• Kasano a Matulongannaka ti Biblia?
    Agbiagka a Naragsak iti Agnanayon!—Leksion iti Biblia a Makatulong Kenka
    • Leksion 1. Nakalukat a Biblia.

      LEKSION 01

      Kasano a Matulongannaka ti Biblia?

      Addaantayo amin iti saludsod maipapan iti biag, panagrigrigat, ipapatay, ken iti masanguanan. Adda met dagiti pampanunotentayo iti inaldaw, kas iti panagbirok iti kuarta ken no kasano nga agbalin a naragsak ti pamiliatayo. Nakatulong ti Biblia iti adu a tattao a mangsungbat kadagiti importante a saludsodda iti biag. Ngem saan la a dayta. Nakatulong met dagiti pammagbaga ti Biblia iti inaldaw a panagbiagda. Adda kadi am-ammom a mabalin a matulongan ti Biblia?

      1. Ania dagiti saludsod a masungbatan ti Biblia?

      Sungbatan ti Biblia dagitoy nga importante a saludsod: Kasano a nangrugi ti biag? Ania ti rason nga agbibiagtayo? Apay nga agrigrigat dagiti inosente a tattao? Ania ti mapasamak no matay ti maysa? No kayat ti amin ti talna, apay a nagadu ti gubat? Madadaelto kadi ti daga wenno saan? Aw-awisennatayo ti Biblia a mangbirok iti sungbat kadagita a saludsod, ket minilion a tattao ti nakakita a makakombinsir ti sungbat ti Biblia.

      2. Kasano a matulongannatayo ti Biblia tapno naragsaktayo iti inaldaw?

      Nagmayat dagiti pammagbaga ti Biblia. Kas pagarigan, isurona dagiti pamilia no kasanoda nga agbalin a talaga a naragsak. Ibagana met no ania ti aramidentayo no mais-stress-tayo ken no kasano a ma-enjoy-tayo ti trabahotayo. Maammuamto ti isursuro ti Biblia maipapan kadagitoy a banag, ken ad-adunto pay ti maammuam bayat a pagsarsaritaanta daytoy a pagbasaan. Makitamto a ti “intero a Kasuratan [amin nga adda iti Biblia ket] . . . makagunggona.”​—2 Timoteo 3:16.

      Saan a suktan daytoy a pagbasaan ti Biblia. Tulongannaka ketdi a mas aginteres a mangadal iti Biblia para iti pagsayaatam. Isu nga awisendaka a mangbasa kadagiti teksto a makita kadagiti leksion ken kitaem ti koneksion dagita iti maad-adalmo.

      AMMUEM TI AD-ADU PAY

      Kitaem no kasano a nakatulong ti Biblia kadagiti tattao, no kasanom a ma-enjoy a basaen, ken no apay a nasayaat nga agpatulongka tapno maawatam dayta.

      3. Kaya ti Biblia nga idalan ti biagmo

      Ti Biblia ket kas iti napigsa a flashlight. Matulongannatayo a mangaramid kadagiti husto a desision ken maibagana ti mapasamak iti masanguanan.

      Basaen ti Salmo 119:105, sa pagsaritaan dagitoy a saludsod:

      • Ania ti imbaga ti nangisurat iti daytoy a salmo maipapan iti Biblia?

      • Sika ngay, ania ti makunam iti Biblia?

      Lalaki a nakaiggem iti naraniag a flashlight bayat a magmagna iti nabato nga igid ti dan-aw iti sumipnget.

      4. Masungbatan ti Biblia dagiti saludsodtayo

      Nasungbatan ti Biblia dagiti saludsod a nabayagen a pampanunoten ti maysa a babai. I-play ti VIDEO, sa pagsaritaan dagiti sumaruno a saludsod.

      VIDEO: Dika Maawanan iti Namnama! (1:48)

      • Iti video, ania dagiti saludsod ti babai?

      • Kasano a nakatulong kenkuana ti panagadalna iti Biblia?

      Aw-awisennatayo ti Biblia nga agsaludsod. Basaen ti Mateo 7:7, sa pagsaritaan daytoy a saludsod:

      • Ania dagiti saludsodmo a mabalin a masungbatan ti Biblia?

