Agduduma ti opinion dagiti tattao iti intero a lubong maipapan iti arak. Maen-enjoy ti dadduma ti uminum sagpaminsan a kadua dagiti gagayyemda. Dadduma met ti saan a pulos umin-inum. Adda met dagiti uminum nga uray da la mabartek. Ania ti ibaga ti Biblia maipapan iti arak?

1. Dakes kadi ti uminum iti arak?

Saan nga ibaga ti Biblia a dakes ti uminum iti arak. Imbes ketdi, no ibagana ti maipapan iti adu a nagsasayaat a banag nga inted ti Dios kadatayo, karaman iti dayta “ti arak a mangparagsak iti puso ti tao.” (Salmo 104:14, 15) Ibaga ti Biblia nga adda dagiti matalek a lallaki ken babbai nga imminum met iti arak.​—1 Timoteo 5:23.

2. Ania ti balakad ti Biblia kadagiti mayat nga uminum iti arak?

Kagura ni Jehova ti sobra a panaginum iti arak ken panagbarbartek. (Galacia 5:21) Ibaga ti Saona: “Dika makikadua kadagiti managinum iti arak.” (Proverbio 23:20) Isu a no kayattayo ti uminum​—uray awan ti makakitkita kadatayo​—saan koma a sobra ti panaginumtayo nga uray la saantayon a makapanunot a naimbag, saantayon a makontrol ti panagsasao ken panagtigtignaytayo, wenno maapektaranen ti salun-attayo. No saantayo a makontrol ti panaginumtayo, nasaysayaat laengen a saantayo a pulos uminum.

3. Kasanotayo a maipakita a resrespetuentayo ti desision ti dadduma maipapan iti arak?

Desision ti maysa no uminum iti arak wenno saan. Saantayo koma a husgaran ti maysa no kayatna ti uminum iti kalkalainganna, ken saantayo koma met a piliten ti maysa no dina kayat ti uminum. (Roma 14:10) Saantayo koma nga uminum no mangted laeng dayta iti problema iti dadduma. (Basaen ti Roma 14:21.) ‘Sapulentayo ti pagimbagan ti sabali, saan a ti bukodtayo a pagimbagan.’​—Basaen ti 1 Corinto 10:23, 24.

AMMUEM TI AD-ADU PAY

4. Agdesisionka no uminumka wenno saan

Ania ti panangmatmat ni Jesus iti panaginum iti arak? Tapno maammuam ti sungbat, kitaem ti umuna a milagro nga inaramidna. Basaen ti Juan 2:1-11, sa pagsaritaan dagitoy a saludsod:

• Iti dayta a milagro, ania ti maadaltayo iti panangmatmat ni Jesus iti arak ken kadagiti umin-inum iti arak?

• Gapu ta saan met nga imparit ni Jesus ti panaginum iti arak, ania koma ti panangmatmat ti maysa a Kristiano kadagiti mayat nga uminum?

Uray no mabalin nga uminum ti maysa a Kristiano, saanna a kayat a sawen a kanayon a dayta ti husto nga aramidenna. Basaen ti Proverbio 22:3. Kalpasanna, panunotem no kasano nga apektaran dagitoy a situasion ti desisionmo no uminumka wenno saan:

• Agmanehoka wenno agusarka iti machine.

• Masikogka.

• Imbaga ti doktormo a saanka nga uminum iti arak.

• No marigatanka a mangkontrol iti kaadu ti inumem.

• Iparit ti linteg nga uminumka iti arak.

• Adda kaduam a saanna a kayat ti uminum ta marigatan idi a mangkontrol iti panaginumna.

Agidasarka kadi iti arak iti maysa a kasaran wenno dadduma pay a gathering? Tapno matulonganka nga agdesision, i-play ti VIDEO.

VIDEO: Mangisaganaak Kadi iti Arak? (2:41)

Basaen ti Roma 13:13 ken 1 Corinto 10:31, 32. Kalpasan a mabasa ti tunggal teksto, pagsaritaan daytoy a saludsod:

• Kasano a makatulong daytoy a prinsipio tapno makaaramidka iti desision a mangparagsak ken Jehova?

5. Agdesisionka no kasano kaadu ti inumem

No agdesisionka nga uminum iti arak, laglagipem daytoy: Agpayso a saan nga iparparit ni Jehova ti panaginum iti arak, ngem kagurana ti sobra a panaginum. Apay? Basaen ti Oseas 4:11, 18, sa pagsaritaan daytoy a saludsod:

• Ania ti mapasamak no sobra ti panaginum ti maysa?

