“Tapno Saankayo a Sumrek iti Pannakasulisog”
“Agtultuloykayo nga agbantay ken agkararagkayo nga agpatpatuloy, tapno saankayo a sumrek iti pannakasulisog.”—MATEO 26:41.
NARIGAT unay ti sasaaden ti Anak ti Dios a ni Jesu-Kristo. Awan pay ti kasta a napasaranna. Dandanin agngudo ti biagna ditoy daga. Ammo ni Jesus nga asidegen a matiliw, masentensiaan iti ipapatay, ken mailansa iti kayo a pagtutuokan. Ammona a makaapektar iti nagan ni Amana ti amin a pangngeddeng ken tignayna. Ammo met ni Jesus nga agpannuray kenkuana ti biag ti sangatauan iti masanguanan. Ania ti inaramidna iti sidong dagitoy a kasasaad?
2 Napan ni Jesus ken dagiti adalanna idiay minuyongan ti Getsemani, maysa a disso a kaay-ayo ni Jesus. Idi addadan sadiay, immadayo bassit kadagiti adalanna. Idi agmaymaysan, sipapasnek a nagkararag ken ni Amana tapno dumawat iti kired, nga imbukbokna ti pusona—saan la a naminsan no di ket namitlo. Nupay perpekto ni Jesus, saanna a pinanunot a kabaelanna a sanguen ti kasasaad iti bukodna a pigsa.—Mateo 26:36-44.
3 Adu met dagiti pakarigatan a pakaipasanguantayo ita. Kadagiti immun-una a paset daytoy a broshur, inusigtayo dagiti pammaneknek nga agbibiagtayon kadagiti maudi nga aldaw daytoy dakes a sistema. Dumegdegdeg dagiti sulisog ken pakarigatan iti lubong ni Satanas. Dagiti pangngeddeng ken tignay ti asinoman kadatayo nga agkunkuna nga agserserbi iti pudno a Dios ket makaapektar iti nagan ti Dios ken dakkel ti epektona iti namnama ti tunggal maysa kadatayo nga agbiag iti baro a lubongna. Ay-ayatentayo ni Jehova. Kayattayo ti ‘agibtur agingga iti panungpalan’—ti panungpalan ti biagtayo wenno ti panungpalan daytoy agdama a sistema, aniaman ti umuna kadagita. (Mateo 24:13) Ngem kasanotayo a mataginayon ti pannakariknatayo iti kinaganat ken makapagtalinaed a nasalukag?
4 Ammo ni Jesus a dagiti adalanna—agpadpada idi ken ita— maipasangoda met kadagiti narigat a kasasaad, isu nga indagadagna: “Agtultuloykayo nga agbantay ken agkararagkayo nga agpatpatuloy, tapno saankayo a sumrek iti pannakasulisog.” (Mateo 26:41) Ania ti kaipapanan dagita a sasao kadatayo ita? Ania a sulisog ti pakaipaspasanguam? Ken kasanoka a ‘makapagtultuloy nga agbantay’?
Masulisog nga Agaramid iti Ania?
5 Inaldaw a maipasangotayo amin iti sulisog a tumulok iti “silo ti Diablo.” (2 Timoteo 2:26) Ballaagannatayo ti Biblia a dagiti agdaydayaw ken ni Jehova ti kangrunaan a puntiria ni Satanas. (1 Pedro 5:8; Apocalipsis 12:12, 17) Apay? Saan a tapno patayennatayo. Saan nga agballigi ni Satanas no mataytayo a matalek iti Dios. Ammo ni Satanas nga iti panawen nga inkeddeng ni Jehova, agungarto dagiti natay.—Lucas 20:37, 38.
