Agpaibagnoskayo iti Silaw

DIN mabilang a biag ti nasalbar gapu kadagiti parola. Ngem para iti nabannog a managlayag, ti silaw iti adayo ket saan laeng a mangipakdaar iti napeggad a kadilian. Pagilasinan met dayta a ti managlayag ket asidegen iti destinasionna. Umasping iti dayta, dagiti Kristiano ita ket asidegdan iti pagnguduan ti naunday a panagdaliasatda, maysa a panagbaniaga a lumasat iti lubong a nasipngetan ken napeggad iti naespirituan. Iti Biblia, ti intero a sangatauan​—dagiti tattao a naisina iti Dios​—ket nayasping iti “baybay a maipalpallayog, no saan a makapaglinak, a ti dandanumna mangipurpuruakda iti ruot ti baybay ken pitak.” (Isaias 57:20) Kasta ti kasasaad iti aglawlaw ti ili ti Dios. Nupay kasta, addaanda iti naraniag a namnama ti pannakaisalakan. Para kadakuada, maysa dayta a piguratibo ken mapangnamnamaan a silaw. (Mikias 7:8) Gapu ken Jehova ken ti naisurat a Saona, “ti met laeng silaw nagsilnag maipaay iti daydiay nalinteg, ken ti panagrag-o maipaay a mismo kadagidiay napalungdo iti puso.”​—Salmo 97:11.a

Nupay kasta, dadduma a Kristiano impalubosda a dagiti pakasingaan ti nangyadayo kadakuada iti silaw ni Jehova isu a ti pammatida ket arig barko a narba gapu kadagiti di nadnadlaw a kabatuan​—materialismo, imoralidad, wenno uray pay ketdi ti apostasia. Wen, kas idi umuna a siglo, dadduma ita ti ‘nakapadas iti pannakarba maipapan iti pammatida.’ (1 Timoteo 1:19; 2 Pedro 2:13-15, 20-22) Ti baro a lubong ket mayarig iti pagsangladantayo, ket agturturongtayon sadiay. Nakaas-asidegen dayta, isu nga anian a nakalkaldaang no mapukawtayo ti anamong ni Jehova!

Liklikanyo ti ‘Pannakarba ti Pammatiyo’

Kadagiti napalabas a siglo, ti maysa a barko ket mabalin nga aglayag a sitatalged iti nawayang a baybay ngem sa la marba inton asidegen iti sangladan. Masansan a ti kangrunaan a di madmadlaw a peggad iti panaglayag ket no asidegen ti barko iti sangladanna. Umasping iti dayta, para iti adu, ti kapeggadan a tiempo iti pakasaritaan ti tao ket dagiti “maudi nga aldaw” daytoy agdama a sistema ti bambanag. Siuumiso a deskribiren ti Biblia dagita a tiempo kas “narigat a pakilangenan,” nangruna kadagiti dedikado a Kristiano.​—2 Timoteo 3:1-5.

Apay a nakapegpeggad dagitoy maudi nga al-aldaw? Ngamin, ammo ni Satanas nga ‘ababan ti [nabatbati a] tiempona’ a makigubat iti ili ti Dios. Gapuna, kumarkaro ti narungsot a panangrautna kadakuada kas panagreggetna a mangrebba iti pammatida. (Apocalipsis 12:12, 17) Nupay kasta, adda ti tumulong ken mangibagnos kadatayo. Ni Jehova ket kanayon a mabalin a pagkamangan dagidiay mangipangag iti balakadna. (2 Samuel 22:31) Impaayannatayo kadagiti leksion a pakaballaagantayo a mangibutaktak kadagiti nasikap ken dakes a taktika ni Satanas. Repasuentayo ita ti dua kadagiti kasta a pagarigan a pakairamanan ti nasion ti Israel idi dandanidan makagteng iti Naikari a Daga.​—1 Corinto 10:11; 2 Corinto 2:11.

