Kualipikadokay Aya nga Agserbi?

“Ti pannakaan-anaymi agtaud iti Dios.”​—2 CORINTO 3:5.

1. Ti kongregasion Kristiano ket awan lugarna para kadagiti ania a kita ti tattao?

NI Jehova a Dios ken ni Jesu-Kristo ket tumatrabahoda. Kuna ni Jesus: “Ni Amak agingga ita agar-aramid, ket agar-aramidak met.” (Juan 5:17) Saan nga anamongan ti Dios dagiti tattao a madi nga agtrabaho; ket awan met ti anamongna kadagidiay agsapsapul ti responsabilidad tapno makagun-odda laeng ti pannakabalin kadagiti dadduma. Ti kongregasion Kristiano ket awanan lugar nga agpaay kadagiti sadut wenno agpaay kadagiti naagum nga ambisioso.​—Mateo 20:25-27; 2 Tesalonica 3:10.

2. Apay nga adda ita ti dakkel a panagkasapulan ti lallaki a mangibaklay kadagiti responsabilidad iti kongregasion Kristiano?

² Dagiti Saksi ni Jehova ket ‘aduanda iti aramid ti Apo,’ nangnangruna itatta ta nagadu a tattao ti agturturong “iti bantay” ti pudno a panagdaydayaw. (1 Corinto 15:58; Isaias 2:2-4) Adda dakkel a panagkasapulan kadagiti kualipikado iti naespirituan a lallaki a mangibaklay kadagiti responsabilidad iti kongregasion. Di tigtignayen ti inaagum nga ambision, dagita a lallaki itan-okda ni Jehova, saan a ti bagbagida. (Proverbio 8:13) Ammoda a ti Dios tulonganna ida a makakualipikar a maipaay kadagiti annongen ti kongregasion, kas ti ‘panangan-anayna kadagiti ministro ti baro a tulag.’​—2 Corinto 3:4-6.

3. Kangrunaanna, ania dagiti responsabilidad dagiti panglakayen ken ministerial nga ad-adipen?

³ Itatta, kas kadagidi immuna a Kristiano, madutdutokan dagiti lallaki babaen ti nasantuan nga espiritu ken babaen iti organisasional nga urnos ni Jehova tapno agserbi kas dagiti panglakayen ken ministerial nga ad-adipen. (Aramid 20:28; Filipos 1:1; Tito 1:5) Dagiti panglakayen ipastoranda iti naespirituan ti arban ti Dios, a mangipapaay ti makasalaknib a panangaywan. Isudat’ tultulongan dagiti ministerial nga ad-adipen, a ti annongenda ket saan a direkta a mangiraman iti naespirituan a panangaywan. (1 Pedro 5:2; idiligyo ti Aramid 6:1-6.) Kas iti Anak ti Dios, nga immay tapno agserbi, dagita a madutokan tarigagayanda a serbian dagiti kapammatianda. (Marcos 10:45) No maysakay a lalaki a Kristiano, addaankay aya iti dayta nga espiritu?

Dagiti Kangrunaan a Kualipikasion

4. Sadinot’ nangnangruna a pakakitaantayo ti listaan dagiti kualipikasion agpaay kadagidiay pakaitalkan ti responsabilidad iti kongregasion?

⁴ Nangnangruna nga imbinsabinsa ni apostol Pablo dagiti pagannurotan para kadagidiay nakaitalkan ti responsabilidad iti kongregasion idiay 1 Timoteo 3:1-10, 12, 13 ken Tito 1:5-9. Bayat ti panangusigtayo kadagitoy a kualipikasion, a dadduma mabalin nga agaplikar agpadpada kadagiti panglakayen ken ministerial nga ad-adipen, ditay koma ida matmatmatan sigun kadagiti nailubongan a pagannurotan. Imbes ketdi, rebbeng a matmatantayo ida iti umuna-siglo a kasasaadda ken kas iti agaplikar iti ili ni Jehova. Ti panangragpat kadagitoy a pagalagadan saanna a sapsapulen ti kinaperpekto, ta no kasta awanen tao a makakualipikar. (1 Juan 1:8) Ngem no maysakay a lalaki a Kristiano, addaankay man kadagiti annongen ti kongregasion wenno awanan pay, apay a dikay tingitingen dagiti personal a kualipikasionyo?

