Ti Panangmatmat iti Biblia
Homoseksualidad Aniat’ Obligasion ti Klero?
DAGITI homoseksual a sipapasnek nga agtarigagay nga agserbi iti Dios mariribukda. Kas kinuna ti maysa: “No impaaymon ti bagim iti iglesia ket naduktalam ti bagim a bakla met, ania ti pudno a pilienyo?”
Tapno maammuan no ania ti kasapulan tapno makaay-ayo iti Dios, adu a homoseksual ti nainkalintegan a nagturong iti kleroda. Dagitoy kadi a “nakasutana a lallaki” mangipapaayda iti umiso a panangiturong? Ania ti obligasionda iti komunidad a homoseksual? Ania ti kangrunaan a rebbengenda kadagiti amin a tattao?
Maobligar dagiti Papadi a Mangitandudo kadagiti Pagalagadan ti Dios
Simple laeng ti panangibaga ti Biblia no kunaenna a dagiti papadi idi ugma “matudingan[da] a maipaay kadagiti tattao kadagiti bambanag a maipanggep iti Dios.” (Hebreo 5:1) Idi nagserbi ni Abraham idi ugma iti pamiliana iti kastoy a pamay-an, tinulonganna ida tapno “surotenda ti dalan ni Jehova.”—Genesis 18:19.
Kasta met, ti kinapadi iti kadaanan nga Israel nainget ti pasetna iti panangitandudo kadagiti pagalagadan ti Dios. Rebbengen dagiti papadi ti mangtulong iti nasion nga “agtultuloy kas ili ni Jehova.” (2 Cronicas 23:16) Itatta, kas idi, dagiti pannakabagi ti Dios maobligarda a tumulong iti arbanda nga ‘agtultuloy kas ili ti Dios’ ken ‘sumurot iti dalan ti Dios.’
Tapno maaramid daytoy, masapul nga isuroda iti arban ti Sao ti Dios. (Malakias 2:7) Napaneknekan kadi dagiti klero nga isuda dagiti ‘mensaheros iti Dios,’ a tultulonganda dagiti tattao a ‘sumurot iti dalan ti Dios’? Kaaduanna saan. Ket nangnangruna a makita daytoy maipapan iti isyu ti homoseksualidad.
Dakes a Mensaheros, Napeggad a Panangiwanwan
Sipaprangka, kondenaren ti Biblia ti homoseksualidad. Awan dagiti awan ti mamaayna a sasao a mabalin a mangpukaw kadagiti kasuratan a kas iti Levitico 18:22 ken Roma 1:26, 27. (Kitaenyo ti kahon.) Ngem nakidasig iti agdama a panagrasrason a bumusor iti Biblia, kinuna ti maysa a padi a Jesuita maipapan iti relasion a homoseksual: “Dagitoy ti kakaisuna a solusion tapno makapagbiag dagiti adu a tattao iti naragsak ken addaan panggep a panagbiag.” Iti panangsurot iti isu met laeng a panagpampanunot, maysa nga obispo nga Episkopal ti nangibilang iti homoseksualidad a “maysa a banag a saan a matengngel [dagiti homoseksual].” Ngem kunaen ti Biblia maipapan kadagiti dadduma a dati a homoseksual idi umuna a siglo: “Kasta idi dagiti dadduma kadakayo. Ngem nadalusankayo.”—1 Corinto 6:9-11.
Dadduma ti mangikalintegan iti panangbusorda kadagiti pagalagadan iti Biblia a maibatay iti ayat. Kinuna ti maysa a padi: “Ti ayat, nangnangruna ti ayat iti taga ruar ken ti pugante, isu ti nasken a pakasubokan iti naespirituan a biagtayo.” Kalpasanna nagkonklusion, “Ti homoseksualidad pulos a saan a nagbalin nga isyu ken Kristo. Ti isyu para kenkuana ket: Agbibiag kadi dagitoy a tattao, aniaman ti kasasaadda, iti pudno a naayat a pamay-an?”
Ngem ti Biblia dina pagsinnukaten ti ayat iti panagrikrikna. Ti nadiosan nga ayat ket natimbeng iti kinahustisia ken iramanna ti pananggura iti kinadakes. Sibibileg a mamagbaga ti Biblia, “O dakayo nga agay-ayat ken Jehova, guraenyo ti dakes.” (Salmo 97:10) Ti pudno nga ayat iramanna met ti disiplina, ta “dusaen ni Jehova ti ayatenna,” (Hebreo 12:6) Ngarud, maobligar dagiti ministros a “mamalbalakad babaen iti nadalus a sursuro ken mangbabalw kadagiti sumuppiat.” (Tito 1:9) Ket laglagipenyo daytoy: No dagiti papadi idi ugma simamatalek nga imbanagda dagiti rebbengenda, “pinagsublida dagiti adu manipud iti kinadakes.”—Malakias 2:5, 6.