Idi Asidegdan iti Naikari a Daga

Babaen ti panangidaulo ni Moises, nakapanaw ti ili ti Israel manipud Egipto. Di nagbayag, nakagtengdan iti makin-abagatan a beddeng ti Naikari a Daga. Nangibaon ni Moises iti 12 nga espia nga agsiim iti Canaan. Idi nagsublida, saan a nasayaat ti impadamag ti 10 nga awanan pammati nga espia. Kinunada a di kabaelan ti Israel a parmeken dagiti Canaanita agsipud ta ‘dadakkelda unay’ ken nabileg ti buyotda. Ania ti epekto dayta kadagiti Israelita? Sigun iti salaysay, nangrugida nga agtanabutob maibusor kada Moises ken Aaron, a kunkunada: “Apay nga iyegnakami ni Jehova iti daytoy a daga tapno mapasagkami babaen ti kampilan? Dagiti assawami ken dagiti ubbingmi agbalindanto a samsam. . . . Mangdutoktayo iti pannakaulo, ket agsublitayo idiay Egipto!”​—Numeros 13:1, 2, 28-32; 14:1-4.

Agasenyo! Dagitoy a mismo ti nakaimatang iti panangibabain ni Jehova iti kabilgan idi a turay nga isu ti Egipto babaen ti makadidigra a sangapulo a saplit ken nakaskasdaaw a milagro idiay Nalabaga a Baybay. Malaksid iti dayta, matantannawaganda idin ti Naikari a Daga, a ti laengen aramidenda ket umasideg sadiay a kas iti maysa a barko nga umas-asideg iti silaw a mangtanda iti destinasionda. Ngem dida patien a kabaelan ni Jehova a parmeken dagiti nagbabassit ken nabingaybingay a siudad-pagarian ti Canaan. Gapu iti dayta a kinaawan pammati, nadismaya la ketdi ti Dios ken ti dua a natured nga espia a da Josue ken Caleb, a nangibilang iti Canaan kas ‘tinapay’ kadagiti Israelita! Mapagpannurayan ti impormasion dagita a dua yantangay nasawarda a mismo ti Canaan. Idi saan a nakastrek dagiti Israelita iti Naikari a Daga, nakipagdaliasat latta da Josue ken Caleb iti let-ang iti pinulpullo a tawen, ngem saanda a natay sadiay a kas kadagidiay awanan pammati. Kinapudnona, timmulong da Josue ken Caleb a nangidaulo iti simmaganad a henerasion manipud let-ang nga agturong iti Naikari a Daga. (Numeros 14:9, 30) Idi makaasidegda iti Naikari a Daga iti maikadua a gundaway, naipasango ti Israel iti sabali a pannubok. Kasanoda ngata a sanguen dayta?

Ni Ari Balak iti Moab pinadasna nga ilunod ti Israel babaen iti palso a mammadto a ni Balaam. Nupay kasta, linapdan ni Jehova dayta a plano babaen ti panangtignayna ken ni Balaam a mangisawang kadagiti bendision imbes a lunod. (Numeros 22:1-7; 24:10) Saan a naupay ni Balaam. Nangaramid iti sabali manen a gakat tapno saan a maikari ti ili ti Dios iti daga ti Canaan. Kasano? Babaen ti panangisungsongna kadakuada nga agaramid iti imoral ken agdayaw ken Baal. Nupay saan a nagkurri dayta iti kaaduan nga Israelita, nagresulta dayta iti pannakasulisog ti 24,000 nga Israelita. Naaddaanda iti imoral a relasion kadagiti Moabita a babbai ken nakinaminda iti panagdayaw ken Baal idiay Peor.​—Numeros 25:1-9.

