Idadauluan ni Kristo ti Kongregasionna
“Adtoy! Addaak kadakayo iti amin nga al-aldaw agingga iti panungpalan ti sistema ti bambanag.”—MATEO 28:20.
1, 2. (a) Idi imbilinna a mangaramidda kadagiti adalan, ania ti inkari ni napagungar a Jesus kadagiti pasurotna? (b) Kasano a siaaktibo nga indauluan ni Jesus ti nagkauna a kongregasion Kristiano?
SAKBAY a nagpalangit ti napagungar a Pangulotayo, ni Jesu-Kristo, nagparang kadagiti adalanna ket kinunana: “Isuamin nga autoridad naiteden kaniak idiay langit ken ditoy daga. Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.”—Mateo 23:10; 28:18-20.
2 Saan laeng nga impaannong ni Jesus kadagiti adalanna ti makaispal-biag a trabaho a panagaramid iti ad-adu nga adalan no di pay ket inkarina nga isut’ addanto kadakuada. Iti pakasaritaan ti nagkauna a Kristianidad, kas nairekord iti libro ti Biblia nga Aramid, nalawag nga inusar ni Kristo ti naited kenkuana nga autoridad tapno idauluanna ti kaibangbangon idi a kongregasion. Imbaonna ti naikari a “katulongan”—ti nasantuan nga espiritu—tapno mangpabileg kadagiti pasurotna ken mangiwanwan kadagiti panagreggetda. (Juan 16:7; Aramid 2:4, 33; 13:2-4; 16:6-10) Binilin ni napagungar a Jesus dagiti anghelna a suportaranda dagiti adalanna. (Aramid 5:19; 8:26; 10:3-8, 22; 12:7-11; 27:23, 24; 1 Pedro 3:22) Maysa pay, iwanwan ti Pangulotayo ti kongregasion babaen ti panangyurnosna kadagiti kualipikado a lallaki nga agserbi kas bagi a manarawidwid.—Aramid 1:20, 24-26; 6:1-6; 8:5, 14-17.
3. Ania a salsaludsod ti mausig iti daytoy nga artikulo?
3 Komusta met iti kaaldawantayo, bayat “ti panungpalan ti sistema ti bambanag”? Kasano nga idadauluan ni Jesu-Kristo ti kongregasion Kristiano ita? Ken kasano a maipakitatayo a bigbigentayo ti panangidaulona?
Adda Matalek nga Adipen ti Apo
4. (a) Siasino ti mangbukel iti “matalek ken masirib nga adipen”? (b) Ania ti intalek ti Apo iti adipen?
4 Idi impadtona ti pagilasinan ti kaaddana, kinuna ni Jesus: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo? Naragsak dayta nga adipen no iti idadateng ni apona masarakanna nga ar-aramidenna ti kasta! Pudno kunak kadakayo, Dutokannanto nga agaywan kadagiti amin a sanikuana.” (Mateo 24:45-47) Ti ‘apo’ isu ti Pangulotayo, ni Jesu-Kristo, ket intalekna iti “matalek ken masirib nga adipen”—ti grupo dagiti napulotan a Kristiano ditoy daga—amin a sanikuana ditoy daga.
5, 6. (a) Iti sirmata a naawat ni apostol Juan, ania ti isimbolo “ti pito a nabalitokan a pagsaadan ti silaw” ken “ti pito a bituen”? (b) Ania ti ipamatmat ti kaadda “ti pito a bituen” iti makannawan nga ima ni Jesus?
5 Ti libro ti Biblia nga Apocalipsis ipakitana a direkta nga iwanwanwan ni Jesu-Kristo ti matalek ken masirib nga adipen. Iti nasirmatana maipapan iti “aldaw ti Apo,” nakita ni apostol Juan ti “pito a nabalitokan a pagsaadan ti silaw, ket iti tengnga dagiti pagsaadan ti silaw adda maysa nga umasping iti anak ti tao” nga ‘iti makannawan nga imana adda pito a bituen.’ Idi inlawlawagna ti sirmata ken ni Juan, kinuna ni Jesus: “No maipapan iti sagrado a palimed ti pito a bituen a nakitam iti makannawan nga imak, ken ti pito a nabalitokan a pagsaadan ti silaw: Ti pito a bituen kaipapananda dagiti anghel iti pito a kongregasion, ket ti pito a pagsaadan ti silaw kaipapananda ti pito a kongregasion.”—Apocalipsis 1:1, 10-20.
