Panangmatmat ti Biblia

Mapennekmo ti Naespirituan a Kasapulam

DAGITI tattao ket agkasapulan iti naespirituan a taraon a kas iti panagkasapulanda iti pisikal a taraon. Ngem no maipapan iti pisikal a taraon, adu ti pagpiliantayo ta nadumaduma ti mabalintayo a pangsustiner iti biagtayo. Kasta met la kadi no maipapan iti naespirituan a taraon? Nakaad-adu dagiti aramid a nainaig iti kultura ken relihion a makaipaay kano iti pannakapnek.

Patien ti adu a no la ket ta makipasetda iti aniaman nga aramid a nainaig iti kultura ken relihion, saanen a napateg no ania ti kayatda a patien wenno no kasano ti wagas ti panagdaydayawda. Ania ti makunam? Napateg kadi no kasano ti panangpennekmo iti naespirituan a kasapulam? Ania ti kuna ti Biblia?

Ti Nainaig iti Pudno nga Espiritualidad

Iti Genesis 1:27, ipakaammo ti Biblia no apay nga addaantayo iti naespirituan a panagkasapulan: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.” Yantangay ni Jehova a Dios ket maysa nga espiritu, saan nga iti langa ti tuktukoyen dayta a panagpada, no di ket kadagiti galad. Kas iti Namarsua kenkuana, ti umuna a tao a ni Adan kabaelanna nga iparangarang dagiti galad kas iti di managimbubukodan nga ayat, asi, pannakipagrikna, hustisia, ken panagteppel. Addaan met iti konsiensia, ti nainkasigudan nga abilidadna a mangilasin iti naimbag ken dakes, a mangigiya iti panangusarna iti wayawayana nga agdesision maitunos kadagiti linteg ti Dios. Dagitoy a galad ti nakaidumaanna kadagiti animal a pinarsua ti Dios ken dagita ti nakatulong kenkuana a mangaramid iti pagayatan ti Namarsua kenkuana.—Genesis 1:28; Roma 2:14.

Ilawlawag ti Biblia ti maysa a napateg a banag a makatulong kadatayo a mangpennek iti naespirituan a kasapulantayo. Iti 1 Corinto 2:12-15, nadeskribir ti naespirituan a tao kas daydiay umaw-awat iti espiritu ti Dios. Daytoy nga espiritu ket ti aktibo a puersa ti Dios. Masapul nga adda dayta iti maysa a tao tapno maammuanna ti naespirituan a bambanag. Iti kasta, masukimat ken maawatanna ti aniaman sigun iti panangmatmat ti Dios. Iti sabali a bangir, daydiay awanan iti espiritu ti Dios ket maawagan iti pisikal a tao, ta ibilangna a minamaag ti naespirituan a bambanag. Kas resultana, iti natauan a sirib laeng ti pagpampannurayanna.

Gapuna, nupay addaantayo iti abilidad nga agtignay ken agpanunot a kas iti Dios gapu ta pinarsuanatayo iti ladawanna, saantayo a mapatanor ti pudno nga espiritualidad babaen iti bukodtayo a pannakaammo, sirib, ken gapuanan. Kasapulantayo ti tulong ti nasantuan nga espiritu ti Dios. Kinapudnona, dagidiay mangipangpangruna iti bukodda a tarigagay ken iti di nadiosan a bambanag imbes nga agpaidalanda iti espiritu ti Dios ket nadeskribir kas awanan iti espiritualidad. Agpapaimpluensiada kadagiti nainlasagan a tarigagay ken pagannayasanda.—1 Corinto 2:14; Judas 18, 19.

Panangpennek iti Kasapulantayo

Ti pudno a naespirituan a pannakapnek ket mangrugi iti panangbigbig ken Jehova kas ti Namarsua ken nakautangantayo iti biagtayo. (Apocalipsis 4:11) Maamiristayo ngarud a sa la adda kaipapanan ti biagtayo no aramidentayo ti pagayatanna. (Salmo 115:1) Adda direksion ti biagtayo no aramidentayo ti pagayatan ti Dios, maysa a paset ti panagdaydayawtayo a kas kapateg ti pisikal a taraon. Gapuna, ni Jesus a pagaammo kas naespirituan a tao, kinunana: “Ti taraonko isu ti panangaramidko iti pagayatan daydiay nangibaon kaniak.” (Juan 4:34) Ti panangaramid iti pagayatan ti Dios ti nangpapigsa, nangbang-ar, ken nangyeg kenkuana iti pannakapnek.

Yantangay naparsuatayo iti ladawan ti Dios, ti pudno a naespirituan a pannakapnek ket agpannuray met iti panangitunostayo iti personalidadtayo iti Namarsua kadatayo. (Colosas 3:10) No kasta ti aramidentayo, maliklikantayo dagiti aramid a pakaibabainan wenno mangdadael iti relasiontayo iti sabsabali. (Efeso 4:24-32) No agbiagtayo maitunos kadagiti pagalagadan ni Jehova, sumayaat ti kabibiagtayo ken mangyeg iti pudno a talna ti panunot tangay awan pakaburiboran ti konsiensiatayo.—Roma 2:15.

Imbaga ni Jesus ti maysa pay a kangrunaan a kinapudno maipapan iti panangpennektayo iti naespirituan a kasapulantayo. Kinunana: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Masapul a kanayon nga asikasuentayo ti espiritualidadtayo. Babaen iti Biblia, ipapaay ni Jehova dagiti sungbat kadagiti saludsod maipapan iti biag, a gagangay nga iyim-imtuod ti amin a tao.—2 Timoteo 3:16, 17.

Ti Gubuayan ti Pudno a Kinaragsak

Tapno mapennek ti bisin ti maysa a tao, nalabit a mangan iti sitsiria. Umasping iti dayta, mabalin nga arigna agbussogtayo kadagiti aramid ken pilosopia a kasla mangpennek iti panagbisintayo iti naespirituan. Ngem sigurado a ti pannangan iti saan a nasustansia ket agresulta iti malnutrision, sakit, wenno nakarkaro pay. Sigurado a madangrantayo met no di umiso ti panangpennektayo iti naespirituan a kasapulantayo.

Nupay kasta, no patanorentayo ti relasiontayo ken Jehova a Dios, ikagumaantayo nga aramiden ti pagayatanna, ken agpaiwanwantayo kenkuana, mapaneknekantayo a pudno ti kinuna ti Biblia: “Naragsak dagidiay sipapanunot iti naespirituan a kasapulanda.”—Mateo 5:3.

NAPANUNOTMO KADIN?

◼ Apay nga addaanka iti naespirituan a panagkasapulan?—Genesis 1:27.

◼ Mapennektayo kadi a bukbukod ti naespirituan a kasapulantayo?—1 Corinto 2:12-15.

◼ Ania ti rumbeng nga aramidentayo tapno mapennek ti naespirituan a kasapulantayo?—Mateo 4:4; Juan 4:34; Colosas 3:10.

[Blurb iti panid 13]

Sigurado a madangrantayo no di umiso ti panangpennektayo iti naespirituan a kasapulantayo