5. Aniat’ kayat a sawen ti awan pakapilawanna?

⁵ Awan pakapilawanna; adda naimbag a damagna kadagiti taga ruar; awan pakaakusaranna. (1 Timoteo 3:2, 7, 8, 10; Tito 1:6, 7) No nadutokanen ken bayat nga agserserbi, masapul a dagiti ministerial nga ad-adipen ken panglakayen awan komat’ pakapilawanda, kayatna a sawen, awan pakababalawanda ken awan aniaman a pakatubngaranda iti nainkalintegan a pakaakusaran ti dakes a kababalin wenno sursuro. Dagiti di pudno a darum nga ar-aramiden dagiti “sinan kakabsat” wenno dadduma pay saanna a pagbalinen nga adda pakapilawan ti maysa a tao. Tapno madiskualipikar ti maysa a lalaki manipud panagserbina iti kongregasion, masapul a ti darum saan a kadagiti awan kukuentana, ket masapul a daytat’ mapaneknekan maitunos kadagiti Nainkasuratan a pagannurotan. (2 Corinto 11:26; 1 Timoteo 5:19) Daydiay madutokan iti kongregasion “masapul pay nga adda naimbag a damagna kadagiti taga ruar, di la ket ta matnag iti pannakaibabain ken iti silo ti Diablo.” No ti maysa a lalaki nakaaramid ti serioso a basol kadagiti napalabas, isut’ madutokan laeng no nadalusannan ti naganna iti aniaman a pakaumsian ken nakaaramiden ti naimbag a nagan.

6. Kas isut’ asawa ti maymaysa a babai kaipapananna dayta ti ania?

⁶ Asawa ti maymaysa a babai. (1 Timoteo 3:2, 12; Tito 1:6) Di kayat a sawen daytoy a dagiti laeng kasado a lallaki ti agbalin kas ministerial nga ad-adipen ken panglakayen. No adda asawana, nupay kasta, masapul a ti lalaki addaan laeng ti maymaysa a sibibiag nga asawa ken isut’ matalek ken baketna. (Hebreo 13:4) Saan a kas kadagiti adu a di Kristiano a lallaki idi umuna a siglo, isut’ saan a mabalin nga agbalin a poligamo.a

7. (a) Ti kadi pisikal nga edad ti mangkualipikar ti maysa a lalaki kas panglakayen? (b) Aniat’ ramanen ti panangituray a naimbag iti sangakabbalayan?

⁷ Maysa a mangituray a naimbag ti balayna met laeng, nga iturayanna dagiti annakna. (1 Timoteo 3:4, 5, 12; Tito 1:6) Patien dagiti dadduma a dagiti panglakayen ket masapul a saanda koma a nakurkurang ngem 30 años, ngem ti Biblia saan a mangikedkeddeng ti kababaan nga edad. Kaskasdi, masapul a ti tao agtignay koma kas nataenganen a lalaki iti naespirituan a kaipapanan. Masapul a dagiti ministerial nga ad-adipen ken panglakayen umdas koma ti kalakaydan a maaddaanen ti annak. No adda asawana, saan a makakualipikar ti lalaki no agtigtignay iti nadiosan a pamay-an iti dadduma a luglugar ngem nauyong met idiay balayda. Masapul a nagun-odannan ti panagraem iti panangiturturayna ti sangakabbalayanna sigun kadagiti prinsipio ti Biblia, ket ti kalatna isu komat’ pannakaadda ti naespirituan a balligi iti tunggal miembro ti pamilia. Kas ti kaaduan a pagannurotan, ti panglakayen a maysan nga ama rebbeng a maaddaan koma kadagiti naimbag ti kababalinna a menor nga annak a “manamati.” Mabalin a rumangrang-ayda nga agturturong iti dedikasion iti Dios wenno bautisadodan kas Saksi ni Jehova. Ti lalaki a saan a makapabileg ti pammati kadagiti annakna saan met a makapabileg kadagiti dadduma.

