Agprogresoka—Rumang-ayka
IDI damo a nasursurom nga iyaplikar dagiti prinsipio ti Biblia, nagin-inut a nagbalbaliw ti nakairuamam a panagpampanunot, panagsasao, ken panagug-ugali. Adu kadagitoy ti nabalbaliwan uray idi sakbay a nagpasalistaka iti Teokratiko nga Eskuelaan ti Panagministro. Mabalin a nagprogresoka iti punto nga indedikarmo ti biagmo ken Jehova. Kayat kadi a sawen dayta nga agsardengkan nga agprogreso? Saan a pulos. Ti panagpabautisarmo ket pangrugian laeng.
Agserserbin ni adalan a Timoteo kas Kristiano a panglakayen idi imbaga ni Pablo nga ‘utobenna’ dagiti naibalakad kenkuana ken dagiti pribilehio a naitalek kenkuana—a ‘maipamaysa’ kadagitoy a bambanag—tapno ti ‘panagrang-ayna maiparangarang iti amin a tattao.’ (1 Tim. 4:12-15) Uray mangrugrugika pay laeng a magna iti dalan ti kinapudno wenno aduankan ti kapadasan iti Nakristianuan a panagbiag, rumbeng nga interesadoka a rumang-ay.
Pannakaammo ken Panagbalbaliw
Iti Efeso 3:14-19, mabasatayo nga inkararag ni apostol Pablo a dagiti kapammatianna “naan-anay a maawatan[koma] iti isip[da] . . . ti kaakaba ken kaatiddog ken kangato ken kauneg” ti kinapudno. Gapu iti dayta, nangipaay ni Jesus kadagiti sagut a tattao a mangisuro, mangilinteg, ken mangpabileg iti kongregasion. Ti regular a panangmennamenna iti naipaltiing a Sao ti Dios, agraman ti panangiwanwan dagiti aduan iti kapadasan a mannursuro, matulongandatayo a ‘dumakkel’ iti naespirituan.—Efe. 4:11-15.
Ramanen dayta nga irarang-ay ti ‘pannakapabaro iti puersa a mangtigtignay iti panunotmo.’ Saklawen daytoy ti panangpatanor iti natibker a panagpampanunot a maitunos iti panunot ti Dios ken ni Kristo. Kalikagumanna ti pannakairuam iti panagpampanunotda, tapno ‘maikawes ti baro a personalidad.’ (Efe. 4:23, 24) No adalem dagiti Ebanghelio, matmatmatam kadi dagitoy pakasaritaan ti biag ni Kristo a kas pagwadan a surotem? Sipsiputam kadi dagiti espesipiko a galad nga impakita ni Jesus ken talaga nga ikagkagumaam nga iparangarang dagitoy iti biagmo?—1 Ped. 2:21.
Dagiti topiko nga iramanmo iti pannakisaritam mabalin nga ipasimudaagda ti rukod ti panagrang-aymo. Saan nga inuulbod, nagubsang, narugit, wenno negatibo ti panagsasao dagidiay nangikawes iti baro a personalidad. Imbes ketdi, ti panagsasaoda ket “naimbag a maipaay a pangpabileg . . . tapno maipaayna no ania ti mainugot kadagiti agdengdengngeg.” (Efe. 4:25, 26, 29, 31; 5:3, 4; Jud. 16) Dagiti komento ken panagsasaoda iti pribado ken kadagiti gimong iti kongregasion ipamatmatna a ti kinapudno binalbaliwannan ti biagda.
No saankan a “mayallo-allon a kas panangyallon dagiti dalluyon ket iyallaalla ditoy ken idiay ti tunggal angin ti sursuro,” pammaneknek met daytoy a rumangrang-ayka. (Efe. 4:14) Ania ti aramidem, kas pagarigan, no gabsuonannaka ti lubong kadagiti baro nga ideya, gannuat, wenno paglinglingayan? Masulisogka aya a mangusar iti tiempom kadagita a banag imbes a dagiti naespirituan nga obligasion ti asikasuem? Malapdan ti naespirituan a panagrang-aymo no kasta ti aramidem. Anian nga ad-adda a nainsiriban nga usarem ti tiempo kadagiti naespirituan nga aramid!—Efe. 5:15, 16.
