Ti Bileg ti Kararag

Lumlumnek ti init iti siudad ni Nacor idiay Makintengnga a Daya. Dimteng iti bubon nga adda iti ruar dayta a siudad ti Siriano nga agnagan Eliezer ken ti sangapulo a kameliona. Nupay di pagduaduaan a nabannog ken mawaw, ad-adda a maseknan ni Eliezer iti pagimbagan ti dadduma. Adayo a lugar ti naggapuanna tapno agbirok iti asawaen ti anak ni apona. Maysa pay, masapul a kabagian ni apona ti mabirokanna. Kasanona a maaramid daytoy narigat nga annong?

AGTALEK ni Eliezer iti bileg ti kararag. Buyogen ti naisangsangayan a pammati a kas iti adda iti maysa nga ubing, sipapakumbaba nga indawatna: “O Jehova a Dios ni Apok nga Abraham, ibaonmo kadi kaniak, dawatek kenka, ti naimbag a gasat ita nga aldaw, ket itdem ti kaasi ken apok nga Abraham. Adtoy, sitatakderak iti abay ti ubbog ti danum: ket dagiti babbai nga annak dagiti tattao ti ili um-umayda sumakdo; ket maaramid koma a ti balasang a pagkunaak, Dawatek nga ibabam kadi ta karambam, tapno uminumak; ket isu kunananto, Uminumka, ken kasta met painumekto dagita kamelio: ipaaymo kadi a daytoy ti insaganam iti adipenmo nga Isaac; ket iti kastoy maammuakto nga inaramidmo ti kaasi ken apok.”​—Genesis 24:12-14.

Saan nga ubbaw ti panagtalek ni Eliezer iti bileg ti kararag. Ti damo a babai nga immay iti bubon isu ti apoko ti kabsat a lalaki ni Abraham! Rebecca ti naganna, maysa a balasang a natakneng ken napintas. Nakaskasdaaw ta saanna la a pinainum ni Eliezer no di ket siaayat met a pinainumna ti sangapulo a kameliona. Idi kalpasan a nagsasarita ti pamiliada, sidadaan nga immanamong ni Rebecca a makikuyog ken Eliezer iti adayo a lugar tapno agbalin nga asawa ni Isaac nga anak ni Abraham. Anian a makatukay ken nalawag a sungbat iti kararag ni Eliezer idi panawen a pasaray laeng a bumallaet ti Dios babaen ti milagro!

Adu ti maadaltayo iti kararag ni Eliezer. Impakitana ti naidumduma a pammati, kinapakumbaba, ken di managimbubukodan a pannakaseknanna iti pagimbagan ti dadduma. Impakita met ti kararag ni Eliezer ti panagpannurayna iti pamay-an ni Jehova a makilangen kadagiti tattao. Di pagduaduaan nga ammona ti naisangsangayan a kinasinged ti Dios ken Abraham ken ti kari ti Dios a mabendisionan ti sangatauan iti masanguanan babaen ken ni Abraham. (Genesis 12:3) Isu a rinugian ni Eliezer ti kararagna iti sasao a: “O Jehova a Dios ni apok nga Abraham.”

Ni Jesu-Kristo ti kaputotan ni Abraham a pakabendisionan ti amin a natulnog a sangatauan. (Genesis 22:18) No kayattay a masungbatan dagiti kararagtayo ita, rumbeng a bigbigentayo a sipapakumbaba ti pamay-an ti Dios a makilangen iti sangatauan babaen ti Anakna. Kinuna ni Jesu-Kristo: “No agtalinaedkayo a naikaykaysa kaniak ket dagiti sasaok agtalinaedda kadakayo, dawatenyo ti aniaman a kayatyo ket maaramidto dayta a maipaay kadakayo.”​—Juan 15:7.

Napasaran ni apostol Pablo a pasurot ni Kristo ti kinapudno dagitoy a sasao ni Jesus. Saan nga ubbaw ti panagtalekna iti bileg ti kararag. Imparegtana kadagiti padana a Kristiano nga ikararagda iti Dios ti amin a pakadanaganda sana kinuna: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.” (Filipos 4:6, 7, 13) Kayat kadi a sawen daytoy a napatgan amin nga inkararag ni Pablo iti Dios? Kitaentayo.

