PANAGKUSIT, PANAGSAUR

Ti inggagara a panangallilaw, panangsikap, wenno panangballikug iti kinapudno tapno maallukoy nga ited ti sabali a tao ti maysa a napateg a banag wenno tapno idianna ti maysa a legal a kalintegan. Ti Hebreo a termino a naipatarus a “sauren” (ʽa·shaqʹ; Le 6:2) gagangay a kaipapananna ti di umiso a panangaramat ti maysa a tao iti pigsa, pannakabalin, wenno autoridadna maibusor iti sabsabali. Ngarud naipatarus met nga “irurumen.” (Ec 4:1; Isa 52:4) Ti Griego a berbo nga a·po·ste·reʹo kaipapananna ti “paidaman; sauren.” (1Co 7:5; Mr 10:19) Ti Griego a nombre a doʹlos (“kinasaur”; Ara 13:10) naipatarus met nga “allilaw.”​—Mr 7:22.

Ti panangaramat ti Biblia iti panagkusit ket kaaduanna a nainaig iti ar-aramid ti negosio. Iparit ti linteg ti Dios dagiti nakusit nga ar-aramid ti negosio. Rumbeng idi a napudno dagiti Israelita iti maysa ken maysa. Ti matangtangdanan a trabahador ket espesipiko a sinalakniban ti Linteg. (Le 19:13; De 24:14; idiligyo ti San 5:4.) Ti pammilin maibusor iti panagkusit ket inraman ni Jesu-Kristo kadagiti “bilin” ti Dios. (Mr 10:19) Iti sidong ti Linteg ti tulag, no ti maysa a tao sinaurna ti kaduana ngem nagbabawi kamaudiananna ken impudnona dayta a banag, nakalikaguman nga isublina ti intero a gatad a sinaurna agraman ti kakalima dayta maipaay iti tao a linukona, kasta met a mangipaay ken Jehova iti daton gapu iti babak.​—Le 6:1-7.

Iti Kasuratan, naibilang met a nakusit dagiti ulbod a porma ti relihion. Ti nadagsen a panangkondenar ni Pablo iti mangkukulam a ni Elimas ket nagbanag iti pannakabulsek daytoy gapu iti kinasaurna ken nadangkok nga ar-aramidna iti ‘panangkillona kadagiti nalinteg a dalan ni Jehova.’ (Ara 13:8-11) Inlinteg met ni Pablo dagiti Kristiano idiay Corinto nga agsisinnaklang iti pangukoman, ket kinunana a dangdangran ken sasaurenda ti kakabsatda babaen ti ipapanda iti pangukoman, iti saklang dagiti nakillo a tattao imbes nga iti saklang dagiti sasanto iti kongregasion. Naim-imbag la koman a nasaurda imbes nga iyamangda ti kakasta a banag iti saklang dagiti tattao ti lubong.​—1Co 6:1-8.

Masansan a mamakdaar ti Biblia maibusor iti panagsaur ken nakusit nga ar-aramid ken kondenarenna dagita, ket dinakamatna met a ti Dios ukomennanto dagiti manangsaur ken isalakanna ti ilina manipud kadagita a tattao.​—Sal 62:10; 72:4; 103:6; Pr 14:31; 22:16; 28:16; Mik 2:1, 2; Mal 3:5.