Kinaawan Asawa​—Ruangan iti Di Masingsinga nga Aktibidad

“Kaipapananna ti naynay a panagserbi iti Apo nga awan ti makasinga.” ​—1 CORINTO 7:35.

1. Ania a makapadanag a damag ti nakadanon ken Pablo maipapan kadagiti Kristiano sadi Corinto?

MASEKNAN idi ni apostol Pablo kadagiti Kristiano a kakabsatna idiay Corinto, Grecia. Agarup lima a tawen sakbayna, impasdekna ti kongregasion iti dayta narang-ay a siudad nga agdindinamag gapu iti imoralidad. Ita, idi agarup 55 K.P., bayat nga adda idiay Efeso, iti Asia Minor, nakadanon kenkuana ti makapadanag a damag manipud Corinto maipapan iti panaglalasin ken panangpanuynoy iti nadagsen a kaso ti imoralidad. Maysa pay, nakaawat ni Pablo iti surat a naggapu kadagiti Kristiano sadi Corinto nga agpapaiwanwan maipapan iti seksual a panagdenna, selibasia, panagasawa, panagsina, ken maikadua a pannakiasawa.

2. Kasano a ti nasaknap nga imoralidad sadi Corinto nalawag nga ap-apektaranna idi dagiti Kristiano iti dayta a siudad?

² Agparang nga ap-apektaran idi ti nakaro nga imoralidad a nasaknap sadi Corinto ti lokal a kongregasion iti dua a pamay-an. Adda dagiti Kristiano a nalulok iti moral ken mangpampanuynoy iti imoralidad. (1 Corinto 5:1; 6:15-17) Gapu kadagiti nailubongan a pagraragsakan nga agraira idi iti siudad, agparang nga imparit pay ketdi dagiti dadduma ti amin a seksual a panagdenna, uray kadagiti agassawa.​—1 Corinto 7:5.

3. Ania a bambanag ti tinaming nga umuna ni Pablo iti umuna a suratna kadagiti taga-Corinto?

³ Iti atiddog a surat ni Pablo kadagiti taga-Corinto, tinamingna nga immuna ti problema maipapan iti saan a panagtutunos. (1 Corinto, kapitulo 1-4) Binagbagaanna ida nga idianda ti panangsurot kadagiti tattao, a mangiturong laeng iti makadangran a panaglalasin. Rebbeng nga agkaykaysada a kas “katrabahuan” ti Dios. Kalpasanna, inikkanna ida kadagiti masnup nga instruksion maipapan iti panamagtalinaed iti kongregasion a nadalus iti moral. (1Co Kapitulo 5, 6) Insaruno ti apostol a tinaming ti suratda.

Maiparegta ti Kinaawan Asawa

4. Ania ti kayat a sawen ni Pablo idi kinunana a “nasayaat a ti maysa a lalaki dina sagiden ti maysa a babai”?

⁴ Inrugina: “Ita no maipapan kadagiti bambanag nga insuratyo, nasayaat a ti maysa a lalaki dina sagiden ti maysa a babai.” (1 Corinto 7:1) Ti ebkas ditoy a “dina sagiden ti maysa a babai” kaipapananna ti di panangpennek iti seksual a tarigagay babaen ti pannakidenna iti babai. Tangay kinondenaren ni Pablo ti pannakiabig, tuktukoyennan ti seksual a panagdenna ti agassawa. Gapuna, iparparegta itan ni Pablo ti kinaawan asawa. (1 Corinto 6:9, 16, 18; idiligyo ti Genesis 20:6; Proverbio 6:29.) Insuratna pay: “Ita kunaek kadagiti awanan asawa a tattao ken kadagiti balo, naimbag kadakuada nga agtalinaedda a kas kaniak.” (1 Corinto 7:8) Awan asawa ni Pablo, nalabit maysa a biudo.​—1 Corinto 9:5.

5, 6. (a) Apay a nabatad a saan nga iparparegta ni Pablo ti monastiko a wagas ti panagbiag? (b) Apay nga imparegta ni Pablo ti di-pannakiasawa?

