Panagmula Kadagiti Bin-i ti Kinapudno Maipapan iti Pagarian
“Iti bigat imulam ti bin-im, ket iti rumabii dika pagsardengen ta imam.”—ECLESIASTES 11:6.
1. Iti ania a pamay-an a dagiti Kristiano agmulmulada iti bin-i?
NAPATEG ti agrikultura iti kagimongan dagiti Hebreo idi ugma, iti Naikari a Daga a nagnaedan ni Jesus iti unos ti panagbiagna. Dayta ti gapuna a nagaramat ni Jesus kadagiti ilustrasion a mainaig iti agrikultura. Kas pagarigan, inyarigna ti panangikasaba iti naimbag a damag ti Pagarian ti Dios iti panagimula iti bin-i. (Mateo 13:1-9, 18-23; Lucas 8:5-15) Agingga kadagitoy nga aldaw, agnanaedtay man wenno saan iti kagimongan a panagtalon ti pagbiagan dagiti tattao, ti panangimula iti naespirituan a bin-i iti kastoy a wagas ti kapatgan a trabaho dagiti Kristiano.
2. Kasano kapateg ti trabahotayo a panangasaba, ket ania dagiti maar-aramid ita tapno maitungpal dayta?
2 Iti daytoy tiempo ti panungpalan, naindaklan a pribilehio ti panagimula iti kinapudno nga adda iti Biblia. Nagsayaat ti panangyebkas ti Roma 10:14, 15 iti kinapateg daytoy a trabaho: “Kalpasanna, kasano a mangngegdanto no awan ti mangasaba? Kalpasanna, kasano ti panangasabadanto malaksid no naibaonda? Kas adda a naisurat: ‘Anian a nagimnas ti saksaka dagidiay mangideklara ti naimbag a damag dagiti naimbag a bambanag!’” Ad-adda ita a nasken a maitungpal daytoy nga annongen nga inted ti Dios buyogen ti positibo a kababalin. Dayta ti gapuna a siaagawa nga agipabpablaak ken agiwarwaras dagiti Saksi ni Jehova kadagiti Biblia ken katulongan iti panagadal iti Biblia iti 340 a pagsasao. Tapno maipablaak dagitoy a publikasion, kasapulan ti nasurok a 18,000 a boluntario iti hedkuarter ken kadagiti sanga nga opisinada iti nadumaduma a pagilian. Ket agarup innem a milion a Saksi ti agiwarwaras kadagitoy a literatura ti Biblia iti intero a lubong.
3. Ania ti magapgapuanan ti pannakaimula ti kinapudno maipapan iti Pagarian?
3 Ania ti bunga daytoy a panagbannog? Kas idi nabiit pay a naipasdek ti Kristianidad, adu ita ti mangipangpangag iti kinapudno. (Aramid 2:41, 46, 47) Nupay kasta, napatpateg ngem iti kaadu dagiti kabbaro a nabautisaran nga agibumbunannag iti Pagarian ti banag a makatulong daytoy naindaklan a panangsaksi iti pannakasantipikar ti nagan ni Jehova ken iti pannakaalangonna kas maymaysa a pudno a Dios. (Mateo 6:9) Maysa pay, ti pannakaammo iti Sao ti Dios pasayaatenna ti biag ti adu a tattao ken mangiturong iti pannakaisalakanda.—Aramid 13:47.
4. Kasano kapasnek ti pannakaseknan dagiti apostol kadagiti tattao a kinasabaanda?
4 Nabigbig dagiti apostol ti makaispal-biag a kinapateg ti naimbag a damag, ket maseknanda unay kadagidiay kinasabaanda. Nabatad daytoy iti sasao ni apostol Pablo idi insuratna: “Yantangay adda nadungngo a panagayatmi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.” (1 Tesalonica 2:8) Iti panangipakitada iti kasta a napaypayso a pannakaseknan kadagiti tattao, ni Pablo ken dagiti dadduma pay nga apostol tinuladda ni Jesus ken dagiti anghel sadi langit, a nairaman unay iti daytoy makaispal-biag a trabaho. Repasuentayo ti napateg a paset dagitoy a nailangitan nga adipen ti Dios iti pannakaimula ti kinapudno maipapan iti Pagarian, ket kitaentayo no kasano a mapabilegnatayo ti ulidanda a mangaramid iti pasettayo.
