Kakabsat a Lallaki—Agmulakayo Maipaay iti Espiritu ken Rumagpatkayo!
“Ti agimulmula maipaay iti espiritu apitennanto ti agnanayon a biag.”—GAL. 6:8.
1, 2. Kasano a matungtungpal ita ti Mateo 9:37, 38, a nagresulta iti ania a panagkasapulan ti kongregasion?
MAIM-IMATANGANYO ti maysa a nakallalagip a pasamak! Nakabungbunga ita ti trabaho a dinakamat ni Jesu-Kristo. “Dakkel ti anien, ngem bassit dagiti trabahador,” kinuna ni Jesus. “Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Sungbatan ni Jehova a Dios dagiti kasta a kararag iti naisangsangayan a pamay-an. Bayat ti 2009 a tawen serbisio, ti bilang ti kongregasion dagiti Saksi ni Jehova iti intero a lubong ket immadu iti 2,031, isu nga agdagup itan iti 105,298. Agarup 757 nga indibidual ti mababautisaran iti kada aldaw!
2 Ti kasta a panagrang-ay ket agkasapulan iti kualipikado a kakabsat a lallaki a mangidaulo iti panangisuro ken panangipastor kadagiti kongregasion. (Efe. 4:11) Kadagiti naglabas a dekada, nangdutok ni Jehova kadagiti kualipikado a lallaki a mangaywan kadagiti karnerona, ket makapagtalektayo nga agtultuloy nga aramidenna ti kasta. Ti padto iti Mikias 5:5 ipasiguradona kadatayo a bayat ti maudi nga al-aldaw, maaddaan ti ili ni Jehova iti “pito a pastor” ken “walo a duke,” a mangiladawan iti adu a bilang dagiti lallaki a makabael a mangidaulo kadakuada.
3. Ilawlawagyo ti kaipapanan ti ‘panagmula maipaay iti espiritu.’
3 No maysaka a bautisado a lalaki a Saksi ni Jehova, ania ti tumulong kenka nga agtarigagay a rumagpat kadagiti pribilehio iti kongregasion? Ti dakkel a makatulong kenka ket ti ‘panagmula maipaay iti espiritu.’ (Gal. 6:8) Maaramidmo dayta no agpaiwanwanka iti nasantuan nga espiritu ti Dios. Determinadoka koma a di ‘agmula maipaay iti lasag.’ Dimo ipalubos a bumaaw ti tarigagaymo a mangusar iti biagmo nga agserbi iti Dios gapu laeng kadagiti pagnam-ayan, ragragsak, ken paglinglingayan. Amin a Kristiano ket masapul nga ‘agmula maipaay iti espiritu.’ Dagiti lallaki a mangar-aramid iti dayta ti nalabit a kualipikadonto nga umawat kadagiti pribilehio iti kongregasion. Gapu ta adda dakkel a panagkasapulan ita kadagiti ministerial nga adipen ken panglakayen, nangruna a naiturong daytoy nga artikulo kadagiti Kristiano a lallaki. Gapuna kakabsatmi a lallaki, paregtaendakayo a mangusig iti daytoy a banag buyogen ti kararag.
Ragpatenyo ti Nasayaat nga Annongen
4, 5. (a) Aniada a pribilehio iti kongregasion ti maidagadag a ragpaten dagiti bautisado a lallaki? (b) Kasano a maragpat dayta ti maysa?
4 Saan nga automatiko nga agbalin a panglakayen ti maysa a Kristiano a lalaki. Masapul a ragpatenna daytoy a “nasayaat nga aramid.” (1 Tim. 3:1) Ramanen dayta ti panagserbi kadagiti kapammatian babaen ti napasnek a panangasikaso kadagiti kasapulanda. (Basaen ti Isaias 32:1, 2.) No umiso ti motibo ti lalaki a rumagragpat iti pribilehio, saan a kinaambisioso dayta. Imbes ketdi, kayatna laeng ti agserbi a naimpusuan iti sabsabali.
