“Dikay Agbalin a Di Agkaasmang a Naisangol”
DAGITI dua a toro a nailadawan ditoy ket addaan iti naindaklan a bileg, a tumulong kadakuada a mangguyod a sinanam-ay kadagiti nadagsen nga awit. Ngem no ngay nasukatan ti maysa kadagiti toro iti asno. Yantangay basbassit ken nakapkapuy ti asno ngem iti toro, mabalin nga agtukiad daytoy babaen ti panangkugtarna kadagiti pallatiwan a mangtengtengngel kenkuana iti daytoy di agkaasmang a sangol. Gapuna, buyogen ti naimbag a rason, kinuna ti linteg ti Dios iti Israel: “Dikanto pagarado ti baka ken asno nga aggiddan.”—Deuteronomio 22:10.
Nagsurat ni apostol Pablo iti umasping a banag maipanggep kadagiti tattao. Kinunana: “Dikay agbalin a di agkaasmang a naisangol kadagiti di manamati.” (2 Corinto 6:14) Nangnangruna a rumbeng a laglagipen daytoy no agpili iti asawaen. Ti panagasawa ket permanente a panagkadua, ta kinuna ni Jesu-Kristo: “Ti pinagmaymaysa ti Dios saan koma a pagsinaen ti tao.” (Mateo 19:6) Adu a ladingit ti ibungana no ti pagassawaan ket saanda nga agpada iti narelihiosuan a pammati, prinsipio, ken kalat. Gapuna, nainkalintegan laeng a suroten ti pammagbaga ti Biblia a mangasawa ‘laeng iti Apo.’ (1 Corinto 7:39) Ti pannakiasawa iti diyo kapammatian mabalin a mangyeg iti dakdakkel pay a parikut ngem ti panangisangol iti maysa a toro iti asno.
Ti panagduma iti narelihiosuan a pammati ket maysa laeng a banag a mamagbalin iti pagassawaan a di agkaasmang a naisangol. Uray no agkapammatianda, nasayaat no isaludsod dagiti dandanin agasawa, ‘Agpadakami kadi iti kalat? Sadinonto ti pagnaedanmi? Siasinonto ti agiggem iti kuarta? Agtrabahokamto aya a dua? Ania ngay ti maipapan kadagiti annak? Iwanwanto aya ti kinaasi ken konsiderasion ti relasionmi?’
No dadduma, ti wagas a pannakausig dagiti kasta nga isyu mabalin nga isut’ mangipakita no ti sangol ket agkaasmangto wenno saan. Siempre, awan dua a tao nga agtunos a naan-anay. Kaaduanna, nupay kasta, no makapagtunosda a mangsango ken mangrisut kadagiti parikut kabayatan ti panaginnarem ken no mapagtalinaedda a silulukat ti linia ti komunikasion, mabalin nga agkaasmangdanto.