Ni Jesus—Ti Agmulmula iti Kinapudno Maipapan iti Pagarian
5. Ania a trabaho ti kangrunaan nga inaramid ni Jesus idi adda ditoy daga?
5 Kas perpekto a tao, adda pannakabalin ni Jesus a mangipaay iti adu nga agkakaimbag a material a kasapulan dagiti tattao idi tiempona. Kas pagarigan, mabalinna koma a kinorehir ti adu kadagiti di umiso a kapanunotan mainaig iti medisina idi kaaldawanna, wenno mabalinna koma a pinarang-ay ti pannakaawat ti tao iti dadduma pay a siensia. Ngem imbatadna iti rugrugi ti ministeriona nga isu ket naibaon a mangikasaba iti naimbag a damag. (Lucas 4:17-21) Idi agngudon ti ministeriona, kinunana: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Iti kasta, siaagawa a nagmula kadagiti bin-i ti kinapudno maipapan iti Pagarian. Napatpateg ti panangisurona kadagiti tattao maipapan iti Dios ken kadagiti panggepna ngem iti aniaman a sabali nga edukasion a maipaay koma ni Jesus kadakuada.—Roma 11:33-36.
6, 7. (a) Ania ti naisangsangayan nga inkari ni Jesus sakbay nga immuli sadi langit, ket kasanona a tungtungpalen dayta? (b) Kasano nga apektarannakayo a mismo ti panangmatmat ni Jesus iti trabaho a panangasaba?
6 Inladawan ni Jesus ti bagina kas Agmulmula iti kinapudno maipapan iti Pagarian. (Juan 4:35-38) Nagitukit kadagiti bin-i ti naimbag a damag iti amin a gundaway. Uray idi dandanin matay iti kayo a nakaibitinanna, impakaammona ti naimbag a damag maipapan iti masanguanan a paraiso a daga. (Lucas 23:43) Maysa pay, ti nalaus a pannakaseknanna a maikasaba ti naimbag a damag ket saan a nagpatingga iti ipapatayna iti kayo a pagtutuokan. Sakbay nga immuli sadi langit, binilinna dagiti apostol nga itultuloyda ti agmula kadagiti bin-i ti kinapudno maipapan iti Pagarian ken mangaramid kadagiti adalan. Kalpasanna, adda naisangsangayan nga inkari ni Jesus. Kinunana: “Adtoy! addaak kadakayo iti isuamin nga al-aldaw agingga iti panungpalan ti sistema ti bambanag.”—Mateo 28:19, 20.
7 Kadagitoy a sasao, inkari ni Jesus a suportaran, iturong, ken saluadanna ti trabaho a panangikasaba iti naimbag a damag “iti isuamin nga al-aldaw agingga iti panungpalan ti sistema ti bambanag.” Maseknan ni Jesus agingga ita iti trabaho a panagebanghelio. Isu ti Pangulotayo, a mangimatmaton iti pannakaimula ti kinapudno maipapan iti Pagarian. (Mateo 23:10) Kas Ulo ti kongregasion Kristiano, isu ti nangitalkan ni Jehova iti daytoy sangalubongan a trabaho.—Efeso 1:22, 23; Colosas 1:18.
Ipakpakaammo Dagiti Anghel ti Naimbag a Damag
8, 9. (a) Kasano nga ipakpakita dagiti anghel ti napaypayso a pannakaseknan iti mapaspasamak kadagiti tattao? (b) Iti ania a pamay-an a maikuna a buybuyaendatayo dagiti anghel?
8 Idi pinarsua ni Jehova ti daga, dagiti anghel “nagdaniwda a sangsangkamaysa, . . . ken dimmir-ida gapu iti rag-o.” (Job 38:4-7) Sipud idin, maseknan unay dagitoy a nailangitan a parsua iti mapaspasamak kadagiti tattao. Inusar ida ni Jehova a mangidanon kadagiti nadibinuan a mensahe kadagiti tattao. (Salmo 103:20) Pudno la unay daytoy mainaig iti pannakairakurak ti naimbag a damag iti tiempotayo. Iti paltiing a naited kenkuana, nakita ni apostol Juan ti maysa nga “anghel a tumaytayab iti nagtangatangan” nga addaan iti “agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribo ken pagsasao ken ili, a kunkunana iti natbag a timek: ‘Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen.’”—Apocalipsis 14:6, 7.
