“Ikasabam ti Sao” a Buyogen ti Kinaganat
1 No adda maawatyo a banag a namarkaan iti “URGENT,” nga iti Iloko, “NAGANAT,” kasanot’ panangmatmatyo iti dayta? Ti sao a “naganat” kaipapananna a “kasapulan ti madagdagus nga atension.” Maitutop ngarud ti imbilin ni apostol Pablo kadagiti Kristiano nga ‘ikasabada ti sao . . . a sigaganetget’ wenno “sigaganat” (“urgently” iti Ingles). (2 Tim. 4:2) Agtulnogkayo kadi babaen ti madagdagus a panangipaayyo iti atension iti daytoy a trabaho?
2 Mabalin a naipadamag ken Pablo a dadduma kadagiti kakabsatna ket addaan iti pagannayasan nga ‘agpallailang iti aramidda’ kas Kristiano. (Roma 12:11) Gapu iti daytoy, saan unay a naballigi dagiti trabahoda ken kurang ti rag-o a nagun-odda iti panangtulong kadagiti sabsabali.
3 Ti Panangmatmat ni Jesus iti Ministerio: Anian a ragsak ni Jesus a nangitungpal iti ministeriona! Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” Ti ulidan ni Jesus ti nangtignay kadagiti adalanna, ket pinaregtana ida babaen ti panangibagana kadakuada a ‘dagiti taltalon ket purawdan a maipaay iti pannakaani.’ (Juan 4:34, 35) Ti kinaganat nga impakitana iti intero a ministeriona ket nagminar idi imbagana kadagiti adalanna nga ‘ipakaasida iti Apo ti panagani a mangibaon kadagiti agobra iti panaganina.’ (Mat. 9:38) Nabigbig ni Jesus nga annongenna ti mangasaba, ket determinado a dina itulok nga adda aniaman a manglapped kenkuana a mangaramid iti dayta.
4 Datayo met Ngay? Ad-adda a naganat itatta ti agtultuloy a panangasabatayo. Iti adu a paset ti lubong, natangkenanen dagiti anien iti tay-ak. Uray kadagiti pagilian a kasla nakasabaanen a naan-anay, rinibu ti mababautisaran iti kada tawen. Bayat nga umad-adani ti panungpalan daytoy a sistema dagiti bambanag, ‘adu ti aramiden iti trabaho ti Apo.’ (1 Cor. 15:58) Ad-adda a kasapulan itatta nga ikagumaantayo nga iranud ti mensahe ti Pagarian kadagiti sabsabali.
5 Ganetgetantayo koma nga idanon ti naimbag a damag kadagiti sabsabali, iti binalaybalay ken iti sadinoman a pakasarakan kadagiti tattao iti teritoria. Babaen ti naan-anay a pannakiraman iti trabaho a panangasaba, nabatad nga ipakpakitatayo nga iyun-unatayo ti Pagarian iti biagtayo. (Mat. 6:33) Ti kinamatalektayo a mangikasaba iti sao a buyogen ti kinaganat ket mangyeg iti aglaplapusanan a rag-o.