Ti Sao ni Jehova Nabiag

Dagiti Tampok iti Surat Kadagiti Taga-Corinto

MASEKNAN unay ni apostol Pablo iti espiritualidad ti kongregasion idiay Corinto. Nadamagna nga adda di pagkikinnaawatan dagiti kakabsat sadiay. Mapampanuynoyan ti imoralidad. Nagsurat met ti kongregasion ken Pablo, nga agdamdamagda maipapan iti sumagmamano a banag. Isu nga idi agarup 55 K.P., idi adda ni Pablo idiay Efeso, bayat ti maikatlo a panagdaliasatna kas misionero, insuratna ti umuna kadagiti dua a suratna kadagiti taga-Corinto.

Ti maikadua a surat, a nalawag a nailanad sumagmamano laeng a bulan kalpasan ti immuna, ket tuloy ti immuna a suratna. Tangay dagiti kasasaad iti uneg ken ruar ti kongregasion ti Corinto idi umuna a siglo ket umasping iti adu a pamay-an iti kaaldawantayo, nakapatpateg kadatayo ti mensahe dagiti surat ni Pablo kadagiti taga-Corinto.​—Heb. 4:12.

‘AGTALINAEDKAYO A SIRIRIING, AGTAKDERKAYO A SITITIBKER, BUMILEGKAYO’

(1 Cor. 1:1–16:24)

“Rebbeng nga agsaokayo amin a sangsangkatunos,” imbalakad ni Pablo. (1 Cor. 1:10) Ngamin, ‘awan ti sabali a pamuon’ a nakaibangonan dagiti Nakristianuan a galad no di ni Jesu-Kristo. (1 Cor. 3:11-13) Maipapan iti maysa a mannakiabig iti kongregasion, kinuna ni Pablo: “Ikkatenyo ti nadangkes a tao iti tengngayo.” (1 Cor. 5:13) “Ti bagi saan a maipaay iti pannakiabig,” kinunana, “no di ket maipaay iti Apo.”​—1 Cor. 6:13.

Kas sungbat ‘kadagiti bambanag nga insuratda,’ nangipaay ni Pablo iti nainsiriban a balakad maipapan iti panagasawa ken panagbalin a di naasawaan. (1 Cor. 7:1) Kalpasan ti komentona maipapan iti Nakristianuan a kinaulo, kinaurnos dagiti Nakristianuan a gimong, ken ti kinasigurado ti panagungar, namagbaga ni Pablo: “Agtalinaedkayo a siririing, agtakderkayo a sititibker iti pammati, agtalinaedkayo a malalaki, bumilegkayo.”​—1 Cor. 16:13.

Sungbat Kadagiti Nainkasuratan a Saludsod:

1:21​—Talaga kadi nga inusar ni Jehova ti “kinamaag” tapno maisalakanna dagidiay manamati? Saan. Nupay kasta, tangay “ti lubong babaen ti siribna saanna a naammuan ti Dios,” ti us-usarenna a mangisalakan kadagiti tattao ket agparang a kinamaag iti lubong.​—Juan 17:25.

5:5​—Ania ti kaipapanan ti ‘panangyawat iti nadangkes a tao kenni Satanas maipaay iti pannakadadael ti lasag, tapno ti espiritu maisalakan koma’? No mailaksid iti kongregasion ti awan panagbabawina a managbasol, isu ket agbalin manen a paset ti nadangkes a lubong ni Satanas. (1 Juan 5:19) Iti kasta, makuna a nayawat kenni Satanas. Ti pannakailaksidna ket agresulta iti pannakadadael, wenno pannakaikkat ti dakes nga impluensiana iti kongregasion ken ti pannakataginayon ti espiritu, wenno nadalus a kasasaad ti kongregasion.​—2 Tim. 4:22.

7:33, 34​—Ania ti kaipapanan dagiti “bambanag ti lubong” a pakakumikoman ti naasawaan a lalaki wenno babai? Ni Pablo tuktukoyenna dagiti bambanag mainaig iti inaldaw a panagbiag a pakaseknan dagiti naasawaan a Kristiano. Ramanenna ti taraon, kawes, ken pagtaengan, ngem dina iraman dagiti dakes a bambanag iti daytoy a lubong a likliklikan dagiti Kristiano.​—1 Juan 2:15-17.

11:26​—Kasano ‘kasansan’ a marambakan ti ipapatay ni Jesus, ken “agingga” iti kaano? Saan nga ibagbaga ni Pablo a masansan a marambakan ti ipapatay ni Jesus. Ti Griego a sao a nausar a “masansan” kaipapananna ti “kada” wenno “tunggal.” No kasta, ibagbaga ni Pablo a tunggal makiraman dagiti napulotan a Kristiano kadagiti emblema iti Memorial, maminsan iti makatawen, iti Nisan 14, ‘iwarwaragawagda ti ipapatay ti Apo.’ Aramidenda daytoy “agingga iti idadatengna,” kayatna a sawen, agingga nga awatenna ida idiay langit babaen ti panagungar.​—1 Tes. 4:14-17.

