‘Kayatyo’ Kadi a Tulongan Dagiti Sabsabali?
1 Pudno a maseknan idi ni Jesus kadagiti tattao. Idi adda agkukutel a nagpakpakaasi kenkuana, inyunnat ni Jesus ti imana, sinagidna ti lalaki, ket kinunana: “Kayatko. Madalusanka koma.” (Mar. 1:40-42) Kadagiti ania a pamay-an a matuladtayo ti kababalin ni Jesus no maipapan iti panangtulong kadagiti sabsabali?
2 Dagiti Interesado a Tattao: Adda paset ti tunggal miembro ti kongregasion iti panangtulong kadagiti interesado nga agbalin a managdaydayaw ni Jehova. No umay makigimong dagiti kabbaro, kablaawan ken am-ammuenyo ida. Sumapulkayo kadagiti pamay-an no kasanoyo a maparegta ida. Komendaranyo ida no agkomentoda. Iyebkasyo ti apresasionyo iti panangikagumaanda a mangyaplikar kadagiti prinsipio ti Biblia iti biagda. Ipariknayo kadakuada a mabalinda ti maaddaan kadagiti pudno a gagayyem iti uneg ti kongregasion.
3 Dagiti Kapammatian: Dagiti “nainaig kadatayo iti pammati” ket nangnangruna a maikarida iti tulongtayo iti nadumaduma a pamay-an. (Gal. 6:10) Adu dagidiay marigrigatan gapu iti sakit. No sumarungkarkayo, maparegta ken makalangenyo ida ken nalabit matulonganyo ida kadagiti praktikal a pamay-an. Dagiti dadduma mabalin nga adda sabali a parikutda. Ipakitayo a maseknankayo babaen ti madadaan a panagimdeng ken panangpabilegyo kadakuada. (1 Tes. 5:14) Kasapulan met dagiti panglakayen ti tulongtayo bayat a tungtungpalenda dagiti rebbengenda. (Heb. 13:17) Babaen ti kinatulok ken pannakitinnulongtayo, ‘agbalintayo a makapabileg a tulong’ kadagiti kapammatiantayo.—Col. 4:11.
4 Dagiti Kameng ti Pamilia: Ikagumaantay met koma a tuladen ti pannakaseknan ni Jesus kadagiti kameng ti pamiliatayo. Ti nauneg a pannakaseknan ti mangtignay kadagiti nagannak a ‘mangitultuloy a mangpadakkel kadagiti annakda iti disiplina ken panangiturong-panunot ni Jehova.’ (Efe. 6:4) Maaramid dagiti annak ti pasetda babaen ti panagsaganada a dagus para iti panagadal ti pamilia, kadagiti gimong ti kongregasion, wenno panagserbi iti tay-ak. Dagiti nataenganen nga annak matuladda ti asi ni Jesus babaen ti sidudungngo a panangtulongda kadagiti dadakkelda a mangsaranget kadagiti pakarigatan a kakuyog ti panaglakay wenno panagbaket. Kadagitoy ken dadduma pay a pamay-an, ‘maannurottayo amin ti nadiosan a debosion iti bukodtayo a sangakabbalayan.’—1 Tim. 5:4.
5 No tuladentayo ni Jesus iti panangtulong kadagiti sabsabali, mabalin a makissayantayo dagiti parikut ken sumingedtayo iti pamiliatayo ken iti kongregasion. Kangrunaan iti amin, maidaydayawtayo ni Jehova, “ti Ama dagiti nadungngo nga asi.”—2 Cor. 1:3.