Dikay Agimula iti Sakit ti Nakem

MABALIN a kasla narigat a liklikan ti gumura no adda mangsair kadatayo. Adda praktikal a pammagbaga ti Biblia iti kakasta a kasasaad. “Agpungtotkayo,” insurat ni apostol Pablo, “ngem nupay kasta dikay agbasol; ti init saannakay koma a malnekan a sipupungtot.”​—Efeso 4:26.

No adda nangsair kadatayo, gagangay laeng ti agpungtot. Ti kuna ni Pablo nga “agpungtotkayo” ipasimudaagna a mabalin nga umiso no dadduma ti agpungtot​—nalabit gapu iti di nainkalintegan a pannakatrato wenno kinaawan hustisia. (Idiligyo ti 2 Corinto 11:29.) Ngem no saan a mataming, mabalin a dakes ti pagbanagan uray ti nainkalintegan a panagpungtot, a mangituggod iti nakaro a basol. (Genesis 34:1-31; 49:5-7; Salmo 106:32, 33) Gapuna, ania ti mabalinyo nga aramiden no makapungtotkayo?

Iti kaaduan a kasasaad a nairaman ti babassit a biddut, mabalinyo a risuten ti kasasaad iti pusoyo ket ‘agulimekkay’ laengen wenno saan, asitganyo daydiay nangsair ket pagsaritaanyo ti parikut. (Salmo 4:4; Mateo 5:23, 24) Aniaman kadagita, nasayaat a risuten a dagus dayta a banag tapno saan a kumaro ti sakit ti nakem ket dakes ti pagtungpalanna.​—Efeso 4:31.

Sibubulos a pakawanen ni Jehova dagiti basoltayo, uray dagiti basol a gapu iti kaawan ammotayo, mabalin a ditay mapupuotan a maaramid. Ditay met kadi mapakawan ti bassit a biddut ti padatayo a tao?​—Colosas 3:13; 1 Pedro 4:8.

Makapainteres, ti Griego a sao para iti “pakawanen” literal a kaipapananna, “palabsen.” Ti panangpakawan dina kalikaguman a tagibassiten wenno panuynoyantayo ti basol. No dadduma mabalin a kasapulan laeng a palabsen ti kasasaad, nga ammoyo a ti panagimula iti sakit ti nakem ad-adda laeng a padagsenannakayo ket singaenna ti panagkaykaysa ti kongregasion Kristiano. Maysa pay, mabalin a makadangran iti salun-atyo no agimula iti sakit ti nakem!​—Salmo 103:9.