“Agpaadipenkayo iti Apo, a ni Kristo”
ITI intero a historia, minilion a tattao ti nangibtur iti rigat ti pannakaadipen. Rinibu a tawenen ti napalabas, kas pagarigan, nagsagaba unay dagiti Israelita iti sidong dagiti manangaywan nga Egipcio. Kas kuna ti Biblia, “nangisaadda kadagiti mangdagdag kadagiti Israelita a mamadagsen kadagiti awitda,” nangruna iti panagaramid kadagiti ladrilio.—Exodo 1:11, The Jerusalem Bible.
Iti adu a pagilian itatta, mabalin a saan a literal a maadipen dagiti tattao, ngem adu ti masapul nga agtrabaho iti naunday iti sidong dagiti narigat—pasaray nakas-ang—a kasasaad. Napadagsenanda iti makunkuna a panangadipen ti ekonomia.
Nupay kasta, adda pannakaadipen a saan a makapadagsen. Indagadag ni apostol Pablo kadagiti kapammatianna: “Agpaadipenkayo iti Apo, a ni Kristo.” (Colosas 3:24) Dagidiay mayat nga agpaadipen ken Kristo mabang-aranda kadagiti nadagsen nga awitda. Kinuna a mismo ni Jesus: “Umaykayo kaniak, dakayo amin a mabambannogan ken nadagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kaririknak ken napakumbaba ti pusok, ket makasarakkayto ti bang-ar a maipaay kadagiti kararuayo. Ta ti sangolko naasi ken ti awitko nalag-an.”—Mateo 11:28-30.
Ti panangibaklay iti sangol ni Kristo dina wayawayaan ti maysa a tao iti obligasionna a mangipaay iti namaterialan a kasapulan ti pamiliana. (1 Timoteo 5:8) Nupay kasta, mangwayawaya dayta manipud iti adu a pakasimbaludan kadagiti materialistiko a kalat. Imbes a pagbalinenda ti material a pagnam-ayan kas kangrunaan a kalatda iti biag, mapneken dagiti Kristiano kadagiti kangrunaan a kasapulanda.—1 Timoteo 6:6-10; idiligyo ti 1 Corinto 7:31.
Mabang-aran met dagiti Kristiano iti panangtungpal iti rebbengenda a mangikasaba iti “naimbag a damag” ti Pagarian ti Dios. (Mateo 24:14) Mangyeg daytoy iti pudpudno a rag-o ken pannakapnek!
Rumbeng nga agyamantayo ta mabalintay ti ‘agpaadipen iti Apo, a ni Kristo’!
[Picture Credit Line iti panid 32]
Pictorial Archive (Near Eastern History) Est.