‘Kawesanyo ti Bagbagiyo iti Mabayag a Panagitured’

“Kawesanyo ti bagbagiyo kadagiti kinalailo ti pannakipagrikna . . . ken mabayag a panagitured.”​—COLOSAS 3:12.

1. Isalaysayyo ti maysa a nagsayaat nga ulidan ti mabayag a panagitured.

NI Régis, nga agnanaed iti umabagatan a laud ti Francia, ket nabautisaran kas Saksi ni Jehova idi 1952. Adu a tawen nga impamuspusan ni baketna a lappedan ti panagreggetna nga agserbi ken ni Jehova. Pinadas ni baketna nga eppesen dagiti pilid ti luganna tapno saan a makatabuno kadagiti gimong, ket iti naminsan sinurot pay ni baketna bayat nga ikaskasabana ti mensahe ti Biblia iti binalaybalay, a mangum-umsi bayat nga isarsaritana kadagiti bumalay ti maipapan iti naimbag a damag ti Pagarian. Iti laksid ti kastoy nga agtultuloy nga ibubusor, tinaginayon ni Régis ti mabayag a panagitured. Nagsayaat ngarud nga ulidan ni Régis kadagiti amin a Kristiano, yantangay kalikaguman ni Jehova kadagiti amin nga agdaydayaw kenkuana a tratuenda ti sabsabali buyogen ti mabayag a panagitured.

2. Ania ti literal a kaipapanan ti Griego a sao para iti “mabayag a panagitured,” ken ania ti ipasimudaag dayta a sao?

² Ti Griego a sao para iti “mabayag a panagitured” literal a kaipapananna “kinaandur ti espiritu.” Daytoy a sao ket sangapulo a daras nga impatarus ti Baro a Lubong a Patarus kas “mabayag a panagitured,” tallo a daras kas “kinaanus,” ken naminsan kas “panangwatwat iti kinaanus.” Ti Hebreo ken Griego a sao a naipatarus kas “mabayag a panagitured” ket agpadpada a mangipasimudaag iti kinaanus, kinaandur, ken kinabannayat nga agunget.

3. Kasano a ti panangmatmat dagiti Kristiano iti mabayag a panagitured naiduma kadagiti Griego idi umuna a siglo?

³ Dagiti Griego idi umuna a siglo dida minatmatan a nasayaat a kababalin ti mabayag a panagitured. Pulos a di inusar dagiti pilosopo nga Estoico dayta a sao. Sigun iti eskolar ti Biblia a ni William Barclay, ti mabayag a panagitured “ket maisupadi a mismo kadagiti matmatan dagiti Griego a naimbag a kababalin,” a pakairamanan “ti di panangpalabas iti aniaman a pannakainsulto wenno pannakadangran.” Kunana: “Kadagiti Griego, ti natan-ok a tao ket daydiay aramidenna ti amin tapno makabales. Kadagiti Kristiano, ti natan-ok a tao ket daydiay saan a pulos nga agibales uray kabaelanna koma.” Nalabit ibilang dagiti Griego a pagilasinan ti kinakapuy ti mabayag a panagitured, ngem iti daytoy ken iti dadduma pay a kaso, “ti minamaag a banag ti Dios nasirsirib ngem iti tattao, ket ti nakapuy a banag ti Dios napigpigsa ngem iti tattao.”​—1 Corinto 1:25.

Ti Ulidan ni Kristo iti Mabayag a Panagitured

4, 5. Ania a nagsayaat nga ulidan ti mabayag a panagitured ti impakita ni Jesus?

