Magnakayo kas Masirib a Tattao
1 Idi inawis ni Jesus dagiti uppat a mangngalap nga agbalin a pasurotna, saanda nga intantan ti desisionda no di ket ‘madagdagus a simmurotda kenkuana.’ (Mat. 4:18-22) Idi nakomberte ni Saulo a taga-Tarso ken naisubli ti panagkitana, saan met a nagtaktak no di ket “dagus a kadagiti sinagoga rinugianna nga ikasaba ni Jesus.” (Ara. 9:20) Agtultuloy ti panaglabas ti oras; no limmabasen dayta, saanen a maisubli. Dayta ti gapuna a napateg para kadatayo ti ‘magna kas masirib a tattao’ no maipapan iti panangusartayo iti tiempotayo.—Efe. 5:15, 16.
2 Di Mapakpakadaan a Pasamak: Dagiti oportunidadtayo nga agserbi ken Jehova ita ket mabalin nga awanton inton bigat. (Sant. 4:14) Awan ti mailaksid iti “di mapakpakadaan a pasamak.” (Ecl. 9:11) Malaksid iti dayta, lumakay ken bumakettayo amin ket iti daytoy agdama a sistema ti bambanag, saantayo a maliklikan dagiti “makadidigra nga aldaw” a kakuyog ti panagnataengan ken manglimitar iti kabaelantayo nga aramiden iti panagserbi ken Jehova. (Ecl. 12:1) Gapuna, saan a nainsiriban ti panangitantan iti panagdedikar iti Dios wenno ti panaguray iti kasayaatan a kasasaad sakbay a palawaentayo ti ministeriotayo no ipalubos met ita ti kasasaad. (Luc. 9:59-62) Natalingenngen ti biag ni Abraham uray iti maud-udin a tawtawenna, a natay a “lakay ken napneken” gapu ta nainsiriban ti panangusarna iti biagna. Naan-anay ti kinasungdona ken Jehova.—Gen. 25:8.
3 Ababan ti Tiempo: Kayattayo met nga usaren a nainsiriban ti panawentayo gapu ta ‘ababan ti nabati a tiempo.’ (1 Cor. 7:29-31) Nakaas-asidegen ti panungpalan daytoy daan a sistema ti bambanag. Agpatingganton ti gundawaytayo a makiraman iti nasaknap a panangurnong kadagiti marakarnero a tattao bayat ti ‘panagani ditoy daga.’ (Apoc. 14:15) Nasken nga agannadtayo a ditay palubosan dagiti pakaringgoran ken pakasingaan iti biag a mangagaw iti tiempotayo a nasaysayaat nga usaren iti ministerio. (Luc. 21:34, 35) Anian a makapnek ti pananglagiptayto iti napalabas gapu ta ammotayo a naan-anay a nakiramantayo iti trabaho a panagani!
4 Nasken a nasiputtayo a kanayon tapno saantayo a maikapis no adda makaparagsak ken silulukat a pribilehio iti panagserbi. Determinadotayo koma a mangaramid iti amin a kabaelantayo nga agserbi ken Jehova “agingga a maaw-awagan dayta iti ‘Ita nga aldaw.’” (Heb. 3:13) No aramidentayo dayta, maipakitatayo a pudno a masiribtayo gapu ta “ti agaramid iti pagayatan ti Dios agtalinaed iti agnanayon.”—1 Juan 2:17.