“Manipud Kinamaladaga Naammuam”

SIGUN iti nabiit pay a panagadal dagiti sientipiko, ti pannakisarita kadagiti maladaga dakkel ti epektona iti pannakapatanor ti utekda, a mangpalaing iti abilidadda nga agpanunot, agrason, ken mangrisut kadagiti parikut. Nangnangruna a pudno daytoy iti umuna a tawen ti biag ti maladaga. Ipadamag ti International Herald Tribune a patien itan ti sumagmamano a managsirarak a “ti bilang dagiti sao a mangngeg ti maysa a maladaga kada aldaw ti kakaisuna a kapatgan a makaibaga a nasaksakbay iti sariritna iti masanguanan, balligi iti eskuelaan ken abilidad a makipulapol iti kagimongan.”

Nupay kasta, ti maisawang a sasao rumbeng nga agtaud iti maysa a tao. Ti telebision wenno radio agparang a di mabalin nga isukat iti daytoy.

Kinuna ti maysa a neuroscientist iti University of Washington idiay Seattle, E.U.A.: “Ammotay itan a dagiti koneksion dagiti nerbio ket mabukel iti nasapa unay a paset ti biag ket ti utek ti maladaga literal nga agur-uray kadagiti kapadasan tapno madeterminar no kasano a maaramid dagiti koneksion. Ita laeng a mabigbigtayo no kasano kasapa a mangrugi daytoy a proseso. Kas pagarigan, masursuro dagiti maladaga ti ayug ti katutubo a pagsasaoda iti edad nga innem a bulan.”

Supiaten ti panagsirarak ti nasaknap a kapanunotan a dagiti maladaga agbalin a nasaririt basta maipakitaanda laeng iti aglaplapusanan nga ayat. Itampok met daytoy ti kinapateg ti akem dagiti nagannak iti irarang-ay ti anak.

Ipalagip daytoy ti sasao ti naipaltiing a surat ni apostol Pablo ken Timoteo: “Manipud kinamaladaga naammuam dagiti nasantuan a sursurat, a makabael a mamagsirib kenka maipaay ti pannakaisalakan.” Nalabit a dagiti nasantuan a surat, nga insarsarita ti manamati nga inana ken apongna a baket ken ni Timoteo idi maladaga pay, addaan napateg a papel iti irarang-ayna kas naisangsangayan nga adipen ti Dios.​—2 Timoteo 1:5; 3:15.