⁵ Nalabit nga adda ammo dagiti Kristiano sadi Corinto maipapan iti pilosopia dagiti Griego, a mainaig iti dayta, adda idi dagiti eskuelaan a nangitandudo iti aglablabes a panagsakripisio, wenno panangpaidam iti bagi. Mabalin ngata a dayta ti makagapu nga insaludsod dagiti taga-Corinto ken Pablo no “nasayaat” nga idian dagiti Kristiano ti amin a seksual a panagdenna? Saan nga inyanninaw ti sungbat ni Pablo ti pilosopia dagiti Griego. (Colosas 2:8) Saan a kas kadagiti teologo a Katoliko, dina pulos imparegta ti di pannakiasawa, nga agpupok iti maysa a monasterio wenno kombento, a kas man la nakasansanto dagiti awan asawana ken maisalakanda ti bagbagida gapu iti wagas ti panagbiag ken karkararagda.

⁶ Imparegta ni Pablo ti di-pannakiasawa “gapu iti panagkasapulan nga adda kadatayo.” (1 Corinto 7:26) Nalabit a tuktukoyenna dagiti narigat a kasasaad a mapaspasaran idi dagiti Kristiano, a mabalin a pakaruen ti panagasawa. (1 Corinto 7:28) Kastoy ti balakadna kadagiti Kristiano nga awan asawana: “Naimbag kadakuada nga agtalinaedda a kas kaniak.” Kadagiti biudo, kinunana: “Naluk-atanka aya manipud iti maysa nga asawa a babai? Isardengmo ti agsapul iti asawa.” Maipapan iti biuda a Kristiano, insuratna: “Naragragsak no agtalinaed kas iti kasasaadna, sigun iti kapanunotak. Pudno unay a pagarupek nga addaanak met iti espiritu ti Dios.”​—1 Corinto 7:8, 27, 40.

Saan nga Inkapilitan ti Panagtalinaed nga Awanan Asawa

7, 8. Ania ti mangipakita a saan a pilpiliten ni Pablo ti asinoman a Kristiano nga agtalinaed a di naasawaan?

⁷ Di pagduaduaan nga indalan ti nasantuan nga espiritu ni Jehova ni Pablo idi imbalakadna daytoy. Natimbeng ken nainkalintegan ti panangidatagna iti selibasia ken panagasawa. Dina imbaga a kinamatalek wenno di kinamatalek ti aniaman kadagitoy. Imbes ketdi, nawaya ti maysa nga agpili, a sititimbeng a maiparegta ti di-pannakiasawa kadagidiay makapagtalinaed a nadalus iti dayta a kasasaad.

⁸ Kalpasan la unay ti panangibagana a “nasayaat a ti maysa a lalaki dina sagiden ti maysa a babai,” innayon ni Pablo: “Nupay kasta, gapu iti kinasaknap ti pannakiabig, tunggal lalaki maaddaan koma iti bukodna nga asawa ket tunggal babai maaddaan koma iti bukodna nga asawa.” (1 Corinto 7:1, 2) Kalpasan nga imbalakadna kadagiti awan asawana ken balo nga “agtalinaedda a kas kaniak,” insarunona a dagus: “Ngem no awananda iti panagteppel, mangasawada koma, ta nasaysayaat ti mangasawa ngem iti sumged ti derrep.” (1 Corinto 7:8, 9) Maminsan pay, imbalakadna kadagiti biudo: “Isardengmo ti agsapul iti asawa. Ngem uray pay no nangasawaka, dika makabasol.” (1 Corinto 7:27, 28) Iyanninaw daytoy natimbeng a balakad ti wayawaya nga agpili.