6 “Ti pito a nabalitokan a pagsaadan ti silaw” isimboloda ti amin a pudno a kongregasion Kristiano kabayatan ti “aldaw ti Apo,” a nangrugi idi 1914. Ngem ania met ngay “ti pito a bituen”? Idi damo, isimboloda ti amin a nayanak iti espiritu, napulotan a manangaywan a mangimatmaton kadagiti kongregasion idi umuna a siglo.a Dagiti manangaywan ket adda iti makannawan nga ima ni Jesus—iti sidong ti pannakabalin ken panangiwanwanna. Wen, idadauluan ni Kristo Jesus ti klase adipen kas maysa a grupo. Ngem ita, manmano laengen dagiti napulotan a manangaywan. Kasano nga idauluan ni Kristo ti nasurok a 93,000 a kongregasion dagiti Saksi ni Jehova iti intero a lubong?
7. (a) Kasano nga us-usaren ni Jesus ti Bagi a Manarawidwid tapno idauluanna ti kongregasion iti intero a daga? (b) Apay a makuna a dinutokan ti nasantuan nga espiritu dagiti Kristiano a manangaywan?
7 Kas idi umuna a siglo, maysa a bassit a grupo dagiti kualipikado a lallaki manipud kadagiti napulotan a manangaywan ti agserserbi ita kas Bagi a Manarawidwid, a mangirepresentar iti grupo ti matalek ken masirib nga adipen. Ti Pangulotayo us-usarenna ti Bagi a Manarawidwid a mangdutok kadagiti kualipikado a lallaki—napulotan iti espiritu wenno saan—kas papanglakayen iti kongregasion. Iti daytoy a banag, napateg ti akem ti nasantuan nga espiritu, nga intalek ni Jehova ken ni Jesus tapno usarenna. (Aramid 2:32, 33) Umuna iti amin, dagitoy a manangaywan nasken a maragpatda dagiti kualipikasion a nailanad iti Sao ti Dios, nga impaltiing ti nasantuan nga espiritu. (1 Timoteo 3:1-7; Tito 1:5-9; 2 Pedro 1:20, 21) Ti panangirekomenda ken panangdutok ket maaramid kalpasan ti kararag ken iti sidong ti panangiwanwan ti nasantuan nga espiritu. Maysa pay, nasken a paneknekan ti nadutokan nga indibidual nga iparparangarangna dagiti bunga ti espiritu. (Galacia 5:22, 23) No kasta, agpadpada nga agaplikar ti balakad ni Pablo kadagiti amin a panglakayen, napulotan man wenno saan: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan.” (Aramid 20:28) Dagitoy a nadutokan a lallaki ket iwanwanwan ti Bagi a Manarawidwid ken situtulokda a mangipastor iti kongregasion. Iti kastoy a pamay-an, adda kadatayo ni Kristo ita ken siaaktibo nga idadauluanna ti kongregasion.
8. Kasano nga us-usaren ni Kristo dagiti anghel a mangiturong kadagiti pasurotna?
8 Us-usaren met ni Jesus dagiti anghelna tapno iturongda dagiti pasurotna ita. Sigun iti pangngarig maipapan iti trigo ken dagiti dakes a ruot, dumteng ti panagani bayat “ti panungpalan ti sistema ti bambanag.” Siasino ti ibaon ti Apo nga agani? “Dagiti managani isuda dagiti anghel,” kinuna ni Kristo. Innayonna: “Ti Anak ti tao ibaonnanto dagiti anghelna, ket ummongendanto manipud iti pagarianna ti amin a bambanag a mamataud iti pannakaitibkol ken dagiti tattao nga agar-aramid iti kinakillo.” (Mateo 13:37-41) Maysa pay, no kasano a ti maysa nga anghel inturongna ni Felipe iti maysa nga Etiope a eunuko, adu met ti pammaneknek ita nga us-usaren ni Kristo dagiti anghelna tapno iturongda ti trabaho dagiti pudno a Kristiano iti panangsapul kadagiti napudno ti panagpuspusoda a tattao.—Aramid 8:26, 27; Apocalipsis 14:6.
