Maysa a Lubong nga Awan Dagiti Mannanakaw

NAGPARTAK ti pannakapasamakna. Intutok ti maysa a lalaki a disentet’ panagkawkawesna ti rebolberna iti ulo ni Antônioa iti sango ti pagtaenganna idiay São Paulo, Brazil. Pinilitna ni Antônio nga itedna dagiti tulbek ken papeles ti kotsena, sa pimmanaw a dagus a nakakotse.

Idiay Rio de Janeiro, iti imatang ti balasitangna nga agtawen iti sangapulo, dinarup dagiti uppat a nagtagiarmas a lallaki ti maysa a lalaki nga agnagan Paulo. Ket idi nakagtengdan a nakakotse iti pagtaenganna, simrek dagiti birkug ket innalada amin a kayatda, a pinunnoda ti dua a kotse ni Paulo. Pinangtaanda a papatayen ti asawa ni Paulo, inkuyogda daytoy agraman ti maysa nga empleado a kas hostage sada nagturong iti ili iti paglakuan ti alahas ni Paulo, ket innalada amin nga agkakapateg a banag. Nupay kasta, idi agangay kellaat a nagtelepono dagiti mannanakaw, ket imbagada no sadino ti nangibatianda kadagiti kotse.

Anian a makapasakit-nakem ti matakawan iti kuarta ken sanikua a nagbannoganyo! Nupay saan a nagibales ni Antônio wenno ni Paulo, dagiti dadduma agibalesda iti bukodda a pamay-an. Mabalin a gudasenda wenno pilayenda ti mannanakaw, ta no saan mapukawda ti mismo a biagda. Kas pangarigan, idi rinabsut ti maysa nga agtutubo ti relo ti maysa a babai a taga Brazil, inruar ti makapungtot a babai ti rebolber iti bagna sana pinaltogan ti mannanakaw a nakatayan daytoy. Ti resulta? Ipadamag ti O Estado de S. Paulo: “Dayawen dagiti nakasaksi ti inaramid ti babai, ket awan ti mayat a tumulong kadagiti polis a mangbigbig kenkuana.” Nupay il-iliwenda ti maysa a lubong nga awan dagiti mannanakaw, saan nga agibales dagiti Kristiano a kas iti inaramid dayta a babai. Yantangay kukua ti Dios ti pammales, ipangagda ti sasao ti Proverbio 24:19, 20: “Dika agalimuteng a gapu kadagiti managdakdakes. Dika apalan dagiti nadangkes a tattao. Ta awan ti masakbayan ti dakes a tao.”

Ngem ania ngay ti aramidenyo no darupendakayo? Ipakita ti maysa a pasamak idiay Rio de Janeiro ti kinapateg ti panagtalinaed a natanang. Agluglugan iti bus ti maysa a Kristiano a ni Heloísa tapno mapan mangyadal iti Biblia. Hinoldap ti dua a lallaki dagiti pasahero. Idi nakagtengen iti pagsardengan ti bus a pagdissaaganna, imbaga ni Heloísa kadakuada nga isu ket maysa kadagiti Saksi ni Jehova ket mapan mangyadal iti Biblia. Impakitana ti Bibliana ken ti katulongan iti panagadal nga awitna. Awan a pulos ti innalada kenkuana ket pinalubosanda a dimsaag. Ngem saanda a pinalubosan ti sabali a pasahero. Kinuna ti drayber idi agangay nga awan pay kasta a naimatanganna.

Nagtalinaed met a natanang ni Regina idi a binilin ti dua a nagtagiarmas a lallaki a lumugan iti kotsena. Impakita ni Regina ti personal a kopiana nga Agriingkayo! ket nangpaneknek. Yantangay agnernerbios dagiti birkug, indawatna a luktanda ti glove compartment a nangikabilanna iti sumagmamano a kendi. Ngem idi makitada dagiti cassette tape a Kingdom Melodies, dimngegda iti dayta a musika. Gapu ta natalinaay ti kasasaad, pinanawan dagiti birkug ni Regina iti kalsada a pulos a di naan-ano, nga impanamnamada kenkuana a makasarakto iti naimbag a tao a tumulong kenkuana. Kalpasan ti sangapulo a minuto a pannagnana, nakasarak iti maysa a balay, ngem saan a mamati ti bumalay idi inestoria ni Regina ti napasamakna, a kunkunana: “Kasla awan a pulos ti nakaan-anuam; nakatantanangka.”

Nupay mabalin a saan a naranggasan ti biktima, ti kasta a makapakullayaw a kapadasan mabalin nga adda dakes nga epektona. ‘Mabalin a saan a makaidna ti biktima, kagurana dagiti kameng ti pamilia wenno dagidiay mangikagkagumaan a tumulong kenkuana, saan nga agpiar kadagiti dadduma, makumikom kadagiti babassit a banag, mariknana a naulpit ti lubong,’ kuna ti O Estado de S. Paulo. Maigiddiat iti dayta, ti biktima nga agtalek ken Jehova a Dios mabalin a malasatanna ti pasamak a di naan-ano iti pisikal ken emosional. Nupay kasta, saan aya a nagsayaat no awanen ti krimen wenno aniaman a pagtaudan ti buteng?