5 Makualipikar nga agbalin a ministerial nga adipen wenno panglakayen ti maysa no ikagumaanna a ragpaten dagiti kualipikasion a nailanad iti Kasuratan. (1 Tim. 3:1-10, 12, 13; Tito 1:5-9) No maysaka a bautisado a lalaki, isaludsodmo iti bagim: ‘Naan-anay kadi a makiramramanak iti trabaho a panangasaba, ken tultulongak kadi ti dadduma nga agbalin met a kasta? Pabpabilgek kadi dagiti kapammatiak babaen ti panangipakitak iti pudno a pannakaseknan iti pagimbaganda? Matmatmatandak kadi dagiti kakabsat kas maysa a naanep nga estudiante ti Biblia? Parparang-ayek kadi ti kalidad dagiti komentok? Sigagaget kadi nga itungtungpalko dagiti annongen nga intalek kaniak dagiti panglakayen?’ (2 Tim. 4:5) Masapul nga utobem a naimbag dagita a saludsod.
6. Ania ti maysa a napateg a banag tapno agbalinka a kualipikado kadagiti pribilehio iti kongregasion?
6 Ti sabali pay a pamay-an nga agbalinka a kualipikado kadagiti pribilehio iti kongregasion ket ti ‘panangpabilegmo iti kinataom buyogen ti pannakabalin babaen ti espiritu ti Dios.’ (Efe. 3:16) Saan a binnutosan ti panagbalin a ministerial nga adipen wenno panglakayen iti kongregasion Kristiano. Maragpat laeng dagita a pribilehio babaen ti naespirituan a panagrang-ay. Kasano ngarud a maiparangarang ti kasta a panagrang-ay? Ti maysa a pamay-an ket babaen ti ‘agtultuloy a pannagnam buyogen ti espiritu’ ken panangpatanormo iti bungana. (Gal. 5:16, 22, 23) Bayat nga iparparangarangmo dagiti nadiosan a galad a kasapulan tapno maibaklaymo dagiti kanayonan nga annongen ken bayat nga iyap-aplikarmo dagiti balakad a tumulong kenka a rumang-ay, “ti panagrang-aymo [ket] maiparangarang iti amin a tattao.”—1 Tim. 4:15.
Kasapulan ti Kinamanagsakripisio
7. Ania ti ramanen ti panagserbi iti sabsabali?
7 Ti panagserbi iti sabsabali ramanenna ti panagregget ken panagsakripisio. Yantangay arigna a papastor dagiti Kristiano a panglakayen, pakaseknanda unay dagiti parikut ti arban. Imutektekanyo no ania ti epektona ken apostol Pablo dagiti annongen a kakuyog ti trabahona a panagipastor. Kinunana kadagiti kapammatian idiay Corinto: “Gapu iti kasta unay a rigat ken tuok ti puso nagsuratak kadakayo buyogen ti adu a lulua, saan a tapno mapaglidaykayo, no di ket tapno maammuanyo koma ti ayat nga adda kaniak a nangnangruna unay nga agpaay kadakayo.” (2 Cor. 2:4) Nalawag a sipapasnek nga intungpal ni Pablo ti annongenna.
8, 9. Mangted kadagiti pagarigan iti Biblia a mangipakita no kasano nga inasikaso dagiti lallaki ti kasapulan ti dadduma.
8 Ti kinamanagsakripisio ti kangrunaan a pakabigbigan dagiti lallaki nga agbambannog maipaay kadagiti adipen ni Jehova. Kas pagarigan, saan la ketdi nga imbaga ni Noe iti pamiliana: ‘Pakaammuandakto no nalpasen ti daong tapno kaduaenkayo.’ Saan nga imbaga ni Moises kadagiti Israelita idiay Egipto: ‘Agkikitatayto idiay Nalabaga a Baybay. Ikagumaanyo ti makagteng sadiay.’ Di pulos imbaga ni Josue: ‘Pakaammuandakto no narban dagiti pader ti Jerico.’ Ken saan met a nangitudo ni Isaias iti sabali a tao sana kinuna: ‘Isu ti ibaonyo.’—Isa. 6:8.
