Ti Lawag ti Dios Paksiatenna ti Kinasipnget!
“Ni Jehova ti mamagsilnag iti kinasipngetko.”—2 SAMUEL 22:29.
1. Ania ti pakainaigan ti lawag iti biag?
“KINUNA ti Dios: ‘Maadda koma ti lawag.’ Iti kasta naadda ti lawag.” (Genesis 1:3) Kadagita a nagpateg a sasao, ti salaysay ti Genesis maipapan iti panamarsua ipabigbigna a ni Jehova ti gubuayan ti lawag. Awan ti agbiag ditoy daga no awan ti lawag. Ni Jehova met ti gubuayan ti naespirituan a lawag, a napateg a mangibagnos kadatayo iti dalan ti biag. (Salmo 43:3) Impakita ni Ari David ti dakkel a pakainaigan ti biag iti naespirituan a lawag idi insuratna: “Adda kenka ti ubbog ti biag; babaen iti lawagmo makitami ti lawag.”—Salmo 36:9.
2. Kas impakita ni Pablo, dakkel ti pakainaigan ti lawag iti ania?
2 Agarup 1,000 a tawen kalpasan ti kaaldawan ni David, dinakamat ni apostol Pablo ti salaysay ti panamarsua. Kinunana iti suratna iti kongregasion Kristiano sadi Corinto: “Ti Dios ti nagkuna: ‘Agsilnag koma ti silaw (wenno, lawag) manipud iti sipnget.’” Impakita ngarud ni Pablo a dakkel ti pakainaigan ti naespirituan a lawag iti pannakaammo a naggapu ken Jehova idi kinunana: “Isu nagsilnag iti puspusotayo tapno lawagan ida iti nadayag a pannakaammo iti Dios babaen ti langa ni Kristo.” (2 Corinto 4:6) Kasano a masilnagannatayo dayta a lawag?
Ti Biblia—Mangisilnag iti Lawag
3. Babaen ti Biblia, ania a lawag ti ipapaay ni Jehova?
3 Mangipaay ni Jehova iti naespirituan a lawag kangrunaanna babaen ti naipaltiing a Saona, ti Biblia. Isu a no adalentayo ti Biblia ken gun-oden ti pannakaammo a naggapu iti Dios, ipalpalubostayo ti lawagna a mangsilnag kadatayo. Babaen ti Biblia, ilawlawag ni Jehova no ania dagiti panggepna ken ibagana no kasano a maaramidtayo ti pagayatanna. Daytoy ti mangted iti direksion iti biagtayo ken tumulong a mangpennek kadagiti naespirituan a kasapulantayo. (Eclesiastes 12:1; Mateo 5:3) Impaganetget ni Jesus a nasken a penkentayo ti naespirituan a kasapulantayo, idi a nagadaw iti Mosaiko a Linteg, a kunkunana: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’”—Mateo 4:4; Deuteronomio 8:3.
4. Iti ania a wagas a ni Jesus “ti silaw ti lubong”?
4 Dakkel ti pakainaigan ni Jesus iti naespirituan a lawag. Kinapudnona, tinukoyna ti bagina kas “ti silaw ti lubong” ken kinunana: “Ti sumurot kaniak saanto a pulos magna iti sipnget, no di ket ikutannanto ti silaw ti biag.” (Juan 8:12) Dagitoy a sasao ti tumulong kadatayo a mangtarus iti kinapateg ti akem ni Jesus tapno mayallatiw iti sangatauan ti kinapudno a naggapu ken Jehova. No kayattayo a maliklikan ti sipnget ken magna iti lawag ti Dios, nasken nga umimdengtayo iti amin a bilin ni Jesus ken surotentayo a naimbag ti ulidan ken pannursurona a nailanad iti Biblia.
5. Ania ti responsabilidad dagiti pasurot ni Jesus kalpasan ti ipapatayna?
5 Sumagmamano nga aldaw sakbay ti ipapatayna, dinakamat manen ni Jesus ti bagina kas ti silaw. Kinunana kadagiti adalanna: “Ti silaw agyanto iti tengngayo iti bassit pay a kanito. Magnakayo bayat nga adda kadakayo ti silaw, tapno saannakay a maringbawan ti sipnget; ket ti magna iti sipnget saanna nga ammo no sadino ti papananna. Bayat nga adda kadakayo ti silaw, watwatenyo ti pammati iti silaw, tapno agbalinkayo nga annak ti lawag.” (Juan 12:35, 36) Dagiti nagbalin nga annak ti lawag naadalda ti “pagtuladan iti makapasalun-at a sasao” a linaon ti Biblia. (2 Timoteo 1:13, 14) Babaen dagitoy a makapasalun-at a sasao, iturturongda iti lawag ti Dios dagiti nasingpet ti panagpuspusona a tattao nga adda iti sipnget.