6 Kayat ni Satanas a dadaelen ti maysa a banag a napatpateg ngem iti agdama a biagtayo—ti kinatarnawtayo iti Dios. Ikagkagumaan ni Satanas a paneknekan a kabaelannatayo nga itallikud ken ni Jehova. Gapuna, no masulisogtayo a di agmatalek—sumardeng a mangikasaba iti naimbag a damag wenno mangilaksid kadagiti Nakristianuan a pagalagadan—maysa dayta a balligi para ken ni Satanas! (Efeso 6:11-13) No kasta, “ti Mannulisog” pasanguannatayo kadagiti sulisog.—Mateo 4:3.
7 Nagduduma dagiti “pangallilaw a pamuspusan” ni Satanas. (Efeso 6:11) Mabalin a sulisogennatayo babaen ti materialismo, buteng, panagduadua, wenno ragragsak. Ngem pannakaupay ti maysa kadagiti kasamayan a pamay-anna. Nasikap ken mananggundaway ni Satanas. Ammona a ti pannakaupay mabalin a pakapsutennatayo, iti kasta nalakatayo a masulisog. (Proverbio 24:10) Sulisogennatayo a sumuko nangnangruna no ‘mailupitlupittayo iti napalalo.’—Salmo 38:8.
8 Bayat nga umas-asideg ti panagpatingga dagiti maudi nga aldaw, agparang nga umad-adu dagiti pakaigapuan ti pannakaupay, ket saantayo a mailisi kadagita. (Kitaem ti kahon a “Dadduma a Pakaigapuan ti Pannakaupay.”) Aniaman ti makagapu, ti pannakaupay mabalin a pakapuyennatayo. Ti ‘pananggatang iti nainggundawayan a tiempo’ para kadagiti naespirituan nga obligasion—a pakairamanan ti panagadal iti Biblia, itatabuno kadagiti Nakristianuan a gimong, ken pannakiraman iti ministerio—ket mabalin a narigat no napaksuyanka iti pisikal, mental, ken emosional. (Efeso 5:15, 16) Laglagipem a kayatnaka a pasardengen ti Mannulisog. Ngem saan a panawen daytoy ti panagginad wenno panangyaleng-aleng iti kinaganat ti tiempo a pagbibiagantayo! (Lucas 21:34-36) Kasanom a masaranget ti sulisog ken kasanoka a makapagtalinaed a nasalukag? Usigem ti uppat a makatulong a singasing.
‘Agkararagka nga Agpatpatuloy’
9 Agpannurayka ken ni Jehova babaen ti kararag. Laglagipem ti inaramid ni Jesus idiay minuyongan ti Getsemani. Idi nagtutuok iti napalalo, ania ti inaramidna? Nagpatulong ken ni Jehova. Nagkararag a sipapasnek nga uray la a “ti ling-etna nagbalin a kas kadagiti tedted ti dara nga agtinnag iti daga.” (Lucas 22:44) Panunotem dayta. Ni Jesus am-ammona unay ni Satanas. Manipud idiay langit, nakita ni Jesus dagiti amin a sulisog nga us-usaren ni Satanas iti panangikagumaanna a mangsilo kadagiti adipen ti Dios. Ngem saan a pinanunot ni Jesus a nalakana la a sarangten ti aniaman nga ipasango kenkuana ti Mannulisog. No ti perpekto nga Anak ti Dios ket nagkararag latta iti Dios tapno dumawat iti tulong ken bileg, ad-adda a nasken nga aramidentayo dayta!—1 Pedro 2:21.
10 Laglagipem met a kalpasan nga indagadagna kadagiti adalanna nga ‘agkararagda nga agpatpatuloy,’ kinuna ni Jesus: “Ti espiritu, siempre, sigagagar, ngem ti lasag nakapuy.” (Mateo 26:41) Makinlasag ti kayat a sawen ni Jesus? Sigurado a saan a ti lasagna; awan ti aniaman a pagkapuyan ti perpekto a natauan a lasagna. (1 Pedro 2:22) Ngem saan a kasta dagiti adalanna. Gapu iti natawid a kinaimperpekto ken dakes a pagannayasan, nangnangruna a kasapulanda ti tulong tapno masarangetda ti sulisog. (Roma 7:21-24) Dayta ti gapuna nga indagadagna kadakuada —ken kadagiti amin a pudno a Kristiano kalpasanda—a dumawatda iti tulong tapno masarangetda ti sulisog. (Mateo 6:13) Sungbatan ni Jehova dagiti kasta a kararag. (Salmo 65:2) Kasano? Iti dua a pamay-an.