9 Ti kangrunaan nga ulidantayo a tao a nagpaidalan iti espiritu ti Dios ket ni Jesu-Kristo. Sidadaan nga inawatna ti naited kenkuana nga akem kas Mannubbot ti sangatauan. (Juan 3:16) Saan kadi a rumbeng nga agyamantayo gapu iti managsakripisio nga ayat ni Jesus? Iti panangiladawan ti maysa a nabayagen a panglakayen iti panangmatmatna iti arban, kinunana: “Dakkel ti epektona kaniak ti imbaga ni Jesus ken Pedro nga ‘ipastoram dagiti karnerok.’ Iti panaglabas dagiti tawen, napaneknekak no kasano a ti sumagmamano laeng a naayat a sasao wenno simple nga aramid ti kinaimbag ket makapabileg iti maysa. Kaay-ayok unay ti trabaho a panagipastor.”—Juan 21:16.
10. Ania ti mabalin a mangtignay kadagiti Kristiano a lallaki a mangtulad iti ulidan ni Jesus nga agserbi kadagiti sabsabali?
10 No maipapan iti arban ti Dios, sigurado a kayat dagiti nagaget a kakabsat a lallaki nga iyanninaw ti kababalin ni Jesus, a nagkuna: “Pagin-awaenkayto.” (Mat. 11:28) Ti pammati iti Dios ken panagayat iti kongregasion ti mangtignay kadagiti Kristiano a lallaki a mangragpat iti daytoy a nasayaat nga annongen, a dida panunoten a nalabes wenno adu unay ti kalikagumanna. Ngem kasano no saan a talaga a tarigagayan ti maysa ti rumagpat? Mabalin kadi a patanoren ti kabsat a lalaki ti tarigagay nga agserbi iti kongregasion?
Patanoren ti Tarigagay nga Agserbi
11. Kasano a mapatanor ti maysa ti tarigagay nga agserbi kadagiti sabsabali?
11 No awan ti tarigagaymo a rumagpat gapu ta ipapanmo a dika kualipikado, nasayaat nga ikararagmo ti nasantuan nga espiritu. (Luc. 11:13) Tulongannaka ti espiritu ni Jehova a mangsaranget iti aniaman a pagam-amkam iti daytoy a banag. Makaay-ayo ken Jehova ti tarigagay nga agserbi kadagiti sabsabali yantangay ti nasantuan nga espirituna ti mangtignay iti kabsat a rumagpat ken mangipaay iti bileg tapno maitungpalna ti sagrado a panagserbina. (Fil. 2:13; 4:13) Gapuna, maitutop a kiddawem ken Jehova a tulongannaka a mangpatanor iti tarigagay nga agpausar iti kongregasion.—Basaen ti Salmo 25:4, 5.
12. Kasano a ti maysa magun-odna ti umdas a sirib a mangibaklay kadagiti annongen a naitalek kenkuana?
12 Mabalin nga agkedked a rumagpat ti maysa a Kristiano gapu ta ipagarupna a narikut ken adu ti kalikaguman ti panangasikaso kadagiti kasapulan ti arban. Wenno mabalin a panunotenna nga isu ket awanan iti umdas a sirib a mangibaklay kadagiti annongen. No dayta ti makagapu, mabalinna ti gumun-od iti sirib babaen ti naan-anep a panagadalna iti Sao ti Dios ken kadagiti publikasion a naibatay iti Biblia. Nasayaat met nga isaludsodna iti bagina, ‘Adda kadi eskediulko nga agadal iti Sao ti Dios, ken ikarkararagko kadi a maaddaanak iti sirib?’ Insurat ni adalan a Santiago: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana.” (Sant. 1:5) Mamatika kadi iti daytoy a naipaltiing a sasao? Kas sungbat iti kararag ni Solomon, isu ket inikkan ti Dios iti ‘masirib ken mannakaawat a puso’ a timmulong kenkuana a mangilasin iti naimbag ken dakes no mangaramid idi kadagiti desision. (1 Ar. 3:7-14) Pudno, naidumduma ti kasasaad ni Solomon. Kaskasdi, makapagtalektayo a ti Dios ipaayna ti sirib kadagiti lallaki a nakaitalkan dagiti annongen iti kongregasion tapno maaywananda a naimbag ti arbanna.—Prov. 2:6.
