Ti Panangmatmat ti Biblia

No Apay a Naayat nga Urnos ti Panangilaksid

EKSKOMUNIKASION​—ti mismo a kapanunotan a manggutugot iti agkakanat a rikna iti adu a relihioso a tattao.a Umanamong ti kaaduan a tattao a kasapulan dagiti relihion ti sumagmamano a kita ti disiplina. Ngem adu ti mangmatmat iti ekskomunikasion kas nagkupasen a kustombre ti napalabas​—naulpit a disiplina a mangipalagip kadakuada iti panangtiliw kadagiti mangkukulam ken inkisision.

Ti mangdegdeg iti problema isut’ nasaknap nga impluensia ti sekular a lubong. Isu a kaaduan a relihion iti Kakristianuan ti nangtulad iti napanuynoy a panangmatmat iti basol. Isu met la gayam a kinuna ti maysa a ministro ti Episcopal: “Paset iti tradisionmi ti panangilaksid, ngem diak patien a maipatpatungpal iti daytoy a siglo.”

Nupay kasta, mabalin a masdaaw ti adu a kadagiti Saksi ni Jehova, saan a matagtagilag-an ti panangilaksid (ti katupag ti ekskomunikasion). Talaga a saan a nalaka nga aramiden, ngem naayat nga urnos. Kasano a kasta?

Itandudona ti Nagan ti Dios

Nasantuan a Dios ni Jehova. Saanna a panuynoyan ti inggagara a panagbasol dagidiay agkunkuna nga agdaydayaw kenkuana. Insurat ni apostol Pedro kadagiti Kristiano: “Agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Agbalinkayo a nasantuan, agsipud ta nasantuanak.’” (1 Pedro 1:15, 16) Isu a mangitandudo iti nasantuan a nagan ti Dios ti panangilaksid kadagiti di agbabbabawi a managbasol; ipakitana ti panagayat iti dayta a nagan.​—Idiligyo ti Hebreo 6:10.

Kaipapanan kadi daytoy a no tumulok ti maysa a Kristiano iti pagkapuyan wenno maitibkol iti nadagsen a basol, dagus a mailaksiden iti kongregasion? Saan met ketdi! Saan a diktador a di mangikabkabilangan ni Jehova. Naasi ken mannakaawat. Malagipna nga imperpektotayo. (Salmo 103:14) Bigbigen ni Jehova nga “amin nagbasol ken agkurang iti dayag ti Dios.” (Roma 3:23) Inyurnos ti Dios ti naespirituan a tulong iti uneg ti kongregasion tapno ti maysa a Kristiano a nakaaramid iti “kamali nga addang” wenno uray pay nakaaramid iti nadagsen a basol, mabalin a siaayat a ‘maatur’ iti espiritu ti kinaalumamay. (Galacia 6:1) Babaen ti panangawatna iti balakad ti Sao ti Dios ken panangipakita iti naimpusuan a panagladingit ken pudno a panagbabawi, mabalin a ‘maimbagan’ iti naespirituan ti maysa a naisiasi iti dana ti kinalinteg.​—Santiago 5:13-16.

Ngem kasano ngay no nagbasol iti nadagsen ti maysa a bautisado a Kristiano ket mapaay amin a panagregget a mangpaimbag kenkuana? Iti sabali a pannao, kasano ngay no sisusukir a pagkedkedanna nga aturen ti managbasol a kursona?

Taginayonenna a Natalged ti Kongregasion

Ibilin ti Biblia kadagiti Kristiano: “Isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti didiosen wenno manangrabngis wenno managbarbartek wenno manangkikil, saan uray makipangan iti kasta a tao.”​—1 Corinto 5:11.

Naulpit ken mangumsi kadi daytoy a linteg ti Biblia? Usigenyo man daytoy: No maibalud ti maysa a napeklan a kriminal gapu iti pananglabsingna iti linteg, maibilang kadi dayta a naulpit wenno awan panangikabilanganna? Saan, agsipud ta adda kalintegan ti publiko a mangigaga iti talna ken talged ti komunidad. Pagbanaganna, mailaksid ti kriminal manipud iti managtulnog-linteg a kagimongan kabayatan ti pannakaibaludna.

Umasping iti dayta, umiso ti kongregasion Kristiano iti panangilaksidna kadagiti di agbabbabawi a managbasol iti nagtetengngaanda. Apay? Agsipud ta masapul nga agbalin a natalged a lugar ti kongregasion nga awanan kadagiti imoral a tattao ken dadduma a sipapakinakem a managbasol.