11 Umuna, tulongannatayo ti Dios a mangilasin kadagiti sulisog. Mayarig dagiti sulisog ni Satanas kadagiti silo a naiwaras iti nasipnget a dalan. No saanmo a makita dagita, mabalin a masiluanka. Babaen ti Biblia ken dagiti naibatay iti Biblia a publikasion, inlatak ni Jehova dagiti silo ni Satanas, iti kasta saantayo a matnag iti sulisog. Iti adun a tawen, maulit-ulit a pakpakdaarandatayo dagiti naipablaak a literatura ken dagiti programa iti kombension ken asamblea maipapan kadagiti peggad a kas iti panagbuteng iti tao, seksual nga imoralidad, materialismo, ken dadduma pay a sinasairo a sulisog. (Proverbio 29:25; 1 Corinto 10:8-11; 1 Timoteo 6:9, 10) Saanka kadi nga agyaman ken ni Jehova gapu iti panangpakdaarna kadatayo maipapan kadagiti pamay-an ni Satanas? (2 Corinto 2:11) Amin dagita a pakdaar ket sungbat ti panangikarkararagmo iti tulong a mangsaranget iti sulisog.
12 Maikadua, sungbatan ni Jehova dagiti kararagtayo babaen ti panangtedna kadatayo iti kired a mangibtur iti sulisog. Kuna ti Saona: “Ti Dios . . . saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran.” (1 Corinto 10:13) No itultuloytayo ti agpannuray iti Dios, saanna nga ipalubos a maawanantayo iti naespirituan a pigsa a mangsaranget iti sulisog uray no nakaro dayta. Kasanonatayo nga ‘iyaramidan iti pagruaran’? ‘Itedna ti nasantuan nga espiritu kadagidiay agdawdawat kenkuana.’ (Lucas 11:13) Mabalin a tulongannatayo dayta nga espiritu a manglagip kadagiti prinsipio ti Biblia a mangpabileg iti determinasiontayo a mangaramid iti umiso ken tulongannatayo a mangaramid kadagiti nainsiriban a desision. (Juan 14:26; Santiago 1:5, 6) Matulongannatayo dayta a mangiparangarang kadagiti mismo a galad a kasapulantayo tapno maparmek dagiti dakes a pagannayasan. (Galacia 5:22, 23) Ti espiritu ti Dios mabalin a tignayenna pay dagiti kapammatiantayo nga ‘agbalin a makapabileg a tulong kadatayo.’ (Colosas 4:11) Saanka kadi nga agyaman ta babaen dagita a naayat a pamay-an, sungsungbatan ni Jehova ti panangidawdawatmo iti tulong?
Rasonable Koma Dagiti Inanamaem
13 Tapno makapagtalinaedtayo a nasalukag, nasken a rasonable dagiti inanamaentayo. Gapu kadagiti pakarigatan iti biag, mautoyantayo no dadduma. Ngem masapul a laglagipentayo a pulos a saan nga inkari ti Dios a mailikliktayo kadagiti parikut iti daytoy daan a sistema. Uray idi tiempo ti Biblia, napasaran dagiti adipen ti Dios dagiti narigat a kasasaad, a pakairamanan ti pannakaidadanes, kinapanglaw, panagleddaang, ken sakit.—Aramid 8:1; 2 Corinto 8:1, 2; 1 Tesalonica 5:14; 1 Timoteo 5:23.