Ti wagas a pannakilangenmo kadagiti dadduma ipasimudaagna met ti rinang-ayam iti naespirituan. Nasursurom kadin ti agbalin a ‘nadungngo a mannakipagrikna, a sibubulos a mamakawan’ kadagiti kakabsatmo?—Efe. 4:32.
Ti panagprogresom iti panangaramid kadagiti bambanag sigun iti wagas ni Jehova ket rumbeng a maiparangarang agpadpada iti kongregasion ken iti pagtaengan. Maiparangarang met koma dayta idiay eskuelaan, kadagiti publiko a lugar, ken iti panggedam. (Efe. 5:21–6:9) No kadagita amin a sirkumstansia ket ad-adda nga ipakpakitam dagiti nadiosan a galad, ngarud, maiparparangarang a mismo ti panagrang-aymo.
Usarem ti Sagudaymo
Intalek ni Jehova iti tunggal maysa kadatayo dagiti abilidad ken talento. Namnamaenna nga usarentay dagitoy a maipaay kadagiti sabsabali iti wagas a babaen kadatayo, mayebkasna ti di kaikarian a kinamanangngaasina. Maipapan iti daytoy, insurat ni apostol Pedro: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios.” (1 Ped. 4:10) Kasano ti panangannongmo iti kinamayordomom?
Intuloy ni Pedro: “No ti asinoman agsao, agsao koma a kasla dayta ti sagrado a pammakdaar ti Dios.” (1 Ped. 4:11) Ipaganetget daytoy a bersikulo ti responsabilidadtayo nga agsao a naan-anay a maitunos iti Sao ti Dios, tapno maidaydayaw ti Dios. Ti wagas ti panagsaotayo ket pakaidayawan met koma ni Jehova. Dagiti masursurom iti Teokratiko nga Eskuelaan ti Panagministro matulongannaka a mangusar iti sagudaymo iti kasta a wagas—panangidayaw iti Dios babaen ti panangtulongmo kadagiti sabsabali. Buyogen ti kasta a panggep, kasanom a rukoden ti panagprogresom iti eskuelaan?
Imbes a bilbilangem ti kaadu dagiti punto a nalpasmon iti porma a pangbalakadan iti palawagmo wenno ti klase dagiti paset a naited kenka, panunotem no kasano a pinarang-ay ti kawadwad ti pannakasanaymo ti kalidad ti sakripisio a pagdayawmo. Sanayennatayo ti eskuelaan nga agbalin a mas epektibo iti tay-ak ti ministerio. Isu nga isaludsodmo iti bagim: ‘Isagsaganak met laeng aya ti sawek iti tay-ak ti serbisio? Nasursurok aya nga ipakita ti personal nga interes kadagidiay kaskasabaak? Isagsaganak met la aya ti pundasion para iti sumaganad nga isasarungkar babaen ti panangibati kadakuada iti saludsod a pagsaritaanmi inton agsubliak? No adda iyad-adalak iti Biblia, ikagkagumaak aya ti rumang-ay kas mannursuro a mangdanon iti puso?’
Saanmo a panunoten a nagprogresokan gapu laeng kadagiti pribilehio a naawatmo. Makita ti panagrang-aymo, saan nga iti paset a naited kenka, no di ket iti panangitungpalmo iti dayta. No maikkanka iti paset a kasapulan ti panangisuro, isaludsodmo iti bagim: ‘Talaga kadi nga impakatko ti arte ti panangisuro? Indatagko kadi ti material iti wagas a nangbalbaliw iti biag dagidiay nakangngeg iti dayta?’