9. (a) Iti ania a pamay-an nga idadauluan ni Kristo ti kongregasion Kristiano ita? (b) Ania a saludsod ti nasken nga usigentayo no kayattayo ti magunggonaan iti panangidaulo ni Kristo?
9 Anian a makapabileg a maammuan nga idadauluan ni Jesus dagiti adalanna ita babaen ti Bagi a Manarawidwid, ti nasantuan nga espiritu, ken dagiti anghel! Uray no dadduma kadagiti agdaydayaw ken Jehova ti temporario a naiputong iti Bagi a Manarawidwid gapu iti panangidadanes wenno dadduma nga umarngi a rason, idauluan latta ida ni Kristo babaen ti nasantuan nga espiritu ken dagiti anghel. Ngem satay la magunggonaan iti panangidaulona no awatentayo dayta. Kasano a maipakitatayo a bigbigentayo ti panangidaulo ni Kristo?
“Agtulnogkayo . . . Agpasakupkayo”
10. Kasano a maipakitatayo ti panagraem kadagiti panglakayen iti kongregasion?
10 Ti Pangulotayo ket nangted kadagiti kongregasion “kadagiti sagut a tattao”—“kas managebanghelio, ti sumagmamano kas papastor ken mannursuro.” (Efeso 4:8, 11, 12) Ti panangmatmat ken kababalintayo kadakuada ket nalawag a pakakitaan no inawattayo ti panangidaulo ni Kristo. Maiparbeng laeng nga ‘ipakitatayo nga agyamantayo’ gapu kadagiti naespirituan a kualipikado a lallaki nga impaay ni Kristo. (Colosas 3:15) Maikarida met iti panagraemtayo. “Dagiti lallakay a mangidaulo iti nasayaat a wagas maibilangda koma a maikari iti mapamindua a dayaw,” insurat ni apostol Pablo. (1 Timoteo 5:17) Kasano a maipakitatayo nga apresiaren ken raementayo dagiti lallakay—dagiti panglakayen, wenno manangaywan—iti kongregasion? Sumungbat ni Pablo: “Agtulnogkayo kadagidiay mangidadaulo kadakayo ket agpasakupkayo.” (Hebreo 13:17) Wen, nasken nga agtulnog ken agpasakuptayo kadakuada.
11. Apay a ti panangraem iti urnos mainaig kadagiti panglakayen ket paset ti panangitungpal iti bautismotayo?
11 Awan pagkurangan ti Pangulotayo. Ngem saan a kasta dagiti insagutna a lallaki. Gapuna, agkamalida no dadduma. Kaskasdi, napateg nga agtalinaedtayo a nasungdo iti urnos ni Kristo. Kinapudnona, ti panangtungpal iti dedikasion ken bautismotayo kaipapananna a bigbigentayo a lehitimo ti autoridad dagidiay dinutokan ti espiritu iti kongregasion ken situtuloktayo nga agpasakup iti dayta. Ti bautismotayo ‘iti nagan ti nasantuan nga espiritu’ ket panangideklara iti publiko a bigbigentayo ti nasantuan nga espiritu ken ti akemna mainaig kadagiti panggep ni Jehova. (Mateo 28:19) Ipasimudaag dayta a bautismo a makitunostayo iti espiritu ket ditay agaramid iti aniaman a manglapped iti panagtignayna kadagiti pasurot ni Kristo. Yantangay nagpateg ti akem ti nasantuan nga espiritu no maipapan iti panangirekomenda ken panangdutok kadagiti panglakayen, talaga kadi a napudnotayo iti dedikasiontayo no ditay makitunos iti urnos ti kongregasion mainaig kadagiti panglakayen?
