1. Ania ti epekto kadatayo dagiti gagayyemtayo?

Kaaduanna a matuladtayo dagiti tattao a pakikadkaduaantayo. Mabalin a nasayaat ti impluensiada wenno saan, personaltay man ida a makadkadua wenno iti social media. Kas kuna ti Biblia, “ti makikadkadua iti masirib agbalinto a masirib, ngem ti makilanglangen iti maag [daydiay saan a mangay-ayat ken Jehova], dakesto ti pagtungpalanna.” (Proverbio 13:20) Dagiti gagayyem a mangay-ayat ken agdaydayaw ken Jehova matulongandaka nga agtalinaed a nadekket kenkuana ken agaramid kadagiti nasayaat a desision. Ngem no dagiti nadekket a gagayyemmo ket saan a mangay-ayat ken Jehova, mabalin a mayadayoka kenkuana. Dayta ti rason nga ibagbaga ti Biblia a pilientayo a naimbag dagiti gagayyemtayo. No ay-ayaten dagiti gagayyemtayo ti Dios, nasayaat ti impluensiada kadatayo ken agbalintayo met a nasayaat nga impluensia kadakuada. ‘Maitultuloytayo ti agpipinnaregta ken agpipinnabileg.’​—1 Tesalonica 5:11.

Idi pinarsuanatayo ni Jehova, adda nakasaysayaat nga inregalona kadatayo​—ti abilidad nga agsao. Napateg ngata kenkuana no kasanotayo nga us-usaren dayta a regalona? Wen! (Basaen ti Santiago 1:26.) Isu a kasanotayo a mausar ti abilidadtayo nga agsao iti pamay-an a mangparagsak ken Jehova?

1. Kasanotayo nga usaren ti regalo ni Jehova nga abilidad nga agsao?

Ibagbaga ti Biblia nga ‘itultuloytayo ti agpipinnaregta ken agpipinnabileg.’ (1 Tesalonica 5:11) Adda kadi am-ammom nga agkasapulan iti pammaregta? Ania ti mabalinmo nga aramiden tapno sumayaat ti riknana? Ipasiguradom a napateg isuna kenka. Mabalin nga ibagam no ania ti maap-apresiarmo kenkuana. Adda kadi mapanunotmo a teksto a mabalin a mangparegta iti maysa nga am-ammom? Adu a teksto ti mabalinmo nga usaren. Laglagipem met nga agpada a napateg ti ibagam ken ti pamay-an ti panangibagam. Isu a kanayon koma a nasingpet ken naalumamay ti panagsaom.​—Proverbio 15:1.

2. Ania a klase ti panagsasao ti masapul a liklikantayo?

Kuna ti Biblia: “Awan koma ti naalas a sao a rummuar iti ngiwatyo.” (Basaen ti Efeso 4:29.) Kayatna a sawen a saantayo koma nga agsao iti dakes wenno makapainsulto a sasao a mangpasakit iti rikna ti dadduma. Liklikantayo met koma ti agitsismis ken mangpadakes.​—Basaen ti Proverbio 16:28.

3. Ania ti makatulong kadatayo tapno agbalin a makaparegta ti panagsasaotayo?

Kaaduanna nga ipakita ti panagsasaotayo no ania ti adda iti puso ken panunottayo. (Lucas 6:45) Isu a masapul a sanayentayo ti bagitayo nga agpokus kadagiti positibo a bambanag​—bambanag a nalinteg, nadalus, maay-ayat, ken naimbag. (Filipos 4:8) Tapno makapagpokustayo kadagitoy a banag, masapul a pilientayo a naimbag dagiti gagayyemtayo ken no ania dagiti aramidentayo no agrelrelakstayo. (Proverbio 13:20) Makatulong met no panunotentayo nga umuna ti ibagatayo. Panunotentayo no ania ti epekto iti dadduma ti ibagatayo. Kuna ti Biblia: “Ti di pinampanunot a sasao ket kas kadagiti duyok ti espada, ngem makapaimbag ti dila dagiti masirib.”​—Proverbio 12:18.