14 Iti kaaldawantayo, addaantayo met kadagiti parikut. Mabalin a maidadanestayo, maringgoran gapu iti kinarigat ti biag, maldaangan, agsakit, ken agsagaba iti dadduma pay a pamay-an. No namilagruan a salaknibannatayo ni Jehova iti amin a dakes a kasasaad, saan kadi a mangted dayta ken ni Satanas iti panggapuanna a mangumsi ken ni Jehova? (Proverbio 27:11) Ipalubos ni Jehova a masulisog ken masubok dagiti adipenna, iti dadduma a kasasaad uray agingga iti nasapa nga ipapatay iti ima dagiti bumusbusor.—Juan 16:2.
15 Ania ngarud ti inkari ni Jehova? Kas nadakamaten, inkarina nga ikkannatayo iti bileg a mangsaranget iti aniaman a sulisog a mabalin a pakaipasanguantayo, no la ket ta agtalektayo a naan-anay kenkuana. (Proverbio 3:5, 6) Babaen ti Sao, espiritu, ken organisasionna, salaknibannatayo iti naespirituan a pamay-an, a tulongannatayo a mangsaluad iti relasiontayo kenkuana. No natibker ti relasiontayo kenkuana, agballigitayo uray no mataytayo. Awan a pulos—uray ni patay—ti makalapped iti Dios a manggunggona kadagiti matalek nga adipenna. (Hebreo 11:6) Ket iti baro a lubong, nga asidegen a dumteng, di bumurong a tungpalen ni Jehova ti amin nga inkarina a dadduma pay nga agkakaimbag a bendision a sagrapen dagidiay mangay-ayat kenkuana.—Salmo 145:16.
Laglagipem Dagiti Isyu
16 Tapno makapagibturtayo agingga iti panungpalan, masapul a laglagipentayo dagiti napateg nga isyu a mainaig iti panangipalubos ti Dios iti kinadakes. No adda dagiti tiempo a kasla nadagsen unay dagiti parikuttayo ket agduyostayo a sumuko, nasayaat no lagipentayo a kinarit ni Satanas ti kalintegan ni Jehova a mangituray. Pinagduaduaan met ti Manangallilaw ti debosion ken kinatarnaw dagiti agdaydayaw iti Dios. (Job 1:8-11; 2:3, 4) Napatpateg ngem iti mismo a biagtayo dagita nga isyu ken ti wagas a panangtaming ni Jehova kadagita. Kasano a kasta?
17 Ti temporario a panangipalubos ti Dios iti rigat inikkanna dagiti dadduma pay a tattao iti gundaway a mangawat iti kinapudno. Panunotem daytoy: Nagsagaba ni Jesus tapno agbiagtayo. (Juan 3:16) Saantayo kadi nga agyaman iti dayta? Ngem situtuloktayo kadi a mangibtur pay iti rigat tapno maaddaan dagiti sabsabali iti gundaway nga agbiag? Tapno makapagibturtayo agingga iti panungpalan, masapul a bigbigentayo a natantan-ok nga amang ti sirib ni Jehova ngem iti siribtayo. (Isaias 55:9) Gibusanna ti kinadakes iti kasayaatan a tiempo a pannakaibanag ti isyu a mamimpinsan ken agpaay iti agnanayon a pagimbagantayo. Adda kadi pay nasaysayaat a pamay-an? Awan ti kinakillo iti Dios!—Roma 9:14-24.
‘Umadanika iti Dios’
18 Tapno sisasalukagtayo a kanayon, nasken nga agtalinaedtayo a nasinged ken ni Jehova. Dimo liplipatan nga ar-aramiden ni Satanas ti amin a kabaelanna a mangdadael iti nasayaat a relasiontayo ken ni Jehova. Kayat ni Satanas nga ipapati kadatayo a pulos a saan nga umay ti panungpalan ken awan mamaay ti panangikasaba iti naimbag a damag wenno ti panagbiag a mayannurot kadagiti pagalagadan ti Biblia. Ngem isu ket ‘managulbod ken ama ti kinaulbod.’ (Juan 8:44) Masapul a determinadotayo a ‘mangbusor iti Diablo.’ Pulos a ditay koma tagibassiten ti relasiontayo ken ni Jehova. Siaayat nga idagadag ti Biblia kadatayo: “Umadanikayo iti Dios, ket isu umadaninto kadakayo.” (Santiago 4:7, 8) Kasanoka nga agbalin a nasingsinged ken ni Jehova?
