Ti Dios ti Mangpadakkel​—Ar-aramidenyo Aya ti Pasetyo?

DAREPDEPENYO nga addakayo iti napintas a minuyongan, a napalawlawan kadagiti nangayed a kayo, narukbos a palungpong, ken agririmmuok a sabong a nagdudumat’ marisna. Agpasalog ti karuotan a paraanganna a pangesmeraldaen ti kinaberdena iti nasayaat pannakataripatona nga igid ti waig nga agipuspussuak iti nakalitlitnaw a danum. Awan a pulos ti mangpaalas iti buya. Masmasdaaw a dinamagyo no asino ti nangaramid itoy nakaay-ayat a lugar. Sipapakumbaba nga insungbat ti hardinero a ti Dios ti mangpadpadakkel iti amin.

Siempre, ammoyo dayta. Idi nakaawidkayon nalagipyo ti imbaga ti hardinero ket nakitayo a saan a naurnos ti paraanganyo, awan a pulos makaay-ayo a mula sadiay, nagabsuon ti basura, ken napno iti danum ti tudo dagiti likkaong iti daga. Ar-arapaapenyo ti maaddaan iti hardin a kas iti daydiay kagapgapuyo a pinasiar. Gapu ta mamatikayo iti imbaga ti hardinero, nagparintumengkayo ket sipapasnek nga inkararagyo iti Dios a patubuenna dagiti agkakapintas a sabong iti paraanganyo. Aniat’ mapasamak? Siempre awan.

Kumusta met ngay ti naespirituan nga idadakkel? Mabalin a tarigagayanyo unay a makita ti irarang-ay dagiti bambanag, kas ti panangipangag dagiti baro nga adalan iti kinapudno iti Sao ti Dios wenno ti mismo a naespirituan nga irarang-ayyo. Ket mabalin a sipapasnek nga ikararagyo ken Jehova a parang-ayenna dagiti bambanag, a buyogen ti dakkel a panagtalek nga addaan iti pannakabalin a mangaramid iti kasta. Ngem rumang-ay aya dagiti bambanag babaen laeng ti nasged a tarigagay, napasnek a kararag, ken panagtalekyo iti pannakabalin ti Dios?

Ti Dios ti Mangpadakkel

Mabalin a mariknayo a bassit laeng ti pasetyo iti panangpataud iti naespirituan nga idadakkel, wenno awan pay ketdi. Di met aya impamatmat ni apostol Pablo daytoy iti sasaona idiay 1 Corinto 3:5-7? Kinunana: “Asino ngarud ni Apolos? Wen, asino ni Pablo? Ministroda a babaen kadakuada nagbalinkayo a manamati, ken kas iti inted ti Apo iti tunggal maysa. Siak ti nagmula, ni Apolos ti nagsibug, ngem inted ti Dios ti idadakkel; iti kasta uray ti agmula, uray ti agsibug, awan aniaman no di laeng ti Dios a mangted iti idadakkel.”

Siuumiso a binigbig ni Pablo a no rumang-ay dagiti bambanag, ti Dios ti maidaydayaw. Mabalin a ti hardinero ti mangisagana iti daga, agmula, ken mangtaripato a naimbag kadagiti mula, ngem ti nakaskasdaaw a pannakabalin ti Dios ti mangpatubo. (Genesis 1:11, 12, 29) Ngem aniat’ kayat a sawen ni Pablo idi imbagana nga “uray ti agmula, uray ti agsibug, awan aniaman”? (“Saan nga importante no siasino dagiti hardinero a nagmula ken nagsibug,” The New English Bible.) Tagtagibassitenna aya ti paset ti tunggal ministro iti panangaramid kadagiti baro nga adalan, nga ipakpakitana a saan a napateg no kasano ti panangannongtayo iti ministeriotayo?

“Uray ti Agmula, Uray ti Agsibug, Awan Aniaman”

Laglagipenyo nga iti daytoy a paset ti suratna, saan a ti Nakristianuan a ministerio ti salsalaysayen ni Pablo no di ket ti kinamaag ti panangsurot kadagiti tao imbes a ni Jesu-Kristo. Dadduma kadagiti taga-Corinto ti mangitantan-ok kadagiti prominente nga adipen ni Jehova, kas da Pablo ken Apolos. Itantandudo dagiti dadduma ti sektarianismo ken idaydayawda dagiti lallaki a mangipagarup a natantan-okda ngem dagiti Kristiano a kakabsatda.​—1 Corinto 4:6-8; 2 Corinto 11:4, 5, 13.

Saan a nasayaat ti panangidayaw kadagiti tao iti kastoy a wagas. Nailasagan a panagpampanunot dayta, ken mangpataud iti imon ken ringgor. (1 Corinto 3:3, 4) Impakita ni Pablo ti pagbanagan ti kasta a panagpampanunot. Kinunana: “Adda sussusik kadakayo. Kastoy ti kayatko a sawen, a tunggal maysa kadakayo kunana: ‘Siak kaduanak ni Pablo,’ ‘Ngem siak kaduanak ni Apolos,’ ‘Ngem siak kaduanak ni Cefas,’ ‘Ngem siak kaduanak ni Kristo.’”​—1 Corinto 1:11, 12.