AMMUEM TI AD-ADU PAY

4. Annadam ti panagsasaom

No dadduma, makaibagatayo kadagiti banag a pagbabawyantayto. (Santiago 3:2) Basaen ti Galacia 5:22, 23, sa pagsaritaan dagitoy a saludsod:

• Ania kadagitoy a kualidad ti mabalinmo nga ikararag tapno makontrolmo ti panagsasaom? Kasano a makatulong kenka dagitoy a kualidad?

Basaen ti 1 Corinto 15:33, sa pagsaritaan daytoy a saludsod:

• Ania ti mabalin nga epekto dagiti gagayyemmo ken ti paglinglingayam iti panagsasaom?

Basaen ti Eclesiastes 3:1, 7, sa pagsaritaan daytoy a saludsod:

• Kaano a maymayat nga agulimekka wenno agurayka iti umiso a tiempo sakbayka nga agsao?

5. Positibo koma ti ibagam maipapan iti dadduma

VIDEO: Agsao iti “Nasayaat ken Makapabileg” iti Sabsabali (4:07)

• Iti video, apay a kayat ti kabsat a balbaliwan ti pamay-an ti panagsasaona iti dadduma?

• Ania ti inaramidna tapno makapagbalbaliw?

Basaen ti Eclesiastes 7:16, sa pagsaritaan daytoy a saludsod:

• Ania ti masapul a laglagipentayo no kasla kayattayo ti agsao iti negatibo maipapan iti maysa a tao?

Basaen ti Eclesiastes 7:21, 22, sa pagsaritaan daytoy a saludsod:

• Kasano a makatulong dagitoy a bersikulo tapno saanka a masuron no adda makaibaga iti negatibo maipapan kenka?

6. Nasayaat koma ti panagsasaom kadagiti kapamiliam

VIDEO: Ti Ayat ken Respeto Pagkaykaysaenna Dagiti Pamilia (3:08)

• Ania ti makatulong kenka tapno agbalin a naasi ti panagsasaom kadagiti kapamiliam?

Basaen ti Efeso 4:31, 32, sa pagsaritaan daytoy a saludsod:

• Kasano koma ti pannakisaritatayo kadagiti kapamiliatayo tapno mariknada a maipatpategda?

Inyebkas ni Jehova ti marikriknana maipapan iti Anakna a ni Jesus. Basaen ti Mateo 17:5, sa pagsaritaan daytoy a saludsod:

• Kasanom a matulad ni Jehova no makisarsaritaka kadagiti kapamiliam?

SUMARIO

Dakkel ti epekto iti dadduma ti ibagbagatayo. Masapul a panunotentayo a naimbag no ania ti ibagatayo, no kaanotayo nga ibaga, ken no kasanotayo nga ibaga.

Rebiu

• Kasanoka a makapagsao iti mangpabileg iti dadduma?

• Ania a panagsasao ti kayatmo a liklikan?

• Ania ti makatulong kadatayo tapno kanayon a nasayaat ken makapabileg ti panagsasaotayo?

AGDISKOBREKA PAY

Ania ti makatulong kadatayo tapno positibo ti panagsasaotayo?

Maaddaanka iti Dila Dagiti Masirib (8:04)

Ammuem no ania ti makatulong kenka tapno maliklikam ti agsao iti dakes.

“Talaga Kadi a Dakes ti Agsao iti Dakes?” (Artikulo iti website)

Kitaem no kasanom a maliklikan ti agitsismis.

Kasano a Mapasardengko ti Tsismis? (2:36)

Kitaem no kasano a tinulongan ni Jehova ti maysa a lalaki tapno maisardengna ti agsao iti dakes.

“Inut-utobko No Ania ti Pagtungpalan ti Biagko” (Ti Pagwanawanan, Agosto 1, 2013)