13, 14. (a) Ilawlawagyo no ania ti epektona ken Pablo “ti ayat nga adda ken Kristo.” (b) Ania ti rumbeng nga epektona kadatayo “ti ayat nga adda ken Kristo”?
13 Ti sabali pay a makatulong tapno mapatanor ti tarigagay nga agserbi iti sabsabali ket ti panangutob iti amin nga inaramid ni Jehova ken ti Anakna maipaay kadatayo. Kas pagarigan, usigentayo ti 2 Corinto 5:14, 15. (Basaen.) Ania ti kayat a sawen ti sasao a “ti ayat nga adda iti Kristo pilitennakami”? Naisangsangayan ti ayat nga impakita ni Kristo idi insakripisiona ti biagna agpaay kadatayo maitunos iti pagayatan ti Dios. Bayat a dumakdakkel ti panangipategtayo iti dayta, matignay ti pusotayo iti kasta unay. Dakkel ti impluensiana ken Pablo ti ayat ni Kristo. Dayta ti nanglapped kenkuana nga agbalin a managimbubukodan ken timmulong a mangipamaysa iti biagna iti panagserbi iti Dios, kadagiti kapammatianna, ken iti sabsabali.
14 Matignaytayo nga agyaman no utobentayo ti panagayat ni Kristo kadagiti tattao. Iti kasta, mabigbigtayo nga awanen ti rason nga itultuloytayo ti ‘agmula maipaay iti lasag’—ti panangragpat kadagiti managimbubukodan a kalat ken ti panagbiag agpaay laeng iti bukod a pagimbagan. Imbes ketdi, mangaramidtayo kadagiti panagbalbaliw tapno mayun-unatayo ti trabaho nga inted kadatayo ti Dios. Matignaytayo nga ‘agpaadipen’ kadagiti kakabsattayo gapu iti ayat. (Basaen ti Galacia 5:13.) No matmatantayo ti bagitayo kas nanumo nga adipen nga agserserbi kadagiti dedikado nga adipen ni Jehova, tratuentayo ida buyogen ti dignidad ken panagraem. Sigurado a ditay kayat a tuladen ti manangbabalaw ken manangkritikar a kababalin nga itantandudo ni Satanas.—Apoc. 12:10.
Panagtitinnulong ti Pamilia
15, 16. Ania ti rumbeng nga aramiden dagiti kameng ti pamilia tapno makualipikar ti maysa nga agserbi kas ministerial nga adipen wenno panglakayen?
15 No kasado ken addaan iti annak ti kabsat a lalaki, masapul a maikabilangan ti kasasaad ti pamiliana tapno makita no isu ket kualipikado nga agserbi kas ministerial nga adipen wenno panglakayen. Kinapudnona, ti espiritualidad ken reputasion ti pamiliana ket addaan iti direkta nga epekto iti pannakadutokna. Daytoy ti mangipaganetget iti kinapateg ti pannakitinnulong ti asawa ken annak bayat nga ikagkagumaan ti ama nga ibaklay ti annongenna iti kongregasion kas ministerial nga adipen wenno panglakayen.—Basaen ti 1 Timoteo 3:4, 5, 12.
16 Maragsakan ni Jehova no agtitinnulong dagiti kameng ti Kristiano a pamilia. (Efe. 3:14, 15) Masapul a natimbeng ti ulo ti pamilia tapno maibaklayna dagiti annongenna iti kongregasion ken maaywananna ti pamiliana “iti nasayaat a pamay-an.” Gapuna, napateg nga adda eskediul ti pamilia ti panglakayen wenno ministerial nga adipen para iti linawas a Panagdaydayaw ti Pamilia tapno magunggonaanda amin. Regular koma a mangasabada a sangapamiliaan. Gapuna, napateg a ti amin a kameng ti pamilia makikooperarda iti panagregget ti ulo ti pamilia.
Mabalinmo Kadi Manen ti Agserbi?