12. Ania dagiti dinakamat ni Judas a pagarigan ti di panagraem iti autoridad, ket ania ti isuroda kadatayo?
12 Naglaon ti Kasuratan kadagiti pagarigan a mangisuro kadatayo iti kinapateg ti panagtulnog ken panagpasakup. Maipapan kadagidiay agsao a sibabassawang kadagiti nadutokan a lallaki iti kongregasion, impatuldo ni adalan a Judas ti tallo a kapadasan a pakaballaagan, idi kunana: “Asida pay, agsipud ta simmurotda iti dana ni Cain, ket nagdarasudosda iti biddut a turongen ni Balaam gapu iti gunggona, ket nadadaelda iti managalsa a sasao ni Kore!” (Judas 11) Inyaleng-aleng ni Cain ti naayat a pammagbaga ni Jehova ket sipapakinakem a nangipempen iti gura a nangituggod kenkuana a pimmatay. (Genesis 4:4-8) Iti laksid ti maulit-ulit a pakdaar ti Dios, pinadas ni Balaam nga ilunod ti ili ti Dios gapu iti pinansial a gunggona. (Numeros 22:5-28, 32-34; Deuteronomio 23:5) Nagsayaat ti annongen ni Kore iti Israel, ngem saan a napnek iti dayta. Insungsongna ti iyaalsa iti adipen ti Dios a ni Moises, ti kaemmaan idi a tao ditoy daga. (Numeros 12:3; 16:1-3, 32, 33) Dimteng ti didigra kada Cain, Balaam, ken Kore. Anian a naglawag dagitoy a pagarigan a mangisuro nga ipangagtayo ti pammagbaga dagidiay inikkan ni Jehova iti autoridad ket pagraeman ida!
13. Ania dagiti gunggona nga impadto ni propeta Isaias a tagiragsaken dagidiay agpasakup iti urnos mainaig kadagiti panglakayen?
13 Siasino ti di mangayat a magunggonaan iti naindaklan nga urnos ti panangaywan nga inyussuat ti Pangulotayo iti kongregasion Kristiano? Impadto ni propeta Isaias dagiti gunggona nga itden daytoy nga urnos, idi kunana: “Adtoy! Maysa nga ari ti agturayto maipaay iti mismo a kinalinteg; ket no maipapan iti piprinsipe, agturaydanto kas piprinsipe maipaay iti mismo a kinahustisia. Ket tunggal maysa agbalinto a kas paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.” (Isaias 32:1, 2) Amin a panglakayen ket agbalin koma a “lugar” ti salaknib ken kinatalged. Nupay narigat kadatayo ti agpasakup iti autoridad, ikagumaantayo ti sikakararag nga agtulnog ken agpasakup kadagiti inikkan ti Dios iti autoridad iti uneg ti kongregasion.
No Kasano nga Agpasakup Dagiti Panglakayen iti Panangidaulo ni Kristo
14, 15. Kasano nga ipakita dagidiay mangidadaulo iti kongregasion nga agpasakupda iti panangidaulo ni Kristo?
14 Tunggal Kristiano—nangruna dagiti panglakayen—ket nasken a sumurot iti panangidaulo ni Kristo. Dagiti manangaywan, wenno papanglakayen, addaanda iti autoridad iti kongregasion. Ngem dida ‘iturayan ti pammati dagiti kapammatianda’ babaen ti panangkontrol kadagiti biagda. (2 Corinto 1:24, Philippine Bible Society) Ipapuso dagiti panglakayen ti sasao ni Jesus: “Ammoyo a dagiti agturay kadagiti nasion dominaranda ida ket dagiti naindaklan a tattao aramatenda ti autoridad kadakuada. Saan a kastoy kadakayo.” (Mateo 20:25-27) Bayat nga itungpal dagiti panglakayen ti annongenda, sipapasnek nga ikagumaanda a pagserbian ti sabsabali.