⁴ Ni Kristo Jesus laeng ti sumaruno ken ni Jehova no maipapan iti nasayaat nga ulidan ti mabayag a panagitured. Impakita ni Jesus ti nakaskasdaaw a kinatanang iti sidong dagiti nakaro a pakarigatan. Naipadto maipapan kenkuana: “Isu napagsagaba, ket palpalubosanna idi ti bagina nga agtuok; kaskasdi a saanna a ngangaen ti ngiwatna. Isu maip-ipan idi a kas iti karnero nga agturong iti pannakaparti; ket kas iti kabaian a karnero a nagumel iti sanguanan dagiti mamukpukis kenkuana, saanna met a ngangaen ti ngiwatna.”​—Isaias 53:7.

⁵ Anian a mabayag a panagitured ti impakita ni Jesus iti intero a ministeriona ditoy daga! Inibturanna dagiti mangallilaw a saludsod ken panangumsi dagiti bumusbusor kenkuana. (Mateo 22:15-46; 1 Pedro 2:23) Naanus kadagiti adalanna, uray no nagtultuloy a nagririkkiaranda no siasino ti katan-okan kadakuada. (Marcos 9:33-37; 10:35-45; Lucas 22:24-27) Ken anian a nakaskasdaaw a kinatanang ti impakita ni Jesus iti rabii ti pannakaliputna, idi nakaturog da Pedro ken Juan kalpasan nga imbagana nga ‘agtultuloyda nga agbantay’!​—Mateo 26:36-41.

6. Kasano a nagimbagan ni Pablo ti mabayag a panagitured ni Jesus, ket ania ti masursurotayo iti dayta?

⁶ Kalpasan ti ipapatay ken panagungarna, nagtultuloy ti mabayag a panagitured ni Jesus. Pagaammo unay dayta ni apostol Pablo yantangay indadanesna idi dagiti Kristiano. Insuratna: “Matalek ken maikari iti naan-anay a panangawat isu ti sao a ni Kristo Jesus immay ditoy lubong tapno mangisalakan kadagiti managbasol. Siak ti kangrunaan kadagitoy. Nupay kasta, ti rason no apay a naipakitaanak ti asi ket tapno babaen kaniak kas ti kangrunaan a kaso maiparangarang koma ni Kristo Jesus ti isuamin a mabayag a panagituredna nga agpaay a pagtuladan dagidiay mangisaad ti pammatida kenkuana maipaay iti agnanayon a biag.” (1 Timoteo 1:15, 16) Aniaman ti nalikudantayo, no mamatitay kenkuana, an-anusannatayo ni Jesus. Kaskasdi, namnamaenna nga iparangarangtayo ‘dagiti aramid a maitutop iti panagbabawi.’ (Aramid 26:20; Roma 2:4) Dagiti mensahe nga impatulod ni Kristo kadagiti pito a kongregasion idiay Asia Menor ipamatmatda a nupay mabayag ti panagituredna, namnamaenna ti nasayaat a panagbalbaliw.​—Apocalipsis, kapitulo 2 ken 3.

Maysa a Bunga ti Espiritu

7. Ania ti pakainaigan ti mabayag a panagitured iti nasantuan nga espiritu?

⁷ Iti maikalima a kapitulo ti suratna kadagiti taga Galacia, pinaggidiat ni Pablo dagiti aramid ti lasag ken dagiti bunga ti espiritu. (Galacia 5:19-23) Yantangay ti mabayag a panagitured ket maysa kadagiti galad ni Jehova, nagtaud dayta kenkuana ket bunga ti espirituna. (Exodo 34:6, 7) Wen, ti mabayag a panagitured ket maikapat kadagiti inlista ni Pablo a bunga ti espiritu, a pakairamanan ti “ayat, rag-o, talna, . . . kinamanangngaasi, kinaimbag, pammati, kinaalumamay, panagteppel.” (Galacia 5:22, 23) Isu a no iparangarang dagiti adipen ti Dios ti nadiosan a kinaanus, wenno mabayag a panagitured, ar-aramidenda dayta iti sidong ti impluensia ti nasantuan nga espiritu.

