti kinatarnaw. (1 Corinto 15:23) Kaduada itan ni Jesus nga agserserbi idiay langit. Ngem dagiti ngay sumagmamano laengen a napulotan a Kristiano a sibibiag pay laeng ditoy daga? Ur-urayenda aya ti rapture?

“Maitayab”​—Kasano?

Kalpasan ti panangtukoyna kadagiti napulotan a Kristiano a natayen, innayon ni Pablo: “Kalpasanna, datayo a sibibiag, datayo a mabati, maitayabtayo a maikuyog kadakuada kadagiti ul-ulep a sumabet iti Apo iti tangatang; ket iti kasta kankanayon nga addatayto iti Apo.” (Bersikulo 17) “Dagiti sibibiag” isu dagidiay sibibiag bayat ti kaadda ni Kristo. “Maitayab[danto]” a sumabet ken Apo Jesus. Kas kadagiti matalek nga immuna a Kristiano, nasken a matayda kas tao tapno maikaykaysada ken Kristo idiay langit.​—Roma 8:17, 35-39.

Idi nagsurat kadagiti Kristiano idiay Corinto, kinuna ni Pablo: “Kunak daytoy, kakabsat, a ti lasag ken dara saanda a mabalin a tawiden ti pagarian ti Dios, ket ti panagrupsa dina tawiden ti saan nga agrupsa. Adtoy! ibagak kadakayo ti maysa a sagrado a palimed: Saantayto a maturog amin ken patay, ngem mabaliwantayto amin, iti apagdarikmat, iti apagkirem, iti kamaudianan a trumpeta. Ta aguninto ti trumpeta, ket dagiti natay agungardanto a di agrupsa, ket mabaliwantayto amin.” (1 Corinto 15:50-52) Apaman a matay a matalek bayat ti kaadda ni Kristo, dagus nga awaten ti tunggal maysa iti natda ti naespirituan nga Israel ti nailangitan a gunggonana. Mapagungar “iti apagkirem” kas espiritu a parsua ket “maitayab” a sumabet ken Jesus ken makipagturay iti Pagarian idiay langit. Ngem dagiti ngay dadduma nga agdaydayaw ken Jehova? Bayat nga umas-asideg ti panungpalan daytoy dakes a sistema, maitayabdanto met aya idiay langit?

Pannakailasat​—Ngem Saan a Babaen ti Rapture

Yantangay nangrugi ti naarian a kaadda ni Jesus idi 1914, adayot’ nagtengantayon iti “panawen ti panungpalan” daytoy a lubong. (Daniel 12:4) Namakdaar ni Pablo: “Maipapan kadagiti al-aldaw ken kadagiti panawen, kakabsat, awan pakasapulanyo a maisurat kadakayo. Ta dakayo ammoyo unay a ti aldaw ni Jehova umay nga apagpag-isu a kas mannanakaw iti rabii. Inton sasawenda: ‘Talna ken talged!’ iti kasta ti kellaat a pannakadadael isunto ti dagdagus nga umapay kadakuada a kas iti panagpasikal ti masikog; ket didanto pulos makalisi.” (1 Tesalonica 5:1-3) Ngem makalisi dagiti nasalukag a Kristiano. Kasano?

Maipukkaw nga umuna ti “Talna ken talged!” sakbay ti panawen nga inawagan ni Jesus a “dakkel a rigat.” Iti panangdeskribirna iti “dakkel nga umariwekwek” dagiti matalek nga addaan namnama nga agbiag nga agnanayon iti naindagaan a paraiso, kunaen ti libro ti Apocalipsis: “Dagitoy isuda dagiti naggapu iti dakkel a rigat, ket binugguanda dagiti pagan-anayda ket pinapurawda ida iti dara ti Kordero.” (Apocalipsis 7:9, 14; Lucas 23:43) Saan a rapture ti namnamada. Imbes ketdi, addaanda iti namnama a makalasat ditoy daga a mismo. Tapno makapagsaganada, masapul a kanayon nga agsalukagda iti naespirituan. Kasanoyo a maaramidan daytoy ken malasatan ti panungpalan daytoy a sistema?

Masapul nga ‘agparbengkayo ken ikapetyo ti kabal ti barukong, ti pammati ken ayat ken kas kabal ti ulo, ti inanama ti pannakaisalakan.’ (1 Tesalonica 5:6-8) Itan ti tiempo nga ipangag ti naimpadtuan a Sao ti Dios, ti Biblia. Bayat nga aglabas ti panawen nga agturong iti panungpalan daytoy a sistema, ipangagyo ti patigmaan ni Pablo: “Saanyo a laisen dagiti panagpadto. Siguraduenyo dagiti amin a banag; salimetmetanyo a sititibker ti naimbag.” (1 Tesalonica 5:20, 21) Gapuna, abrasaendakayo dagiti Saksi ni Jehova kadagiti Kingdom Hall-da, a sadiay mabalinyo ti makiraman kadakuada a mangusig kadagiti padto ti Biblia ken dadduma pay a paset ti naipaltiing a Sao ti Dios.

Bayat a rumang-aykayo iti umiso a pannakaammo ken pammati, maawatanyonto ti pannakaibanag ti panggep ni Jehova a Dios a mangpukaw kadagiti amin a kabusorna iti sapasap ken mamagbalin manen iti daga a paraiso. No alagadenyo ti pammati, nalabit maysakayto kadagiti makalasat iti dakkel a rigat, a naparaburan a mangabrasa kadagiti riniwriw a mapagungarto iti biag ditoy daga. Anian a nagragsak ti agbiag iti sidong ti Pagarian ti Dios iti ima ni Jesu-Kristo ken dagiti kaduana nga agturay, nga iti dayta a tiempo ‘naitayabdan a simmabet iti Apo’ babaen ti pannakapagungarda iti nailangitan a disso!

Ania, no kasta, ti pudno a Nainkasuratan a namnama ti natulnog a sangatauan iti pangkaaduan? Saan a rapture. Imbes ketdi, biag nga agnanayon ditoy daga iti sidong ti turay ti Pagarian ti Dios.

[Ladawan iti panid 7]

Abrasaento dagiti makalasat iti dakkel a rigat dagiti mapagungar iti paraiso a daga iti sidong ti turay ni Jesus ken dagidiay “naitayab” idiay langit