15 Naidagadag kadagiti Kristiano: “Laglagipenyo dagidiay mangidadaulo kadakayo, . . . ket bayat nga ut-utobenyo ti pagbanagan ti kababalinda tuladenyo ti pammatida.” (Hebreo 13:7) Saan a naikalikagum daytoy gapu ta dagiti panglakayen ti mangidadaulo. Kinuna ni Jesus: “Ti Panguluentayo ket maymaysa, ni Kristo.” (Mateo 23:10) Ti pammati dagiti panglakayen ti nasken a tuladen gapu ta tultuladenda ti pudno a Pangulotayo, ni Kristo. (1 Corinto 11:1) Usigenyo ti dadduma a pamay-an nga ikagkagumaan dagiti panglakayen a mangtulad ken Kristo no maipapan iti relasionda kadagiti kakabsat iti kongregasion.
16. Iti laksid ti ik-ikutanna nga autoridad, kasano a trinato ni Jesus dagiti pasurotna?
16 Nupay natantan-ok ni Jesus ngem kadagiti imperpekto a tattao iti aniaman nga aspeto ken addaan iti di maartapan nga autoridad a naggapu iti Amana, sieemma a trinatona dagiti adalanna. Dina imparammag kadagiti agdengdengngeg ti pannakaammo nga ik-ikutanna. Mannakipagrikna ken naasi ni Jesus kadagiti pasurotna, nga ikabilanganna dagiti kasapulanda kas tattao. (Mateo 15:32; 26:40, 41; Marcos 6:31) Dina kinalikaguman kadagiti adalanna ti nalablabes ngem iti maipaayda, ket dina imparebbeng ti dida kabaelan. (Juan 16:12) ‘Naalumamay ti kababalin ken napakumbaba ti puso’ ni Jesus. Saan ngarud a pakasdaawan nga adu ti nabang-aran kenkuana.—Mateo 11:28-30.
17. Kasano a maipakita dagiti panglakayen ti kinaemma a kas ken Kristo no maipapan iti pannakilangenda kadagiti sabsabali iti kongregasion?
17 No ni Kristo a Pangulo imparangarangna ti kinaemma, anianto ketdin dagidiay mangidadaulo iti kongregasion! Wen, annadanda a dida abusuen ti aniaman nga autoridad a naitalek kadakuada. Ken dida ‘agpakalaing nga agsao’ tapno laeng agparammagda kadagiti sabsabali. (1 Corinto 2:1, 2, Philippine Bible Society) Imbes ketdi, ikagumaanda nga ipakaammo ti Nainkasuratan a kinapudno iti simple ken napudno a wagas. Maysa pay, nasken a rasonable ti namnamaen dagiti panglakayen kadagiti sabsabali ken maseknanda koma kadagiti kasapulan dagitoy. (Filipos 4:5) Gapu ta bigbigenda nga adda limitasion ti tunggal maysa, siaayat a palabsenda dagiti pagkurangan dagiti kakabsatda. (1 Pedro 4:8) Saan kadi a pudno a makapabang-ar dagiti panglakayen a napakumbaba ken naemma? Wen, pudno a kasta.
18. Ania ti masursuro dagiti panglakayen iti wagas ti panangtrato ni Jesus kadagiti ubbing?
18 Nalaka a maasitgan ni Jesus, uray kadagiti nanumo. Usigenyo ti sungbatna idi a dagiti adalanna binabalawda dagiti tattao a ‘nangyeg kenkuana kadagiti ubbing.’ Kinuna ni Jesus: “Bay-anyo dagiti ubbing nga umay kaniak; dikay padasen a pawilan ida.” Kalpasanna, “innalana dagiti ubbing kadagiti takiagna ket rinugianna a binendisionan ida, nga impatayna kadakuada dagiti imana.” (Marcos 10:13-16) Nadungngo ken naanus ni Jesus, isu a naallukoy kenkuana dagiti sabsabali. Saan a maamak dagiti tattao ken ni Jesus. Nalag-an ti riknada kenkuana uray dagiti ubbing. Umasping iti dayta, nalaka a maasitgan dagiti panglakayen, ket bayat nga ipakpakitada ti kinadungngo ken kinaanus, saan nga alusiisen kadakuada dagiti sabsabali—uray dagiti ubbing.
