Napudno a Konsiensia

BAYAT ti panagawidna manipud iti trabaho, napukawan iti cell phone ni Charles, maysa nga empleado iti unibersidad idiay Kenya. Nangina pay laeng ti kastoy nga alikamen idiay Kenya.

“Diak ninamnama nga adda mangisubli iti dayta,” kinuna ni Charles. Ngem sumagmamano nga aldaw kalpasanna, nasorpresa idi teleponuan ti sanga nga opisina dagiti Saksi ni Jehova idiay Kenya. Narigatna a patien idi makiddaw nga apanna alaen ti napukawna a cell phone! Naammuanna a maysa nga amin-tiempo a ministro dagiti Saksi ni Jehova ti nakalugananna ken nakapidut iti nabatina a cell phone iti lugan. Iti panangikagumaanna a mangsapul iti makinkukua, ti ministro impanna ti cell phone iti sanga nga opisina, ket dagiti boluntario nga agtartrabaho sadiay natuntonda ni Charles babaen ti numero iti cell phone.

“Apresiarek unay ti panangikarigatanyo a mangsapul kaniak nupay narigat,” kinuna ni Charles iti maysa a suratna iti sanga nga opisina. “Sipapasnek a pagyamanak dagiti miembro ti organisasionyo a nakasarak iti cell phone, a nangtunton kaniak tapno maalak dayta. Kadagitoy a tiempo, saan a nalaka ti makasarak iti napudno a tao, ngem makaparegta nga addaantayo kadagiti sumagmamano nga agbibiag kas pudno a Saksi ni Jehova a Dios.”

Agdindinamag dagiti Saksi ni Jehova iti sadinoman gapu iti panagbalinda a napudno. Tultuladenda ni apostol Pablo, a nagkuna: “Agtalekkami nga addaankami iti napudno a konsiensia, yantangay kayatmi ti agbiag a mapagtalkan iti amin a bambanag.” (Hebreo 13:18; 1 Corinto 11:1) Ammoda a pakaidayawan ni Jehova a Dios ti kasta a kababalin, kas iti kinuna ni Jesus: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.”​—Mateo 5:16.