Iti panangbigbigna a “ti maysa a managbasol dadaelenna ti adu nga imbag,” imbilin ni apostol Pablo kadagiti padana a manamati: “Ikkatenyo ti nadangkes a tao manipud iti tengngayo.” (Eclesiastes 9:18; 1 Corinto 5:13) Lapdan daytoy nga aksion ti managbasol iti panangisaknapna iti panangmulitna iti kongregasion, ket salaknibanna ti naimbag a nagan ti kongregasion.​—Idiligyo ti 1 Timoteo 3:15.

Salaknib iti Tattao

Kasta met a salakniban ti panangilaksid dagiti indibidual a kameng ti kongregasion. Iyilustrartayo: Darepdepenyo a naalimpungatankayo iti turog gapu iti napigsa a busina wenno alarma ti kotse. Narigat a baybay-an lattan ti makasisileng nga uni; kinapudnona, kigtotennakayo! Kasta met laeng a no mailaksid ti maysa a tao iti kongregasion, ti aksion ti mangabbukay iti atension ti tunggal kameng ti arban. Riribukenna ti riknada. Saan a mabalin a baybay-an lattan. Kasano a salaknib daytoy?

“Idi damo a nangngegko idiay Kingdom Hall nga adda nailaksid, naklaatak a dagus,” kuna ti maysa a Saksi. “Kalpasanna pinagpakumbabanak. Impaamirisna nga uray siak ti mabalin met a maikulbo.” Kas ipamatmat ti sasaona, ti panangilaksid ti mabalin a mangtignay iti dadduma a mangamiris iti konduktada.​—1 Corinto 10:12.

Babaen ti panangimtuodtay iti bagitayo kadagiti saludsod a kas iti ‘Adda kadi aniaman a benneg iti biagko a nakapuyak iti naespirituan?’ matulongantayo a mangusig iti mismo a takdertayo iti Dios. Iti kastoy a pamay-an, maitultuloytayo nga ‘itrabaho ti bukodtayo a pannakaisalakan buyogen ti buteng ken panagpigerger.’​—Filipos 2:12.

Panagsubli iti Dios

“Nupay nagrigat,” kinuna ti maysa a Kristiano a nailaksid idi, “maiparbeng ken kasapulan unay idi ti pannakadisiplina, ket napaneknekan a makaispal-biag.” Daytoy ti mangitampok iti sabali pay nga aspeto ti panangilaksid. Matignayna dagiti di agbabbabawi idi a managbasol a mangaramid iti umuna nga addangda nga agsubli iti Dios.

Kinuna ni apostol Pablo: “Ti ayaten ni Jehova disiplinaenna.” (Hebreo 12:6) Ket nupay agpayso nga “awan ti disiplina a kasla makaparag-o iti agdama, no di ket makapaladingit; ngem kalpasanna kadagidiay a nasanayen iti dayta ipaayna ti natalna a bunga, nga isu ti, kinalinteg.”​—Hebreo 12:11.

Daytat’ napasamak ken Richard. Kalpasan ti pannakailaksidna iti gistay dua a tawen, nagbabawi, inaturna ti mangibabain-Dios a konduktana, ket naisubli manen iti kongregasion Kristiano. No lagipenna, kunana maipapan iti kapadasanna: “Maamirisko a kasapulan a mailaksidak idi ket maikariak idi a mailaksid. Talaga a kasapulan daydi ket natulonganak a mangtarus no kasano kadagsen ti naaramidak ken kasapulan a kiddawek ti pammakawan ni Jehova.”

Mabalin a narigat nga ibturan ti disiplina. Ti panangawat ti dayta kalikagumanna ti kinapakumbaba, ngem agapitto iti naruay a bunga dagidiay nga agnakem iti dayta.

Gapuna, maysa a naayat nga urnos ti panangilaksid agsipud ta itandudona iti nasantuan a nagan ti Dios ken salaknibanna ti kongregasion manipud iti makadadael nga impluensia ti basol. Kasta met nga ipakitana ti ayat iti nakabasol babaen ti panangiparegta kenkuana nga agbabawi ken ‘agbaw-ing tapno mapunas dagiti basol[na], tapno dagiti panawen ti pannakabang-ar umayda manipud iti persona ni Jehova.’​—Aramid 3:19.

[Footnote]

[Picture Credit Line iti panid 26]

The New Testament: A Pictorial Archive from Nineteenth-Century Sources, ni Don Rice/Dover Publications, Inc.