Sanayenyo Ida Manipud iti Kinamaladaga

IPAKITA ti moderno a panagsirarak a dagiti “sikog addaanda iti pisiolohikal a reaksion kadagiti boses.” Dagiti managsirarak iti University of North Carolina “natakuatanda a kalpasan nga ibasaan dagiti inna ti annakda a di pay naipasngay, agtignay dagiti kaipasngay no maibasa manen dagiti naadaw a teksto,” kuna ti Winnipeg Free Press. No sipipigsa nga agbasa dagiti babbai kabayatan a masikogda, tumulong unay daytoy iti panangipasagepsep kadagiti nasayaat nga ugali iti anak. Kuna ti Biblia a ‘naammuan [ni Timoteo] dagiti nasantuan a sursurat manipud iti kinamaladaga.’ (2 Timoteo 3:14, 15) Nalawag, inapresiar ni nanangna ken ni apongna a baket ti kinapateg ti panangsanay kenkuana manipud iti kinamaladaga, a nalabit nairaman ti sipipigsa a panagbasa.

Ti panagbasa ti “kabibilgan a kinasigo iti biag nga adda iti kagimongantayo ita,” kuna ni autor a Jim Trelease. Maparang-ay ti kinasigo iti pagsasao ken bokabulario babaen ti sipipigsa a panagbasa.

Nainsiriban a rugian ti sipipigsa a panagbasa apaman a kasaritayon ti maladagayo. Nupay iti damo saan a matarusan ti di pay naipasngay wenno kaipaspasngay nga anak ti ibagbagayo, nagpateg dagiti potensial a manayon a gunggona. Kuna ti Proverbio 22:6: “Iruammo ti ubing iti dalan a rebbengna a papanan, ket uray intono lakayen saannanto a pagpanawan.”

Aniat’ mabalinyo a basaen nga agpadpada a praktikal ken makagunggona? Sipipigsa a basaenyo ti Biblia iti anakyo iti inaldaw. Agbasakay met iti sabsabali pay a makagunggona a publikasion, kas ti Panagimdeng iti Naindaklan a Mannursuro, Ti Librok dagiti Estoria ti Biblia, Ti Katan-okan a Tao a Nagbiag Pay Laeng, ken dagiti artikulo iti magasin a Pagwanawanan ken Agriingkayo!

Pudno, ti panangaramidyo iti kastoy ramanenna ti tiempo, ngem nasayaat daytoy a panangaramat iti tiempo. Maysa daytoy a direkta a pamay-an a panangipakita iti pannakaseknan ken ayatyo iti anakyo.