IDOLO, DAGITI KARNE A NAIDATON KADAGITI
Iti pagano a lubong ti umuna a siglo K.P., kadawyan nga aramid ti naseremoniaan a panagidaton iti karkarne kadagiti idolo. Iti kakasta a gundaway, dagiti paset ti naparti a sakripisio nga animal naikabil iti altar ti idolo, ti sangkapaset naited iti papadi, ket ti sangkapaset naited kadagiti managdaydayaw, a mangusar iti dayta maipaay iti pannangan wenno piesta, mabalin nga iti templo wenno iti pribado a balay. Nupay kasta, ti sumagmamano iti lasag a naidaton kadagiti idolo masansan a mayallawat idi iti maʹkel·lon, wenno tiendaan ti karne, tapno mailako.
Sakbay a nagbalinda a Kristiano nairuam ti adu a tattao a mangan kadagiti karne a naidaton kadagiti idolo buyogen ti rikna a panagraem iti idolo. (1Co 8:7) Iti panangaramidda iti kasta, dagitoy a sigud a pagano makiramramanda idi iti sairo a dios nga iladladawan ti idolo. (1Co 10:20) Ngarud, mayanatup unay a babaen ti pormal a surat manipud Jerusalem, ti manarawidwid a bagi ti nagkauna a kongregasion Kristiano, iti sidong ti panangiwanwan ti nasantuan nga espiritu, imparitna ti kasta a pormal, narelihiosuan a pannangan kadagiti karne a naidaton kadagiti idolo, iti kasta masalakniban dagiti Kristiano manipud idolatria mainaig iti daytoy.—Ara 15:19-23, 28, 29.
Dagiti Kristiano, kas kadagidiay agnanaed iti pagano a Corinto, naipasangoda iti sumagmamano a saludsod maipapan itoy a banag. Sipapalubos kadi ti konsiensiada a sumrek iti templo ti idolo ket manganda iti karne no aramidenda ti kasta a saanda a pampanunoten ti panangpadayaw iti idolo? Ken, maiparit kadi ti gumatang manipud iti maʹkel·lon kadagiti karne a naseremoniaan a naidaton kadagiti idolo? Kamaudiananna, kasano ti panangtaming ti maysa a Kristiano iti daytoy a banag no mangmangan kas sangaili iti pagtaengan ti sabali?
Iti sidong ti pannakapaltiing impaayan ni Pablo dagiti Kristiano a taga Corinto iti naintiempuan nga impormasion a tumulong kadakuada a mangaramid kadagiti umiso a pangngeddeng. Nupay “ti idolo awan kapapay-anna,” saan a nasayaat a ti maysa a Kristiano sumrek iti templo ti idolo tapno mangan iti karne (uray no ti pannanganna saan a paset ti narelihiosuan a seremonia), agsipud ta babaen iti dayta isu makaipaay iti di umiso a panangmatmat kadagiti managpaliiw a nakapuy ti espiritualidadda. Mabalin nga ipapan ti kakasta a managpaliiw a ti Kristiano ket agdaydayaw iti idolo, ket mabalin a maitibkolda iti daytoy. Mabalin a mangituggod dayta kadagidiay nakapkapuy iti aktual pay ketdin a pannanganda kadagiti karne a naisakripisio kadagiti idolo iti narelihiosuan a seremonia, kas direkta a panangsalungasing iti bilin ti manarawidwid a bagi. Adda met peggad a ti nangan a Kristiano masalungasingna ti bukodna a konsiensia ket tumulok iti panagdaydayaw iti idolo.—1Co 8:1-13.
Yantangay ti naseremoniaan a panangidaton iti karkarne kadagiti idolo saan a namagbalbaliw iti karne, buyogen ti nasayaat a konsiensia mabalin ti maysa a Kristiano, nupay kasta, ti gumatang iti karne manipud iti tiendaan a ti sumagmamano a karne dayta ket naggapu kadagiti narelihiosuan a templo. Napukawen ti “sagrado” a pateg daytoy a karne. Dayta ket kasla laengen iti aniaman a sabali pay a karne, ket ngarud ti Kristiano saan nga obligado nga agimtuod maipapan iti nagtaudan dayta.—1Co 10:25, 26.
Kanayonanna pay, ti Kristiano, no naawis iti maysa a pannangan, saan a kasapulan nga agimtuod maipapan iti naggapuan ti karne no di ket mabalinna a kanen dayta buyogen ti nasayaat a konsiensia. Nupay kasta, no kunaen ti maysa a tao nga adda iti pannangan a ti karne ket “naidaton kas sakripisio,” ngarud saan a mangan iti dayta ti Kristiano tapno maliklikan ti panangitibkol iti sabsabali.—1Co 10:27-29.
Ti sasao ti naipadayag a ni Jesu-Kristo ken Juan maipapan kadagiti kongregasion Kristiano idiay Pergamo ken Tiatira ipatuldoda nga adda dagidiay di nakaipangag iti apostoliko a bilin babaen ti saanda a panamagtalinaed a nadalus ti bagbagida manipud iti bambanag a naisakripisio kadagiti idolo.—Apo 2:12, 14, 18, 20.