6. Ania a napateg a kinapudno maipapan iti lawag ken sipnget ti masarakantayo iti 1 Juan 1:5?
6 Insurat ni apostol Juan: “Ti Dios ket silaw ken awan a pulos ti sipnget a naikaykaysa kenkuana.” (1 Juan 1:5) Imutektekanyo ti nagdumaan ti lawag ken ti sipnget. Namunganay ken Jehova ti naespirituan a lawag, ket awan ti pakainaigan ti Dios iti naespirituan a kinasipnget. Asino ngarud ti gubuayan ti kinasipnget?
Naespirituan a Kinasipnget—Ti Gubuayanna
7. Makinggapuanan ti naespirituan a kinasipnget iti lubong, ket kasano a mangim-impluensia?
7 Dinakamat ni apostol Pablo ti maipapan iti “dios daytoy a sistema ti bambanag.” Ni Satanas a Diablo ti tuktukoyenna. Kinunana a daytoy a dios “binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.” (2 Corinto 4:4) Adu ti agkuna a mamatida iti Dios; ngem umad-adu kadakuada ti saan a mamati iti Diablo. Apay? Narigatda ngamin a patien nga adda dakes ken nabilbileg ngem iti tao a mabalin a mangimpluensia iti panagpampanunotda. Kaskasdi, kas impakita ni Pablo, adda ti Diablo ket impluensiaanna ti tattao tapno dida makita ti lawag ti kinapudno. Ti pannakabalin ni Satanas a mangimpluensia iti pampanunot ti tao ket agminar iti naimpadtuan a pannakailadawanna kas “daydiay . . . mangyaw-awan iti intero a mapagnaedan a daga.” (Apocalipsis 12:9) Kas resulta dagiti aramid ni Satanas, ti kasasaad nga impadto ni propeta Isaias ket agaplikar ita iti intero a sangatauan, a saan a pakaibilangan dagidiay agserserbi ken Jehova: “Adtoy! ti met laeng sipnget abbongannanto ti daga, ken ti napuskol a daguyemyem abbonganna dagiti nasional a bunggoy.”—Isaias 60:2.
8. Ania dagiti wagas a mangipakita a nayaw-awan dagidiay adda iti naespirituan a kinasipnget?
8 Awan ti makita no nakasipsipnget. Nalaka ti maitawtaw wenno mayaw-awan. Umasping iti dayta, bulsek dagidiay adda iti naespirituan a kinasipnget ket di agbayag mayaw-awanda iti naespirituan. Didanto mailasin ti pudno iti ulbod, ti naimbag iti dakes. Dinakamat ni propeta Isaias dagidiay adda iti kasta a kinasipnget, idi insuratna: “Asi pay dagidiay agkunkuna a ti naimbag ket dakes ken ti dakes ket naimbag, dagidiay mangikabkabil iti sipnget maipaay ti lawag ken lawag maipaay ti sipnget, dagidiay mangikabkabil iti napait maipaay ti nasam-it ken nasam-it maipaay ti napait!” (Isaias 5:20) Dagidiay adda iti naespirituan a kinasipnget ket konkontrolen ti dios ti kinasipnget, ni Satanas a Diablo. Kas resultana, nayadayoda iti gubuayan ti lawag ken biag.—Efeso 4:17-19.
Ti Karit ti Panangpanaw iti Sipnget Agturong iti Lawag
9. Ilawlawagyo no kasano a dagiti managbasol nainaigda iti literal ken naespirituan a kinasipnget.
9 Ni matalek a Job impatuldona ti pakainaigan dagiti managbasol a tattao iti literal a kinasipnget idi kinunana: “No maipapan iti mata ti mannakikamalala, nagpadaan iti kinasipnget ti rabii, a kunkunana, ‘Awanto ti mata a makakita kaniak!’ Ket iti rupana mangikabil iti abbungot.” (Job 24:15) Adda met iti naespirituan a kinasipnget dagiti managbasol, ket mangparukma ti kasta a kinasipnget. Kinuna ni apostol Pablo a kadagidiay nasipngetan, gagangay kadakuada ti seksual nga imoralidad, panagtakaw, kinaagum, panagbartek, nalabes a ragragsak, ken panagkikil. Ngem mabalin nga agbalbaliw ti asinoman a malawagan iti Sao ti Dios. Iti suratna kadagiti taga Corinto, imbatad ni Pablo a posible ti kasta a panagbalbaliw. Adu a Kristiano sadi Corinto ti dati a naigamer kadagiti aramid ti kinasipnget, ngem kinuna kadakuada ni Pablo: “Ngem naugasankayon, ngem nasantipikarkayon, ngem naideklarakayon a nalinteg iti nagan ni Apotayo a Jesu-Kristo ken babaen iti espiritu ti Diostayo.”—1 Corinto 6:9-11.
