‘Agmula iti Nawadwad, Agani iti Nawadwad’

“Ti agmula a siimut aganinto iti iniimut; ket ti agmula iti nawadwad aganinto met iti nawadwad.”​—2 CORINTO 9:6.

1. Apay a ni Jehova a Dios ti kararagsakan a persona iti uniberso?

TI Diostayo a ni Jehova isu “ti naragsak a Dios.” Maysa a rason awan duadua ket gapu ta isu ti nawadwad a Mannangted. Ti Anakna, a ni Jesu-Kristo, ti nangilawlawag: “Naragragsak a banag ti mangted ngem ti umawat.” (1 Timoteo 1:11; Aramid 20:35) Awan pay ti nakaited ti ad-adu ngem ni Jehova​—manipud iti panangpaaddana iti bugbugtong nga Anakna, ti Logos, agingga iti agdama a tiempo. Gapuna awan duadua isu ti karagsakan a persona iti intero nga uniberso.

2, 3. (a) Kadagiti ania a pamay-an a ti Dios nagmula iti nawadwad? (b) Apay a maikuna a ni Jehova ti nakapagapit ken agapitto pay a siwawadwad?

² Ti medio umas-asping a prinsipio ti naiyebkas idiay 2 Corinto 9:6: “Ti nagmula a siiimut aganinto iti iniimut; ket ti agmula iti nawadwad aganinto met iti nawadwad.” Anian a nagwadwad ti panagmula ni Jehova maipapan kadagiti ar-aramidna iti panamarsua! Ibagbaga ti Saona ti ginasgasut a milia a naespirituan a parparsua. (Apocalipsis 5:11) Kitaenyo met dagiti di mabilang a galaksi iti nabituen a langlangit, a tunggal maysa buklen ti rinibribo a milion a bitbituen. No bumabatayo iti daytoy a daga, anian ti ngangngani awan inggana a panagdudumaduma dagiti bambanag, addaan biag ken awanan biag, a pinarsua ni Jehova a Dios! Pudno unay ‘ti daga napno iti pagsanikuaanna.’ (Salmo 104:24) Mainayon pay anian a siwawadwad ti panangipaayna kadatayo ti panunot, ti rikriknatayo, ken ti bagitayo! Pudno unay datayo ti “nakaskasdaaw ti pannakaaramidna.”​—Salmo 139:14.

³ Awan duadua iti daytanto ni Jehova a Dios ti nagmula iti nawadwad. Pudno daytoy saan laeng a kadagiti ar-aramidna iti panamarsua no di ket kasta met ti pannakilangenna kadagiti naindagaan a parparsua. Ngem, isu kadi, ti nagani met iti nawadwad? Pudno a kasta! Iti ania a pamay-an? Gapu ta isu ti naaddaan pay ken maaddaanto pay kadagiti adu a nasaririt a parparsua nga agserserbi kenkuana gapu iti ayat. Ti panangar-aramidda iti dayta ti mangparagsak iti puso ni Jehova nangnangruna ta daytat’ mangpaneknek ti kinaulbod ti manangumsi a Diablo.​—Proverbio 27:11.

4. Kasano nga agaplikar ti prinsipio idiay 2 Corinto 9:6 iti kabibiagtayo?

⁴ Ti Biblia naglaon kadagiti aglaplapusanan a pammaneknek a, nangrugi iti Logos, adu kadagiti matalek nga ad-adipen ni Jehova a Dios ti nagmula met iti nawadwad ken naganida met iti nawadwad. Rebbengna laeng a kasta, agsipud ta dagiti prinsipio ni Jehova ti agaplikar iti amin a panawen ken kadagiti isuamin nga indibidual. Gapuna, ti prinsipio maipapan met iti panagmula ti mabalin met a pumudno iti panagbiagyo.

5, 6. (a) Ania dagiti kabkabusor a mamarigat iti intay panagmula iti nawadwad? (b) Aniat’ masapul a situtulok nga aramidentayo, ken kadagiti ania a paset ti sagrado a serbisiotayo?