      5. Ma-enjoy-mo ti agbasa iti Biblia

      Magusgustuan ti adu ti agbasa iti Biblia ken makitkitada ti pagsayaatan dayta. I-play ti VIDEO, sa pagsaritaan dagiti sumaruno a saludsod.

      VIDEO: Panagbasa iti Biblia (2:05)

      • Iti video, ania ti panagrikna dagiti agtutubo iti panagbasa?

      • Ngem apay a kayatda a basaen ti Biblia?

      Mangted ti Biblia kadagiti instruksion a mangparagsak ken mangipaay iti namnama kadatayo. Basaen ti Roma 15:4, sa pagsaritaan daytoy a saludsod:

      • Kayatmo kadi a maammuan ti ad-adu pay maipapan iti ikarkari daytoy a teksto?

      6. Matulongannatayo ti dadduma tapno maawatantayo ti Biblia

      Nakita ti adu a nasayaat no adda mangilawlawag kadakuada iti Biblia imbes a basaenda dayta a bukbukodda. Basaen ti Aramid 8:26-31, sa pagsaritaan daytoy a saludsod:

      Collage: 1. Ilawlawag ni Felipe ti Kasuratan iti Etiope a lalaki. 2. Saksi ni Jehova a mangilawlawag iti Biblia iti maysa nga ina nga addaan iti dua nga annak.

      Kasapulan idi ti Etiope a lalaki ti tulong tapno maawatanna ti basbasaenna. Nakita ti adu a makatulong no adda mangilawlawag kadakuada iti Biblia

      KUNA TI DADDUMA: “Sayang laeng ti orasmo no agadalka iti Biblia.”

      • Ania met ti makunam? Apay?

      SUMARIO

      Mangted ti Biblia kadagiti pammagbaga para iti inaldaw a panagbiag, sungbatanna dagiti importante a saludsod, ken mangipaay iti ragsak ken namnama kadagiti tattao.

      Rebiu

      • Ania dagiti pammagbaga a mabasa iti Biblia?

      • Ania dagiti saludsod a masungbatan ti Biblia?

      • Ania ti kayatmo a maammuan iti Biblia?

      Padasem Daytoy

      AGDISKOBREKA PAY

      Kitaem no kasano a makatulong ita dagiti pammagbaga ti Biblia.

      “Pannursuro ti Biblia​—Di Agkupas a Prinsipio” (Ti Pagwanawanan No. 1 2018)

      Kitaem no kasano a natulongan ti Biblia ti maysa a lalaki nga adda problema iti emosionna sipud kinaubingna.

      Nangrugi ti Naragsak a Biagko (2:53)

      Ammuem dagiti makatulong a pammagbaga ti Biblia para kadagiti pamilia.

      “12 a Sekreto ti Naballigi a Pamilia” (Agriingkayo! No. 2 2018)

      Kitaem no kasano a lawlawagan ti Biblia ti kamali nga ideya maipapan iti no asino a talaga ti agturturay iti lubong.

      Apay nga Adalem ti Biblia?​—At-atiddog a Bersion (3:14)

  • Ti Biblia ket Mensahe ti Dios Kadatayo
    Agbiagka a Naragsak iti Agnanayon!—Leksion iti Biblia a Makatulong Kenka

    • 1. No tao ti nangisurat iti Biblia, kasano a ti Dios ti Autorna?

      Ti Biblia ket insurat ti agarup 40 a lallaki iti sumurok-kumurang a 1,600 a tawen, manipud 1513 B.C.E. agingga iti agarup 98 C.E. Nagduduma ti nagsurat. Adda dagiti pastor, mangngalap, ken ari. Ngem saan nga agkikinnontra dagiti linaon ti Biblia. Apay? Gapu ta ti Dios ti Autor ti Biblia. (Basaen ti 1 Tesalonica 2:13.) Saan a dagiti bukodda a kapanunotan ti insurat dagiti nangisurat iti Biblia. Imbes ketdi, ‘naggapu iti Dios ti imbagada bayat a tigtignayen ida ti nasantuan nga espiritu.’a (2 Pedro 1:21) Inusar ti Dios ti nasantuan nga espirituna a mangiwanwan, wenno mangidalan, kadagiti tattao a mangisurat iti pampanunotna.​—2 Timoteo 3:16.