9. Sigun kada Jesus ken Pablo, kasano nga agpada a sagut ti Dios ti panagasawa ken di-pannakiasawa?

⁹ Impakita ni Pablo nga agpada a sagut ti Dios ti panagasawa ken di-pannakiasawa. “Kayatko nga amin a tattao kaslada koma kaniak a mismo. Nupay kasta, tunggal maysa adda bukodna a sagut manipud iti Dios, maysa iti kastoy a pamay-an, ti sabali iti kasdiay a pamay-an.” (1 Corinto 7:7) Awan duadua nga adda idi iti panunotna ti kinuna ni Jesus. Kalpasan ti panangpasingkedna a namunganay iti Dios ti panagasawa, impakita ni Jesus a naisangsangayan a sagut ti situtulok a panagtalinaed a di naasawaan gapu iti panagserbi iti intereses ti Pagarian: “Saan nga amin a tattao maiwayaanda ti sao, no di laeng dagidiay addaan ti sagut. Ta adda dagiti eunuko a naiyanakda a kasta manipud iti aanakan ti inada, ket adda dagiti eunuko a napagbalin nga eunuko babaen kadagiti tattao, ken adda dagiti eunuko a pinagbalinda ti bagbagida nga eunuko maigapu iti pagarian ti langlangit. Ti makaiwaya iti dayta iwayaanna koma dayta.”​—Mateo 19:4-6, 11, 12.

Panangiwaya iti Sagut a Kinaawan Asawa

10. Kasano a “maiwayaan” ti maysa a tao ti sagut a kinaawan asawa?

¹⁰ Nupay agpada a kinuna da Jesus ken Pablo a maysa a “sagut” ti kinaawan asawa, saanda nga imbaga a maysa dayta a datdatlag a sagut a manmano laeng ti pakaitedanna. Kinuna ni Jesus a “saan nga amin a tattao maiwayaanda” dayta a sagut, ket pinaregtana dagidiay makabael nga ‘iwayaanda dayta,’ kas kada Jesus ken Pablo. Pudno, insurat ni Pablo: “Nasaysayaat ti mangasawa ngem iti sumged ti derrep,” ngem agsasao idi maipapan kadagidiay ‘awanan iti panagteppel.’ (1 Corinto 7:9) Kadagiti immun-una a suratna, impakita ni Pablo a kabaelan dagiti Kristiano a gawidan ti irarasuk ti derrep. (Galacia 5:16, 22-24) Ti pannagna iti espiritu kaipapananna ti panagpaidalan iti espiritu ni Jehova iti amin nga addangtayo. Maaramid kadi daytoy dagiti agtutubo a Kristiano? Wen, no surotenda a naimbag ti Sao ni Jehova. Insurat ti salmista: “Kasano ti panangdalus ti agtutubo a lalaki [wenno babai] iti dalanna? Babaen ti panagannadna mayannurot iti saom.”​—Salmo 119:9, NW.

11. Ania ti kayat a sawen ti ‘pannagna maitunos iti espiritu’?

¹¹ Ramanen daytoy ti panagannad kadagiti nalulok a kapanunotan a maidatdatag kadagiti adu a programa iti TV, sine, artikulo iti magasin, libro, ken liriko dagiti kanta. Nainlasagan dagita a kapanunotan. Ti Kristiano nga agtutubo a lalaki wenno babai nga agtarigagay nga agtalinaed nga awanan asawa rumbeng a “magna, saan a maitunos iti lasag, no di ket maitunos iti espiritu. Ta dagidiay makitunos iti lasag iturongda ti pampanunotda kadagiti bambanag ti lasag, ngem dagidiay makitunos iti espiritu [iturongda ti pampanunotda] kadagiti bambanag ti espiritu.” (Roma 8:4, 5) Nalinteg, nadalus, makaay-ayo, ken nadayaw dagiti bambanag ti espiritu. Nasayaat nga ‘itultuloy [dagiti Kristiano, agtutubo ken nataengan] nga imutektekan dagitoy a bambanag.’​—Filipos 4:8, 9.

