Ti Eskuelaan a Gilead—60 a Tawenen a Mangsansanay Kadagiti Misionero
“GAPU iti naregta a panagadalmi iti Biblia, ad-adda a nayadanikami ken ni Jehova ken ad-adu ti naammuanmi maipapan iti organisasionna. Daytoy ti nangisagana kadakami iti pakaibaonanmi a sabali a pagilian.” Dayta ti nakuna ti maysa a nagturpos iti umuna a klase kas panangiladawanna iti kurso ti panagadalda iti Watchtower Bible School of Gilead. Adun a misionero ti imbaon ti Eskuelaan a Gilead sipud idi inagurasion ti eskuelaan 60 a tawenen ti napalabas. Idi Marso 8, 2003, naangay ti panagturpos ti maika-114 a klase iti Watchtower Educational Center idiay Patterson, New York. Adda 6,404 a naguummong iti auditorium ken kadagiti lugar a nakaipabuyaan ti panagturpos babaen ti telebision. Sipapasnek a nagimdengda iti programa, a pakaibilangan dagiti palawag, interbiu, ken maysa a diskusion ti grupo.
Nagserbi a tserman ni Theodore Jaracz, maysa a kameng ti Bagi a Manarawidwid. Dagiti panglukat a sasaona ket naiturong kadagiti agdengdengngeg a naggapu iti nadumaduma a paset ti lubong—iti Asia, Caribbean, Sentral ken Makin-abagatan nga America, ken Europa. Imbatay ni Kabsat Jaracz dagiti komentona iti 2 Timoteo 4:5, nga intampokna ti kangrunaan a trabaho dagiti misionero a sinanay ti Gilead—ti ‘panangaramid iti trabaho ti managebanghelio.’ Saksian dagiti misionero ti kinapudno babaen ti panangisuro iti Biblia kadagiti tattao.
Immawat Dagiti Estudiante iti Maudi nga Instruksion
Kas panangirugi kadagiti serye ti ababa a palawag, ni John Larson, maysa a kameng ti Branch Committee ti Estados Unidos, impalawagna ti makapabileg-pammati a suheto a “No ti Dios Adda Kadatayo, Siasinonto ti Bumusor Kadatayo?” (Roma 8:31) Inlawlawag ti ispiker ti Nainkasuratan a pangibatayan dagiti estudiante a maaddaan iti naan-anay a panagtalek iti bileg ni Jehova a tumulong kadakuada a mangparmek iti aniaman a mabalin a tubeng kadagiti pakaibaonanda. Iti panangusarna iti Roma 8:38, 39, imbalakad ni Kabsat Larson kadagiti estudiante: “Utobenyo ti bileg nga us-usaren ti Dios agpaay kadakayo, ken laglagipenyo nga awan ti makadadael iti personal a singgalutyo ken ni Jehova.”
Ti simmaruno nga ispiker iti programa isu ni Guy Pierce, maysa a kameng ti Bagi a Manarawidwid. Pinilina ti tema a “Taginayonenyo a Naragsak Dagiti Matayo!” (Lucas 10:23) Inlawlawagna a ti pudno a kinaragsak iramanna ti panangam-ammo ken ni Jehova ken panangtarus iti agnanayon a panggepna agraman ti pannakakita iti kaitungpalan dagiti padto ti Biblia. Sadinoman ti pakaibaonanda, agtultuloy a marikna dagiti estudiante ti pudno a kinaragsak babaen ti panangtaginayonda iti naragsak a mata. Imparegta ni Kabsat Pierce kadagiti nagturpos a mennamennaenda a sipapasnek ti kinaimbag ni Jehova ken ipamaysada ti panunot ken pusoda iti panangaramid iti pagayatanna. (Salmo 77:12) Babaen ti panangtaginayon iti positibo a kababalin, maparmek dagiti nagturpos dagiti aniaman a parikut a mabalin a pakaipasanguanda.