Panunotenyo laengen! Adu kadagita nga Israelita ti nakasaksi iti panangispal kadakuada ni Jehova iti “dayta dakkel ken nakaam-amak a let-ang.” (Deuteronomio 1:19) Kaskasdi nga idi asidegda unayen iti tawidenda a daga, 24,000 kadagiti Israelita ti timmulok kadagiti nainlasagan a tarigagayda isu a pinapatay ida ni Jehova. Anian a pakdaar dayta kadagiti adipen ti Dios ita bayat nga umas-asidegdan iti dakdakkel a tawidda!

Saan a nagbaliw dagiti taktika nga us-usaren ni Satanas iti ultimo a panagreggetna a manglapped kadagiti adipen ni Jehova ita a manggun-od iti gunggonada. Iti maysa a taktika a mangipalagip kadatayo iti napasamak iti damo nga iyaasideg dagiti Israelita iti Naikari a Daga, masansan nga ikagumaan ni Satanas ti mangimula iti buteng ken panagduadua, babaen man dayta kadagiti pammutbuteng, panangidadanes, wenno panangumsi. Addan dagiti Kristiano a nagpaapektar kadagita. (Mateo 13:20, 21) Ti imoralidad ti sabali pay a napaneknekanen nga epektibo a taktika ni Satanas. Adda dagiti nakastrek iti kongregasion Kristiano a dakes ti motiboda ket ginundawayanda dagidiay nakapuy ti pammatida ken dagidiay saan nga agpapaibagnos iti silaw manipud iti Dios.​—Judas 8, 12-16.

Kadagiti nataengan iti naespirituan ken manangipangag kadagiti pakdaar ti Dios, ammoda a ti napartak a panagrakaya ti moralidad ti lubong ket nabatad a pammaneknek a desperado unayen ni Satanas. Wen, ammo ni Satanas nga asidegen ti tiempo a dinanton maimpluensiaan dagiti nasungdo nga adipen ti Dios. Sigurado nga itan ti tiempo tapno agtalinaedtayo a naridam kadagiti panagregget ni Satanas.

Dagiti Makatulong Tapno Agtalinaedtayo a Naridam

Dineskribir ni apostol Pedro ti naimpadtuan a sao ti Dios kas “pagsilawan nga agsilsilnag iti nasipnget a disso,” agsipud ta dayta ti makatulong kadagiti Kristiano a mangtarus iti kaitungpalan ti panggep ti Dios. (2 Pedro 1:19-21) Dagidiay mangparayray iti panagayatda iti Sao ti Dios ken kanayon nga agpapaibagnos iti dayta maamirisda a ni Jehova ti mangpalinteg iti danada. (Proverbio 3:5, 6) Gapu ta dagiti managyaman ket addaanda iti namnama, “agdir-idanto a sirarag-o gapu iti nasayaat a kasasaad ti puso,” idinto ta dagidiay saan a makaam-ammo ken Jehova, wenno dagidiay umikay iti dalanna, ket sigurado a makariknada iti “saem ti puso” ken “pannakarba ti espiritu.” (Isaias 65:13, 14) Gapuna, babaen ti napasnek a panagadaltayo iti Biblia ken ti panangyaplikar kadagiti maad-adaltayo, kanayon a maipamaysatayo dagiti matatayo iti sigurado a namnamatayo imbes a kadagiti temporario a ragragsak iti daytoy agdama a sistema ti bambanag.

Ti panagkararag ket napateg met iti panagtalinaedtayo a naridam. Idi sarsaritaenna ti maipapan iti agdama a sistema, kinuna ni Jesus: “Agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.” (Lucas 21:34-36) Usigenyo ti panangusar ni Jesus iti sao nga “umar-ararawkayo,” a maysa a nakapaspasnek a kita ti kararag. Ammo ni Jesus nga iti daytoy napeggad a panawen, nakatayá ti agnanayon a biag. Dagiti kadi kararagmo iyanninawda ti nasged a tarigagaymo nga agtalinaed a siririing iti naespirituan?