10, 11. (a) Kasano nga impakita ni Jesus ti konsiderasionna iti bulsek a pinaimbagna? (b) Apay nga adu ti agkedked iti lawag?
10 No ti maysa a tao ket naggapu iti kasipngetan agturong iti lawag, saanna a dagus a maiperreng ti matana iti lawag. Idiay Betsaida, linuktan ni Jesus ti mata ti bulsek a lalaki ngem in-inut nga inaramidna dayta buyogen ti konsiderasion. “Kinibinna ti bulsek a tao, impanna iti ruar ti purok, ket, idi natupraanna dagiti matana, impatayna kenkuana dagiti imana ket rinugianna nga imtuoden kenkuana: ‘Adda kadi aniaman a makitam?’ Ket ti lalaki timmangwa ket rinugianna a kunaen: ‘Adda makitkitak a tattao, agsipud ta adda maim-imatangak a kasla kaykayo, ngem agpagnapagnada.’ Idin impatayna manen dagiti imana kadagiti mata ti lalaki, ket ti lalaki nakakita a silalawag, ket immimbag, ket silalawag a makitkitanan ti isuamin.” (Marcos 8:23-25) Agparang nga in-inut ti panangisubli ni Jesus iti panagkita ti lalaki tapno saan a mabigla ken masisirap. Mailadawantayo ti rag-ona idi makakitan.
11 Ngem no maidilig iti rag-o ti lalaki, naragragsak dagidiay natulongan a rimmuar nga in-inut manipud iti naespirituan a kinasipnget agturong iti lawag ti kinapudno. No imutektekantayo ti rag-oda, masdaawtayo no apay a manmano ti maatrakar iti lawag. Imbaga ni Jesus ti makagapu: “Daytoy ti pakaibatayan ti pannakaukom, a ti silaw immay iti lubong ngem dagiti tattao inayatda ti sipnget imbes a ti lawag, ta nadangkes dagiti aramidda. Ta ti mangyugali iti nakadakdakes a bambanag guraenna ti lawag ket saan nga umay iti lawag, tapno saan a matubngar dagiti aramidna.” (Juan 3:19, 20) Wen, adu ti agduyos nga agaramid iti “nakadakdakes a bambanag”—kas iti imoralidad, panangirurumen, panagulbod, panagsaur, ken panagtakaw—ket ti naespirituan a kinasipnget ti lubong ni Satanas ti maitutop unay a lugar a pangaramidanda iti kaykayatda.
Irarang-ay iti Lawag
12. Ania dagiti nagunggonatayo idi inawattayo ti lawag?
12 Sipud idi naammuantayo ti lawag, ania dagiti inaramidtayo a panagbalbaliw? No dadduma, nasayaat nga agmennamennatayo ket kitaen no ania dagiti naaramidantayo a naespirituan a panagrang-ay. Ania dagiti naiwaksitayo a dakes a kababalin? Ania dagiti parikuttayo iti biag a nasolbartayo? Kasano a nagbalbaliw dagiti planotayo iti masanguanan? Iti bileg ni Jehova ken iti tulong ti nasantuan nga espirituna, maitultuloytayo a baliwan ti personalidad ken panagpampanunottayo a mangipakita nga agtigtignaytayo maitunos iti lawag. (Efeso 4:23, 24) Kastoy ti panangikuna ni Pablo: “Idi naminsan sipngetkayo, ngem lawagkayo itan mainaig iti Apo. Itultuloyyo ti magna kas annak ti lawag, ta ti bunga ti lawag buklen ti tunggal kita ti kinaimbag ken kinalinteg ken kinapudno.” (Efeso 5:8, 9) No agpaiwanwantayo iti lawag ni Jehova, maaddaantayo iti namnama ken panggep, ken paragsakenna ti biag dagidiay adda iti aglikmuttayo. Ken anian a rag-o ti iyegna iti puso ni Jehova no aramidentayo ti kasta a panagbalbaliw!—Proverbio 27:11.