8. Sakbay nga agbalin kas panglakayen ti maysa a lalaki a de pamilia, aniat’ masapul nga adalenna nga aramiden?

⁸ Sakbay a ti lalaki a de pamilia makapagbalin kas panglakayen a kabaelannat’ mangted ti naespirituan a panangaywan iti kongregasion, masapul nga adalenna pay nga umuna nga iturong ti mismo a sangakabbalayanna. ‘Ta no ti maysa a tao dina ammo ti mangurnos iti balayna met laeng, kasanonto ti panangaywanna iti kongregasion ti Dios?’ (1 Timoteo 3:5) Pudno, ti maysa a lalaki mabalin a busbusoren ni baketna. (Mateo 10:36; Lucas 12:52) Wenno mabalin a maysa kadagiti annakna ti makabasol ti nadagsen, ngem dagiti dadduma nasayaatda met iti naespirituan. Kaskasdi, no naaramidan ti lalaki ti amin a manamnama kenkuana, ken nangnangruna no addaan met naespirituan a balligi kadagiti dadduma iti sangakabbalayanna, ti panangilaksid iti nasayaat a panangiturongna babaen ti maysa a kameng ti pamilia ket saan nga isut’ nesesita a mangdiskualipikar kenkuana manipud panagbalinna a ministerial nga adipen wenno panglakayen.

9. Ania a panagannad ti masapul a watwaten ti panglakayen wenno ministerial nga adipen maipapan kadagiti inumen a de alkohol?

⁹ Saan a mannakikabil a mammartek wenno managinum ti adu nga arak. (1 Timoteo 3:3, 8; Tito 1:7) Ti ministerial nga adipen wenno panglakayen masapul a saan a managlablabes kadagiti inumen a de alkohol. Ti pannakaadikto kadagita mabalin a mangibunga ti pannakapukaw ti panangtengngelnat’ pampanunotna ken emosionna, nga agturong iti nabartek a pannakikabil wenno pannakiriri. Isut’ saan koma a ‘managinum ti adu nga arak’ wenno addaan pakasarsaritaan kas nairuamen wenno aglablabes a managinum. (Proverbio 23:20, 21, 29-35) Anian a nakalkaldaang no ti maysa nga ibibisita a panangpastor ket madadael gapu iti sobra a panaginum! No uminum latta ti kabsat, dina koma ar-aramiden dayta no makiramraman iti panaggigimong, iti ministerio, wenno iti dadduma pay a sagrado a serbisio.​—Levitico 10:8-11; Ezequiel 44:21.

10. Apay a dagiti managayat ti pirak ken naagum iti naalas a masapulan saanda a kualpikado nga agbalin kas papanglakayen wenno ministerial nga ad-adipen?

¹⁰ Saan a managayat iti pirak wenno naagum iti naalas a masapulan. (1 Timoteo 3:3, 8; Tito 1:7) Dagiti managayat ti pirak addada iti naespirituan a kinapeggad, ket dagiti “tattao a naagum” saandanto a tawiden ti Pagarian ti Dios. Gapuna, saan a makakualipikar dagita a tattao kas panglakayen wenno ministerial nga ad-adipen. (1 Corinto 6:9, 10; 1 Timoteo 6:9, 10) Ti namunganayan a sao iti Griego a naipatarus kas “naalas” kangrunaanna a kayatna a sawen “nakababain,” ket daydiay termino a naipatarus a “masapulan” tuktukoyenna ti aniaman a ganansia wenno bentaha. (Filipos 1:21; 3:4-8) Siempre, ti lalaki a ti pakinakemna ipamatmatna a tratuenna dagiti “karnero” ti Dios a sikukusit wenno naalas ket saan a kualipikado a maipaay iti responsabilidad ti kongregasion. (Ezequiel 34:7-10; Aramid 20:33-35; Judas 16) Ti pannakasapul ti panagannad iti panagirekomendar ket dumakkel no maawatantayo a ti maysa a lalaki, apaman a madutokan, mabalin nga isut’ pakaitalkan kadagiti pundo a kuarta ket mabalin a masulisog a mangtakaw ti dadduma iti dayta a kuarta.​—Juan 12:4-6.