No kasta, idi kinunana a “saan nga importante no siasino ti nagmula ken nagsibug” (Phillips), parparmeken ti apostol ti kasta a nailasagan a panagpampanunot, nga ipagpaganetgetna a ni Jesu-Kristo ti rumbeng a matmatan a Pangulo ket ti Dios ti rumbeng a maidaydayaw iti irarang-ay ti kongregasion. Agpapada nga adipen laeng iti kongregasion dagiti apostol ken dagiti dadduma pay a panglakayen. Awan ti rumbeng a maitan-ok ket di rumbeng a sapulenda ti dayaw wenno kinalatak. (1 Corinto 3:18-23) Isu a saan nga importante no siasino ti nagmula ken nagsibug, kinuna ni Pablo, “no maidilig iti daydiay mangted ti biag iti bin-i.”​—1 Corinto 3:7, Phillips.

Dagiti Katulongan ti Dios

Gapuna, iti panangibagana iti daytoy, saan a tagtagibassiten ni apostol Pablo ti pateg ti pasettayo iti panagmula ken panagsibug. Saanna a pinanggep a panunotentayo, “Dios ti mangpadakkelto met laeng kadagiti bambanag iti bukodna a panawen,” satay agdiskanso ken ur-urayen lattan nga isut’ mangaramid iti dayta. Ammona a dakkel ti maitulong ti aramidentayo ken no kasanot’ panangaramidtayo iti dayta iti irarang-ay dagiti bambanag.

Isut’ gapuna a kanayon a pinaregta ni Pablo dagiti Kristiano nga aggaggagetda iti ministerioda ken parang-ayenda ti abilidadda a kas mannursuro. Utobenyo ti impatigmaanna ken ni agtutubo a Timoteo: “Saluadam a kanayon ta bagim ken ti isursurom. Agtalinaedka kadagitoy a bambanag, ta no aramidem daytoy maisalakanmonto ti bagim ken dagiti dumngeg kenka.” (1 Timoteo 4:16) “Sipapasnek nga ibilinko kenka . . . , nga ikasabam ti sao, umagawaka iti dayta . . . , buyogen ti mabayag a panagitured ken ti arte ti panangisuro. . . . Iringpasmo a naan-anay ti ministeriom.” (2 Timoteo 4:1, 2, 5) Awan koma kapapay-an ti panagregget ni Timoteo a mangparang-ay iti abilidadna no awan met laeng maitultulong ti panagmula ken panagsibugna iti idadakkel dagiti bambanag.

Kas kada Pablo ken Apolos, mabalinyo met ti maaddaan iti naindaklan a pribilehio nga agserbi a kas maysa kadagiti katulongan ti Dios. (1 Corinto 3:9; 2 Corinto 4:1; 1 Timoteo 1:12) Kinapudnona, napateg ti pasetyo. Saan a mangnamnama lattan ti hardinero iti Dios a simimilagro a mangpataud iti napintas a hardin nga awan panagregget iti biang ti hardinero. Saan aya a kasta met koma iti naespirituan nga idadakkel? Ay ket wen. No kasano a siaanus nga “ur-urayen [ti mannalon] ti napateg a bunga ti daga,” kasta met a masapul nga igaedtayo nga umuna ti agmula ken agsibug, nga aguraytayo bayat a padpadakkelen ti Dios ti mula.​—Santiago 1:22; 2:26; 5:7.

Aramidenyo ti Pasetyo

Yantangay kinuna ni apostol Pablo a “tunggal maysa awatennanto ti gunggonana sigun iti aramidna met laeng,” nasayaat a saludsodantayo ti bagitayo no kasano ti panagtartrabahotayo.​—1 Corinto 3:8.

Kunaen ti maysa a nalaing a hardinero a ni Geoffrey Smith: “Saan a kasapulan ti naisangsangayan a saguday iti panagbalin a hardinero, no di laeng ti interes kadagiti mula.” (Shrubs & Small Trees) Kasta met, saan a kasapulan ti nakaisigudan a naisangsangayan a saguday iti panagbalin a katulongan ti Dios, no di laeng ti napaypayso nga interes kadagiti tao ken ti panagbalin a sidadaan a pausar iti Dios.​—2 Corinto 2:16, 17; 3:4-6; Filipos 2:13.

Usigenyo dagiti nasayaat a balakad dagiti nalaing a hardinero. Kinuna ti maysa a hardinero a no sidadaan ti agdadamo a hardinero a dumngeg kadagidiay aduan kapadasan, “nadaras nga agbalin nga eksperto.” Ken kinunana pay a “kanayon nga agbirbiruk ti eksperto iti baro a banag a masursurona.” (The Encyclopedia of Gardening) Sidadaankayo aya nga umawat iti tulong nga ipapaay ni Jehova iti kasta agbalin nga epektibo ti panagmula ken panagsibugyo? No kasta, agdadamokay man iti trabaho wenno aduanen iti kapadasan, mapasayaatyo pay ti abilidadyo a kas katulongan ti Dios ket iti kasta agbalinkayto a “makabalin a mangisuro kadagiti sabsabali.”​—2 Timoteo 2:2.