8. Kasanotay a masukay dagiti bunga ti espiritu, agraman ti mabayag a panagitured?

⁸ Ngem di kaipapanan daytoy nga ipilit ni Jehova ti espirituna iti maysa a tao. Masapul a situtuloktayo nga agpaidalan iti dayta. (2 Corinto 3:17; Efeso 4:30) Agtignay ti espiritu iti biagtayo no sukayentayo dagiti bungana iti amin nga aramidtayo. Kalpasan a dinakamatna dagiti aramid ti lasag ken dagiti bunga ti espiritu, innayon ni Pablo: “No agbibiagtayo babaen ti espiritu, itultuloytayo met ti magna a siuurnos babaen ti espiritu. Dikay payaw-awan: Ti Dios saan a maysa a marabrabak. Ta aniaman nga imulmula ti maysa a tao, daytoyto met ti apitenna; agsipud ta ti agimulmula a maipaay iti lasagna apitennanto ti panagrupsa manipud iti lasagna, ngem ti agimulmula maipaay iti espiritu apitennanto ti agnanayon a biag manipud iti espiritu.” (Galacia 5:25; 6:7, 8) Tapno agballigitayo a mangsukay iti mabayag a panagitured, masapul met a patanorentayo dagiti dadduma pay a bunga a patauden ti nasantuan nga espiritu kadagiti Kristiano.

“Ti Ayat Mabayag ti Panagituredna”

9. Ania ti posible a rason nga imbaga ni Pablo kadagiti taga Corinto a “ti ayat mabayag ti panagituredna”?

⁹ Impakita ni Pablo a naisangsangayan ti pakainaigan ti ayat iti mabayag a panagitured idi kinunana: “Ti ayat mabayag-panagituredna.” (1 Corinto 13:4) Sigun iti eskolar ti Biblia a ni Albert Barnes, impaganetget ni Pablo daytoy gapu iti rinnisiris ken ringgor a mapaspasamak idi iti kongregasion Kristiano idiay Corinto. (1 Corinto 1:11, 12) Impatuldo ni Barnes: “Ti sao a nausar ditoy [para iti mabayag a panagitured] ket maisupadi iti kinadarasudos: iti nasakit a sasao ken kapanunotan, ken iti kinamanagsiksikor. Ipasimudaagna ti kasasaad ti panunot a MABAYAG A MAKAPAGIBTUR uray mairurumen wenno mapagpungtot.” Dakkel ti maitulong ti ayat ken mabayag a panagitured iti pannakaadda ti talna ti kongregasion Kristiano.

10. (a) Iti ania a wagas a ti ayat matulongannatayo a maaddaan iti mabayag a panagitured, ket ania ti imbalakad ni apostol Pablo iti daytoy a banag? (b) Ania ti komento ti maysa nga eskolar ti Biblia maipapan iti mabayag a panagitured ken kinamanangngaasi ti Dios? (Kitaenyo ti footnote.)

¹⁰ “Ti ayat mabayag-panagituredna ken manangngaasi. Ti ayat . . . saanna a sapulen dagiti bukodna a pagimbagan, saan a magargari nga agpungtot.” Adu ngarud a pamay-an a matulongannatayo ti ayat a maaddaan iti mabayag a panagitured.a (1 Corinto 13:4, 5) Ti ayat tulongannatayo nga agpipinnasensia ken manglagip nga imperpektotayo amin, nga addaan iti pagkamalian ken pagkurangan. Tulongannatayo met nga agbalin a naasi ken manangpakawan. Paregtaennatayo ni apostol Pablo a magna “buyogen ti naan-anay a kinapakumbaba iti panagpampanunot ken kinaalumamay, agraman ti mabayag a panagitured, nga agiinnanuskayo iti ayat, a sipapasnek nga ikagumaanyo a salimetmetan ti panagmaymaysa ti espiritu iti mamagkaykaysa a singgalut ti talna.”​—Efeso 4:1-3.