“Ti Mannanakaw Saan Koma nga Agtakawen”

Nupay kaykayat ti adu ti inaagum a kabibiagda, adun a mannanakaw ti natulongan ti Sao ti Dios a nangbalbaliw kadagiti tarigagayda ken iti personalidadda. (Efeso 4:23) Gapu ta addaanda iti napaypayso, naibatay-Biblia a panggep ti biag, ipappapusoda ti sasao a: “Nasaysayaat ti bassit a kakuyogna ti kinalinteg ngem ti adu a masapulan a kakanunong ti kinakillo.” (Proverbio 16:8) Kuna ni Cláudio: “Gistay Saksi ti amin a kameng ti pamiliak, ngem diak pulos idi dengdenggen ti ibagbagada maipapan ken Jehova ken kadagiti panggepna. Iti panagawidko a nakalugan iti tinakaw a pickup manipud iti biahe nga agarup 2,000 a kilometro ti kawatiwatna, adu a checkpoints ti naglasatak. Iti saan a nabayag nabigbigko a masapul nga agbalbaliwak. Pinadasko idin ti agbalbaliw ngem napaayak. Iti daytoy a gundaway nalagipko dagiti kabagiak a Saksi ni Jehova ken ti pannakaidumada, ta addaanda iti rag-o, kinaragsak, ken talna.” Nagbanaganna, rinugian ni Cláudio ti nagadal iti Sao ti Dios, tinallikudanna ti droga ken dagiti dati a gagayyemna, ket maysa itan a Kristiano a ministro.

Ipangpangag met ita dagiti dadduma ti sasao a: “Dika agtalek iti panangilupit, ket dika mapaubbaw iti panagagaw.” (Salmo 62:10) Maysa idi a drug addict ken drug trafficker ni José. Naibalud gapu iti pananggandatna a pumatay iti naminsan a panangloobna. Idi naruk-atanen, nakipagadal iti Biblia iti kayongna a nakagunggonaanna. Insardengna ti agusar ken aglako iti droga ket maysa itan a naregta a Saksi.

Nupay kasta, saan a giddato wenno babaen ti milagro a mapatanor ti baro a personalidad. Ni Oscar, a naigamer idi iti droga ken panagtakaw, kunana: “Sipapasnek unay a nagkarkararagak ken Jehova. Adu a lua ti nagarubos nga uray la kasla bassit a danaw ti nagbalinan ti datar.” Wen, malaksid pay iti naanep a panagadal iti Sao ti Dios, kasapulan ti awan sardayna, naimpusuan a panagkararag. Imutektekanyo ti sirib a maanninaw iti daytoy a kararag: “Dika itden kaniak ti kinapanglaw wenno ti kinabaknang. Taraonannak iti taraon a mayanatup kaniak, di la ket ta aglaplapusananak ket ilibakka ken kunaek: ‘Siasino ni Jehova?’ wenno di la ket ta pumanglawak ket agtakawak ken aramatek a sibabassawang ti nagan ti Diosko.”​—Proverbio 30:8, 9.

Ti panagimbubukodan masapul a masukatan iti napaypayso nga ayat: “Ti mannanakaw saan koma nga agtakawen, no di ket agtrabaho, nga aramidenna ti naimbag babaen ti imana, tapno adda pagitedna iti adda pakasapulanna.” (Efeso 4:28) Kas kadagiti dadduma a Kristiano idi umuna a siglo, a dati a ‘mannanakaw wenno naagum a tattao,’ siaasi a pakawanen ni Jehova, babaen ti subbot nga inted ni Jesu-Kristo, dagiti agbabawi. (1 Corinto 6:9-11) Anian a makaliwliwa nga uray no ania ti napalabastayo, mabalintay a balbaliwan ti kabibiagtayo ken magun-odan ti anamong ti Dios!​—Juan 3:16.

