“Agtalinaedkayo a Sititibker”—Dikay Maitibkol
TI KADADAKKELAN nga isyu a naipasango iti sangatauan itatta ket isut’ sapasap a kinasoberano. Aw-awisennatay ni Jehova a mangalat’ takdertayo ken maibilang iti daytoy a banag babaen ti panagpasakoptayo iti dinutokanna nga Ari, a ni Kristo Jesus. Adda naganat a panagkasapulan a mangabrasa itoy nga awisna, ket iti las-ud laeng ti napalabas a lima a tawen, nasurok a sangamilion a tattao ti nangaramid iti dayta. Ngem nakita dagitoy nga ad-adu pay ti nairaman iti panagtakderda ngem ti basta panangaramid laeng ti naminsan a desision nga agserbi ken Jehova. Masapul nga adda komat’ aginggat’ tungpal biag a dedikasion. Masalimetmetantay aya ti takdertayo no rumigaten dagiti kasasaad? Wenno datay ketdi ti kumapuy, kalpasan ti umuna a ‘panagtakdertayo a sititibker’?—1 Corinto 16:13; Hebreo 2:1.
No nasarakanyo a ti Nakristianuan a kurso ket saan a nalaka, maliwliwakay koma iti pannakaammo a pudno met dayta ken Jesu-Kristo. Wen, uray ti bugbugtong nga Anak ti Dios ket nagkararag a maipaay iti pigsa tapno mataginayonnat’ takderna, nangnangruna idi umadanin ti kadakkelan a suot. Isut’ iladawanyo idiay minuyongan ti Getsemani, a sipapasnek nga agkarkararag: “Abba, Ama, amin a bambanag mabalin kenka; ipanawmo kadi kaniak daytoy a kopa. Nupay kasta saan a ti kayatko, no di ta kayatmo.” (Marcos 14:36) Ammona a ti kurso iti masanguanan ket narigat. Ammona a ti nagan ni Amana ti maapektaran. Gapuna, ti kakaisuna a perpekto a tao ditoy daga di bimdeng a dimmawat ti tulong.
No ti agdama a kasasaad rumigat para kadatayo, addaantay ti isu met laeng a gubuayan ti pigsa nga adda idi ken Jesus. Mabalintay ti agkararag ken Jehova maipaay iti tulong tapno saantay a maitibkol wenno matnag. Ngem ania a kita dagiti peggad ti agparang a mabalin makaitibkol kadatayo? Ti panangammo iti daytoy ken panagsagana a nasapa ket nalabit makatulong kadatayo a di maitibkol.
Ti Pannakaidadanes Mabalin a Makaitibkol Kadatayo
Mamakdaar ti Biblia: “Isuamin dagiti mayat nga agbiag a nasantuan ken Kristo Jesus aglak-amdanto ti pannakaidadanes.” (2 Timoteo 3:12) Ti pannakaidadanes mabalin a makaitibkol kadatayo, ket daytat’ umay iti adu a kita. (Marcos 4:17) Mabalin a daytat’ legal a panangiparit—a mangyeg peggad ti pannakaibalud wenno uray pay ipapatay—panagderraaw, mangpakapuy pammati nga inaldaw-aldaw nga ibubusor ti maysa a determinado, bumusbusor nga asawa, wenno di agressat a pananglalais dagiti kaeskuelaan.
Narigat nga ibturan ti pannakaidadanes, ngem napakdaarantayo a daytat’ agparang iti nadumaduma a porma. Gapu itoy, mabalintay a pabilgen ti pammatitay itan ken sursuruen ti agpannuray iti pigsa ni Jehova tapno inton umay ti tiempo, makapagibturtayo iti dayta a pigsa. (1 Pedro 4:13, 14; 5:6-11) Nupay kasta, masansan a dagiti pakaitibkolan ket nasiksikapda ngem ti narungsot nga iraraut ti pannakaidadanes.
Mabalin Mangpakapuy Pammati dagiti Pannakapaay
Asinot’ di makalagip iti nadudog a rikna a dimteng idi ub-ubbingtay pay ken nariknatay a napaaytayo? Malagipyo pay aya daydiay panagkari ni Daddy ti panangipasiarna ti pamilia ngem kalpasanna gaput’ maysa a rason binaliwannat’ panunotna? Wenno ti tiempo nga ipannakayo koma idiay zoo ket iti maudi a kanito kinanselarna dayta? Anian ti pannakapaayyo!
Uray dagiti nataenganen a Kristiano mapaayda met, ket daytoy ti nangiturong ti naespirituan a didigra iti dadduma a kaso. Dadduma inkabildat’ namnamada iti maysa a petsa a siguradoda nga idadatengen ti Armagedon. Idi awan met napasamak iti dayta nga aldaw, napaaydan. Dadduma napaayda idi daydiay namnamaenda a pribilehio ket saan met a nagun-odan. Maysa pay, mabalin met a makapaupay dagiti tattao. Maysa a 18-años a balasang ti nagkuna kadagiti dadakkelna nga isut’ naupay iti kababalin ti sumagmamano kadagiti babbaro idiay kongregasionda—ken ti saan a panangdisiplina dagiti nagannakda kadakuada—a gapu itoy kayatna nga awanen ti pakibibianganna pay iti kinapudno.