⁵ Numan pay dagiti Kasuratan ti aglaplapusanan kadagiti rason ken pangarigan maipapan iti panagmulatayo iti nawadwad, dayta ti saan unay a nalaka a banag nga aramiden. Apay a saan? Agsipud ta addaantayo ti tallo a kabusor a sipipigsa a mangsupsuppiat iti panangaramidtayo iti dayta. Umuna, addada dagiti kabukbukodantayo a natawid a pagannayasan nga agturong iti kinaagum. Mabasatayo idiay Genesis 8:21: “Ta ti darepdep ti puso ti tao dakes manipud iti kinaubingna.” Pakaammuannatay pay met ti Sao ti Dios a ti puso ti tao ket manangallilaw ken napalalo a nagdakes. (Jeremias 17:9) Maikadua, masapul ti intay pannakisalisal kadagiti pammarigat manipud iti nadangkes a lubong, nga adda iti pannakabalin ti maysa a managdakdakes. (1 Juan 5:19) Maikatlo, ti Diablo a mismo ti sisasagana a mangalun-on kadatayo no ditayo agannad.​—1 Pedro 5:8.

⁶ Kankanayon kadi nga alertokayo kadagiti tallo a kabusor? Gapu kadagitoy a kabkabusor, masapul a sigagagartay koma a ‘mangipangag iti patigmaan ken umawat iti pannakaisuro, tapno agbalintayo a nasirib iti kamaudianan.’ (Proverbio 19:20) Kinapudnona, masapul nga aramidentayo kas ti inaramid ni apostol Pablo, ‘a gubatentay ti bagbagitayo ken iturayantayo kas maysa nga adipen,’ di la ket ta maabaktayo iti kamaudianan. (1 Corinto 9:27) Ti prinsipio a no agmulatayo iti nawadwad aganitayto met iti nawadwad agaplikar kadagiti isuamin a nadumaduma a paset ti sagrado a serbisio a pakiramramanan amin dagiti Kristiano a saksi ni Jehova. Wen, uray sadino ti kitaentayo, makitatayo a daytoy a prinsipio ket agaplikar: iti personal a panagadaltayo, iti pannakigimgimongtayo, iti panagkarkararagtayo, iti panangasabatayo a pormal ken di pormal, ken iti relasiontayo kas sangapamiliaan.

Agmula iti Nawadwad no maipapan iti Panagadal iti Biblia

7, 8. (a) Tapno makapagmula iti nawadwad maipapan iti personal a panagadaltayo iti Biblia, aniat’ masapul nga adda kadatayo? (b) Ania dagiti kalat a rebbeng nga ikeddengtayo, ken kasanotay a magun-odan dagitoy?

⁷ Tapno agbalin a nabunga a ministros ni Jehova a Dios, masapul nga umuna nga agmulatayo iti nawadwad maipapan iti personal a panagad-adaltayo iti Biblia. Tarigagayantay koma ti maaddaan iti nagagar a naespirituan a gana, nga apresiaren a ditayo mabalin ti agbiag babaen laeng kadagiti material a bambanag. Babaen kadagiti amin a panagagawa ken ar-aramid iti inaldaw a panagbiag a mangpadpadagsen kadatayo, sapulenna ti sipapasnek a panagregget nga agbalin a siririing unay kadagiti naespirituan a kasapulantayo. (Mateo 13:19) Pudno a nagsayaat koma kadatayo ti personal a maaddaan iti panangipateg iti Sao ti Dios nga adda iti salmista idi a nagsurat: “Pagragrag-oak ti saom a kas maysa a nakasarak iti dakkel a samsam.”​—Salmo 119:162.

⁸ Ti piho a katulongan iti daytoy isut’ panangipangag met iti balakad a ‘kitaentay ngarud a siaannad no kasano ti pannagnatayo saan a kasla nakuneng no di ket kasla masirib, a gundawayan ti panawen.’ (Efeso 5:15, 16) Mabalin a kayatyo pay a sukimaten ti bagbagiyo iti daytoy a banag. Saludsodanyo: Iyur-urnosko aya ti kabibiagko tapno maiwayaak ti panawen nga agbasa iti magasin a Pagwanawanan ken Agriingkayo!? Ti met ngay, Yearbook, agraman dagiti liblibro ken dagiti dadduma a literatura a magunggun-odantayo kadagiti kumbension? Mabalin a ditay kanayon a makasapul ti maysa wenno dua nga oras a panagbasbasa kadagitoy, ngem babaen ti panagbalin nga alerto makagun-odtayo ti sumagmamano a minuto ditoy ken idiay tapno mangbasa iti maysa a kapitulo ti Biblia wenno maysa nga artikulo ti magasin. Saan laeng a sumagmamano kadagiti Kristiano ti mangiyur-urnos ti ibabangonda iti 10 wenno 15 a minuto a nasapsapa iti kada aldaw tapno agbasada bayat a kaal-alertuanda. Nasarakan dagiti dadduma nga adu dagiti mabasada bayat nga agdaldaliasatda kadagiti transportasion publiko. Dakayo met ngay?

