Itultuloymo ti Rumang-ay iti Naespirituan!
Ti aldaw ti bautismotayo ti aldaw a kankanayon koma nga ipatpateg ken laglagipentayo. Ngamin, daytoy ti aldaw nga impaduyakyaktayo iti publiko a nagdedikartayon nga agserbi iti Dios.
DAKKEL a panangikarigatan para kadagiti dadduma a tattao ti pannakagteng iti daytoy a punto—ti panangisardeng kadagiti nabayagen a bisio, panangiwaksi iti dakes a kakadua, panangbaliw kadagiti nakaro ti pannakaigamerna a kapanunotan ken kababalin.
Uray kasta, nupay ti bautismo ket naragsak ken napateg a pasamak iti biag ti maysa a Kristiano, kaskasdi a pangrugian laeng dayta. Kuna ni apostol Pablo kadagiti bautisado a Kristiano sadi Judea: “Ita ta binaybay-antayon ti pagdamdamuan a doktrina maipapan ken Kristo, agreggettayo koma a rumang-ay iti kina-nataengan.” (Hebreo 6:1) Wen, amin a Kristiano nasken a ‘makagteng . . . iti panagmaymaysa iti pammati ken iti umiso a pannakaammo iti Anak ti Dios, iti maysa a nataenganen a tao, iti rukod ti kinatayag ti kinanaan-anay ti Kristo.’ (Efeso 4:13) Babaen laeng iti panagrang-aytayo agingga a maragpat ti kinanataengan a pudpudno a “napatibker[tayo] iti pammati.”—Colosas 2:7.
Iti kallabes a sumagmamano a tawen, ginasut a ribu a kadeddedikar a managdayaw ti timmipon iti kongregasion Kristiano. Nalabit maysaka kadakuada. Kas kadagiti kakabsatmo idi umuna a siglo, saanmo a kayat ti agtalinaed a maladaga iti naespirituan. Kayatmo ti dumakkel, rumang-ay! Ngem kasano? Ken ania dagiti sumagmamano a pamay-an tapno rumang-ayka?
Panagrang-ay Babaen ti Personal a Panagadal
Kinuna ni Pablo kadagiti Kristiano idiay Filipos: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin.” (Filipos 1:9) Ti irarang-ay iti “umiso a pannakaammo” ket napateg iti naespirituan a panagprogresom. Agtultuloy a proseso ‘ti pananggun-od iti pannakaammo maipapan ken Jehova a Dios kasta met ken Jesu-Kristo,’ saan nga agpatingga kalpasan ti bautismo.—Juan 17:3.
Nabigbig daytoy ti maysa a Kristiano a babai nga awagantay iti Alexandra, sangapulo a tawen kalpasan ti bautismona idi 16 ti tawenna. Napadakkel ni Alexandra iti kinapudno ket kankanayon a regular a tumabtabuno idi kadagiti Nakristianuan a gimong ken makiramraman iti trabaho a panangasaba. Insuratna: “Kadagiti kallabes a sumagmamano a bulan, naamirisko nga adda nakaro a parikutko. Inkeddengko nga usigek a naimbag ti kasasaadko, no ania ti mariknak maipanggep iti kinapudno, ken no apay nga addaak pay laeng iti kinapudno.” Ania ti natakuatanna? Intuloyna: “Maburiboranak kadagiti natakuatak a rason iti kaaddak iti kinapudno. Malagipko a bayat a dumakdakkelak, naipaganetget dagiti gimong ken serbisio iti tay-ak. Kas man la mayugalikto latta ti personal a panagadal ken panagkararag. Ngem bayat ti panangut-utobko iti sasaadek, naamirisko a saan a napasamak dayta.”
Imbalakad ni apostol Pablo: “Aniaman ti nagtengantayon a panagrang-ay, itultuloytayo koma ti magna a siuurnos iti daytoy met laeng a rutina.” (Filipos 3:16) Ti rutina mabalin nga iyussuatna ti panagabante. Sakbay a nabautisaranka, sigurado nga adda linawas a rutinam a panagadal iti Biblia a kadua ti kualipikado unay a mannursuro. Bayat a dumakdakkel ti apresasionmo, inramanmo iti daytoy a rutina ti panagsaganam iti linawas nga adalen, a suksukimatem dagiti naisitar a teksto iti Biblia, ken dadduma pay. Ita ta nabautisarankan, nagtultuloyka kadi a ‘magna iti dayta met laeng a rutina’?