Ti balakad nga usarem ti sagut a naited kenka ipasimudaagna ti panagboluntario. Madadaanka kadi a makipagtrabaho kadagiti dadduma iti tay-ak ti ministerio? Gunggundawayam kadi a tulongan dagiti kakongregasionmo a kabbaro, agtutubo, wenno adda an-annayenna? Madadaanka kadi nga agdalus idiay Kingdom Hall wenno tumulong iti nadumaduma a pamay-an kadagiti kombension ken asamblea? Masansan kadi nga ag-auxiliary pioneer-ka? Mabalinmo kadi ti agserbi a kas regular pioneer wenno tumulong iti kongregasion a dakdakkel ti pakasapulanna? No maysaka a kabsat a lalaki, ragragpatem kadi dagiti Nainkasuratan a kualipikasion para kadagiti ministerial nga adipen ken panglakayen? Ti kinatulokmo a tumulong ken umawat iti responsabilidad ket pagilasinan ti panagrang-ay.—Sal. 110:3.
Ti Paset ti Kapadasan
No ipapanmo a limitado ti kabaelam gapu ta kurang ti kapadasam iti Nakristianuan a panagbiag, dika maupay. Ti Sao ti Dios “mamagsirib iti daydiay awanan kapadasan.” (Sal. 19:7; 119:130; Prov. 1:1-4) No tungpalentayo ti balakad ti Biblia, magunggonaantayo iti awan pagkuranganna a sirib ni Jehova, a napatpateg ngem iti aniaman a nasursurotayo iti kapadasan laeng. Kaskasdi, bayat a rumangrang-aytayo iti panagserbitay ken Jehova, makagun-odtayo iti napateg a kapadasan. Kasanotay a mausar dayta a pakagunggonaan?
Tangay napasarannan ti nagduduma a kasasaad iti biag, mabalin nga irason ti maysa: ‘Napadasakon dayta idi. Ammokon ti aramidek.’ Nainsiriban aya dayta? Palagipannatayo ti Proverbio 3:7: “Dika agmasirib kadagiti bukodmo a mata.” Pudno a ti kapadasan palawaenna ti panangmatmattayo kadagiti banag a nasken nga usigen iti panangtaming iti nadumaduma a kasasaad iti biag. Ngem no agprogprogresotayo iti naespirituan, ti kapadasantayo rumbeng nga imalditna met iti isip ken pusotayo a kasapulantayo ti pamendision ni Jehova tapno agballigitayo. No kasta, maiparangarang ti panagrang-aytayo, saan a babaen ti panangsango kadagiti situasion a buyogen ti panagtalek iti bukod a bagi, no di ket babaen ti madadaan a panagpaiwanwan ken Jehova iti biagtayo. Maipakita dayta babaen ti panagkompiansatay nga awan banag a mapasamak no saan a gapu iti pammalubosna ken babaen ti panangtaginayon iti panagtalek ken nadungngo a relasion iti nailangitan nga Amatayo.
Itultuloymo ti Rumang-ay
Nupay nataenganen iti naespirituan ken maysa a napulotan a Kristiano, binigbig ni apostol Pablo a masapul nga itultuloyna ti ‘rumagpat’ tapno magun-odna ti kalat a biag. (Fil. 3:13-16) Addaanka met aya iti kasta a panangmatmat?
Kasano kadakkelen ti panagprogresom? Rukodem ti irarang-aymo babaen ti no kasano kaan-anay ti panangikawesmo iti baro a personalidad, no kasano kaan-anay ti panagpasakupmo iti kinasoberano ni Jehova, ken no kasano kapasnek ti panangusarmo kadagiti naited kenka a saguday a mangidaydayaw ken Jehova. Bayat a magunggonaanka iti edukasion nga ipapaay ti Teokratiko nga Eskuelaan ti Panagministro, dagiti kualidad a naitampok iti Sao ti Dios ket rumbeng a progresibo a maiparangarang iti wagas ti panagsaom ken panangisurom. Tandaanam dagitoy nga aspeto ti panagrang-aymo. Wen, pagragsakam dagita, ket ti panagrang-aymo nalawag a maiparangarangto.