9. Kasanotay ti agani a nawadwad no maipapan iti personal a panagadaltayo iti Biblia?

⁹ Babaen ti panagmula iti nawadwad kadagitoy a pamay-an, makainanamatayo met nga agani ti nawadwad. Kasano? Babaen iti pannakaadda iti napigpigsa a pammati, ti naranraniag a namnama, ken ti maysa a naragsak ken positibo a panagpampanunot. Ad-adda pay ngem dayta, makabalantayo nga ad-adda pay a mangasaba kadagiti dadduma. Mabalintayo ti makaipaay iti nasaysayaat a panagpapatang ken makatulong kadagiti kakabsattayo no ipalubos dagiti gundaway. Kitaenyo manipud iti 1 Timoteo 4:15, 16 no ania ti mabalin a maibunga dayta.

Agmula iti Nawadwad no maipapan iti Panaggigimong

10. Aniat’ rebbeng a kababalintayo maipapan iti panaggigimongtayo?

¹⁰ Mabalin a maisaludsodyo: Daytoy prinsipio iti panagani iti nawadwad no agmulatayo iti nawadwad agaplikar met kadi iti panaggigimong ti kongregasion? Pudpudno a kasta! Rebbeng a mariknatayo koma kas ken salmista a David idi a kinunana: “Naragsakanak idi kinunada kaniak: ‘Intayo idiay balay ni Jehova.’” Wen, rebbengna a maallukoytayo a makitaripnong a kadua dagiti kakabsattayo.​—Salmo 122:1.

11, 12. Kasanotay ti agmula ken agani ti nawadwad no maipapan iti itatabuno ti gimgimongtayo?

¹¹ Aniat’ sapulen dayta kadatayo? Kaipapanan dayta ti regular ken simamatalek nga itatabuno kadagiti lima a linawas a panaggigimongtayo, a di palpalubosan ti uray bassit a dakes a panawen wenno ti bassit a di naimbag a pisikal a panagrikrikna nga agserbi a kas pambar iti panagtalinaedtayon iti balay. Kasanon no masansan ti pannakakitkitatayo iti panawen​—a napudot wenno nalammiis, nabasa wenno namaga​—a mangsingsinga iti itatabunotayo iti panaggigimong? Kaskasdi, bayat nga ad-adu dagiti lapped a parmekentayo tapno makatabuno, dakdakkel met ti bendision a kasla ipaay ni Jehova kadatayo. Makapagmulatayo met iti nawadwad babaen iti idadateng a nasapa tapno maaddaan kadagiti makaparegta a panagpapatang sakbay dagiti gimong ken ti panagtalinaedtay bassit kalpasanna nga agpaay iti isu met laeng a panggep. Kasanot’ personal a pannakairukodyo iti daytoy a banag? Rebbeng aya ti panangpadpadasyo nga agmula pay nga ad-adda a siwawadwad? Nairaman met ditoy ti panagsagana a naimbag a maipaay iti Panagadal ti Pagwanawanan ken ti dadduma pay a gimong. Ti rason iti daytoy a ta tapno makapagmulatay iti nawadwad babaen iti panagkomento kas ipalubos dagiti gundaway.

¹² Kadagiti ania a pamay-an a mainanamatayo ti agani a nawadwad manipud iti daytoy? Saantayo a makaaramid iti makaparegta a komento no saantayo met a naparegta a mismo ti bagbagitayo; saantayo a maparagsak ti maladladingitan a kararua no dagiti mismo a puspusotayo saanda a naragsak. Wen, ditayo maiyebkas dagiti bagbagitayo iti panagkomento kadagiti panaggigimong no ditay pabilgen ti mismo a pammatitayo kadagiti kinapudno nga iyeb-ebkastayo. Nakalaklaka laeng: “Ti managparabur a kararua mapalukmegto, ket ti agsibug isu met laeng masibuganto.”​—Proverbio 11:25.