Panangpakapuy kadagiti Pagalagadan iti Biblia
Ngem kaaduanna, dagiti klero itatta ket kas kadagiti manangpalugod a nagannak: mabutengda a mangbaot kadagiti annakda agsipud ta ‘daytat’ saan a kinamanagayat.’ Iti adu a dekada ti klero pinakapuynan dagiti pagalagadan iti Biblia. Ti resulta? “Agsipud ta ti panangipato a maibusor iti dakes nga aramid saan a matungpal a sipapardas, iti kasta ti puso dagiti annak dagiti tattao ipamaysada ti agaramid iti dakes.” (Eclesiastes 8:11) Kas pangarigan, uray pay no ti opisial a takder ti Iglesia Katolika ket maibusor iti relasion a homoseksual, maysa a panagsaludsod ipakitana a 55 porsiento kadagiti amin a Katoliko iti E.U. patienda a ti maysa nga addaan iti relasion a homoseksual ket kaskasdi a maysa pay laeng a naimbag a Katoliko.
Adda umasping a banag a napasamak kadagiti Israelitas idi ugma idi dagiti papadi dida intandudo dagiti pagalagadan ti Dios. Kinunana maipapan kadakuada: “Simminada kaniak . . . Ket saanda met a kinuna, ‘Sadino ti yan ni Jehova?’” Ken apay? Agsipud ta “dagiti papadi saanda a kinuna, ‘Sadino ti yan ni Jehova?’ Ket dagiti agaywan ti linteg saandak a binigbig.” (Jeremias 2:5-8) Kinuna ni mammadto a Sofonias: “Ti nakillo dina ammo ti bain” agsipud ta “dagiti papadina binassawanganda ti santuario; sinalungasingda ti linteg.”—Sofonias 3:1-5.
“Guraen ti Kinadakes”
Dagiti homoseksual nga agtarigagay nga agserbi iti Dios masapul nga agserbida sigun iti terminona—dagiti termino a silalawag a naipasdek iti Biblia. Itatta, kas idi immuna a siglo, addada dagiti homoseksual a natulonganen a ‘mangpapatay kadagiti kamkamengda no maipapan iti pannakiabig, kinarugit, ken dagiti derrep.’ (Colosas 3:5) Ipapantayon, daytoy ket saan a nalaka para kadagiti dadduma, ngem nasursuroda a pinapatay dagiti imoral a tarigagayda a kas met kadagiti adu a heteroseksual pinapatayda dagiti dakes a tarigagayda iti kasungani a sekso. Dagiti dua a grupo natulonganda met babaen iti regular a pannakilangen iti pudno a kongregasion Kristiano, isu a mangsuportar kadakuada iti kalatda a ‘manggura iti kinadakes ken dagiti nailubongan a tarigagay ken agbiag iti kinalinteg ken iti nadiosan a debosion.’—Tito 2:12.
Dagiti klero a manglaok kadagiti pagalagadan iti Biblia ken mangpalugod iti basol dida tultulongan dagiti homoseksual. Mabalin a ‘gagarienda dagiti pagdengngegda,’ ngem saanda tungtungpalen ti obligasionda a “mangikasaba iti sao.” Daytoy ti rebbengenda kadagiti homoseksual—ken kadagiti amin a tattao.—2 Timoteo 4:1-5.
[Kahon iti panid 13]
“Dikanto kaidda ti lalaki a kas ibilang a babai. Daytoy ti kinarimon.”—Levitico 18:22
“Gapu iti daytoy ti Dios binaybay-anna ida kadagiti derderrep a nakababain, ta uray dagiti babbai nga adda kadakuada sinuktanda ti nakaparsuaan a pannakaaramatda iti maisalungasing iti nakaparsuaan; ken kasta met dagiti lallaki, binaybay-anda ti nakaparsuaan dagiti babbai ket simgedda iti derrep iti maysa ken maysa kadakuada, nga inaramidda ti nakarugrugit a pamay-an a lallaki ken lallaki, ket inawatda kadagiti bagbagida met laeng ti maikari a gunggona ti pannakaallilawda.”—Roma 1:26, 27