9 Iti Biblia, nailadawan dagiti anghel kas ‘espiritu a maipaay iti publiko a panagserbi, a naibaon tapno agserbida kadagidiay agtawidto iti pannakaisalakan.’ (Hebreo 1:14) Bayat a sigagagar nga itungtungpal dagiti anghel ti annongenda, mapalpaliiwdatayo ken ti trabahotayo. Kas man la addatayo iti naparang nga entablado ti teatro a mangan-annong iti trabahotayo iti imatang dagiti anghel sadi langit. (1 Corinto 4:9) Anian a makaliwliwa ken makaparagsak a maammuan a saan laeng a datayo ti agtartrabaho kas agmulmula iti kinapudno maipapan iti Pagarian!
Sigagagar nga Aramidentayo ti Pasettayo
10. Kasano a mayaplikar iti trabahotayo a panagebanghelio ti praktikal a balakad iti Eclesiastes 11:6?
10 Apay a maseknan unay ni Jesus ken dagiti anghel iti trabahotayo? Adda maysa a makagapu nga inted ni Jesus idi kinunana: “Ibagak kadakayo, adda panagrag-o kadagiti anghel ti Dios gapu iti maysa a managbasol nga agbabawi.” (Lucas 15:10) Addaantay met iti kasta a napaypayso a pannakaseknan kadagiti tattao. Gapuna, aramidentayo ti amin a kabaelantayo a mangitukit kadagiti bin-i ti kinapudno maipapan iti Pagarian iti uray sadinoman. Mayaplikar iti trabahotayo ti kuna ti Eclesiastes 11:6, nga iti dayta balakadannatayo ti Biblia: “Iti bigat imulam ti bin-im, ket iti rumabii dika pagsardengen ta imam; ta dika ammo nga agrang-ayto, no daytoy wenno daydiay, wenno isuda nga agpadpada naimbagdanto.” Ipapantayon nga iti tunggal tao a mangipangag iti mensahetayo, mabalin a ginasut wenno rinibu pay ketdi dagiti di mangikankano iti dayta. Ngem kas kadagiti anghel, agrag-otayo no “adda [uray] maysa a managbasol” a mangawat iti mensahe ti pannakaisalakan.
11. Kasano kaepektibo ti panangusar kadagiti publikasion a naibatay iti Biblia?
11 Adu ti ramanen ti panangikasaba iti naimbag a damag. Ti maysa a napateg a katulongan iti daytoy a trabaho ket dagiti publikasion a naibatay iti Biblia nga us-usaren dagiti Saksi ni Jehova. Iti dadduma a kasasaad, mayarig met dagitoy a publikasion kadagiti bin-i a maipuruak iti amin a disso. Ditay la ammo no sadino nga agtubo dagitoy. No dadduma, mabalin nga adu nga ima ti paglabasan ti maysa a publikasion sakbay nga adda mangbasa iti dayta. Mabalin nga imaniobra pay ketdi ni Jesus ken dagiti anghel ti kasasaad nga agpaay iti pagimbagan dagiti tattao a nalinteg ti panagpuspusoda. Usigenyo ti sumagmamano a kapadasan a mangipakita no kasano a maibanag ni Jehova dagiti di ninamnama ken nagsayaat a resulta babaen kadagiti literatura a naipaima kadagiti tattao.