Agmula iti Nawadwad no maipapan iti Karkararagtayo

13, 14. Kasanotay ti (a) agmula iti nawadwad, (b) agani iti nawadwad maipapan iti karkararagtayo?

¹³ Ti Nainkasuratan a prinsipio maipapan iti panagmula iti nawadwad agaplikar met uray kadagiti personal a karkararagtayo. Dagiti kadi karkararagtayo ti napamaysa, mekanikal, maulit-ulit, wenno pudno nga agtataudda manipud iti puso? Aramatenda aya saan laeng a dagiti panagdawdawat no di ket kasta met dagiti naimpusuan a panagdayaw ken panagyaman, ken no maminsan, ti ar-araraw? Pudno aya nga al-alaentayo a sisiserioso ti nagsudi a pribilehio iti kararag? Iluklukattay aya dagiti puspusotayo iti nailangitan nga Amatayo? Wenno dardarasudosentay laeng dagiti panagkarkararagtayo, a no maminsan okupadotayo unay tapno agkararag pay? Ipakpakita ti Kristiano a Griego a Kasuratan a ti kararag prominente iti panagbiag da Jesu-Kristo ken ni apostol Pablo.​—Lucas 6:12, 13; Juan 17:1-26; Mateo 26:36-44; Filipos 1:9-11; Colosas 1:9-12.

¹⁴ Agingga iti daydiay panagmulatayo a siwawadwad no maipapan iti karkararagtayo, agingga met iti dayta a mainanamatayo ti agani iti nawadwad babaen ti panangsungbat ni Jehova kadakuada ken ti kaadda ti naimbag a relasiontayo kenkuana. Ti karkararag ti pamilia ti agserbi a mangpasinged nga ad-adda kadagiti miembro iti daydiay mangidadaulo iti kararag. Laglagipentayo met dagiti sasao ni Jesus idiay Mateo 7:7: “Itultuloyyo ti agdawat, ket maikkankayto, itultuloyyo ti agsapul, ket makasarakkayto; itultuloyyo ti umawag, ket mailukatankayto.”

Agmula iti Nawadwad no maipapan iti Ministeriotayo

15. Sadino nangnangruna ti mabalin a pangtagiragsakan iti nawadwad a panagmula ken panagani?

¹⁵ Nalabit awan pay ti ad-adda a nalawlawag a pakaiyaplikaran ti tematayo ngem ti mainaig iti panangaskasabatayo. Nalawag, no ad-adu a panawen ti busbusbosentayo iti dayta ad-adda met nga aganitayo maipapan kadagiti makapainteres a kapadasan kadagiti nabunga a panagsarungkar, ken kadagiti nabunga a panangiyadal iti Biblia kadagiti pagtaengan, a mangibunga kadagiti sibibiag a sursurat ti rekomendasion.​—2 Corinto 3:2.

16, 17. (a) Ti panagmula iti nawadwad maipapan iti serbisiotayo iti tay-ak sapulenna ti ania kadatayo? (b) Iti panangaramid iti dayta, ania a resulta ti manamnamatayo?

¹⁶ Ti panagmula iti nawadwad no maipapan iti tay-ak ti ministerio, nupay kasta, ket saan laeng a maysa a banag maipapan iti kantidad no di ket kasta met ti kualidad. Tarigagayantay koma ti agbalin a “nasged iti espiritu” no makipaspaset iti ministerio. (Roma 12:11) Rebbengna a maasitgantay koma dagiti tattao a buyogen ti siwayawaya a panagsao, nga addaan ti nabara, nainggayeman a panagisem. Agaplikar dayta no mapmapantay iti panagbalaybalay wenno makiramraman iti panangaskasaba kadagiti lansangan. No daytat’ magun-odanen iti pagsasaotayo, ti baro a katulongan ti panangasaba, a Reasoning From the Scriptures ti rebbeng a makatulong kadatay amin nga agbalin a nalalaing, ken agbalin a nabungbunga, nga agani iti ad-adu manipud iti panawen ken pigsa a busbusbosentayo iti ministerio.