Saan a Mapatgan Amin a Kiddaw

Iti napnuan sakripisio a ministeriona, naglak-am ni Pablo iti inawaganna a “siit iti lasag.” (2 Corinto 12:7) Mabalin a kaipapanan daytoy ti panagdanag ken panagdukotna maigapu kadagiti bumusbusor ken “sinan-kakabsat.” (2 Corinto 11:26; Galacia 2:4) Wenno nalabit pisikal nga an-annayen mainaig iti nakaro a depekto ti mata. (Galacia 4:15) Aniaman ti kasasaad, naapektaran ni Pablo iti daytoy a “siit iti lasag.” Insuratna: “Namitlo a nagpakaasiak iti Apo tapno sumina koma daytoy kaniak.” Nupay kasta, saan a napatgan ti kiddaw ni Pablo. Nailawlawag kenkuana nga umanayen dagiti naespirituan a gunggona nga inawatna manipud iti Dios, kas koma iti kired nga agandur kadagiti pakasuotan. Kinuna pay ti Dios: “Ti pannakabalinko mapagbalin a naan-anay iti kinakapuy.”​—2 Corinto 12:8, 9.

Ania ti maadaltayo kadagita a kapadasan da Eliezer ken Pablo? Ipangag ni Jehova a Dios dagiti kararag dagidiay sipapakumbaba a mangikagumaan nga agserbi kenkuana. Ngem di kayat a sawen daytoy a kanayon a patganna ti kiddawda yantangay matmatan ti Dios dagiti bambanag sigun iti makitana a mapasamak iti masanguanan. Isu laeng ti makaammo no ania ti kasayaatan para kadatayo. Napatpateg pay, kanayon nga agtignay maitunos iti panggepna a nailanad iti Biblia.

Panawen ti Naespirituan a Pannakapaimbag

Inkari ti Dios a paimbagenna amin a pisikal, mental, ken emosional a sakit ti tao kabayatan ti Sangaribu a Tawen a Panangituray ti Anakna iti daga. (Apocalipsis 20:1-3; 21:3-5) Padpadaanan dagiti napasnek a Kristiano daytoy a naikari a masakbayan, a naan-anay nga agtalekda a pumudno daytoy babaen ti pannakabalin ti Dios. Nupay dida namnamaen ti kasta a namilagruan a pannakaagas ita, ikararagda a liwliwaen ken pabilgen ida ti Dios tapno madaeranda dagiti suot. (Salmo 55:22) No agsakitda, mabalin nga ikararagda met ti panangiwanwan ti Dios tapno magun-odda ti kasayaatan a medikal a pannakaagas a kabaelanda a bayadan.

Iparparegta ti dadduma a relihion nga agkararag dagiti masakit tapno maimbaganda itan, a pagrasonda ti panangagas idi ni Jesus ken dagiti apostolna babaen ti milagro. Ngem adda naisangsangayan a panggep dagidi a milagro. Nagserbida a pammaneknek a ni Jesu-Kristo ti pudno a Mesias ken tapno mangipakita a saanen a ti Judio a nasion ti an-anamongan ti Dios no di ket ti kabbuangay idi a kongregasion Kristiano. Nasken idi dagiti milagro tapno mapatibker ti pammati ti kaipaspasdek a kongregasion Kristiano. Idi timmibker ti kongregasion, ken nagmataengan, ‘nagsardengen’ dagiti milagro.​—1 Corinto 13:8, 11.

Kadagitoy a kritikal a tiempo, iturturong ni Jehova a Dios dagiti agdaydayaw kenkuana iti ad-adda a napateg a trabaho mainaig iti naespirituan a panangpaimbag. Bayat nga adda pay tiempoda, masapul nga ipangag itan ti tattao daytoy nga awis: “Sapulenyo ni Jehova ita ta masarakan pay; umawagkayo kenkuana ita ta asideg pay: ti managdakdakes bay-anna koma ti dalanna, ken ti tao a saan a nalinteg dagiti pampanunotna; ket agsubli koma ken ni Jehova, ket isu kaasiannanto; ken iti Diostayo, ta isu pakawanennanto iti nawadwad.”​—Isaias 55:6, 7.

Umim-imbag iti naespirituan dagiti managbasol a nagbabawi maigapu iti pannakaikasaba ti naimbag a damag ti Pagarian ti Dios. (Mateo 24:14) Babaen ti panangsaranayna kadagiti adipenna a mangitungpal iti daytoy makasalbar-biag a trabaho, tultulongan ni Jehova a Dios ti minilion a tattao iti amin a nasion nga agbabawi iti basbasolda tapno maaddaanda iti nasayaat a relasion kenkuana sakbay nga agpatingga daytoy dakes a sistema. Pudno a masungbatan dagiti kararag ti amin a sipapasnek a mangidawdawat iti kasta a naespirituan a pannakapaimbag ken amin a mangikarkararag iti tulong tapno makipaset iti daytoy a trabaho a panangpaimbag.

[Picture Credit Line iti panid 3]

Eliezer and Rebekah/​The Doré Bible Illustrations/​Dover Publications