No saan, nalabit a kasapulan nga usigem manen dagiti iyun-unam, a ‘siguraduem dagiti napatpateg a bambanag.’ (Filipos 1:10) Iti okupado a biagtayo, kasapulantayo ti panagteppel tapno makailasintayo iti tiempo a maipaay iti personal a panagbasa iti Biblia ken panagadal. Ngem makagunggona ti kasta a panagregget. Usigentay manen ti kapadasan ni Alexandra. “Maibagak a nakapagtalinaedak iti kinapudno iti las-ud ti 20 a tawen wenno nasursurok pay babaen ti pannakigimong ken pannakiraman iti tay-ak ti ministerio,” inannugotna. Nupay kasta, intuloyna, “Napanunotko a nupay napateg dagitoy a banag, saan nga umdas dagitoy a mangsustiner kaniak no tumaud dagiti parikut. Rimsua amin dagitoy a parikut gapu ta awanen a pulos ti personal a panagadalko. Paspasaray ken parparawpaw laeng ti panagkararagko. Mabigbigko itan a nasken nga aturek ti panagpampanunotko ken ipasnekko ti agadal tapno maam-ammok a naimbag ni Jehova ken maipategko ti impaay ti anakna kadatayo.”
No kasapulam ti tulong iti panangipasdek iti makagunggona a rutina ti personal a panagadal, dagiti panglakayen ken sabsabali pay a nataengan a Kristiano iti kongregasionmo maragsakanda a tumulong kenka. Mainayon pay, addaan kadagiti makatulong a singasing dagiti artikulo a nagparang iti Mayo 1, 1995; Agosto 15, 1993; ken Mayo 15; 1986 a ruar ti magasin a Ti Pagwanawanan.
Nasken ti Iyaadani iti Dios
Ti sabali pay a benneg nga ikagumaam koma ti rumang-ay isu ti pannakirelasionmo iti Dios. Iti dadduma a kasasaad, nalabit adda nakaing-inget a pakasapulan iti daytoy a banag. Utobem ni Anthony a nabautisaran idi ubing pay laeng. “Iti pamiliami, siak ti immuna nga anak a nabautisaran,” insalaysayna. “Kalpasan ti bautismok, inagepnak a sibabara ni nanangko. Idi la a nakitak a kasta ti karagsakna. Napalalo ti ragsakmi ket nariknak a nabilegak.” Nupay kasta, adda sabali a kasasaad. “Medyo nabayag bassit nga awan agtutubo a nabautisaran iti kongregasionmi,” intuloy ni Anthony. “Isut’ gapuna a nagpannakkelak idi. Impalangguadko dagiti palawag ken komentok kadagiti gimong. Nagbalin a napatpateg kaniak ti pananggun-od iti pammadayaw ken pananganamong dagiti tattao ngem ti panangidaydayaw ken Jehova. Awan a talaga ti nadekket a pannakirelasionko kenkuana.”
Kas ken Anthony, nalabit nagdedikar ti sumagmamano gaput’ panagtarigagay a mangay-ayo kadagiti dadduma saan nga iti panagtarigagay a mangay-ayo ken Jehova. Uray pay kasta, inanamaen ti Dios nga itakderan dagitoy a tattao ti karida nga agserbi kenkuana. (Idiligmo ti Eclesiastes 5:4.) Ngem no awan ti personal a relasionda iti Dios, masansan a narigatda nga aramiden dayta. Malagip ni Anthony: “Apagbiit laeng daydi napalalo a rag-o a nariknak idi nabautisaranak. Awan pay makatawen kalpasan ti bautismok idi nakaaramidak iti nadagsen a basol ket masapul a tubngarendak dagiti panglakayen iti kongregasion. Gapu iti maulit-ulit a panagbasolko, nailaksidak iti kongregasion. Innem a tawen kalpasan ti panagdedikarko ken Jehova, naarestarak ket naibaludak gapu iti panangpapatay.”
Panangpatanor iti Nasinged a Pannakirelasion ken Jehova
Aniaman ti kasasaadmo, mabalin a patgan amin a Kristiano ti awis ti Biblia: “Umadanikayo iti Dios, ket isu umadaninto kadakayo.” (Santiago 4:8) Awan duadua a simmingedka iti Dios idi damom nga adalen ti Biblia. Naammuam a ti Dios saan a kas kadagiti impersonal a didiosen a daydayawen ti Kakristianuan, no di ket maysa a persona a Jehova ti naganna. Nasursurom met nga addaan kadagiti makaay-ayo a kalidad, nga isu ket “Dios a manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno.”—Exodo 34:6.