¹⁷ Ken saan kadi a ti panagmulatay iti nawadwad maipapan iti ministeriotay iti tay-ak kaipapananna met ti panagbalin a silalagip a manginotar idiay pakasarsarakantayo ti interes? Naikawing iti dayta ti panangawattay met ti obligasion a mangsarungkar ken mangsukay iti dayta nga interes agingga iti punto a makairugi iti maysa a panagadal ti Biblia iti pagtaengan no daytat’ posible. Nangnangruna pay ngem iti dayta, masapul a naannadtayo koma nga agbangon kadagiti di mauram iti apuy a materiales. Kaipapanan daytoy a mangisurotayo nga addaan iti napasnek a rikna, ngem buyogen met iti pannakipagrikna ken pannakaawat, a silalaing a guyugoyen ti estudiante ti Biblia no kasano ti panagrikriknada no maipapan kadagiti prinsipio ti Biblia. No babaen laeng iti panagmula iti nawadwad kadagitoy a banag a mainanamatayo ti makapataud kadagiti Nakristianuan a personalidad a mabalindanto a labanan ti panangraraut ni Satanas ken ti sistema dagiti bambanagna.​—1 Corinto 3:12-15.

Panagmula iti Nawadwad no maipapan iti Relasion ti Sangapamiliaan

18. Ania a balakad ti rebbeng a laglagipentayo no maipapan iti relasion ti sangapamiliaantayo?

¹⁸ Ti nateokratikuan a prinsipio nga aganitayo maitunos iti intay panagmulmula agaplikar met uray iti las-ud ti pamilia. Mabalintay a laglagipen ditoy dagiti sasao ni Jesus idiay Lucas 6:38: “Mangtedkayo, ket maikkankayto. Sukat a naimbag, napempen, nasedsed ken agliplipias ti maitedto met iti saklotyo. Ta ti rukod a pangrukodyo, isunto met laeng ti pakarukodanyo.”

19. Kasano a makapagmula a siwawadwad dagiti assawa a lallaki ken babbai ken magunggonaan iti dayta?

¹⁹ Nakaad-adu dagiti gundaway a dagiti assawa a lallaki ken babbai makapagmulada iti nawadwad babaen kadagiti nadungngo nga ar-aramid iti kinamanagpanunot ken kinamanagayat! Nangted ni apostol Pablo kadagiti nagsasayaat a pammalakad idiay Efeso 5:22-33. Pangngaasiyo ta basaenyo dagitoy a bersikulo bayat a pampanunotenyo no kasano a makapagmulakayo iti nawadwadwad pay. Agingga a pudpudno a managpasakop, mannakitunos, ken manangsuportar ti maysa a Kristiano nga asawa a babai, kasta met isunto ti agapit iti nawadwad. Kadagiti ania a pamay-an? Iti kinabara ken iti manangapresiar a panangdungngo ni lakayna, ta isu ti matignay nga agayat kenkuana a kas ti bagina met laeng. Umas-asping iti dayta, iti agingga a ti Kristiano nga asawa a lalaki pagreggetanna nga ipakita ti konsiderasion a naigunamgunam idiay 1 Pedro 3:7 ken ti awan agumna a panagayat a naipaganetget idiay Efeso 5:28, 29, agingga met iti dayta nga isut’ mainanama nga agani no maipapan iti panagpasakop ken nasungdo a panangsuportar ni baketna.