No sidadaan a dumngeg ken agsursuro, kuna ni Geoffrey Smith, “maliklikan ti agdadamo dagiti dakkel a biddut.” No ipangagtayo ti direksion ni Jehova babaen ti Sao ken ti organisasionna, aramidentayo dagiti bambanag sigun iti wagasna. Iti kasta maliklikantayo, kas pangarigan, dagiti biddut a kas ti minamaag a pannakisuppiat kadagidiay makisupsuppiat laeng ti panggepda.​—Proverbio 17:14; Colosas 4:6; 2 Timoteo 2:23-26.

Ti sabali pay a nasayaat a balakad iti nasayaat a panaghardin isu ti panangpanunot a naimbag kadagiti bambanag sakbay nga agdarasudos a mangkali iti daga. “Sakbay nga irugim ti agkali,” kuna ti The Encyclopedia of Gardening, “panunotem pay a naimbag [ti kayatmo a maaramid].” Agdardarasudoskay aya iti Nakristianuan a ministerio a diyo man la panunoten a naimbag nga umuna no aniat’ kayatyo a maaramid ken no kasanot’ kasayaatan a panangaramidyo iti dayta? Siertuenyo nga umuna ti panggepyo sakbay a mangrugikayo. Panunotenyo, kas pangarigan, no ania a kita ti tattao ti mabalin a masabetyo wenno dagiti problema a mabalin a maipasango kadakayo, ken nakasaganakay koma a mangtaming kadagitoy. Iti kasta ‘magun-odyonto dagiti ad-adu [bayat nga] agbalinkayo nga isuamin kadagiti isuamin a kita ti tattao.”​—1 Corinto 9:19-23.

“Dika Pagsardengen ta Imam”

No apresiarentayo ti pribilehio nga agserbi a kas katulongan ti Dios, ditay kedngan ti pasettayo iti trabaho. “Iti bigat imulam ti bin-im ket iti rumabii dika pagsardengen ta imam; ta dika ammo nga agrang-ayto, no daytoy wenno daydiay, wenno isuda nga agpadpada naimbagdanto.” (Eclesiastes 11:6) Adda iti ima ni Jehova dagiti resulta, ngem awan ti apitentayo no ditay gagetan ti agmula.​—Eclesiastes 11:4.

Awan ti hardin a pimmintas babaen ti sinsinan a panagkali ken panangimula kadagiti bin-i. Kasta met, saan laeng a ti paspasaray a pannakiraman iti panangiwaras kadagiti literatura ti Biblia ti kasapulan iti ministerio. Kas katulongan ti Dios, nasken a siaanep ken naan-anay nga iwaragawagtayo ti naimbag a damag maipapan iti Pagarian ti Dios, a birukentayo dagidiay maikari. (Aramid 13:48) Laglagipenyo ti kinuna ni apostol Pablo idiay 2 Corinto 9:6: “Ti agmula a siiimut aganinto met a siiimut; ket ti agmula iti nawadwad aganinto met iti nawadwad.”

Kas kadagiti amin a nalaing a hardinero, pilientayo a pagmulaan ti nadam-eg a daga. Nupay kasta, no naimulatayon ti bin-i uray iti kadam-egan a daga, saan nga agingga la ditan. Kunaen ni Geoffrey Smith: “Saan a kayat a sawen daytoy a no nalpaskan a nagmula awanen ti inka aramiden.” Wen, tapno dumakkel ti mula, nasken a nagagetkayo a mangsibsibug ken mangtartaripato iti mula.​—Idiligyo ti Proverbio 6:10, 11.

Kinapudnona, ti Nakristianuan a ministerio mabalin a sapulenna ti mabayag a panagan-anus no kasla saan a rumangrang-ay dagiti bambanag. Ngem mabalin a kellaat, no dadduma di ninamnama, a nasayaat ti ibungana. Kunaen ni Geoffrey Smith: “Ti panaghardin ket buklen ti adu a panawen a panagtartrabaho a mabaetbaetan kadagiti kanito ti pannakaay-ayo ta malipatam amin a bannogmo a nangkalkali ken nangparparut iti ruot.” Maragsakankayo met iti kasta unay no ipangag ti natulnog a puso ti mensahe ti kinapudno​—no la ket ta nagagetkayo nga agkali, agmula, agparut iti ruot, ken agsibug.​—Idiligyo ti Proverbio 20:4.

Ammo da Pablo ken Apolos a saan a ti trabahoda a panangaskasaba ti Pagarian ti namagbalin kadakuada a prominente iti kongregasion Kristiano. Sipapanunotda a ti Dios ti mangpadakkel kadagiti bambanag. Ngem siaanep a nagmula ken nagsibugda. Sapay koma ta tuladentayo ti ulidanda ken ipaaytayo ti bagitayo iti Dios a kas ‘ministro a babaen kadatayo [agbalin dagiti sabsabali] a manamati.’​—1 Corinto 3:5, 6.

[Ladawan iti panid 23]

Ti Dios ti mangpadakkel kadagiti bambanag​—ngem aramiden met ti hardinero ti pasetna