19. Ania ti nairaman iti panangtulad iti “panunot ni Kristo,” ket ania a panagregget ti kalikagumanna?
19 Ti panangtulad dagiti panglakayen ken ni Kristo Jesus ket agpannuray iti kauneg ti pannakaammoda maipapan kenkuana. “Siasino ti nakaammo iti panunot ni Jehova, tapno isurona koma?” inyimtuod ni Pablo. Sana innayon: “Ngem addaantayo iti panunot ni Kristo.” (1 Corinto 2:16) Tapno matuladtayo ti panunot ni Kristo, nasken nga ammuentayo ti panagpampanunotna ken amin nga aspeto ti personalidadna tapno ammotayo no ania ti mabalin nga aramidenna iti maysa a partikular a kasasaad. Nagsayaaten ta maam-ammotayo a naimbag ti Pangulotayo! Wen, kalikaguman daytoy ti panangadal a naimbag kadagiti salaysay ti Ebanghelio ken regular a panangusig iti kabibiag ken ulidan ni Jesus. No kasta ti panagregget dagiti panglakayen a mangsurot iti panangidaulo ni Kristo, ad-adda a maguyugoy dagiti kakongregasionda a mangtulad iti pammatida. Maragsakan dagiti panglakayen a makakita a sirarag-o a sursuroten dagiti sabsabali ti addang ti Pangulo.
Agmatalek iti Sidong ti Panangidaulo ni Kristo
20, 21. Bayat nga ur-urayentayo ti naikari a baro a lubong, ania koma ti determinasiontayo?
20 Napateg nga agmatalektayo amin iti panangidaulo ni Kristo. Bayat nga umad-adanitayo iti panungpalan daytoy sistema ti bambanag, mayarig ti kasasaadtayo kadagiti Israelita idi addada idiay Tanap ti Moab idi 1473 K.K.P. Addada idi iti wangawangan ti Naikari a Daga, ket babaen ken propeta Moises, indeklara ti Dios: “[Josue] ipanmonto daytoy nga ili iti daga nga insapata ni Jehova kadagidi ammada nga ited kadakuada.” (Deuteronomio 31:7, 8) Ni Josue ti nadutokan a pangulo. Tapno makastrekda iti Naikari a Daga, nasken nga agpasakup dagiti Israelita iti panangidaulo ni Josue.
21 Kuna ti Biblia kadatayo: “Ti Panguluenyo ket maymaysa, ni Kristo.” Ni Kristo laeng ti makaiturong kadatayo iti naikari a baro a lubong a pagtaengan ti kinalinteg. (2 Pedro 3:13) Sapay ngarud koma ta determinadotayo a sumurot iti panangidaulona iti amin a benneg ti biagtayo.
[Footnote]
a Dagiti “bituen” a natukoy ditoy dida isimbolo dagiti literal nga anghel. Sigurado a di usaren ni Jesus ti tao tapno mangilanad kadagiti impormasion agpaay kadagiti espiritu a parsua. No kasta, dagiti “bituen” isimboloda dagiti tattao a manangaywan, wenno papanglakayen, kadagiti kongregasion, a maibilangda kas mensahero ni Jesus. Ti pito a bilangda ipasimudaagna a naan-anayda sigun iti estandarte ti Dios.
Malagipyo Kadi?
• Kasano nga indauluan ni Kristo ti nagkauna a kongregasion?
• Kasano nga idadauluan ni Kristo ti kongregasion ita?
• Apay a nasken nga agpasakuptayo kadagidiay mangidadaulo iti kongregasion?
• Kasano a maiparangarang dagiti panglakayen a ni Kristo ti Panguloda?
[Ladawan iti panid 15]
Idadauluan ni Kristo ti kongregasionna ken adda iti makannawan nga imana dagiti manangaywan
[Dagiti Ladawan iti panid 16]
“Agtulnogkayo kadagidiay mangidadaulo kadakayo ket agpasakupkayo”
[Ladawan iti panid 18]
Nadungngo ken nalaka a maasitgan ni Jesus. Ikagumaan dagiti Kristiano a panglakayen a tumulad kenkuana