Kasanotayo a maliklikan ti sobra a panaginum iti arak? Masapul nga agbalintayo a naemma, wenno ammotayo koma ti limitasiontayo. Basaen ti Proverbio 11:2, sa pagsaritaan daytoy a saludsod:

• Apay a nasayaat nga addan desisionmo no kasano laeng kaadu nga arak ti inumem?

6. Maisardengmo ti sobra a panaginum iti arak

VIDEO: ‘Naumaakon iti Panagbiagko’ (6:32)

• Iti video, ania ti epekto ti arak iti kababalin ni Dmitry?

• Dagus kadi a naisardengna ti panagin-inumna?

• Kasanona a naisardeng ti sobra a panagin-inumna?

Basaen ti 1 Corinto 6:10, 11, sa pagsaritaan dagitoy a saludsod:

• Kasano kaserioso ti panagbarbartek?

• Ania ti mangipakita a makapagbalbaliw dagiti sobra ti panaginumna iti arak?

Basaen ti Mateo 5:30, sa pagsaritaan daytoy a saludsod:

• Ti panangputed iti ima kaipapananna nga adda masapul nga isakripisiotayo tapno maparagsaktayo ni Jehova. Ania ti mabalinmo nga aramiden no marigatanka a mangisardeng iti sobra a panaginummo iti arak?a

Basaen ti 1 Corinto 15:33, sa pagsaritaan daytoy a saludsod:

• Ania ti mabalin nga epektona no makikadkaduaka kadagiti sobra ti panaginumna iti arak?

SUMARIO

Impaay ni Jehova ti arak tapno maragsakantayo. Ngem kagurana ti sobra a panaginum ken panagbarbartek.

Rebiu

• Ania ti kuna ti Biblia maipapan iti arak?

• Ania dagiti pagdaksan ti sobra a panaginum iti arak?

• Kasanotayo a maipakita a resrespetuentayo ti desision ti dadduma maipapan iti panaginum iti arak?

AGDISKOBREKA PAY

Kasano a makaaramid dagiti tin-edyer iti umiso a desision maipapan iti panaginum iti arak?

Agpanunot Sakbay nga Uminum (2:31)

Ammuem dagiti makatulong kenka a mangisardeng iti sobra a panaginum iti arak.

“Ti Umiso a Panangmatmat iti Arak” (Ti Pagwanawanan, Enero 1, 2010)

Mabalin kadi nga ag-toast dagiti Kristiano?

“Salsaludsod Dagiti Agbasbasa” (Ti Pagwanawanan, Pebrero 15, 2007)

Iti artikulo a “Nalaingak nga Uminum,” kitaem no kasano a naisardeng ti maysa a lalaki ti sobra a panagin-inumna.

“Ti Biblia Balbaliwanna ti Biag” (Ti Pagwanawanan, Mayo 1, 2012)

Nagduduma ti kayattayo no maipapan iti panagbadbado ken itsuratayo. No surotentayo dagiti prinsipio ti Biblia, saantay laeng a mapili ti kayattayo a bado no di ket maparagsaktayo pay ni Jehova. Kitaentayo ti dadduma kadagita a prinsipio.

1. Ania ti makatulong kadatayo nga agdesision no ania ti ibadotayo ken no ania ti itsuratayo?

Masapul nga agpilitayo iti “maitutop a bado, buyogen ti kinaemma ken kinasimbeng ti panunot,” ken kanayon koma nga agbalintayo a nadalus tapno maipakitatayo nga ‘agdaydayawtayo iti Dios.’ (1 Timoteo 2:9, 10) Kitaem dagitoy nga uppat a prinsipio: (1) Masapul a “maitutop” ti badotayo. Mabalin a nadlawmo kadagiti gimong nga agduduma ti panagbadbado dagiti kakabsat. Ngem kanayon nga ipakita ti panagbadbado ken panagbubuoktayo a resrespetuentayo ni Jehova a Dios. (2) Ti panagbado “buyogen ti kinaemma” kayatna a sawen a saantayo koma nga agbado iti makagargari wenno mangriing iti seksual a tarigagay, wenno mangala iti adu nga atension. (3) Maipakitatayo a ‘nasimbeng ti panunottayo’ no saantayo a suroten ti amin nga uso a panagbadbado ken itsura. (4) Kanayon koma nga ipakita ti itsuratayo nga ‘agdaydayawtayo iti Dios’ tapno nalawag a mailasin ti dadduma nga agserserbitayo iti pudno a Dios.​—1 Corinto 10:31.

2. Apay a masapul nga ikonsiderartayo dagiti kakabsat no agpilitayo iti badotayo?

Agpayso a datayo ti agpili no ania ti ibadotayo, ngem masapul a panunotentayo ti mabalin nga epekto dayta iti dadduma. Ikagumaantayo a saan a maitibkol ti dadduma, no di ket ‘panunotentayo koma ti pagimbagan ti kaarrubatayo tapno mapabileg.’​—Basaen ti Roma 15:1, 2.