12. Ania ti kangrunaan a nairaman iti panangiwaya iti sagut a di-pannakiasawa?

¹² Maiwayaan ti maysa ti sagut a kinaawan asawa no ipapusona dayta a kalat ken ikararagna ti tulong ni Jehova tapno masalimetmetanna dayta. (Filipos 4:6, 7) Insurat ni Pablo: “No ti asinoman sititibker a nakaikeddeng iti pusona, nga awan ti panagkasapulanna, no di ket addaan ti kinaturay iti bukodna a pagayatan ket inaramidna daytoy a pangngeddeng iti bukodna a puso, a pagtalinaedenna ti bukodna a kinabirhen, naimbagto ti aramidenna. Iti kasta ti met mangited ti kinabirhenna iti pannakiasawa naimbag ti aramidenna, ngem ti di mangited iti dayta iti pannakiasawa naim-imbagto ti aramidenna.”​—1 Corinto 7:37, 38.

Kinaawan Asawa nga Addaan Panggep

13, 14. (a) Kasano a pinagdilig ni apostol Pablo dagiti awan asawana ken dagiti naasawaan a Kristiano? (b) Kasano laeng a “naim-imbag” ti di naasawaan a Kristiano ngem kadagidiay naasawaan?

¹³ Saan a makagunggona a mismo ti di panangasawa. Ngarud, iti ania nga anag a “naim-imbag”? Depende no kasano nga usaren ti maysa a tao ti wayawaya nga iyeg dayta. Insurat ni Pablo: “Kinapudnona, kayatko a siwayawayakayo manipud iti pakaringgoran. Ti awanan asawa a lalaki maringgoran kadagiti bambanag ti Apo, no kasano a magun-odanna ti anamong ti Apo. Ngem ti naasawaan a lalaki maringgoran kadagiti bambanag ti lubong, no kasano a magun-odanna ti anamong ti asawana, ket isu nabingbingay. Kanayonanna, ti awanan asawa a babai, ken ti birhen, maringgoran kadagiti bambanag ti Apo, tapno isu agbalin a nasantuan agpadpada iti bagina ken iti espirituna. Nupay kasta, ti naasawaan a babai maringgoran kadagiti bambanag ti lubong, no kasano a magun-odanna ti anamong ti asawana. Ngem sasawek daytoy a maipaay iti kabukbukodanyo a pagsayaatan, saan a tapno mangipakatak iti silo kadakayo, no di ket tapno tignayenkayo iti daydiay maiyanatup ken iti daydiay kaipapananna ti naynay a panagserbi iti Apo nga awan ti makasinga.”​—1 Corinto 7:32-35.

¹⁴ Saan a “naim-imbag” ngem kadagiti naasawaan a Kristiano ti di-naasawaan a Kristiano a mangusar iti kinaawan asawana a mangragpat kadagiti inaagum a kalat. Agtalinaed nga awanan asawa, saan a “maigapu iti pagarian,” no di ket gapu kadagiti personal a rason. (Mateo 19:12) Ti awan asawana a lalaki wenno babai “maringgoran [koma] kadagiti bambanag ti Apo,” maseknan “no kasano a magun-odanna ti anamong ti Apo,” ken “naynay nga agserbi iti Apo nga awan ti makasinga.” Kayat a sawen daytoy nga ipamaysana ti agserbi kada Jehova ken Kristo Jesus. Babaen laeng ti panangaramidda iti kasta a maikuna a “naim-imbag” dagiti awan asawana a Kristiano a lallaki ken babbai ngem kadagiti naasawaan a Kristiano.

Di Masingsinga nga Aktibidad

15. Ania ti kababagas ti argumento ni Pablo iti 1 Corinto kapitulo 7?

¹⁵ Kastoy ti kababagas ti argumento ni Pablo iti daytoy a kapitulo: Nupay maiparbeng ti panagasawa ken, iti dadduma a kasasaad, maibalakad kadagiti dadduma, di mailibak a makagunggona ti kinaawan asawa iti Kristiano a lalaki wenno babai nga agtarigagay nga agserbi ken Jehova a di unay masingsinga. “Nabingbingay” ti naasawaan, idinto ta nawaya ti awan asawana a Kristiano a mangipamaysa kadagiti “bambanag ti Apo.”