11. Apay a ti “baro iti sursuro” saan a mairekomendar iti responsabilidad ti kongregasion?

¹¹ Saan a baro iti sursuro; nasuotda nga umuna. (1 Timoteo 3:6, 10) Ti kababautisar pay laeng a tao ket di pay naaddaan tiempo a mangpaneknek a simamatalek nga aywanannanto dagiti naituding nga annongenna. Mabalin nga agkurang ti simpatia kadagiti addaan an-anayen wenno agkurang iti kasapulan a kinasirib a tumulong kadagiti padana a managdaydayaw ken mabalin pay ketdi nga ipababana dagiti dadduma. Sakbay ti pannakairekomendarna kas ministerial nga ad-adipen ken nangnangruna kas panglakayen, ngarud, masapul a ti maysa a lalaki “masuot nga umuna” ken rebbeng a mangted ebidensia ti nasayaat a pangngeddengna ken kinamapagtalkanna. Awan ti naikeddeng a tiempo a maited agpaay iti daytoy a panangsuot, ken agduduma ti kinapartak dagiti indibidual iti naespirituan a panagdakkel. Ngem dagiti panglakayen saanda koma a nadaras a mangirekomendar ti kabbaro “di la ket ta agtangsit ket matnag iti pannakadusa ti Diablo.” Bay-an a ti lalaki mangiparangarang nga umuna ti kas ken Kristo a kinapakumbaba.​—Filipos 2:5-8.

Panangiturong ti Atension kadagiti Ministerial nga Ad-adipen

12. Dagiti kadi pagannurotan a nailista agpaay kadagiti ministerial nga ad-adipen ket agpaay laeng kadakuada a ragpaten?

¹² Sumagmamano met a pagalagadan ti nailista agpaay kadagiti ministerial nga ad-adipen. Ngem, no dagita a pagalagadan ket di met naragpat dagiti panglakayen, saanda a kualipikado nga agserbi. Kas Kristiano a lalaki, makakualipikarkay aya kadagitoy?

13. Aniat’ kaipapanan ti panagbalin a serioso?

¹³ Nataknengda. (1 Timoteo 3:8) Ti lalaki a makakualipikar nga agserbi kas ministerial nga adipen rebbeng a saanna a laglag-anen ti responsabilidad. Rebbeng nga agtignay iti nadayaw a pamay-an nga isut’ pagraemanda. Nupay ti sagpaminsan a panagpakatawa ket maakseptar, isut’ saan a kualipikado no kanayon nga agtigtignay kas bulbullagaw.

14. (a) Ti saan a dua ti dilana ket addaan ania a kaipapanan? (b) Ti kaaddat’ nadalus a konsiensia sapulenna ti ania?

¹⁴ Saan a dua ti dilada; addaan nadalus a konsiensia. (1 Timoteo 3:8, 9) Dagiti ministerial nga ad-adipen (ken dagiti panglakayen) masapul a napudnoda, saanda a manangidanondanon wenno manangallilaw. Gapu ta saan koma a duat’ dilada, rebbeng a saanda a managinsisingpet a mangibaga ti maysa a banag iti maysa a tao ket ti kasunganina iti sabali. (Proverbio 3:32; Santiago 3:17) Masapul a dagitoy a lalaki napeklanda a manangsuportar kadagiti naipanayagen a kinapudno, “a kupikupanda ti nasantuan a palimed ti pammati a buyogen ti nadalus a konsiensia.” Iti imatang ti Dios, ti kasta a konsiensia ti tao ket rebbeng a mangpaneknek nga isut’ nalinteg ket saan nga agar-aramid ti aniaman a sinisikap wenno makatulaw. (Roma 9:1; 2 Corinto 1:12; 4:2; 7:1) Awan kualipikado nga agserbi iti arban ti Dios malaksid no kumpet iti kinapudno ken kadagiti nadiosan a prinsipio.

Panangipokus kadagiti Kualipikasion dagiti Panglakayen

15. Makinkualipikasion itatta ti masukimat, ket aniat’ nangnangruna a ramanen dagitoy?

¹⁵ Dadduma kadagiti kualipikasion agaplikarda a nangnangruna kadagiti panglakayen ken mainaig a nangnangruna iti obrada kas papastor ken mannursuro. Kas Kristiano a lalaki, maragragpatyo met laeng aya dagitoy a pagalagadan?