19 Nasken ti panagmennamenna a nabuyogan iti kararag. No kasla naidagelka kadagiti parikut iti biag, ibukbokmo ta pusom ken ni Jehova. No espesipiko ti kararagmo, nalaklakam a makita ti sungbatna kadagiti ararawmo. Ti sungbat ti kararagmo ket mabalin a saan a kanayon a kas iti pampanunotem, ngem no tarigagayam nga idaydayaw ni Jehova ken agtalinaedka a natarnaw, itedna ti tulong a kasapulam tapno makapagibturka. (1 Juan 5:14) No makitam a tartarabayennaka, ad-adda a sumingedka kenkuana. Nasken met ti panangbasa iti maipapan kadagiti galad ken dalan ni Jehova, kas naipalgak iti Biblia, ken ti panangpampanunot kadagita. Ad-adda a maam-ammom ni Jehova no agmennamennaka. Matukay ti pusom ken umuneg ti panagayatmo kenkuana. (Salmo 19:14) Ket dayta nga ayat, a napatpateg ngem iti aniaman, tulongannaka a mangsaranget iti sulisog ken makapagtalinaed a nasalukag.—1 Juan 5:3.
20 Tapno makapagtalinaedtayo a nasinged ken ni Jehova, nasken met nga agtalinaedtayo a nasinged kadagiti kapammatiantayo. Masalaysay daytoy iti maudi a paset daytoy a broshur.
DAGITI SALUDSOD A MAUSAR ITI PANAGADAL
• Ania ti inaramid ni Jesus idi naipasango iti narigat unay a kasasaad idi dandanin agngudo ti biagna, ken ania ti indagadagna nga aramiden dagiti adalanna? (Par. 1-4)
• Apay a dagiti agdaydayaw ken ni Jehova ti puntiria ni Satanas, ken ania dagiti pamay-anna a mangsulisog kadatayo? (Par. 5-8)
• Tapno masarangettayo ti sulisog, apay a masapul nga agkararagtayo a kanayon (Par. 9-12), rasonable dagiti inanamaentayo (Par. 13-15), laglagipentayo dagiti isyu (Par. 16-17), ken ‘umadanitayo iti Dios’ (Par. 18-20)?
[Kahon iti panid 25]
Dadduma a Pakaigapuan ti Pannakaupay
Salun-at/edad. No agsakittayo iti napaut wenno limitadon ti maaramidantayo gapu iti kinalakay wenno kinabaket, mabalin a maupaytayo agsipud ta nakednganen ti magapuanantayo iti panagserbitayo iti Dios.—Hebreo 6:10.
Pannakapaay. Mabalin a maupaytayo no manmano ti mangipangag iti panangikasabatayo iti Sao ti Dios.—Proverbio 13:12.
Pannakarikna iti kinaawan serbi. Gapu iti pannakairurumenna iti adu a tawen, mabalin a marikna ti maysa a tao nga awan ti mangay-ayat kenkuana, uray ni Jehova.—1 Juan 3:19, 20.
Pannakasair ti rikna. No nasaktan unay ti maysa a tao gapu iti inaramid ti kapammatianna, mabalin a maupay unay ket agduyos a sumardeng a tumabuno kadagiti Nakristianuan a gimong wenno makiraman iti ministerio iti tay-ak.—Lucas 17:1.
Pannakaidadanes. Mabalin a busoren, idadanes, wenno laisendaka dagiti dadduma a saanmo a kapammatian.—2 Timoteo 3:12; 2 Pedro 3:3, 4.
[Ladawan iti panid 26]
Indagadag ni Jesus nga ‘agkararagtayo nga agpatpatuloy’ a dumawat iti tulong a mangsaranget iti sulisog