11. Apay a nangnangruna a napateg ti mabayag a panagitured kadagiti grupo dagiti Kristiano?

¹¹ Ti mabayag a panagitured dagiti kamengna mangyeg iti talna ken ragsak kadagiti grupo dagiti Kristiano, dayta man ket kongregasion, pagtaengan a Bethel, pagtaengan dagiti misionero, dagiti boluntario iti konstruksion, wenno Nakristianuan nga eskuelaan. Pasaray tumaud dagiti narikut a kasasaad gapu iti panagduduma ti personalidad, pili, pannakapadakkel, estandarte ti kinasingpet, uray ti kinadalus. Pudno met dayta kadagiti pamilia. Napateg ti saan a dagus a panagpungtot. (Proverbio 14:29; 15:18; 19:11) Ti mabayag a panagitured​—napaut a panagibtur, a manginanama iti nasayaat a panagbalbaliw​—ket kasapulan iti biang ti amin.​—Roma 15:1-6.

Tulongannatayo nga Agibtur ti Mabayag a Panagitured

12. Apay a napateg ti mabayag a panagitured kabayatan dagiti narikut a kasasaad?

¹² Tulongannatayo ti mabayag a panagitured a mangibtur kadagiti narikut a kasasaad a kasla awan ti patinggana wenno awan ti madagdagus a solusionna. Kasta ti napasamak ken ni Régis a nadakamat iti pangrugian. Iti adu a tawen, binusor ni baketna ti panangikagumaanna nga agserbi ken ni Jehova. Ngem iti maysa nga aldaw, agsangsangit nga immasideg daytoy kenkuana ket kinunana: “Ammok nga isu dayta ti pudno. Tulongannak. Kayatko ti agadal iti Biblia.” Idi agangay, nabautisaran kas maysa a Saksi. Kuna ni Régis: “Daytoy ti mangpaneknek a binendisionan ni Jehova dagidi a panawen ti panagregget, panaganus, ken panagibtur.” Nagunggonaan ti mabayag a panagituredna.

13. Ania ti namagbalin ken ni Pablo a makapagibtur, ket kasano a tulongannatayo ti ulidanna nga agibtur?

¹³ Idi umuna a siglo K.P., nasayaat a pagwadan ni apostol Pablo no maipapan iti mabayag a panagitured. (2 Corinto 6:3-10; 1 Timoteo 1:16) Iti arinunos ti panagbiagna, idi binalakadanna ti ub-ubing a kaduana a ni Timoteo, impakpakauna ni Pablo a maipasango ti amin a Kristiano iti pakasuotan. Dinakamatna ti mismo a kapadasanna ket insingasingna dagiti nasken a Nakristianuan a galad tapno makapagibtur. Insuratna: “Sinurotmo a sisisinged ti sursurok, ti dana ti panagbiagko, ti panggepko, ti pammatik, ti mabayag a panagituredko, ti ayatko, ti panagibturko, dagiti pannakaidadanesko, dagiti panagsagabak, ti kita ti bambanag a napasamak kaniak idiay Antioquia, idiay Iconio, idiay Listra, ti kita dagiti pannakaidadanes nga inibturak; ngem nupay kasta ti Apo inispalnak kadagita amin. Iti kinapudnona, amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:10-12; Aramid 13:49-51; 14:19-22) Tapno makapagibtur, kasapulantay amin ti pammati, ayat, ken mabayag a panagitured.

Nakawesan iti Mabayag a Panagitured

14. Iti ania nga inyarig ni Pablo dagiti nadiosan a galad a kas iti mabayag a panagitured, ket ania ti imbalakadna kadagiti Kristiano a taga Colosas?

¹⁴ Ti mabayag a panagitured ken dadduma pay a nadiosan a galad ket inyarig ni apostol Pablo kadagiti pagan-anay a nasken nga ikawes ti Kristiano kalpasan nga uksobenna dagiti kababalin a mangiparangarang iti “daan a personalidad.” (Colosas 3:5-10) Insuratna: “Kas pinili ti Dios, nasantuan ken ay-ayaten, kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”​—Colosas 3:12-14.