13. Kasano a maipakitatayo nga apresiarentayo ti lawag ni Jehova, ket ania ti makalikaguman tapno maaramid dayta?
13 Maipakitatayo nga apresiarentay ti nasagraptayo a naragragsak a biag no pagsilnagentayo ti lawag ni Jehova—nga iranud ti naadaltayo iti Biblia kadagiti kapamilia, gagayyem, ken kaarrubatayo. (Mateo 5:12-16; 24:14) Kadagidiay mangyaleng-aleng, agserbi a pakatubngaranda ti panangasabatayo agraman ti mapagwadan a panagbiagtayo kas Kristiano. Kuna ti Pablo: “Itultuloyyo a siguraduen no ania ti makaay-ayo iti Apo; ket isardengyo ti makiraman kadakuada iti di nabunga nga ar-aramid a kukua ti kinasipnget, ngem, imbes ketdi, tubngarenyo pay ket ida.” (Efeso 5:10, 11) Masapul a naturedtayo tapno matulongantayo ti sabsabali a pumanaw iti sipnget agturong iti lawag. Kangrunaan ti amin, masapul a maaddaantayo iti asi ken pannakaseknan iti sabsabali ken naimpusuan a tarigagay nga iranud kadakuada ti lawag ti kinapudno agpaay iti agnanayon a pagimbaganda.—Mateo 28:19, 20.
Agannadkayo Kadagiti Mangallilaw a Lawag!
14. No maipapan iti lawag, ania a pakdaar ti nasken nga ipangagtayo?
14 Kadagidiay adda iti baybay bayat ti kasipngetan, makabang-ar a makita ti aniaman a lawag. Kadagiti naglabas a panawen, mapasgedan dagiti apuy kadagiti rangkis ti Inglatera kas pagilasinan kadagiti mabalin a pagkamangan no adda bagyo. Dagiti tripolante apresiarenda dagitoy a silaw a mangiturong kadakuada iti natalged a sangladan. Ngem nairanta a mangallilaw ti dadduma a silaw. Imbes a makasarak iti sangladan, adu a barko ti narba gapu ta naiturongda kadagiti nabato nga aplaya, a sadiay a nasamsam dagiti kargamentoda. Iti daytoy makaallilaw a lubong, nasken nga agannadtayo a di maawis kadagiti palso a lawag a mangituggod kadatayo iti naespirituan a pannakadadael. Nabagaantayo: “Ni Satanas a mismo pagbalbalinenna ti bagina a kasla anghel ti lawag.” Kas kenkuana, “manangallilaw a trabahador” dagiti agserserbi kenkuana agraman dagiti apostata, a “pagbalbalinenda met ti bagbagida a kasla ministro ti kinalinteg.” No imdengantayo ti balinsuek a panagrasrasonda, mabalin a pakapuyenna ti panagtalektayo iti kinapudno ti Sao ni Jehova, ti Biblia, ket mapukaw ti pammatitayo.—2 Corinto 11:13-15; 1 Timoteo 1:19.
15. Ania ti tumulong kadatayo nga agtalinaed iti dalan nga agturong iti biag?
15 Insurat ti salmista: “Ti saom ket pagsilawan iti sakak, ken silaw iti danak.” (Salmo 119:105) Wen, ti ‘nailet a dalan nga agturong iti biag’ ket silsilawan ti naayat a Diostayo, ni Jehova, “a ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (Mateo 7:14; 1 Timoteo 2:4) Ti panangyaplikar kadagiti bilin ti Biblia saluadannatayo a maitawtaw iti nailet a dalan agturong iti dalan ti kinasipnget. Insurat ni Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:16) Bayat a rumangrang-aytayo iti naespirituan, isuronatayo ti Sao ti Dios. Babaen ti Biblia, matubngartayo ti bagitayo, ket no kasapulan, tubngarendatayo dagiti naayat a pastor iti kongregasion. Maysa pay, maaturtayo dagiti bambanag ken sipapakumbaba a maawattayo ti disiplina ti kinalinteg tapno makapagtalinaedtayo iti dalan ti biag.