Kalpasanna, nakaawat ti klase iti pammakada a pammaregta manipud iti dua kadagiti instruktor nga inaldaw a nangisuro kadakuada. “Sapsapulenyo Kadi ti Dayag?” ti saludsod nga inyimtuod ni Lawrence Bowen kas pannakatema ti palawagna. Para iti kaaduan a tao, ti dayag ket kaipapananna ti kinatan-ok, dayaw, ken pannakaidumada. Ngem ni salmista nga Asaf, nabigbigna ti pudno a dayag—ti kapatgan a gameng a nadayaw a relasion ken ni Jehova. (Salmo 73:24, 25) Dagiti nagturpos nga estudiante naparegtada a mangtaginayon iti nasinged a relasion ken ni Jehova babaen ti agtultuloy a makagunggona a panagadal iti Biblia. Dagiti anghel ‘tarigagayanda a matmatan’ dagiti detalye maipapan iti pannakaibanag ti panggep ni Jehova babaen ken Kristo. (1 Pedro 1:12) Agingga a mabalin, tarigagayanda ti makasursuro iti maipapan iti Amada tapno maiyanninawda ti dayagna. Kalpasanna, indagadag ti ispiker kadagiti estudiante nga ipadayagda ni Jehova kadagiti teritoriada kas misionero babaen ti panangtulong kadagiti sabsabali a mangsapul iti kapatgan a gameng.
Ti registrar ti eskuelaan, ni Wallace Liverance, inngudona ti umuna a serye dagiti palawag babaen ti tema a “Sawenyo ti Sirib ti Dios iti Sagrado a Palimed.” (1 Corinto 2:7) Ania daytoy nadiosan a sirib a dinakamat ni Pablo bayat ti panagmisionerona? Isu daytoy ti masirib ken nabileg a pamay-an ni Jehova a mangyeg iti sapasap a talna ken panagkaykaysa. Ni Jesus ti nakaisentruan daytoy a sirib. Imbes nga ikasabana ti sosial nga ebanghelio, tinulongan ni Pablo dagiti tattao a mangtarus no kasano a pagpatinggaen ti Dios dagiti imbunga ti basol ni Adan. (Efeso 3:8, 9) Imbalakad ti ispiker kadagiti agdengdengngeg: “Usarenyo ti pribilehioyo nga agserbi kas iti inaramid ni Pablo, a minatmatanna ti kinamisionerona kas maysa a gundaway a tumulong kadagiti tattao a mangtarus no kasano nga ibanag ni Jehova ti panggepna.”
Kalpasan daytoy, ni Mark Noumair, maysa pay nga instruktor ti Gilead, indauluanna ti maysa a narayray a diskusion a kaduana ti sumagmamano nga estudiante ti klase. Ti tema a “Ti Panagadal iti Sao ti Dios Mamataud Kadagiti Naregta a Ministro” intampokna dagiti sasao ni Pablo iti Roma 10:10. Nangisalaysay ti klase iti adu a kapadasanda iti panangasaba bayat ti panageskuelada. Ipakita dagiti kapadasanda a no adalen ken mennamennaentayo ti Sao ti Dios, mapno ti pusotayo kadagiti agkakaimbag a banag maipapan ken ni Jehova a Dios ken iti Pagarianna ket matignaytayo a mangipakaammo kadagita kadagiti sabsabali. Bayat ti lima a bulan a kaaddada iti Watchtower Educational Center, nangirugi dagiti estudiante iti nasurok a 30 a panagadal iti Biblia kadagiti interesado kadagiti masansan a matrabaho a teritoria dagiti kabangibang a kongregasion.
Nangbalakad Dagiti Nataengan
Bayat ti panageskuelada, nagunggonaan dagiti estudiante iti pannakitimpuyog kadagiti kameng ti pamilia ti Bethel idiay Estados Unidos. Dagiti kameng ti sanga nga opisina a da Robert Ciranko ken Robert P. Johnson ininterbiuda dagiti nabayagen nga adipen ni Jehova, agraman dagiti agdaldaliasat a manangaywan a madama nga umaw-awat iti espesial a pannakasanay iti Watchtower Educational Center. Nagturpos iti Gilead ken nagserbi idi kas misionero dagiti amin a nainterbiu. Napabileg dagiti estudiante ken dagiti kapamilia ken gagayyemda idi mangngegda dagiti nainsiriban a sasao manipud kadagitoy aduan kapadasan a naespirituan a lallaki.