16, 17. Kasano nga ad-adda a maipamaysa ti awan asawana a Kristiano dagiti “bambanag ti Apo”?

¹⁶ Ania dagiti bambanag ti Apo nga ad-adda a maiwayaan ti awan asawana a Kristiano ngem kadagiti naasawaan? Iti sabali a konteksto, nagsao ni Jesus maipapan kadagiti “bambanag ti Dios”​—dagiti banag a di maited ti maysa a Kristiano ken Cesar. (Mateo 22:21) Mainaig dagitoy a banag iti biag, panagdayaw, ken ministerio ti maysa a Kristiano.​—Mateo 4:10; Roma 14:8; 2 Corinto 2:17; 3:5, 6; 4:1.

¹⁷ Kaaduanna, nawaywaya dagiti awan asawana a mangusar iti panawenda nga agserbi ken Jehova, a makagunggona iti espiritualidadda ken iti kaadu ti maaramidanda iti ministerio. Ad-adu ti panawenda nga agadal ken agmennamenna. Masansan a nalaklaka nga iyeskediul dagiti awan asawana a Kristiano ti panagbasada iti Biblia ngem kadagidiay naasawaan. Ad-adda a makapagsaganada para kadagiti gimong ken iti tay-ak ti serbisio. Agpaay amin daytoy iti “kabukbukodan[da] a pagsayaatan.”​—1 Corinto 7:35.

18. Kasano a maipakita dagiti adu a kakabsat a lallaki a kayatda ti agserbi ken Jehova nga “awan ti makasinga”?

¹⁸ Adu dagiti awan asawana a kakabsat a lallaki nga agserserbin kas ministerial nga adipen ti makaibaga ken Jehova iti: “Adtoyak! Ibaonnak.” (Isaias 6:8) Mabalinda ti agaplikar a sumrek iti Ministerial Training School, a nairanta kadagiti awan asawana a ministerial nga adipen ken panglakayen a nawaya nga agserbi iti sadinoman a dakdakkel ti pakasapulan. Uray dagiti kakabsat a lallaki a di makapanaw iti kongregasionda mabalinda a pagserbian dagiti kakabsatda kas ministerial nga adipen wenno panglakayen.​—Filipos 2:20-23.

19. Kasano a maparparaburan dagiti adu nga awan asawana a kakabsat a babbai, ket ania ti maysa a pamay-an a bendisionda iti kongregasion?

¹⁹ Tangay awan asawada a pakiumanan ken pangyesngawan iti rikriknada, ad-adda a masursuro dagiti awan asawana a kakabsat a babbai nga ‘iyallatiw ti awitda ken Jehova.’ (Salmo 55:22; 1 Corinto 11:3) Napateg daytoy nangnangruna kadagiti kakabsat a babbai a di naasawaan gapu iti ayatda ken Jehova. No dumteng ti panawen a makiasawada, ‘itinto Apo laeng,’ kayatna a sawen, iti maysa a dedikado ken Jehova. (1 Corinto 7:39) Yamanen dagiti panglakayen ti kaadda dagiti awan asawana a kakabsat a babbai kadagiti kongregasionda; masansan a dagitoy ti sumarungkar ken tumulong kadagiti masakit ken lallakay wenno babbaket. Mangyeg daytoy iti ragsak kadagiti amin a maseknan.​—Aramid 20:35

20. Kasano nga ipakpakita dagiti adu a Kristiano a ‘naynay nga agserserbida iti Apo nga awan ti makasinga’?

²⁰ Adu dagiti agtutubo a Kristiano a nangyurnos kadagiti aktibidadda tapno ‘naynay a makapagserbida iti Apo nga awan ti makasinga.’ (1 Corinto 7:35) Agserserbida ken Jehova kas amin-tiempo a payunir a ministro, misionero, wenno iti maysa kadagiti sanga nga opisina ti Watch Tower Society. Ket pudno a naragsakda! Anian a makapabang-ar ti kaaddada! Kinapudnona, iti imatang da Jehova ken Jesus, ‘kasda la linnaaw.’​—Salmo 110:3.