Nupay kasta, tapno maitungpalmo ti dedikasionmo nga agserbi iti Dios, nasken a lallalo nga umasidegka kenkuana! Kasano? Inyararaw ti salmista: “Iparangmo kaniak dagiti daldalanmo, O Jehova; isurom kaniak dagiti dandanam.” (Salmo 25:4) Ti panangadalmo a mismo iti Biblia ken kadagiti publikasion ti Sosiedad matulongannaka a mangam-ammo a naimbag ken ni Jehova. Napateg met ti regular a naimpusuan a panagkararag. “Ibukbokyo ti pusoyo iti sanguananna,” indagadag ti salmista. (Salmo 62:8) Bayat a masungsungbatan dagiti kararagmo, mariknam ti personal a pannakaseknan ti Dios kenka. Tulongannaka daytoy a makarikna a nasingsingedka kenkuana.
Dagiti pannubok ken parikut mangidatagda ti sabali pay a gundaway a suminged iti Dios. Nalabit a maipasangoka kadagiti karit ken pakasuotan iti pammati, kas kadagiti sakit, parikut idiay eskuelaan ken iti pagtrabahuan, wenno rigat ti panagbiag. Nalabit a marigatanka uray iti gagangay a teokratiko a rutina a pannakiraman iti ministerio, pannakigimong, wenno panangyadal iti Biblia kadagiti annakmo. Saanmo a sarangten a bukbukod dagiti parikutmo! Ipakpakaasim iti Dios a tulongannaka, a dawatem ti pannarabay ken panangiwanwanna. (Proverbio 3:5, 6) Umararawka maipaay iti nasantuan nga espirituna! (Lucas 11:13) Bayat a masagsagrapmo ti naayat a pannaranayna, ad-adda a sumingedka kenkuana. Kas kinuna ni salmista David, “nanamenyo ket kitaenyo ta ni Jehova naimbag: nagasat [“naragsak,” NW] ti tao a kumamang kenkuana.”—Salmo 34:8.
Komusta met ngay ni Anthony? “Inrugik a panunoten daydi tiempo nga aduanak kadagiti naespirituan a kalat a naisentro iti panangaramid iti pagayatan ni Jehova,” malagipna. “Nagsaem daytoy. Ngem iti baet ti amin nga ut-ot ken pannakapaay, nalagipko ti ayat ni Jehova. Nabayag bassit sakbay a nakapagkararagak ken Jehova, ngem inaramidko daytoy, ket imbukbokko ti pusok kenkuana, a dumawdawatak iti pammakawanna. Inrugik met a basaen ti Biblia ket anian a siddaawko ta nagadu ti diak matandaanan ken nagbassit a talaga ti ammok maipapan ken Jehova.” Nupay masapul nga ikaro ni Anthony ti sentensiana gapu iti naaramidanna a krimen, umaw-awat iti tulong kadagiti Saksi iti lugarda ket umung-ungaren iti naespirituan. Siyayaman a kuna ni Anthony: “Agyamanak ken Jehova ken iti organisasionna ta nauksobko ti daan a personalidad ket iti tunggal aldaw, ikagkagumaanak nga ikawes ti baro a personalidad. Ti pannakirelasion ken Jehova ti kapatgan kaniak itan.”
Naespirituan nga Irarang-ay iti Ministerioyo
Imbilin ni Jesu-Kristo kadagiti pasurotna nga agbalinda a manangaskasaba iti “naimbag a damag ti pagarian.” (Mateo 24:14) Kas agdadamo nga agibumbunannag iti naimbag a damag, nalabit nakedngan ti kapadasam iti ministerio. No kasta, kasanoka nga agprogreso tapno ‘naan-anay a maitungpalmo ti ministeriom’?—2 Timoteo 4:5.
Maysa a pamay-an isu ti panangpatanor iti positibo a kababalin. Sursuruem a matmatan ti trabaho a panangasaba kas “gameng,” maysa a pribilehio. (2 Corinto 4:7) Gundaway daytoy a maiparangarangtayo ti ayat, kinasungdo, ken kinatarnawtayo ken Jehova. Palubosannatayo met daytoy a mangipaneknek ti pannakaseknantayo iti kaarrubatayo. Ti di agimbubukodan a panangipaay iti bagbagitayo iti daytoy a benneg ket gubuayan ti napudpudno a kinaragsak.—Aramid 20:35.