15. Ania ti ibungana no ‘ikawes’ dagiti Kristiano ti mabayag a panagitured ken dadduma pay a nadiosan a galad?

¹⁵ No dagiti kameng ti kongregasion ket ‘kawesanda ti bagida’ iti pannakipagrikna, kinamanangngaasi, kinapakumbaba iti panagpampanunot, kinaalumamay, mabayag a panagitured, ken ayat, marisutda dagiti parikut ket makapagkaykaysada nga agserbi ken ni Jehova. Nasken a dagiti Kristiano a manangaywan ti nangnangruna a maaddaan iti mabayag a panagitured. Adda dagiti gundaway a masapul a tubngarenda ti maysa a Kristiano, ngem mabalinda nga aramiden dayta iti nadumaduma a pamay-an. Dinakamat ni Pablo ti kasayaatan a pamay-an idi sinuratanna ni Timoteo: “Mangtubngarka, mangtinggarka, mamagbagaka, buyogen ti isuamin a mabayag a panagitured ken arte ti panangisuro.” (2 Timoteo 4:2) Wen, kanayon koma a matrato ti karnero ni Jehova buyogen ti mabayag a panagitured, dignidad, ken kinadungngo.​—Mateo 7:12; 11:28; Aramid 20:28, 29; Roma 12:10.

“Mabayag a Panagitured iti Isuamin”

16. Ania ti resultana no addaantayo iti “mabayag a panagitured iti isuamin”?

¹⁶ Ti mabayag a panagitured ni Jehova iti sangatauan ket mangted kadatayo iti moral nga obligasion a mangipakita iti “mabayag a panagitured iti isuamin.” (1 Tesalonica 5:14) Kaipapanan daytoy ti panagbalin a naanus kadagiti saan a Saksi a miembro ti pamilia, kaarruba, katrabahuan, kaeskuelaan. Adu a panangidumduma ti napagballigian dagiti Saksi. Iti adu a tawen, inan-anusanda dagiti nasakit a sasao wenno direkta nga ibubusor dagiti katrabahuan wenno kaeskuelaanda. (Colosas 4:5, 6) Insurat ni apostol Pedro: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsasawanda iti maibusor kadakayo a kasla managaramid iti dakes, dayawenda koma ti Dios iti aldaw a panangsukimatna kas bunga ti nasayaat nga ar-aramidyo nga isuda ti saksi kadagita.”​—1 Pedro 2:12.

17. Kasanotay a matulad ti ayat ken mabayag a panagitured ni Jehova, ken apay a nasken nga aramidentayo dayta?

¹⁷ Minilion ti maisalakanto gapu iti mabayag a panagitured ni Jehova. (2 Pedro 3:9, 15) No tuladentay ti ayat ken mabayag a panagitured ni Jehova, siaanus nga itultuloytayo nga ikasaba ti naimbag a damag ti Pagarian ti Dios ken isuro kadagiti tattao nga agpasakupda iti turay ti Pagarian ni Kristo. (Mateo 28:18-20; Marcos 13:10) No isardengtayo ti mangasaba, kasla kayattay a kedngan ti mabayag a panagitured ni Jehova ket ditay natarusan ti panggep dayta: ti panangtulong kadagiti tattao nga agbabawi.​—Roma 2:4.

18. Ania ti inkararag ni Pablo agpaay kadagiti taga Colosas?

¹⁸ Iti suratna kadagiti Kristiano idiay Colosas, Asia Menor, kinuna ni Pablo: “Dayta met ti makagapu a, nanipud iti aldaw a pannakangngegmi iti dayta, saankami a namingga a mangikarkararag kadakayo ken agdawdawat tapno mapnokayo koma iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnakayo a maikari ken Jehova iti panggep a panangay-ayo a naan-anay kenkuana bayat nga agtultuloykayo nga agbunga iti tunggal naimbag nga aramid ken rumang-ay iti umiso a pannakaammo iti Dios, a mapabpabileg iti isuamin a pannakabalin iti madanon ti nadayag a pannakabalinna tapno naan-anay a makapagibturkayo ken maaddaankayo iti mabayag a panagitured buyogen ti rag-o.”​—Colosas 1:9-11.