Nupay ti pannakapaay ket matarusan iti sidong amin dagitoy a sirkumstansia, rebbeng aya a dagidiay napaay maitibkolda iti pannakirelasionda ken Jehova? Pampanunotenyo ti pannakapaay ni Jesus idi intultuloy dagiti apostolna a nagsusuppiatan no asinot’ kadakkelan kadakuada, nga isut’ nangipanayag ti ambisioso a kababalinda. (Lucas 9:46; 22:24) Pampanunotenyo, met, ti pannakapaay ni Job idi dagiti tallo a gagayyemna a rebbeng koma nga adda sadiay a mangtulong kenkuana ngem isuda ketdi ti kimmontra kenkuana ket rinugianda a pagduaduaan ti kinamatalekna! (Job 22:5-10) Kaskasdi, saan a naitibkol da Jesus ken ni Job.
Amin a tattao nalap-itda, gapuna saan a rasonable ti panangipalubos iti bidbiddut dagiti dadduma a mangapektar iti relasiontayo ken Jehova. (Salmo 51:5) Ti kinaimperpekto dagiti dadduma ti di koma mangbulsek kadatayo kadagiti nakaskasdaaw nga ar-aramiden ni Jehova bayat nga urnongenna “amin a bambanag a maikaykaysa ken Kristo.” (Efeso 1:9, 10) Laglagipenyo a dagiti imperpekto, managbasol a tattao kas kadatayo ti ur-urnogen ni Jehova, tattao a kasapulandat’ disiplina ken pananggugor tapno pumigsada. (Salmo 130:3) Ti kabusortayo ket saan a ti imperpekto a Kristiano a kabsattayo no di ket ni Satanas, a kayatnatay nga alun-onen no kabaelanna. Isut’ di agballigi no ‘isut’ sarangtentayo, iti nabileg a pammati.’ (1 Pedro 5:8, 9) No addaantay ti kasta a pammati, saantayto pulos nga “umay iti pannakaibabain.”—Roma 9:33.
Ti Panangkondenartay ti Bagitayo Makadadael
Napukaw dagiti daddumat’ pannakirelasionda ken Jehova a Dios gaput’ rikna ti di pannakaikari. Gapu ta sipapanunotdat’ bukodda a kinakapuy ken bidbiddutda, naikeddengda a dinto pulos akseptaren ni Jehova ti serbisioda. Patienda a ti maysa kas kadakuada nga agkuna kas maysa kadagiti Saksi ni Jehova ket panaginsisingpet laeng. Napadasanyon aya ti kasta a pannakariribuk iti bagiyo? No wen, rebbeng a labananyo dagita a rikrikna.
Mariknayo kadi a dikay maikari nga agserbi ken Jehova? Ngarud saludsodanyo ti bagiyo, ‘Asino ti maikari iti daytoy dakkel a pribilehio?’ Amin a Kristiano addaandat’ di agressat a pannakidangdangadang iti bukodda a kinaimperpekto. Uray ni apostol Pablo nagreklamo: “Idinto a tarigagayak nga aramiden ti naimbag, ti dakes sumango kaniak.” (Roma 7:21) Maysa aya a managinsisingpet ni Pablo gapu ta no maminsan makapagaramid kadagiti bambanag a di umiso? Saan. Ti managinsisingpet ket isu daydiay aginkukuna kas maysa idinto a saan met. No pagregreggetantay ti agaramid ti umiso ngem sagpaminsan maisiasitayo, dayta aya ket panaginkukuna iti maysa a banag? Siempre saan.
Ti Biblia bagbagaannatayo nga “ikawesyo ti baro a personalidad.” (Efeso 4:24) Kayat kadi a sawen dayta, a mapukawtay aminen nga ug-ugali ti daan a personalidad? Saan. Iti suratna kadagiti taga Colosas, ammo ni Pablo a ti baro a personalidad ket “mapabaro” babaen iti umiso a pannakaammo. (Colosas 3:9, 10) Ti sao a “mapabaro” isingasingnat’ agtultuloy a panagtignay. Gapuna ti panangbaliw ti personalidadtayo ket maysa nga agtultuloy nga aramid. Ngarud, saanen a nakaskasdaaw, a sagpaminsan makakitatay kadagiti pagkurkurangan iti bagitayo.
Siempre, saan a panangtagibassit daytoy iti kinaserioso ti basol, wenno kayatna met a sawen a mabalintay ti sumuko iti pannakasulisog nga awan ti pannakidangadang, nga ipatpato nga automatiko ti panangpakawanen ni Jehova kadatayo. Ngem daytat’ makatulong kadatayo a di agbalin a nalabes a mangbabalaw ti bagbagitayo. Ken pagbalinennatayo nga agayat ken Jehova nga ad-adda pay agsipud ta impaayna ti daton a subbot ni Kristo tapno mabalintay ti agserbi Kenkuana agpapan pay kadagiti natawidtay a sibabasol a kababalin.