3. Kasano a mabalin nga aginteres ti dadduma iti kinapudno no nasayaat ti panagbadbadotayo?

Kanayon nga ikagkagumaantayo a maitutop ken nasayaat ti panagbadbadotayo. Ngem ad-adda koma a panunotentayo ti ibadotayo no mapantayo makigimong wenno mangasaba. Saantay a kayat a ti atension dagiti tattao ket maiturong iti itsuratayo imbes nga iti nagpateg a mensahetayo. Kayattayo a makatulong ti panagbadbado ken itsuratayo tapno awaten ti dadduma ti kinapudno ken ‘maarkosantayo ti pannursuro ti Dios, a Manangisalakan kadatayo.’​—Tito 2:10.

AMMUEM TI AD-ADU PAY

4. Maipakitatayo a resrespetuentayo ni Jehova no nasayaat ti panagbadbado ken itsuratayo

Ania ti kapatgan a rason a kayattayo a nasayaat ti panagbadbado ken itsuratayo? Basaen ti Salmo 47:2, sa pagsaritaan dagitoy a saludsod:

• Gapu ta awittayo ti nagan ni Jehova, ania koma ti epekto dayta iti panagpilitayo iti pagbadotayo?

• Panagkunam, talaga kadi a napateg a panunotentayo ti itsuratayo no mapantayo makigimong ken mangasaba? Apay, wenno apay a saan?

5. Ti makatulong kadatayo nga agpili no ania ti pagbado ken itsuratayo

I-play ti VIDEO.

VIDEO: “Aramidenyo ti Amin a Banag a Pakaidayawan ti Dios” (10:18)

Nangina man wenno nalaka ti badotayo, masapul a nadalus dayta ken maibagay iti situasion wenno okasion. Basaen ti 1 Corinto 10:24 ken 1 Timoteo 2:9, 10. Kalpasanna, pagsaritaan no apay a ditay agbado iti . . .

• narugit wenno saan a desente.

• nakipet, nakiting, wenno makagargari.

Nupay saanen a sursuroten dagiti Kristiano ti Mosaiko a Linteg, adda maadaltayo iti dayta maipapan iti pampanunot ni Jehova. Basaen ti Deuteronomio 22:5, sa pagsaritaan dagitoy a saludsod:

• Apay a masapul a liklikan dagiti lallaki ti panagbadbado ken itsura a pangbabai? Kasta met, apay a masapul a liklikan dagiti babbai ti panagbadbado ken itsura a panglalaki?

Basaen ti 1 Corinto 10:32, 33 ken 1 Juan 2:15, 16, sa pagsaritaan dagitoy a saludsod:

• Apay a masapul a panunotentayo no ti panagbadbado ken itsuratayo ket makaitibkol kadagiti tattao iti lugartayo wenno kadagiti kakabsat?

• Ania a panagbadbado ken itsura dagiti tattao ti uso iti lugaryo?

• Panagkunam, maitutop kadi dayta iti maysa a Kristiano? Apay?

SUMARIO

No nasayaat ti pilpilientayo a bado ken itsuratayo, maipakitatayo a resrespetuentayo ni Jehova ken ti dadduma.

Rebiu

• Apay a napateg ken Jehova ti pilpilientayo a bado ken itsura?

• Ania dagiti makatulong kadatayo nga agdesision maipapan iti panagbadbado ken itsuratayo?

• Kasano a ti panagbadbado ken itsuratayo apektaranna ti panangkita ti dadduma iti pudno a panagdaydayaw?

AGDISKOBREKA PAY

Kitaem no ania ti ipakita ti panagbadbadom maipapan kenka.

“Komusta ti Panaglanglangak?” (Artikulo iti website)

Ammuem no apay a nasayaat nga agpanunotka nga umuna sakbayka nga agpa-tattoo.

“Ania ti Kuna ti Biblia Maipapan iti Tattoo?” (Artikulo iti website)

Kitaem ti dadduma pay a prinsipio a makatulong kadatayo nga agdesision.

“Pakaidayawan Kadi ti Dios ti Panagbadbadom?” (Ti Pagwanawanan, Septiembre 2016)

Kasano a nasursuro ti maysa a babai a mayat a mangparagsak iti Dios nga awaten ti personal a desision ti dadduma maipapan iti panagbadbado ken itsura?

“Pakaitibkolak Idi ti Panagkawkawes ken Panaglanglanga” (Agriingkayo!, Disiembre 22, 2003)