16. (a) Aniat’ sapulen ti panagbalin a natimbeng iti ug-ugali wenno managparbeng? (b) Kasano a masalimetmetan ti panglakayen ti panagteppel?

¹⁶ Managparbeng; managteppel. (1 Timoteo 3:2; Tito 1:8) Ti panglakayen rebbeng a natanang, saan a pinaadipen kadagiti dakes a kababalin. No naipasango kadagiti suot, ti Dios ti tumulong kenkuana a mangtaginayon ti kinatimbeng no agkararag kas inaramid ti salmista: “Dagiti dandanag toy pusok dimmakkelda; ay alawennak kadi kadagiti pakarigatak.” (Salmo 25:17) Ti manangaywan ikararagna met koma ti espiritu ti Dios ken iparangarangna ti bungana, agraman panagteppel. (Lucas 11:13; Galacia 5:22, 23) Ti panangmedmed iti pampanunot, sasao, ken tigtignay makatulong iti panglakayen a mangliklik iti panaglablabes bayat ti panangipapaayna ti naespirituan a panangiwanwan iti kongregasion.

17. Aniat’ ramanen ti panagbalin a nasayaat ti riknana?

¹⁷ Nasayaat ti riknana. (1 Timoteo 3:2) Ti panglakayen masapul a nainkalintegan, masirib, ken naannad. Rebbeng nga isut’ napinget ken nalawag ti sasao ken tigtignayna. Ti napakumbaba, natimbeng a panagpampanunotna naibatay iti nadiosan a kinasirib ken iti nasalun-at a sursuro ti Sao ni Jehova, a rebbeng nga isu komat’ naanep nga estudiante iti dayta.​—Roma 12:3; Tito 2:1.

18. Ti panagbalin a naurnos sapulennat’ ania iti maysa a panglakayen?

¹⁸ Naurnos. (1 Timoteo 3:2) Ti sao a Griego a nausar ditoy ket naipatarus a “nanakman” idiay 1 Timoteo 2:9. Gapuna ti panglakayen rebbeng nga addaan disente, nanakman a padron ti panagbiag. Kas pangarigan, rebbeng nga isut’ managsapsapa. Dagidi umuna-siglo a Kristiano nalabit saanda a pinagbalin a dakkel a punto ti panangsalimetmet kadagiti rekord, ket ti manangaywan itatta di kasapulan nga agbalin nga eksperto nga accountant wenno clerk. Mabalin a dagiti ministerial nga ad-adipen ti mangaywan kadagiti bambanag a kasapulan kadagitoy a bambanag. Ngem ti termino a Griego para iti “naurnos” mabalin nga ipasimudaagna ti naimbag a kababalin, ket sigurado a ti lalaki saan a makakualipikar kas panglakayen no isu ket simaron wenno nagulo.​—1 Tesalonica 5:14; 2 Tesalonica 3:6-12; Tito 1:10.

19. Gapu ta isut’ managpadagus, aniat’ masapul nga aramiden ti panglakayen?

¹⁹ Managpadagus. (1 Timoteo 3:2; Tito 1:8) Ti panglakayen ‘surotenna ti dalan ti kinamanagpadagus.’ (Roma 12:13; Hebreo 13:2) Ti sao a Griego para iti “managpadagus” literal a kaipapanannat’ “naayat kadagiti ganggannaet.” Gapuna, ti panglakayen a managpadagus abrasaenna dagiti kabbaro iti Nakristianuan a panaggigimong, a mangipakpakita ti isu met laeng nga interes kadagiti napanglaw kas ar-aramidenna kadagiti narang-ay iti material. Isut’ managpadagus kadagidiay agdaldaliasat iti paginteresan ti Kinakristiano ket sana palubosan ida a mapanen iti dalanda “a maikari iti Dios.” (3 Juan 5-8) Pudno unay, ipakita ti panglakayen ti kinamanagpadagus nangnangruna kadagiti kapammatianna sigun iti kasapulanda ken kas ipalubos dagiti sirkumstansiana.​—Santiago 2:14-17.