Ni Jesus a mismo ket addaan positibo a panangmatmat iti trabaho a panangasaba. Ti panangiburay kadagiti kinapudno ti Biblia iti dadduma ket kasla “taraon” kenkuana. (Juan 4:34) Ti mangtigtignay kenkuana a tumulong iti sabsabali ket kasayaatan ngarud a magupgop iti saona a “Kayatko.” (Mateo 8:3) Adda pannakipagrikna ni Jesus kadagiti tattao, nangnangruna kadagiti ‘linalatan ken inwarawara’ ti lubong ni Satanas. (Mateo 9:35, 36) ‘Kayatmo’ kadi met a tulongan dagidiay adda iti naespirituan a kinasipnget ken agkasapulan iti pannakalawag manipud Sao ti Dios? Ngarud, matignayka a mangipangag iti bilin ni Jesus: “Inkayo ngarud ket mangaramidkayo kadagiti adalan a tattao iti isuamin a nasnasion.” (Mateo 28:19) Wen, magutugotka a makiraman a naan-anay iti daytoy a trabaho kas ipalubos ti salun-at ken kasasaadmo.
Maysa pay a tulbek iti irarang-ay isu ti regular a pannakiraman iti ministerio—linawas aginggat’ mabalin. Ti panangaramid iti daytoy mabalin a parmekenna ti panagdandanag ken buteng a nalabit a manglapped iti maysa a paspasaray laeng a mangasaba. Ti regular a pannakipaset iti tay-ak ti serbisio gunggonaannaka met iti sabali pay a pamay-an. Parayrayenna ti panangipategmo iti kinapudno, pabilgenna ti ayatmo ken Jehova ken iti padam a tao, ken tulongannaka a kankanayon a sipapanunot iti namnama iti Pagarian.
Ngem, kasanon no kedngan unay ti agdama a kasasaadmo ti pannakiramanmo iti trabaho a panangasaba? No nabatad a saan a mabaliwan ti kasasaadmo, maliwliwaka a makaammo a maay-ayo unay ti Dios iti aniaman a mabaelam, la ket ta amin-kararua ti panagserbim. (Mateo 13:23) Nalabit mabalinmo ti rumang-ay iti sabali pay a benneg, kas iti panangpasayaat pay iti laingmo a mangasaba. Iti kongregasion, ipaay ti Teokratiko nga Eskuelaan ti Panagministro ken Gimong iti Serbisio ti nagsayaat a panangsanay iti daytoy a banag. Siempre, no nalalaingtayo iti ministerio, ad-adda a maay-ayotayo a mangaramid iti dayta ken makakita kadagiti resultana.
No kasta, nalawag a saan nga agpatingga ti naespirituan nga idudur-as ti maysa a tao iti aldaw ti panagbautisarna. Insurat ni apostol Pablo maipapan iti namnamana a pananggun-od iti imortal a biag idiay langit: “Kakabsat, saanko pay nga ibilang ti bagik a naiggamakon dayta; ngem adda maysa a banag maipapan iti dayta: Ti pananglipat kadagiti bambanag a nalikudan ken panangkamakam a panangragpat kadagiti bambanag iti masanguanan, agtultuloyak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus. Ngarud, datayo amin a nataenganen, maaddaantayo koma iti daytoy a kababalin ti isip; ket no agannayas ti isipyo iti sabali iti aniaman a pamay-an, ti Dios ipalgaknanto kadakayo ti kababalin nga adda iti ngato.”—Filipos 3:13-15.
Wen, amin a Kristiano, imortal man a biag idiay langit wenno agnanayon a biag iti Paraiso a daga ti namnamada, masapul a ‘kamakamenda a ragpaten’—ikarigatanda a gun-oden ti kalat a biag! Nasayaat a pangrugian ti bautismom, ngem pangrugian laeng dayta. Agtultuloy nga ikagumaam ti rumang-ay iti naespirituan. Babaen kadagiti gimong ken personal a panagadal, ‘agbalinka a nataenganen iti pannakabalin ti pannakaawat.’ (1 Corinto 14:20) ‘Maawatam [koma] iti isipmo . . . ti kaakaba ken kaatiddog ken kangato ken kauneg’ ti kinapudno. (Efeso 3:18) Ti irarang-aymo saan laeng a tumulong kenka a mangtaginayon iti rag-o ken ragsakmo ita no di ket tulongannaka met a mangragpat iti natalged a lugar iti baro a lubong ti Dios iti sidong ti nailangitan a Pagarian, a sadiay mabalinmonton ti rumang-ay iti agnanayon!
[Ladawan iti panid 29]
Kasapulan ti disiplina tapno maiwayaan ti personal a panagadal
[Ladawan iti panid 31]
Ti positibo a kababalin matulongannatayo a maaddaan iti rag-o iti ministerio