Ti Aramid ti Pudno a Dios
12. Kasano a nakatulong ti daan a magasin iti maysa a pamilia a mangam-ammo ken Jehova?
12 Agnanaed idi da Robert, Lila, ken dagiti annakda iti dakkel a siudad, ngem idi 1953 immakarda iti daan ken agrakrakaya a balay iti maysa nga away idiay Pennsylvania, E.U.A. Di nagbayag kalpasan ti iyaakarda, inkeddeng ni Robert ti agaramid iti banio iti sirok ti nakubong nga agdan. Idi linekkabna ti sumagmamano a tabla, natakuatanna nga iti likudan ti diding adda dagiti pigis a papel nga intaray dagiti utot, awan nagyanda a balay ti walnut, ken dadduma pay. Adda iti tengnga amin dagitoy ti maysa a kopia ti magasin a The Golden Age. Naginteres ni Robert iti maysa nga artikulo maipapan iti panangpadakkel kadagiti annak. Nagustuanna unay ti nalawag, naibatay-Biblia a balakad a nabasana iti magasin ket imbagana ken ni Lila a makimiembroda iti “relihion ti The Golden Age.” Kalpasan ti sumagmamano la a lawas, simmarungkar dagiti Saksi ni Jehova iti pagtaenganda, ngem kinuna ni Robert kadakuada nga interesado ti pamiliana iti laeng “relihion ti The Golden Age.” Kinuna dagiti Saksi a saanen a The Golden Age ti paulo ti magasin no di ket Awake! Manipud idin, regular a nakipagadal iti Biblia da Robert ken Lila kadagiti Saksi ni Jehova, ket idi agangay nagpabautisarda. Immulada met dagiti bin-i ti kinapudno kadagiti annakda ket nagapitda iti nawadwad. Bautisado nga ad-adipen ni Jehova a Dios ti nasurok a 20 a kameng daytoy a pamilia, a pakairamanan ti amin a pito nga annak da Robert ken Lila.
13. Ania ti nangtignay iti maysa a pagassawaan idiay Puerto Rico nga aginteres iti Biblia?
13 Agarup 40 a tawenen ti napalabas, saan nga interesado idi nga agadal iti Biblia da William ken Ada, agassawa a taga Puerto Rico. Tunggal adda mapan a Saksi ni Jehova iti balayda, pagparangenda nga awan ti tao. Naminsan, napan ni William iti maysa a junkshop tapno gumatang iti kasapulanna a pangtarimaan iti balayda. Idi agawiden, adda nadlawna a dumuyaw a berde a libro iti basuraan. Daytoy ket ti libro a Religion nga impablaak dagiti Saksi ni Jehova idi 1940. Inyawid ni William dayta a libro ket naklaat idi nabasana ti maipapan iti nagdumaan ti palso ken ti pudno a relihion. Idi simmarungkar manen dagiti Saksi ni Jehova, siraragsak a dimngeg da William ken Ada iti mensaheda ket rinugianda ti nakipagadal iti Biblia. Sumagmamano a bulan kalpasanna, nagpabautisarda iti Divine Will International Assembly idi 1958. Nasuroken a 50 a tattao ti natulonganda nga agbalin a paset ti Nakristianuan a panagkakabsattayo.
14. Kas ipakita ti maysa a kapadasan, ania ti maaramidan dagiti literaturatayo a naibatay iti Biblia?
14 Sangapulo ket maysa laeng idi ti tawen ni Karl ken adda pilpiliona. Iti panagriknana, kasla kanayon a maipaspasango iti gulo. Maysa nga Aleman a Metodista a manangaskasaba ni tatangna. Insuro kenkuana ni tatangna a no matay dagiti dakes a tattao, mapuoranda idiay impierno. Gapuna, kabuteng unay ni Karl ti impierno. Maysa nga aldaw idi 1917, adda nakita ni Karl a polieto iti lansangan ket pinidutna. Idi basaenna, naiturong a dagus ti matana iti saludsod nga: “Ania ti impierno?” Maysa daytoy nga imbitasion iti diskurso publiko maipapan iti impierno. Inyurnos dayta dagiti Estudiante ti Biblia, a pagaammo itan kas dagiti Saksi ni Jehova. Awan pay makatawen, kalpasan ti sumagmamano a daras a panagadalna iti Biblia, nabautisaran ni Karl, iti kasta nagbalin a maysa kadagiti Estudiante ti Biblia. Idi 1925, naawis nga agtrabaho iti sangalubongan a hedkuarter dagiti Saksi ni Jehova—a pagserserbianna agingga ita. Nasurok a walo a dekadan ti kapaut ti Nakristianuan a karerana a nangrugi babaen ti papel a napidutna iti lansangan.
15. Ania ti kabaelan ni Jehova nga aramiden sigun iti pagayatanna?
15 Pudno, ditay maibaga no direkta nga adda pakainaigan ken no kasano kadakkel ti paset dagiti anghel kadagitoy a kapadasan. Ngem pulos a ditay koma pagduaduaan nga adda aktibo a paset ni Jesus ken dagiti anghel iti trabaho a panangasaba ken maiturong ni Jehova dagiti bambanag sigun iti pagayatanna. Dagitoy ken ti adu nga umasping a kapkapadasan ipakitada ti nasayaat a maaramidan dagiti literatura a naipaimatayo.