13:13​—Iti ania a pamay-an a ti ayat dakdakkel ngem iti pammati ken namnama? No natungpalen dagiti “bambanag nga in-inanamaen” ken napasamaken “ti sigurado a panangsegsegga” kadagita, agpatinggan ti pammati ken namnama. (Heb. 11:1) Dakdakkel ti ayat ngem iti pammati ken namnama ta agtalinaed dayta iti agnanayon.

15:29​—Ania ti kayat a sawen ti “mababautisaran maipaay iti panggep a panagbalin a natnatay”? Saan nga ibagbaga ditoy ni Pablo a masapul a mabautisaran dagiti sibibiag maigapu kadagiti natayen a di nabautisaran. Sarsaritaen ditoy ni Pablo ti pannakaitaneb dagiti Kristiano a napulotan iti espiritu tapno agbiagda a natarnaw agingga iti ipapatayda ken sarunuen ti pannakapagungarda iti naespirituan a biag.

Dagiti Masursurotayo:

1:26-31; 3:3-9; 4:7. Mataginayon ti panagkaykaysa iti kongregasion no sipapakumbaba nga ipannakkeltayo ni Jehova, saan a ti bagitayo.

2:3-5. Bayat ti panangasabana idiay Corinto a sentro ti Griego a pilosopia ken panagadal, mabalin a pampanunoten ni Pablo no kabaelanna a kombinsiren dagiti dumngeg kenkuana. Nupay kasta, dina impalubos ti aniaman a pagkapuyan wenno panagbuteng a manglapped kenkuana a mangitungpal iti ministerio nga intalek ti Dios. Kasta met, ditay koma ipalubos a ti aniaman a narigat a kasasaad ti manglapped kadatayo a mangiwaragawag iti naimbag a damag ti Pagarian ti Dios. Agtalektayo a tulongannatayo ni Jehova kas ken Pablo.

2:16. Tapno maadda kadatayo ti “panunot ni Kristo,” nasken nga ammuen ken tuladentayo ti panagpampanunotna, adalentayo ti personalidadna, ken tuladentayo ti ulidanna. (1 Ped. 2:21; 4:1) Anian a nagpateg nga adalentayo a naimbag ti kabibiag ken ministerio ni Jesus!

3:10-15; 4:17. Masapul a tingitingen ken pasayaatentayo ti abilidadtayo a mangisuro ken mangaramid kadagiti adalan. (Mat. 28:19, 20) No saan a nasayaat ti panangisurotayo, mabalin a saan a mapagballigian ti iyad-adalantayo dagiti suot ti pammati ket agsagabatayo iti nakaro a saem gapu iti pannakapukawna. Iti kasta, ti pannakaisalakantayo “kaslanto babaen ti apuy.”

6:18. Tapno ‘maadaywan ti pannakiabig,’ rumbeng a liklikan saan laeng a dagiti aramid a maibilang a por·neiʹa no di ket ti pornograpia, moral a kinarugit, panangdardarepdep iti imoralidad, panagalembong​—aniaman nga aramid nga agturong iti pannakiabig.​—Mat. 5:28; Sant. 3:17.

7:29. Rumbeng nga agannad dagiti naasawaan di la ket ta agbalin laengen a maikadua ti interes ti Pagarian iti biagda gapu iti nalabes a pannakaseknanda iti asawada.

10:8-11. Nasaktan unay ni Jehova idi nagtanabutob ti Israel maibusor kada Moises ken Aaron. Masiribtayo no liklikantayo ti agtanabutob.

16:2. No agplanotayo a nasaksakbay, regular a makaitedtayo iti pinansial a kontribusion tapno mayadelantar dagiti interes ti Pagarian.

‘ITULTULOYYO TI AGPAATUR’

(2 Cor. 1:1–13:14)

Ibagbaga ni Pablo kadagiti taga-Corinto a ‘siaasi a pakawanen ken liwliwaenda’ ti agbabbabawi a managbasol a natubngar. Nupay nagladingitda gapu iti immuna a suratna kadakuada, agrag-o ni Pablo agsipud ta ‘naglidayda nga agturong iti panagbabawi.’​—2 Cor. 2:6, 7; 7:8, 9.