17, 18. (a) Ania ti mabalin nga aramiden ti maysa a sigud nga addaan iti pribilehio ngem naikkat? (b) Ania koma a panangmatmat ti taginayonen ti kabsat a lalaki a sigud a panglakayen wenno ministerial nga adipen?
17 Nalabit a maysaka idi a panglakayen wenno ministerial nga adipen. Ay-ayatem ni Jehova ket manamnamam nga ipatpategnaka agingga ita. (1 Ped. 5:6, 7) Nabalakadanka kadi nga adda dagiti masapul a balbaliwam? Sidadaanka koma a mangbigbig iti nagkurangam ken aturem dayta babaen ti tulong ti Dios. Liklikam ti agimula iti sakit ti nakem. Agbalinka a masirib ken positibo. Maysa a panglakayen a nagserbi iti adu a tawen ngem napukawna dagiti pribilehiona iti kongregasion ti nagkuna: “Inkagumaak a tinaginayon ti kinaregtak a makigimong, mangasaba, ken agbasa iti Biblia a kas iti ar-aramidek idi maysaak pay a panglakayen, banag a naragpatko met. Nasursurok pay ti aguray. Impagarupko ngamin a maisubli ti pribilehiok iti uneg ti maysa wenno dua a tawen, ngem dandani pito a tawen ti inurayko sakbay a nakapagserbiak manen kas panglakayen. Bayat dagidi a tiempo, dakkel ti naitulongna kaniak ti pammaregta a ditay rumbeng a sumuko no di ket itultuloytayo ti rumagpat.”
18 No maysaka a kabsat a lalaki nga adda iti kasta a kasasaad, dika koma maupay. Utobem no kasano a bembendisionan ni Jehova ti ministeriom ken ti pamiliam. Pabilgem ti espiritualidad ti pamiliam, sarungkaram dagiti masakit, ken paregtaem dagiti nakapuy. Kangrunaan iti amin, ipategmo ti pribilehiom a mangidaydayaw iti Dios ken mangiwaragawag iti naimbag a damag ti Pagarian kas maysa a Saksi ni Jehova.a—Sal. 145:1, 2; Isa. 43:10-12.
Sukimatenyo Manen
19, 20. (a) Ania ti maidagdagadag nga aramiden ti amin a bautisado a lallaki? (b) Ania ti mausig iti sumaruno nga artikulo?
19 Dakdakkel ti panagkasapulan ita kadagiti panglakayen ken ministerial nga adipen. Gapuna, idagadagmi kadagiti amin a bautisado a lallaki a sukimatenda manen ti kasasaadda ket isaludsodda iti bagida, ‘Ania ngata dagiti makagapu no apay a saanak pay a ministerial nga adipen wenno panglakayen?’ Bay-am nga iwanwannaka ti espiritu ti Dios tapno maaddaanka iti umiso a panangmatmat iti daytoy a napateg a banag.
20 Pakagunggonaan ti amin a kameng ti kongregasion ti nadiosan a kinamanagsakripisio dagiti kapammatianda. No mangipakitatayo iti naayat ken di managimbubukodan nga aramid, masagraptayto ti rag-o nga itden ti panagserbi iti sabsabali ken ti panagmula maipaay iti espiritu. Ngem kas ipakita ti sumaruno nga artikulo, masapul a ditay pagleddaangen ti nasantuan nga espiritu ti Dios. Kasano a maliklikan dayta?
[Footnote]
Ania ti Sungbatyo?
• Ania ti ipanamnama kadatayo ti padto iti Mikias 5:5?
• Ilawlawagyo no ania ti ramanen ti kinamanagsakripisio.
• Kasano a mapatanor ti maysa ti tarigagay nga agserbi kadagiti sabsabali?
• Kasano kapateg ti pannakitinnulong dagiti kameng ti pamilia tapno makualipikar ti maysa nga agserbi kas ministerial nga adipen wenno panglakayen?
[Dagiti Ladawan iti panid 25]
Ania ti mabalinmo nga aramiden tapno makaragpatka iti pribilehio?