Awan Sapata iti Agnanayon a Selibasia

21. (a) Apay a nabatad a saan nga imparegta ni Pablo ti sapata ti selibasia? (b) Ania ti impasimudaagna iti panangdakamatna iti “labes ti kinalasbang ti kinaagtutubo”?

²¹ Ti kangrunaan a punto iti balakad ni Pablo ket, ‘nasayaat’ nga iwayaan dagiti Kristiano iti biagda ti di-pannakiasawa. (1 Corinto 7:1, 8, 26, 37) Nupay kasta, saanna nga al-allukoyen ida nga agsapata a di makiasawa. Insuratna ketdi: “No ti asinoman pagarupenna a di umiso ti panagtigtignayna iti kinabirhenna, no dayta ket iti labes ti kinalasbang ti kina-agtutubo, ket iti kastoy a wagas a rumbeng a maaramid, aramidenna koma ti kayatna; isu di agbasol. Mangasawada koma.” (1 Corinto 7:36) Ti Griego a sao (hy·peʹra·kmos) a naipatarus nga “iti labes ti kinalasbang ti kinaagtutubo” literal a kaipapananna, “iti labes ti alimpatok” ket tuktukoyen daytoy ti panaglabas ti alimpatok ti seksual a tarigagay. Isu a dagidiay nakapagtalinaed nga awanan asawa iti sumagmamano a tawen ken makarikna a rebbeng a makiasawadan naan-anay a nawayada a makiasawa iti kapammatianda.​—2 Corinto 6:14.

22. Iti aniaman a panirigan, apay a nasayaat no saan a makiasawa a nasapa ti maysa a Kristiano?

²² Nainsiriban a puonan dagiti tawen a busbosen ti maysa nga agtutubo a Kristiano iti panagserbi ken Jehova nga awan makasinga. Dagitoy ti mangted iti gundawayna a gumun-od iti praktikal a sirib, padas, ken nauneg a pannakaawat. (Proverbio 1:3, 4) No dumteng ti panawen a kayatnan ti makiasawa, ti tao a nakapagtalinaed a di naasawaan maipuon iti Pagarian ad-addanto a makabael a mangibaklay kadagiti rebbengen iti biag a naasawaan ken nalabit iti panagbalin nga ama wenno ina.

23. Ania ti mabalin a pampanunoten ti dadduma nga agpangpanggep a makiasawa, ngem ania a saludsod ti mausig kadagiti sumaganad nga artikulo?

²³ Dagiti dadduma nga awan asawana a Kristiano nga adun a tawen nga agserserbi ken Jehova iti amin a tiempo pilienda a naimbag ti agbalinto nga asawada a siinanama a makapagtultuloyda iti amin-tiempo a serbisio. Makomendaran unay daytoy. Mabalin nga ar-arapaapen pay ketdi ti dadduma ti makiasawa nga addaan panggep a di mangipalubos iti pannakiasawada a manglapped iti panagserbida iti aniaman a pamay-an. Ngem rebbeng kadi nga ipagarup ti naasawaan a Kristiano a nawaya a mangipamaysa iti panagserbina ken Jehova a kas idi awan pay asawana? Mausig daytoy a saludsod kadagiti sumaganad nga artikulo.

Kas Panangrepaso

◻ Apay a narikna ni apostol Pablo a kasapulan a suratanna ti kongregasion sadi Corinto?

◻ Apay nga ammotayo a saan nga iparparegta ni Pablo ti monastiko a wagas ti panagbiag?

◻ Kasano a “maiwayaan” ti maysa a tao ti di-pannakiasawa?

◻ Kasano a makagunggona kadagiti di naasawaan a kakabsat a babbai ti kinaawan asawada?

◻ Kadagiti ania a pamay-an a mabalin a gundawayan dagiti awan asawana a kakabsat a lallaki ti wayawayada nga agserbi ken Jehova nga “awan ti makasinga”?