‘No kasano nga aglaplapusananda iti amin a banag,’ pinaregta ni Pablo dagiti taga-Corinto nga agbalinda koma nga ‘aglaplapusanan iti panangted.’ Kalpasan a sinungbatanna dagiti bumusbusor, impaayna ti maudi a balakadna kadakuada amin: “Itultuloyyo ti agrag-o, maatur, maliwliwa, agpanunot a sangsangkatunos, agbiag a sitatalna.”​—2 Cor. 8:7; 13:11.

Sungbat Kadagiti Nainkasuratan a Saludsod:

2:15, 16​—Kasano a “nabanglotayo a sayamusom ni Kristo”? Ti makagapu ket tungtungpalentayo ti ibagbaga ti Biblia ken ikaskasabatayo ti mensahena. Nupay ti kasta a “banglo” ket mabalin a makarimon kadagiti nakillo, nabanglo dayta a sayamusom kenni Jehova ken kadagiti nasingpet a tattao.

5:16​—Kasano a dagiti napulotan a Kristiano ‘awan ti ammoda a tao sigun iti lasag’? Saan a nainlasagan ti panangmatmatda kadagiti tattao, kayatna a sawen, saanda a matmatan dagiti tattao maibatay iti kinabaknang, puli, wenno pagilian a naggapuanda. Ti napateg kadakuada ket ti naespirituan a relasionda kadagiti kapammatianda.

11:1, 16; 12:11​—Nagbalin kadi ni Pablo a di nainkalintegan kadagiti taga-Corinto? Saan. Ngem nalabit agparang a kasla napasindayag ken di nainkalintegan kadagiti dadduma gapu iti imbagana kas panangidepensana iti kinaapostolna.

12:1-4​—Asino ti “narabsut a naipan idiay paraiso”? Tangay awan ti ibaga ti Biblia a sabali a tao nga addaan iti kasta a sirmata ken sinaruno dagita a sasao ti panangidepensa ni Pablo iti kinaapostolna, nalabit a tuktukoyen ni Pablo ti bukodna a kapadasan. Ti nasirmata ti apostol ket mabalin a ti naespirituan a paraiso a tagtagiragsaken ti kongregasion Kristiano iti “tiempo ti panungpalan.”​—Dan. 12:4.

Dagiti Masursurotayo:

3:5. No an-anagen, ibagbaga kadatayo daytoy a bersikulo a ni Jehova pagbalinenna dagiti Kristiano a naan-anay a kualipikado agpaay iti ministerio babaen ti Saona, ti nasantuan nga espirituna, ken ti naindagaan a paset ti organisasionna. (Juan 16:7; 2 Tim. 3:16, 17) Nasayaat no adalentayo a naimbag ti Biblia ken dagiti publikasion a naibatay iti Biblia, agtultuloy nga ikararagtayo ti nasantuan nga espiritu, ken kanayon a tumabuno ken makipaset kadagiti Nakristianuan a gimong.​—Sal. 1:1-3; Luc. 11:10-13; Heb. 10:24, 25.

4:16. Tangay pabpabaruen ni Jehova ‘ti kinataotayo iti uneg iti inaldaw-aldaw,’ kanayon koma a gundawayantayo dagiti probision ni Jehova, a saantay a palabsen ti maysa nga aldaw a di mangutob kadagiti naespirituan a probisionna.

4:17, 18. No laglagipentayo a “ti rigat ket apagkanito ken nalag-an,” matulongantayo nga agtalinaed a matalek ken Jehova bayat ti rigat.

5:1-5. Nagsayaat ti panangyebkas ni Pablo iti rikrikna dagiti napulotan a Kristiano maipapan iti namnamada a nailangitan a biag!

10:13. Kas pagannurotan, mangasabatayo koma laeng iti teritoria a naituding iti kongregasiontayo, malaksid no adda espesipiko nga urnos a naituding kadatayo tapno tumulong iti lugar a dakdakkel ti pakasapulan.

13:5. Tapno ‘suboken no addatayo iti pammati,’ masapul a siguraduentayo a ti kababalintayo ket maitunos iti naammuantayo manipud iti Biblia. Tapno ‘mapaneknekan no aniatayo,’ masapul a tingitingentayo ti espiritualidadtayo, agraman ti ‘pannakabalin ti pannakaawattayo’ ken ti kaadu ti aramidtayo a mangipakita iti pammatitayo iti Dios. (Heb. 5:14; Sant. 1:22-25) No iyaplikartayo ti nagsayaat a balakad ni Pablo, makapagtultuloytayo a magna iti dalan ti kinapudno.

[Ladawan iti panid 26, 27]

Ania ti kaipapanan dagiti sasao a “no masansan a kanenyo daytoy a tinapay ken uminumkayo itoy a kopa”?​—1 Cor. 11:26