20. Kadagiti ania a pamay-an a masapul a ti panglakayen ket kualipikado a mangisuro?

²⁰ Kualipikado a mangisuro. (1 Timoteo 3:2) Ti abilidad ti panglakayen kas naespirituan a mannursuro ket saan a bunga ti kinalaing ti panunot wenno nailubongan a kinasirib. (1 Corinto 2:1-5, 13) Daytat’ sumangbay gapu ta “salimetmetanna a sititibker ti sao a napudno isu a mayannugot iti arte [wenno, wagas ti] panangisuro, tapno iti kasta mabalinna ti mamalbalakad babaen ti nadalus a sursuro ken tapno mauyotanna dagiti sumuppiat.” (Tito 1:9; idiligyo ti Aramid 20:18-21, 26, 27.) Kabaelanna koma ‘ti mamatigmaan a sieemma kadagiti sumalungasing.’ (2 Timoteo 2:23-26) Uray no ti panglakayen ket saan nga isut’ kasayaatan a pumapalawag ti publiko iti kongregasion, rebbeng koma nga isut’ nasayaat nga estudiante ti Sao ti Dios nga isut’ nalaing a mangisuro ken mangbalakad kadagiti manamati, nga agad-adal met ti Biblia. (2 Corinto 11:6) Masapul nga isut’ makakualipikar a mangipaay ti “nasayaat a sursuro” a makatulong kadagiti pamilia ken indibidual a mangsurot ti nadiosan a panagbiag.​—Tito 2:1-10.

21. (a) Apay a maikuna a ti panglakayen saan a mannakikabil? (b) Aniat’ kaipapanan ti panagbalin a naimbag ti awidna wenno rasonable? (c) Ti saan a mannakiringgor kaipapananna ti ania?

²¹ Saan a mannakikabil, no di ket naimbag ti awidna, saan a mannakiringgor. (1 Timoteo 3:3; Tito 1:7) Iti panagbalin a natalna, ti panglakayen saanna a kabilen a pisikal dagiti tattao wenno saktan ida babaen kadagiti abusado wenno makasugat a sasao. (Idiligyo ti 2 Corinto 11:20.) (Ti napalabas a komento nga isut’ “saan a mannakikabil a mammartek” ipakpakitana a liklikanna ti panangabuso ti alkohol a masansan mangiturong iti gulo.) Gapu ta “naimbag ti awidna” wenno “rasonable” (wenno, “manangpabus-ay”), saan nga autoritariano ken narigat nga ay-ayuen, saanna a pagbalinen a dakkel nga isyu dagiti babassit a bambanag. (1 Corinto 9:12; Filipos 4:5; 1 Pedro 2:18) Yantangay ti panglakayen ket saan a mannakiringgor, wenno mannakiapa, liklikanna dagiti riri ken “narigat nga agunget.”​—Tito 3:2; Santiago 1:19, 20.

22. Aniat’ ipamatmat ti kinapudno a ti panglakayen masapul a saan a napalangguad?

²² Saan a napalangguad. (Tito 1:7) Iti literal, kaipapanan daytoy ti “saan a panangpagpagusto ti bagina.” (Idiligyo ti 2 Pedro 2:10.) Masapul a ti panglakayen ket saan a dogmatiko no di ket maaddaan koma ti napakumbaba a panangmatmat kadagiti abilidadna. Gapu ta saanna a pampanunoten a nasaysayaat ti panangtamingna kadagiti bambanag ngem iti dadduma, sipapakumbaba nga iranudna ti responsabilidadna kadagiti dadduma ken ipatpategna ti adu a mamalbalakad.​—Numeros 11:26-29; Proverbio 11:14; Roma 12:3, 16.

23. (a) Kasanoyo a depinaren ti “managayat ti kinaimbag”? (b) Ti panagbalin a nalinteg kaipapananna ti ania?