Ti Gameng a Naitalek Kadatayo
16. Ania ti maadaltayo iti sasao ti 2 Corinto 4:7?
16 Dinakamat ni apostol Pablo ti maipapan iti “gameng kadagiti dinamili a basehas.” Dayta a gameng ket isu ti inted ti Dios nga annongen a mangasaba, ket dagiti damili a basehas isu dagiti tattao a nangitalkan ni Jehova iti daytoy a gameng. Yantangay imperpekto ken limitado ti kabaelan dagitoy a tattao, kinuna pay ni Pablo a naitalek kadakuada dayta nga annongen tapno “ti pannakabalin a nalablabes ngem ti gagangay biang koma ti Dios ket saan nga iti bagbagi[tayo].” (2 Corinto 4:7) Wen, makapagtalektayo ken Jehova nga ipaayna ti bileg a kasapulantayo tapno maitungpaltayo ti intedna a trabaho.
17. Aniada a kasasaad ti pakaipasanguantayo bayat nga agmulmulatayo kadagiti bin-i ti kinapudno maipapan iti Pagarian, ngem apay a taginayonentayo ti positibo a kababalin?
17 Masansan a nasken nga agsakripisiotayo. Mabalin a narigat wenno saan a nanam-ay ti mangasaba iti dadduma a teritoria. Adda dagiti lugar a kasla saan pulos nga interesado ti kaaduan kadagiti tattao, a bumusorda pay ketdi. Mabalin nga ikarkarigatantayo ti mangasaba kadagita a lugar ngem kasla awan pagmamaayanna. Ngem saan nga ubbaw ti panagreggettayo ta nagdakkel a banag ti nakapusta. Laglagipenyo, dagiti bin-i nga imulayo maipaayanda dagiti tattao iti ragsak ita ken biag nga agnanayon iti masanguanan. Namin-adun a napaneknekan a pudno ti kuna ti Salmo 126:6: “Ti mapan ket agsangsangit, nga agawit iti bin-i nga imulana, awan duadua nga agawidto a siraragsak, nga ikuyogna dagiti binettekna.”
18. Kasanotay a maitultuloy nga asikasuen ti ministeriotayo, ken apay?
18 Ditay palabsen ti tunggal maitutop a gundaway a siaagawa nga agmula iti bin-i ti kinapudno maipapan iti Pagarian. Pulos a ditay koma liplipatan a nupay datayo ti mangimula ken mangsibug kadagiti bin-i, ni Jehova ti mangpadakkel. (1 Corinto 3:6, 7) Nupay kasta, no kasano nga ar-aramiden ni Jesus ken dagiti anghel ti pasetda iti daytoy a trabaho, namnamaen ni Jehova a naan-anay nga itungpaltayo ti ministeriotayo. (2 Timoteo 4:5) Sapay koma ta itultuloytay nga asikasuen ti isursurotayo, ti kababalintayo, ken taginayonentayo ti gagartayo iti ministerio. Apay? Sumungbat ni Pablo: “Babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.”—1 Timoteo 4:16.
Ania ti Naadaltayo?
• Kasano a mangpatpataud kadagiti nasayaat a bunga ti trabahotayo a panagmula?
• Kasano a makipaspaset ni Jesu-Kristo ken dagiti anghel iti trabaho a panagebanghelio iti kaaldawantayo?
• Apay nga agbalintay koma a naagawa kas managmula iti kinapudno maipapan iti Pagarian?
• No saan nga interesado wenno busorendatayo dagiti tattao iti ministeriotayo, ania ti mangtignay kadatayo nga agandur?
[Ladawan iti panid 15]
Kas kadagiti mannalon iti nagkauna nga Israel, siaagawa nga agmulmula ita dagiti Kristiano kadagiti bin-i ti kinapudno maipapan iti Pagarian
[Ladawan iti panid 16, 17]
Agipabpablaak ken agiwarwaras dagiti Saksi ni Jehova iti nadumaduma a publikasion a naibatay iti Biblia iti 340 a pagsasao