Imbalakad ti dadduma: “Aramidenyo ti amin a kabaelanyo nga agtalinaed nga okupado iti ministerio ken iti kongregasion.” “Saanyo nga iyun-una ta bagiyo. Ipamaysayo ti panggepyo kas misionero, ken ibilangyo a lugaryo ti pakaibaonanyo.” Dagiti dadduma a makatulong a komento ipakitada no kasano a ti panangsanay ti Gilead kabalanna ti ministro maipaay iti naimbag nga aramid, sadinoman ti pakaibaonanna. Adtoy ti sumagmamano a komentoda: “Nasursuromi ti makitinnulong ken agtrabaho a sangsangkamaysa.” “Tinulongannakami ti eskuelaan a makibagay kadagiti baro a kultura.” “Naisuro kadakami nga usaren ti Kasuratan iti sabali a punto de bista.”
Ni John E. Barr, maysa a nabayag a kameng ti Bagi a Manarawidwid, imparangna ti tampok a palawag iti programa. Impalawagna ti Nainkasuratan a tema nga “Iti Intero a Daga Rimmuar ti Timekda.” (Roma 10:18) Inyimtuodna, Nabalinan kadi ti ili ti Dios nga itungpal daytoy narigat a trabaho ita? Wen, nabalinanda! Uray idi 1881, nayimtuod kadagiti agbasbasa iti magasin a Pagwanawanan: “Mangaskasabaka kadi?” Kalpasanna, impalagip ti ispiker kadagiti amin nga agdengdengngeg ti nayawag iti kombension idi 1922 idiay Cedar Point, Ohio, E.U.A.: “Ipablaakyo ti Ari ken ti Pagarianna!” Iti panaglabas ti tiempo, ti regta dagiti matalek nga adipen ti Dios tinignayna ida a mangipakaammo kadagiti naisangsangayan a kinapudno maipapan iti Pagarian kadagiti amin a pagilian. Babaen ti nayimprenta a material ken babaen ti panagsao, naidanon ti naimbag a damag kadagiti ungto ti mapagnaedan a daga—a pakaidayawan ken pakaitan-okan amin ni Jehova. Iti makagutugot a konklusion, imbalakad ni Kabsat Barr kadagiti nagturpos a laglagipenda dagiti bendisionda, a kunkunana: “Iti inaldaw, no agkararagkayo ken ni Jehova iti teritoriayo, naimpusuan nga agyamankayo kenkuana gapu iti pasetyo iti kaitungpalan ti sasao nga, ‘Iti intero a daga rimmuar ti timekda.’”
Kalpasan ti palawag, naibasa dagiti kablaaw, ket ti tserman inyawatna ti diploma ti tunggal nagturpos. Kalpasanna, gapu ta panawandan ti impatpategda nga eskuelaan, maragsakan a maladingitan nga imbasa ti maysa a pannakabagi ti klase ti naimpusuan a resolusion a naiturong iti Bagi a Manarawidwid ken iti pamilia ti Bethel, a mangyeb-ebkas iti determinasion dagiti nagturpos a mangidayaw ken ni Jehova “manipuden ita ken agingga iti tiempo a di nakedngan.”—Salmo 115:18.
Ikararagtayo a dagitoy a nagturpos mairuamda ti bagbagida kadagiti baro a pagnaedanda ken dakkel ti maitulongda iti panagrang-ay ti sangalubongan a trabaho a panangasaba, kas iti inaramid dagidiay immuna kadakuada iti naglabas nga agarup 60 a tawen.
[Kahon iti panid 23]
ESTADISTIKA TI KLASE
Bilang dagiti pagilian a nairepresentar: 12
Bilang dagiti pagilian a pakaibaonanda: 16
Bilang dagiti estudiante: 48
Promedio nga edad: 34.4
Promedio a tawen iti kinapudno: 17.6
Promedio a tawen iti amin-tiempo a ministerio: 13.5
[Ladawan iti panid 24]
Ti Maika-114 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5)Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.