Kinatalged iti Baro a Lubong ti Dios

Darepdepenyo ti maysa a daga nga awan dagiti mannanakaw. Saanyon a kasapulan pay ti nangina a sistema iti panangipakat ti linteg babaen dagiti hues, abogado, polis, ken pagbaludan! Maysanto dayta a narang-ay a lubong a tunggal maysa raemenna dagiti dadduma ken dagiti sanikuada! Narigat kadi a patien dayta? Talaga kadi a bumallaetto ti Dios iti natauan nga ar-aramid ket pagpatinggaenna ti kinakillo? Awisendakayo a mangsukimat iti ebidensia a ti Biblia isu ti Sao ti Dios ket mapangnamnamaan dagiti padtona. Masarakanyo ti nalagda a pakaibatayan ti panagtalek nga asidegen ti panagbalbaliw. Awan ti makalapped iti Dios a mangipaay iti gin-awa a naikari kadagiti amin nga agayat iti kinalinteg: “Dika agalimuteng gapu kadagiti managdakdakes. Dimo apalan dagiti agar-aramid iti kinakillo. Ta magangodanto iti mabiit a kas ruot, ket malaylaydanto a kas nalangto a ruot.” (Salmo 37:1, 2) Asidegen ti naan-anay a pannakatungpal dagitoy a sasao a naisurat idi un-unana nga aldaw.

Pagpatinggaento ti Pagarian ti Dios ti ladingit ken kinakillo, a pakaigapuan ti pannakapukaw iti namnama ken panagduadua. Awanton ti nakurapay, a mapilitan nga agtakaw. Makainanamatayo iti padto nga: “Addanto kinaruay ti bukel iti daga; iti tapaw dagiti bambantay aglaplapusananto. Ti bungana kaslanto iti adda idiay [nagkauna] a Libano, ket dagiti taga-siudad agrangpayadanto a kas iti ruot iti daga.” (Salmo 72:16) Wen, iti naisubli a Paraiso, awanto a pulos ti mangsinga iti talna dagiti tattao a makaammo ken agdaydayaw iti pudno a Dios.​—Isaias 32:18.

Anian a nagsayaat a gunggona gapu iti panangsaranget kadagiti aramid daytoy naagum a lubong! Kunaen ti Proverbio 11:19: “Ti sitatalinaed iti kinalinteg makagtengto iti biag, ngem ti mangsurot iti dakes aramidenna ti pakatayanna met laeng.” Wen, inton magessat dagiti managdakdakes, awanton panggapuan ti siasinoman a mangiyam-amak iti biagna wenno iti sanikuana. Ikari ti Salmo 37:11 kadatayo: “Dagiti naemma tagikuaendanto ti daga, ket maay-ayatandanto iti kinaruay ti talna.”

[Footnote]

[Kahon iti panid 5]

Panangpaay Kadagiti Mannanakaw

ITI PAGTAENGAN​—Yantangay mabalin a rumaut dagiti mannanakaw, addaka man iti taengmo wenno awan, irikep ken ikandadom dagiti ridaw. Irekomendar dagiti eksperto ti panangikabil iti alarma wenno aso a para bantay. Pakaammuam ti mapagtalkan a kaarruba no mapanka agbakasion. Agtanangka​—nasiglat, di mapakpakadaan ti panagtigtignay dagiti mannanakaw, ken alistoda a mangbaliw iti planoda no matarantada. No maysaka kadagiti Saksi ni Jehova, ibagam ti kinasiasinom ket padasem ti mangpaneknek. Mabalin a matukaymo ti rikna dagiti mannanakaw wenno maguyugoymo ida a mangngaasi kenka. Dika lumablaban malaksid no ranggasandaka.

ITI PUBLIKO​—Siputam no adda sumursurot kenka. Magnaka iti tengnga ti sidewalk. Liklikam dagiti nasipnget ken awan matagtagitaona a lansangan. Idulinmo a naimbag ti petakam wenno sanikuam. Magnaka nga alerto a kas man adda papanam. Dika agaruat iti nangina a kawes wenno rumimatrimat nga alahas. Mangikuyogka iti kaduam a makitienda no talaga a kasapulan. Ti laeng kasapulam a kuarta ti itugotmo, ket saan la a maymaysa a bulsa wenno lugar ti pangidulinam.

ITI KOTSE​—No kadawyan iti lugaryo ti “carjacking,” dika aggian iti nakaparada a kotsem. Baliwbaliwam ti pagnaam nga agturong ken aggapu iti trabaho. Surotem ti nataltalged a dalan, uray no nawatwatiwat. Sakbay nga agiparadaka, kitaem ti aglawlawmo amangan no adda nakaaatap. Dimo lukluktan ti kargadera iti awan matagtagitaona a lugar. Dika agibati kadagiti agkakapateg a banag iti uneg ti kotse a nalaka a makita. Ti nakandaduan a kawar wenno aniaman a kagawaan a pangtungday iti panagtakaw mabalin a paayenna dagiti gagangay a mannanakaw.

[Kahon iti panid 6]

“Isardengyo ti agurnong kadagiti gameng nga agpaay kadakayo ditoy daga, ta ditoy ibusen ti sanga ken ti lati, ken ditoy serken ken takawen dagiti mannanakaw. Agurnongkayo ketdi kadagiti gameng nga agpaay kadakayo idiay langit, ta idiay saan nga ibusen ti sanga ken ti lati, ken idiay saan a serken ken takawen dagiti mannanakaw.”​—Mateo 6:19, 20