20. Kasano a ti nawadwad a panagmula agaplikar met uray iti panangpadakkel kadagiti annak, ket kadagiti ania a resulta?

²⁰ Ket ditay koma met liplipatan ti responsabilidadtayo a mangpadakkel kadagiti annaktayo iti disiplina ken panangiturong pampanunot ni Jehova. (Efeso 6:4) Kinapudnona, daytoy ti umun-una ngem kadagiti dadduma a nateokratikuan nga annongen ken pribilehio. Nakalkaldaang a kunaen a, daytoy a prinsipio ti maliwliwayan dagiti dadduma a Kristiano a nagannak. Iti kasumbangirna, masapul koma a situtulok dagiti nagannak a mangisakripisio kadagiti ragragsak ken nam-ay a maipaay kadagiti emosional ken naespirituan a pagimbagan dagiti annakda, a mangbusbos ti kalalainganna a panawen kadakuada ken panangibuyat ti ayat kadakuada. Iti sabali a bangir, masapul met a mangipakita dagiti nagannak iti kinainget. Nabalakadanda: “Tubngarem ti anakmo ket itdennanto kenka ti inana ken itednanto ti rag-o ita kararuam.” Agmula kadagitoy a pamay-an ket awan duadua nga agapitkayto iti nawadwad babaen iti pannakaaddayonto kadagiti manangsalimetmet ti kinatarnawna nga annak nga agraem ken nakasingsingedto kadakayo.​—Proverbio 29:17.

Agbalinkayo Koma a Managani nga Addaan Gunggona!

21, 22. Kadagiti ania a nadumaduma a bambanag a mabalintayo ti agmula ken agani iti nawadwad no maipapan iti sagrado a serbisiotayo ken iti relasion ti pamiliatayo?

²¹ Ngarud, makitatayo, a ti prinsipio nga aganitayo sigun iti panagmulmulatayo agaplikar iti isuamin a paset ti Kinakristiano. No agmulatayo iti nawadwad no maipapan iti personal a panagadaltayo iti Biblia, aganitayo met ti napigpigsa a pammati, naranraniag a namnama, ken sisasaganatayo iti ministeriotayo. No agmulatayo iti mawadwad maipapan iti panaggigimongtayo, mapapigsanto met ti pammatitayo a mismo, ket mapapigsatayto met ti pammati dagiti dadduma. No agmulatayo iti nawadwad maipapan kadagiti karkararagtayo, aganitayto met iti nasaysayaat a pannakirelasion iti nailangitan nga Amatayo ngem masungbatanto dagiti karkararagtayo. Ket no agmulatayo iti nawadwad maipapan iti panangaskasabatayo, magunggonaantayo a personal, ket inanamaentayo ti maaddaan kadagiti sursurat ti rekomendasion a mangipakita iti panagreggettayo.

²² Kasta met, ditay koma liplipatan a daytoy a prinsipio agaplikar iti relasiontayo iti sangapamiliaan. Babaen ti panagmula iti nawadwad iti naayat a panangtaming ken panagtignay nga awanan imut, datayo kas assawa a lallaki, assawa a babbai, nagannak, wenno dagiti annak ti makainanama nga agani iti panagbiag ti pamilia a nawadwadto iti makagunggona a panagtitimpuyog ken kapkapadasan. Daytanto met ti mangted iti nasayaat a pammaneknek kadagidiay adda iti ruar, a mangirekomenda iti wagas ti panagbiagtayo.

23. Nasayaat nga ipangagtayo ti ania a balakad?

²³ Gapuna bay-an koma a tunggal Kristiano a saksi ni Jehova saludsodanna ti bagina: Mabalin kadi a makapagmulaak pay iti nawadwadwad? Dagiti sasao ni Pablo idiay 1 Tesalonica 4:1 maikanatadda: “Kamaudiananna, kakabsat, dawatenmi ken bagbagaandakayo ken Apo Jesus, a kas iti sinursuroyo kadakami no kasano ti rebbengyo a pannagna ken panangay-ayo iti Dios, kas ar-aramidenyo met, rumang-aykayo koma a rumang-ay.” Wen, pudno unay, pagreggetantay koma amin ti agmula a nawadwadwad tapno aganitayo koma met a nawadwadwad, nga agpaay iti pakaidayawan ni Jehova ken ti pakabendisionantayo met laeng ken dagiti kakabsattayo.

Dagiti Punto a Marepaso

◻ Kasano nga inyulidan ni Jehova a Dios ti kinapudno a masarakan idiay 2 Corinto 9:6?

◻ Aniat’ maaramidanyo tapno makapagani ti nawadwadwad maipapan iti panagadal ti Biblia ken kadagiti Nakristianuan a panaggigimong?

◻ Kasano ti mabalinyo a panagmula ken panagani nga ad-adda pay no maipapan iti serbisio idiay tay-ak?

◻ Ania dagiti praktikal nga addang a mabalin a makatulong iti pamiliayo nga agmula ken agani a siwawadwad?