ESCITA

Maysa a narungsot ken agakar-akar a bunggoy ti tattao a gagangay a nainaig iti rehion iti amianan ken amianan a daya ti Nangisit a Baybay. Kas ipakita ti pammaneknek, ti panagdakiwasda ket dimmanon agingga iti makinlaud a Siberia iti asideg ti beddeng ti Mongolia. Idi umuna a siglo K.P., ti sao nga “Escita” impasimudaagna ti kadadaksan kadagiti di sibilisado a bunggoy ti tattao. Nupay kasta, uray dagiti kasta a tattao makapagbalinda a Kristiano ken mabalinda ti maaddaan iti takder a kapadpada ti dadduma pay a manamati kas kamkameng ti bagi ni Kristo. Insurat ni apostol Pablo: “Awan ti Griego wenno uray Judio, pannakakugit wenno uray di pannakakugit, ganggannaet, Escita, adipen, siwayawaya a tao, no di ket ni Kristo ti amin a bambanag ken adda iti isuamin.”​—Col 3:11; kitaenyo ti PANANGSUGATSUGAT.