Panangtagiragsak iti Musika​—Aniat’ Sekreto?

MAAR-ARAMID ti nakaro nga imoralidad iti lubong idi ugma. Gapuna, nasarakan ni apostol Pablo a nasken a mangipaay iti nainget a balakad maipapan iti Nakristianuan a kababalin. Isut’ nagsurat iti kongregasion ti Efeso: “Daytoy ngarud, ibagak ken saksiak iti Apo, a dikay koma magmagnan a kas iti pannagna dagiti Gentil iti kinapalangguad ti isipda, idinto a nakudrepan ti pannakaawatda, a nayadayoda iti biag ti Dios, gapu iti kinakuneng nga adda kadakuada, a maipuon iti itatangken ti pusoda.”​—Efeso 4:17, 18.

Saan kadi a nagsayaatan met a deskripsion dayta iti wagas dagiti bambanag itatta? Daytoy iramanna ti tay-ak iti musika? Adu a moderno a musika ti mangiparangarang iti estilo nga ‘adayo iti nadiosan a panagbiag.’ Masansan dagiti sasaona iparangarangna ti ‘natangken a panagpuspuso,’ nga awanan iti panangaasi ken pannakipagrikna.

Ngem pinalawa pay ni Pablo ti balakadna babaen ti panagkunana: “Nga idinto a napukaw ti pannakabigbigda iti naimbag ken dakes, inyawatda ti bagida iti kinaderrep tapno aramidenda ti amin a kinarugit.”​—Efeso 4:19, The Jerusalem Bible.

Daytoy a ‘naganat a panagaramid iti kinarugit’ ket naiparangarang iti adu a musika itatta. Dagiti sasao ken ti panggep ti musika ti manggargari ti kaputotan a naigameren iti sekso, kinaranggas, droga, ken ragragsak. Kasano koma ti panangmatmat dagiti Kristiano kadagita a bisio? Paliiwenyo dagiti sasao ni Pablo: “Ngem saanyo nga inadal a kasta ni Kristo, malaksid no dikay nagdengngeg a naimbag kenkuana idi naisurokayo iti kinapudno ken Jesus.”​—Efeso 4:20, 21, JB.

Nasken “ti Naespirituan a Panagbalbaliw”

Kasano nga iyaplikartayo daytoy a balakad iti musika a mangiparangarang iti espiritu ti lubong? Dayta, ket no addaantayo “ti panunot ni Kristo,” kayatna a sawen, no addaantay ti kapanunotanna, ditay kayat ti umimdeng iti musika a “naindagaan, inaanimal, dinidemonio.”​—1 Corinto 2:16; Santiago 3:15.

Ngem mabalin nga imtuodenyo, ‘Kasano a mabalbaliwak ti musika a pagay-ayatko?’ Manen tumulong ni Pablo, ta kunana: “Ikkatenyo koma ti napalabas a panagbibiagyo; ti daan a kinataoyo, nga agrupsa a maitunos kadagiti derrep a mangallilaw. Ket mapabarokay koma babaen iti naespirituan a panagbalbaliw.”​—Efeso 4:22, 23, JB.

Adda sadiay ti sungbat, ti pannakapabaro ti isip babaen iti naespirituan a panagbalbaliw. Daytoy ramanenna ti ad-adu pay ngem ti pagay-ayattayo a musika. Sapulen dayta ti pannakaedukar manen, ti panangipangato kadagiti pagalagadan ken dagiti ipatpateg. Dayta kaipapananna ti panangbalbaliw iti wagas ti panagpampanunottayo, maysa a naiduma a kasasaad. Ket ramanen dayta ti pannakakita kadagiti bambanag manipud iti panangmatmat iti Dios ken ni Kristo. Kas ti nalawag a panangiyebkas ni Pablo iti dayta: “Uray no mangankayo wenno uminumkayo wenno uray ania nga aramidenyo, aramidenyo amin a maipaay iti dayaw ti Dios.”​—1 Corinto 10:31.

Adu a moderno a musika ti di mangidayaw iti Dios. Maisupadi ketdi, laksidenna dagiti ipatpateg nga itaktakderan dagiti Kristiano ken isu a situtulok a nakatayan dagiti adu kadagiti pagbaludan ken kadagiti kampo konsentrasion. Ngarud, apay nga ibilangtayo a panagsakripisio ti panangbalbaliwtayo iti pagay-ayattayo a musika tapno saantay nga ‘ayaten ti lubong wenno dagiti bambanag iti lubong’?​—1 Juan 2:15-17.

Nasayaat a Musika​—Aniat’ Sekreto?

