Ti Kaiyulogan Dagiti Damdamag
Bukbukon a Maipaay ken Kristo?
“Dagiti Bukbukon iti Ebanghelio a Managpabuya” isu ti paulo a nagparang iti Church Times, maysa a pagiwarnak iti Church of England. Daytat’ mangiwarwaragawag iti ibibisita iti Church Army Roadshow kadagiti napili a pagbakasionan iti igid ti baybay idiay Inglatera ken Wales. Naibangon iti nasurok laeng a sangagasut a tawtawen a nalpalabas kas maysa a sanga iti Church Army ti agebanghelio “kadagiti pugante ken dagiti kriminal iti luglugar a napanglaw iti Westminster.”
Itatta, dagiti papangulo iti Church of England, ti Church Army maseknanda pay laeng a ti “ebanghelismo masapul a maikkan koma iti umiso a lugarna.” Ti Pabuyada panggepna ti panangiparang iti ebanghelio iti “nakakatkatawa a pamay-an kadagiti tattao a bassit laeng ti kapadasanda iti Dios, ken dagidiay a di mangar-arapaap iti ipapanda iti maysa nga okasion a maaramid iti simbaan wenno iti pasilio iti simbaan.” Dagiti nakawesan a “Bukbukon iti Ebanghelio” iti pabuya inanamaenda a “ti naidedikar a panangal-alliogda ti mabalin a mangpasardeng kadagiti aglabas ket dumngeg iti apagkanito,” kuna ti Church Times.
Nupay kasta, nupay no ti kawesda a pagpabuya, ti panagpabuyada, ken dagiti libre a baloon ti nangawis kadagiti adu nga ubbing, dagiti nataengan ti agsidsiddaaw no ania ti pakainaigan daytoy a pamay-an iti ebanghelismo nga inrugi ni Jesu-Kristo.
Pudno, nagsurat ni apostol Pablo: “Ta naaramidkami a buyaen ti lubong. . . Nanengnengkami gapu ken Kristo.” (1 Corinto 4:9, 10) Ngem ania ti adda iti panunotna? Ti panagbukbukon wenno “panangal-alliog” kadagiti aglabas? Saan. Iyil-ilustrar ni Pablo no kasano ti panangibilang ti lubong kadagiti Kristiano a nakuneng, “a naisarangda iti pananglalais ken pannakaibabain,” kas kuna ti The New International Dictionary of New Testament Theology, gapu iti pammati ken sursuroda.
Maisupadi iti “Bukbukon iti Ebanghelio” ti Church Army, ni Jesus nangisuro kadagiti bunggoy “kas tao nga addaan iti autoridad.” Ti ministeriona ket prangka ken awanan kadagiti panangal-alliog. Kas inlawlawagna, “Kas iti insuro kaniak ni Ama, dagitoy ti sawek.” Ania ti resulta? “Adu ti namati kenkuana.”—Mateo 7:29; Juan 8:28, 30.
“Dadagsen iti Konsiensia”
Ni Eugene Stockwell, direktor iti Commission on World Mission and Evangelism of the World Council of Churches, nabiit pay nga inaminna iti kinamanaginsisingpet ti klero ken dagiti ig-iglesia iti Kakristianuan bayat dagiti dua a gubat sangalubongan. “Dayta ket maysa a dadagsen iti konsiensia para kadagiti Kristiano a ti dua a kangrunaan a gubat sangalubongan iti daytoy a siglo ti bimtak kadagiti nasnasion a nabayagen nga addaan kadagiti tradision iti Kinakristiano iti tengngada ken isu a dagiti namilitaran nga irarautda ti masansan a bembendisionan dagiti papangulo iti Kristiano nga ig-iglesia,” kinunana iti maysa nga ekumenikal a panagtitipon idiay Warsaw, Poland.
Kinuna pay ni Stockwell: “Sipapasnek a naiwaragawag a ti Dios ti adda iti maysa a dasig iti panagdangadang wenno iti sabali. . . . Nakalaklaka a datayo a Kristiano ikabiltayo ti pammatitayo iti panagserbi iti kinaranggas.” Imbagana a ti Gubat Sangalubongan II ket “maysa a dakkel unay a pammaneknek iti ditay panagballigi kas ‘Kristiano a nasnasion’ nga agbiag a maitunos iti pammatitayo, maysa a pammati a masansan a maiyebkas iti sasao ket nakalawlawag a mailibak kadagiti panagtignay.”
Ngem daytoy kadi a “nadagsen a dadagsen iti konsiensia” natulonganna dagiti makunkuna a Kristiano ken dagiti kleroda tapno makasuroda iti leksion? Sigun iti Ecumenical Press Service, ni Direktor Stockwell impudnona: “Saritaentayo ti panangayattayo kadagiti kabusortayo, ket papatayentayo ida. Saritaentayo ti panangiparang iti bangir a pingping, ket kabalantayo iti kasta unay dagiti bagbagitayo. Saritaentayo ti talna isu a mangiyallatiw iti pannakaawat. Saritaentayo iti pammati iti Dios ket ikabiltayo ti pudno a pammatitayo kadagiti armas iti panangdadael.”
Dagiti manangsuportar iti gubat a klero ti Kakristianuan ken dagiti paspasurotda nalawag a kaaspingda dagiti “awan ti mamaayna a mannanao” kadagiti kaaldawan ni apostol Pablo. Maipapan kadakuada, kinunana: “Ipaduyakyakda nga ammoda ti Dios, ngem gapu kadagiti ar-aramidda tallikudanda.”—Tito 1:10, 16.
“Di Makaay-ayo” a Selio
Idi Nobiembre 19, 1987, implano ti South African Postal Administration ti mangiruar iti uppat a pakalaglagipan a selio iti Biblia. Maysa kadagiti selio ti naglaon kadagiti ebkas a “Ti Sao ti Dios” iti Griego ken “Ti Sao ni Jehova” iti Hebreo. Adda ti nakagupgopan a naimaldit a 1,750,000 a kopia daytoy a selio.
Nupay kasta, di nagbayag sakbay ti petsa ti pannakairuarna, dagiti opisina iti koreo ti nakaawat kadagiti telegrama a mangibilbilin kadakuada nga isublida ti suplayda iti daytoy a selio. Ti rason? “Agsipud ta nasarakan a di makaay-ayo kadagiti kadawyan a komunidad dagiti Judio,” kuna ti The Star, maysa a pagiwarnak iti Johannesburg. Kinunana pay: “Ni Rabbi David Hazdan iti Johannesburg kinunana a ti nagan ti Dios a naimaldit nga interamente iti selio ket gagangay a naireserba a maipaay kadagiti naisangsangayan a narelihiusuan nga okasion laeng.”
Gapu met laeng iti umasping a tradision a Judio nga adu a moderno a manangipatarus iti Biblia ti nangliklik iti panangusar iti nagan a Jehova ket sinukatanda dayta kadagiti basta titulo, kas iti “Apo” wenno “Dios.” Di ngarud pagduaduaan a kinuna ni Jesus kadagiti relihiuso a papangulo idi kaaldawanna: “Pinukawyo ti kapapayan ti sao ti Dios gapu kadagiti kadawyanyo”!—Mateo 15:6.