Ditay koma liplipatan a ti maudi a paset ti biahe ti kapeggadan a paset ti panagdaliasattayo a manggun-od iti tawidtayo. Gapuna, anian a nagpateg no kanayon a sikikitatayo iti silaw a mangitunda iti pannakaispaltayo.

Agannadkayo Kadagiti Mangyaw-awan a Silaw

Idi maus-usar pay laeng dagiti barko a de layag, dagiti pirata gundawayanda ti panawen ti lenned yantangay kabayatan dayta, narigat a makita dagiti marino ti takdang. Dagiti pirata mabalin a mangikabilda kadagiti silaw iti igid ti napeggad a paset ti kosta. Gapu iti dayta, dagiti maallilaw a kapitan ti barko mabalin a baliwanda ti direksionda ngem agbanag laeng dayta iti pannakarba ti barkoda, pannakasamsam dagiti kargamentoda, ken pannakapapatayda.

Iti umasping a wagas, ni Satanas, a manangallilaw nga “anghel ti lawag,” kayatna a pukawen manipud iti ili ti Dios ti relasionda ken Jehova. Mabalin met nga agusar ti Diablo kadagiti ‘ulbod nga apostol’ ken apostata a “ministro ti kinalinteg” a mangallilaw kadagiti di nasiput. (2 Corinto 11:13-15) Ngem kas kadagiti nasiput ken aduan kapadasanen a kapitan ken dagiti tripulantena, a saan a maallilaw kadagiti mangyaw-awan a silaw, saan a kaskarina a maiwawa dagiti naridam a Kristiano. Ngamin, ‘babaen iti panangusar, nasanay dagiti pannakabalin ti pannakaawatda a mangilasin agpadpada iti umiso ken di umiso’ isu a saan ida a maallilaw dagiti mangitantandudo kadagiti palso a pannursuro ken makadadael a pilosopia.​—Hebreo 5:14; Apocalipsis 2:2.

Itugtugot dagiti marino ti maysa a listaan a pangkitaanda no sadino ti ayan dagiti parola. Nailanad iti dayta a listaan dagiti pakailasinan ti tunggal parola, agraman ti naisalsalumina a signalda. Kuna ti The World Book Encyclopedia: “Babaen ti panangpaliiwda iti pakailasinan ti parola ken ti panangidiligda iti dayta iti adda iti listaanda, mailasin dagiti marino no ania a parola ti masirsirpatanda ken no sadino dayta.” Umasping iti dayta, ti Sao ti Dios ti tumultulong kadagiti napudno a tattao tapno mailasinda ti pudno a panagdayaw ken dagidiay mangan-annurot iti dayta, nangruna kabayatan dagitoy maudi nga aldaw a ti pudno a panagdayaw ket intan-oken ni Jehova a nangatngato ngem iti palso a relihion. (Isaias 2:2, 3; Malakias 3:18) Iti panangdeskribirna iti dakkel a naggidiatan ti pudno ken palso a panagdayaw, kastoy ti kinuna ti Isaias 60:2, 3: “Ti met laeng sipnget abbongannanto ti daga, ken ti napuskol a daguyemyem abbonganna dagiti nasional a bunggoy; ngem ni Jehova agsilnagto kenka, ket ti bukodna a dayag makitanto kenka. Ket dagiti nasion pudno nga umaydanto iti lawagmo, ken ti ar-ari iti raniag ti panagsilnagmo.”

Bayat a minilion a tattao iti amin a nasion ket agtultuloy nga agpapaibagnos iti silaw ni Jehova, saanto a marba ti pammatida iti maudi a paset ti panagdaliasat. Imbes ketdi, malasatanda a sitatalged ti nabatbati nga aldaw ti agdama a sistema ti bambanag ken makadanondanto iti natalna a baro a lubong.

[Footnote]

[Ladawan iti panid 15]

Kas kadagiti marino, agan-annad dagiti Kristiano tapno saanda a maallilaw kadagiti mangyaw-awan a silaw