²³ Naayat iti naimbag; nalinteg. (Tito 1:8) Tapno makakualipikar kas panglakayen, masapul a ti tao ayatenna ti kinaimbag ken agbalin a nalinteg. Ti managayat ti kinaimbag ayatenna no aniat’ naimbag iti imatang ni Jehova, agaramid kadagiti kaasi ken makatulong nga ar-aramid, ken ipakitanat’ panangapresiarna iti kinaimbag dagiti dadduma. (Lucas 6:35; idiligyo ti Aramid 9:36, 39; 1 Timoteo 5:9, 10.) Ti panagbalin a nalinteg kaipapananna ti pannakikumporme iti linlinteg ken pagannurotan ti Dios. Mainayon kadagiti dadduma pay a bambanag, ti kasta a lalaki ket saan a manangidumduma ken salimetmetanna ti nalinteg, nadalus, ken natakneng a bambanag iti isipna. (Lucas 1:6; Filipos 4:8, 9; Santiago 2:1-9) Yantangay ti kinaimbag ket naigiddiat iti kinalinteg gapu ta labsanna ti kalkalikaguman ti kinahustisia, ti managayat ti kinaimbag ad-adut’ aramidenna nga agpaay kadagiti dadduma ngem ti makalikaguman kenkuana.​—Mateo 20:4, 13-15; Roma 5:7.

24. Ti kinasungdo kalikagumanna ti ania?

²⁴ Nasungdo. (Tito 1:8) Ti lalaki a kualipikado nga agbalin a panglakayen taginayonenna ti di maisin a debosion iti Dios ken kumpet iti nadiosan a linteg, agpapan pay kasanot’ pannakasuot ti kinatarnawna. Aramidenna ti namnamaen ni Jehova kenkuana, ket daytoy ramanenna ti panagserbina kas matalek a manangiwaragawag ti Pagarian.​—Mateo 24:14; Lucas 1:74, 75; Aramid 5:29; 1 Tesalonica 2:10.

Pannakaragpat kadagiti Kualipikasion

25. Dagiti kasalsalaysay a kualipikasion ket makalikaguman kadagiti siasino, ken kasano a maragpat dagita a kualipikasion?

²⁵ Kaaduan kadagiti kualipikasion a kaisalsalaysay ramanenna dagiti bambanag a kasapulan iti tunggal Saksi ni Jehova ket isudat’ magun-odan babaen ti bendision ti Dios iti panagadal, panagregget, nasayaat a pannakitimtimpuyog, ken karkararag ti tunggal maysa. Dagiti indibidual mabalin a napigpigsada kadagiti dadduma a kualipikasion ngem kadagiti dadduma. Ngem iti nainkalintegan a rukodna, masapul a dagiti ministerial nga ad-adipen ken panglakayen ragpatenda koma amin dagiti pagannurotan a maipaay iti masinunuo a pribilehioda.

26. Apay a dagiti lallaki a Kristiano ipaayda ti bagbagida a maipaay kadgiti responsabilidad ti kongregasion?

²⁶ Amin dagiti Saksi ni Jehova rebbeng a tarigagayanda koma nga aramiden ti isuamin a mabalin iti serbisio ti Dios. Daytoy nga espiritu tignayenna dagiti Kristiano a lallaki a mangipaay ti bagbagida a maipaay iti responsabilidad ti kongregasion. Maysakay aya a dedikado, bautisado a lalaki? No wen, gumaw-atkayo ket aramidenyo amin a panagregget tapno makakualipikar nga agserbi!

[Dagiti Footnote]

Kasano ti Panangsungbatyo?

◻ Apay nga addat’ dakkel a panagkasapulan kadagiti bautisado a lallaki a mangakseptar kadagiti responsabilidad iti kongregasion?

◻ Aniat’ sumagmamano kadagiti kualipikasion a masapul a maragpat dagiti ministerial nga ad-adipen?

◻ Aniat’ sumagmamano kadagiti pagannurotan a masapul maragpat dagiti panglakayen?

◻ Apay a ti panglakayen masapul nga ammuenna no kasanot’ panangituray iti mismo a sangakabbalayanna?

◻ Aniat’ mangtignay kadagiti lallaki a Kristiano a mangipaay ti bagbagida kadagiti annongen ti kongregasion?

[Ladawan iti panid 24, 25]

Rebbeng a dagiti panglakayen ken ministerial nga ad-adipen iturayanda a naimbag dagiti sangakabbalayanda sigun kadagiti prinsipio ti Biblia