19, 20. (a) Kasanotay a maliklikan nga agbalin a makapasikor ti mabayag a panagitured ni Jehova? (b) Ania dagiti gunggona nga itdenna no addaantayo iti mabayag a panagitured?

¹⁹ Saan a makapasikor kadatayo ti agtultuloy a mabayag a panagitured, wenno kinaanus, ni Jehova no ‘napnotayo iti umiso a pannakaammo iti pagayatanna,’ ti ‘pannakaisalakan koma dagiti amin a kita ti tattao ken dumtengda iti umiso a pannakaammo iti kinapudno.’ (1 Timoteo 2:4) ‘Itultuloytayo nga agbunga iti tunggal naimbag nga aramid,’ nangnangruna iti panangikasaba iti “daytoy naimbag a damag ti pagarian.” (Mateo 24:14) No simamatalek nga itultuloytayo nga aramiden daytoy, ‘pabilgennatayo [ni Jehova] iti isuamin a pannakabalin,’ tapno ‘naan-anay a makapagibturtayo ken maaddaantayo iti mabayag a panagitured buyogen ti rag-o.’ No kasta ti aramidentayo, ‘magnatayto a maikari ken Jehova,’ ken maaddaantayo iti talna gapu iti pannakaammo a ‘maay-ayotayo a naan-anay ti Dios.’

²⁰ Sapay koma ta naan-anay a kombinsidotayo a nainsiriban ti mabayag a panagitured ni Jehova. Agpaay dayta a pakaisalakanantayo ken dagiti mangipangag iti ikaskasaba ken isursurotayo. (1 Timoteo 4:16) Makapagiburtayo a siraragsak no patanorentayo dagiti bunga ti espiritu a kas iti ayat, kinamanangngaasi, kinaimbag, kinaalumamay, ken panagteppel. Ad-adda a mataginayontayo ti talna iti uneg ti pamiliatayo ken kadagiti kakabsat iti kongregasion. Tulongannatayo met ti mabayag a panagitured nga agbalin a naanus kadagiti katrabahuan wenno kaeskuelaantayo. Ket addanto ti panggep ti mabayag a panagituredtayo: ti panangispal kadagiti managbasol ken panangitan-ok iti Dios ti mabayag a panagitured, ni Jehova.

[Footnote]

Mailawlawagyo Kadi?

• Kadagiti ania a wagas a nagsayaat nga ulidan ni Kristo iti mabayag a panagitured?

• Ania ti tumulong kadatayo a mangsukay iti mabayag a panagitured?

• Kasano a ti mabayag a panagitured matulonganna dagiti pamilia, Nakristianuan a grupo, ken panglakayen?

• Kasano a magunggonaantayo ken dagiti sabsabali no addaantayo iti mabayag a panagitured?

[Ladawan iti panid 15]

Uray idi adda iti nakaro a pakarigatan, naanus ni Jesus kadagiti adalanna

[Ladawan iti panid 16]

Maidagadag kadagiti Kristiano a manangaywan nga ipakitada ti nasayaat nga ulidan ti mabayag a panagitured iti pannakilangenda kadagiti kakabsat

[Ladawan iti panid 17]

No tuladentay ti ayat ken mabayag a panagitured ni Jehova, itultuloytayo nga ikasaba ti naimbag a damag

[Ladawan iti panid 18]

Inkararag ni Pablo a maaddaan koma dagiti Kristiano iti “mabayag a panagitured buyogen ti rag-o”