No, gapu iti panagraemtayo kadagiti Nainkasuratan a prinsipio, ditay denggen dagiti dakes a musika, ania ti isukattayo iti dayta? Bueno, apay a dikay sukimaten dagiti dadduma a musika? Mabalin nga ad-adda a makaparagsak ken makapabileg ngem dagidiay a kaykayattayo idi napalabas. Kas pangarigan, maysa a dati a musiko ti rock ti nagkuna maipapan iti inaramidna a panagbalbaliw:

“Masapul nga ikagumaak ti agbaliw manipud iti nalaka a timek ti rock nga agturong iti maawat a nalatak a kita ti musika ken ti naun-uneg a klasikal a musika. Ngem idi nabigbigko a napatpategda ken saanakon a mailasin nga addaan iti espiritu ti kaaduan a moderno a musika, nalaklakan dayta ken ad-adda a makapnek. Pudno a nagsayaatan. Nabigbigko ti nakaikapisak gapu iti panangidumdumak iti dadduma a kita iti musika.”

Addada adu a kita iti klasikal a musika, agraman dagiti dadduma a katutubo a moderno a musika, nga addaan iti nagsayaatan a melodia, nadalus a sasao, ken di mangiyebkas iti pilosopia a maikontra kadagiti prinsipio ti Biblia. Ti sekreto isu ti panangsapul ken panangtagiragsak iti musika a di makadangran ti impluensiana iti panagpampanunottayo, musika a ‘nalinteg, nadalus, naimbag ti damagna, nasingpet, ken nadayaw.’​—Filipos 4:8.

Paset ti Musika iti Biag ti Kristiano

Kadagiti dadduma, maysa a pamay-an ti panangtagiragsak iti nasayaat a musika isu ti panagkanta wenno panagsuro nga agtokar iti instrumento. Adu a ragsak ti magun-odan iti solo ken grupo a panagkanta a kadua ti pamilia ken dagiti gagayyem. Kas kadagiti amin a bambanag, nupay kasta, kasapulan ti kinatimbeng. Ti panaglinglingay wenno panagdibersion saan koma nga isu ti pagregreggetan iti panagbiag ti Kristiano. No mapasamak dayta, uray pay ti nasayaat a musika, gapu iti panaglablabes, mabalin nga addaan kadagiti di nasayaat nga epekto. Ngarud ti Kristiano agpeggadto iti panagbalin a ‘managayat iti ragragsak imbes a managayat iti Dios.’​—2 Timoteo 3:4.

Ti musika ket paset met iti panagdayawtayo ken Jehova. Iti Israel idi ugma, nagkanta ni Asap ken dagiti kakabsatna: “O agyamankayo ken Jehova, dakayo a tattao; awaganyo ti naganna, ipakaammoyo kadagiti il-ili dagiti ar-aramidna! Isu ti ikantaanyo, dagiti panagdayaw ikantayo kenkuana, sawenyo ti maipapan kadagiti nakaskasdaaw nga ar-aramidna.” Wen, ti musika maidaydayawna ti Dios ken mangay-ayo kenkuana.​—1 Cronicas 16:8, 9.

Dagiti kankanta iti Pagarian nga usaren dagiti Saksi ni Jehova kadagiti Kingdom Halls da ket naibatay kadagiti teksto ti Biblia, salmo, karkararag, ken sursuro. Saan kadi a matagiragsaktayo met a naimbag daytoy a sagrado a musika? Ket saan kadi masapul nga ipakitatayo ti rag-otayo babaen ti panagkanta a buyogen ti rikna ken kinabara? Uray pay kadagiti okasion malaksid kadagiti Nakristianuan a gimgimong, saan kadi a mabalin a pabang-arantay ti panagbiagtayo babaen kadagiti napipintas a pannakaputar dagitoy a kankanta a maawagan Kingdom Melodies?

Kadagitoy a toktokar ti orkestra, amin dagiti musiko ket Saksi ni Jehova. Dadduma ti propesional nga agtoktokar iti orkestra a simponia. Dadduma, agraman ti dati a musiko ti rock a naadaw iti ngato, ket nalaingda nga agtutubo a mangtagiragsak kadagiti adu a desente a musika. Saanda a marikna a maikapkapisda gapu iti panangidianda iti musika a mangiparangarang iti naindagaan, dinidemonio a kababalin. Ti nagsayaatan nga ulidanda ipakitana a datayo met, no palubosantayo dagiti prinsipio ti Biblia a mangituray iti panagpilitayo, makasaraktayo iti adu a nasayaat a panagrag-o iti musika, agpadpada iti sekular ken sagrado.​—Efeso 5:18-20.

[Kahon iti panid 28]

“Maysa laeng ti pangawis ti musika a rock, ti di sibilisado a pangawis, iti panagtarigagay iti sekso​—saan nga ayat, saan nga eros, no di ket ti di nasukay ken di nasursuruan a seksual a derrep . . . Ammo dagiti agtutubo a ti rock addaan tokar a seksual a panagdenna.”​—The Closing of the American Mind, ni Allan Bloom.