Siyayaman a Magna iti Lawag
16. Kasano a maipakita ti apresasiontayo iti lawag a nagsayaat a probision ni Jehova?
16 Kasano a maipakita ti apresasiontayo iti lawag a nagsayaat a probision ni Jehova? Ibaga kadatayo ti Juan kapitulo 9 nga idi pinaimbag ni Jesus ti lalaki a nayanak a bulsek, natignay ti lalaki a mangyebkas iti panagyamanna. Kasano? Namati ken ni Jesus kas ti Anak ti Dios ken iyam-ammona iti publiko kas “maysa a mammadto.” Maysa pay, situtured a nagsao maibusor kadagidiay nangikagumaan a mangtagibassit iti milagro ni Jesus. (Juan 9:17, 30-34) Inawagan ni apostol Pedro dagiti napulotan a kameng ti kongregasion Kristiano kas “ili nga agpaay a naisangsangayan a sanikua.” Apay? Gapu ta umasping ti apresasionda iti lalaki a naipasngay a bulsek ken napaimbag. Ipakpakitada ti panagyamanda ken Jehova, ti Mangsussustener kadakuada, babaen ti ‘panangideklara a sisasaknap kadagiti kinatan-ok daydiay nangayab kadakuada manipud iti kinasipnget nga agturong iti nakaskasdaaw a lawagna.’ (1 Pedro 2:9; Colosas 1:13) Agyaman met dagidiay addaan iti naindagaan a namnama, ket supsuportaranda dagiti napulotan a kakabsatda iti panangideklara iti publiko ti “kinatan-ok” ni Jehova. Anian a nagpateg a pribilehio ti intalek ti Dios kadagiti imperpekto a tattao!
17, 18. (a) Ania ti annongen ti tunggal maysa? (b) Kas panangtulad ken Timoteo, ania ti naidagadag a liklikan ti amin a Kristiano?
17 Napateg ti naimpusuan a panangapresiar iti lawag ti kinapudno. Laglagipenyo nga awan kadatayo ti nayanak a makaammo iti kinapudno. Naadal dayta ti dadduma idi nataengandan, ket dagus a nakitada ti dakkel a nakaidumaan ti lawag iti kinasipnget. Dadduma ti naaddaan iti naindaklan a pribilehio a pinadakkel ti managbuteng-Dios a nagannak. Nalabit nalaka a matagilag-anda ti lawag. Maysa a Saksi, a datin nga agserserbi ken Jehova dagiti dadakkelna sakbay pay a naipasngay, ti nagkuna a kinasapulanna ti adu a tiempo ken panagregget tapno mabigbigna ti naan-anay a kaipapanan ken kinapateg ti kinapudno a naisuro kenkuana sipud kinamaladagana. (2 Timoteo 3:15) Ubing man wenno nataengan, nasken a sukayentayo ti nauneg a panangapresiar iti kinapudno nga impalgak ni Jehova.
18 Naisuro “ti nasantuan a sursurat” ken ni agtutubo a Timoteo sipud kinamaladagana, ngem sa laeng nagmataengan kas Kristiano idi pinagreggetanna ti ministeriona. (2 Timoteo 3:15) Gapuna, nakabalan a tumulong ken apostol Pablo, a nangidagadag kenkuana: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” Kas ken Timoteo, liklikantayo koma amin ti agaramid iti aniaman a mangibabain kadatayo—wenno panggapuan ni Jehova a mangibain kadatayo!—2 Timoteo 2:15.
19. (a) Kas ken David, adda rasontayo amin a mangikuna iti ania? (b) Ania ti usigentayo iti sumaruno nga artikulo?
19 Adda rasontayo a mangidayaw ken Jehova, a nangted kadatayo iti lawag ti kinapudnona. Maikunatayo ti kinuna ni Ari David: “Sika ti pagsilawak, O Jehova, ket ni Jehova ti mamagsilnag iti kinasipngetko.” (2 Samuel 22:29) Kaskasdi, ditay kayat ti agkompiansa unay, yantangay mabalin nga ituggodnatayo nga agsubli iti kasipngetan a nakaalawantayo. No kasta, tulongannatayo ti sumaruno nga artikulo a mangusig no kasano kapateg iti biagtayo ti nadiosan a kinapudno.
Ania ti Naadalyo?
• Kasano nga ipapaay ni Jehova ti naespirituan a pannakalawlawag?
• Ania a karit ti iyeg ti naespirituan a kinasipnget a nanglikmut kadatayo?
• Ania dagiti peggad a nasken a liklikantayo?
• Kasano a maipakita ti panagyamantayo iti lawag ti kinapudno?
[Ladawan iti panid 8]
Ni Jehova ti gubuayan ti pisikal ken naespirituan a lawag
[Ladawan iti panid 10]
Tulongannatayo ni Jesus a rummuar manipud iti naespirituan a kinasipnget, no kasano nga in-inut a pinaimbagna ti bulsek a lalaki
[Ladawan iti panid 11]
Madadael ti espiritualidadtayo no agpaallilawtayo kadagiti palso a silaw ni Satanas