Imparang ni apostol Juan ti natimbeng a panangmatmat iti banag idi a kinunana: “Isuratko kadakayo dagitoy a bambanag tapno dikay koma agbasol.” Ngem kalpasanna innayonna a sirerealistiko: “Ket no addanto siasino a makabasol [gapu iti natauan a kinaimperpekto], addaantayo ti katulongan iti Ama, nga isu ni Jesu-Kristo.” (1 Juan 2:1) Imbes nga aglablabes ti panangkondenartay ti bagbagitayo, daytoy a pannakaawat iti kasasaadtayo ken tulong nga impaay ni Jehova iturongnatayo a mangikallangogan kadagiti sasao ni Pablo: “Agyamanak iti Dios gapu ken Jesu-Kristo nga Apotayo!”—Roma 7:25.
Dikay Agtalinaed a Sititibkol Lattan
Nangted ti nainget a pakdaar ni Jesus iti asinoman a pagtaudan ti pakaitibkolan: “Ngem uray siasino a mangitibkolto iti maysa kadagitoy babassit nga ubbing a mamati kaniak, nasaysayaat pay kenkuana a maibattoon koma iti tengngedna ti maysa a bato ti gilingan a dakkel kas ipuspusipos ti asno ket isu maipalned koma iti kaadalman ti baybay.” (Mateo 18:6) Ngem daydiay met ngay naitibkol? No datay ti intibkol ti maysa wenno ti maysa a sirkumstansia, rebbeng aya nga ipambarantay ti bagitayo ket kunaen, “Saanko met a basol dayta, gapuna saanakon nga agserbi pulos ken Jehova”?
Usigenyo ti maysa nga ilustrasion. Napadasyon aya ti naikaglis iti rabaw ti yelo wenno naitibkol iti maysa a tukad ti agdan? Nalabit a nakellaatkayo iti dayta a peggad. Kaawatan a makitayo ti bagiyo a napadata iti daga. Ngem aniat’ sumaganad nga inaramidyo? Kinunayo kadi: “Saanko a basol ti pannakaipadatak ditoy. Basol dayta ti yelo [wenno ti tukad]. Gapu itoy saanak pulos a bumangbangon”? Awan duadua, timmakderkayo ken immadayokayon nga insigida manipud nakababain a langayo.
Di aya pudno met laeng dayta kadagiti naespirituan a bambanag? No nasaktantayo gapu iti maysa a sirkumstansia wenno iti padatayo a Kristiano, daytat’ serioso a problema a rebbeng a tamingen. Nupay kasta, no agtalinaedtayo a sititibkol, nga ipapilit ti panangpabasoltayo iti maysa iti problematayo, saan aya a pudno a ti situasiontayo ket agbalin nga ad-adda a basoltayon?
Makaparagsak, ta no naitibkoltayo, dagiti panglakayen ken dadduma a natataengan iti kongregasion situtulokda a tumulong. (Galacia 6:1) Ket ni Jehova a mismo ti mangted pigsa kadagidiay agtarigagay nga agserbi kenkuana agpapan pay dagiti pakarigatan. (Filipos 4:13) Gapuna rebbeng a sisasaganatayo a dumawat ti tulong no agparang nga adda mabalin a suminga iti natibker a takdertayo ken Jehova ken ti Pagarianna. Iti kasta ditay ik-ikkan ni Satanas ti panagbiktoria gaput’ pannakaitibkoltayo ken panagtalinaeden a kasta.
Sadinot’ Pagtaktakderanyo?
Tunggal aldaw, dagiti dedikado nga ad-adipen ti Dios naipasangoda kadagiti isyu a mangsuot ti debosionda ken Jehova. Agpapan pay aniaman ti pakisalisalanda, masapul nga agtakderda ken paibilang iti dasig ti Mesianiko nga Ari ni Jehova. Dagiti mannakabalin nga agturay daytoy a daga nagtakderda a “maibusor ken Jehova ken maibusor met iti pinulotanna.” Anian a pribilehiotayo nga agtakder a maipaay kenkuana!—Salmo 2:2.
Nupay kasta, ditay mabalin ti agtakder a maibusor iti impluensia daytoy intero a sangalubongan a sistema a bukbukodtayo, gapuna maliwliwatayo babaen iti kari ni Jesus nga isuntot’ adda iti kongregasionna “aginggana iti panungpalan ti sistema dagiti bambanag.” (Mateo 28:20) Suportarannatayo. Mainayon pay, dakkel a tulong ti umay no agtalinaedtayo a nasinged ken Jehova ken sapulen ti panangsuportarna. Ti panagturongtay iti Saona mangted pigsa kadatayo. No mariknatayo a ditayon makapagibtur, awisennatayo ti Salmo 55:22 nga ‘iyallatiwtay ti awittayo ken Jehova, ket saranayennatayto. Dinanto ipalubos a magaraw ti nalinteg.’ Wen, idagadag ti Biblia iti intero nga ili ti Dios nga “agtalinaed a sititibker iti pammati”—ket saanda a maitibkol.—1 Corinto 16:13.