‘Ngem Diak Ayaten ni Jehova!’
NI Bob bassit pay la nga ubing idi ni nanangna nagbalin a Saksi ni Jehova. Kadagiti adu a tawen, isut’ inkuyogna idiay Kingdom Hall ken uray pay iti panangasaba a trabaho, nupay di pay nabautisaran. Idi nagtengannan ti arinunos ti kinatin-edyerna, nupay kasta, simmardeng a makitimtimpuyog kadagiti Saksi ni Jehova. Naisagmak kadagiti agsasagadsad a dakes a kasasaad, pinerdina ti biagna. Nupay kaskasdi nga akuenna a patienna pay laeng dagiti adu a naadalna manipud iti Biblia, di umdas daytoy a mamagtarigagay kenkuana nga agsubli iti organisasion ni Jehova. Apay a kastat’ panagrikna ni Bob?
Usigenyo ti sabali nga ehemplo. Ni David ket maysa nga amin-tiempo a ministro iti adun a tawtawen. Kadarato, umapay iti isipna dagiti panagduadua kadagiti dadduma a sursuro ti Biblia. Ngem kanayonna a masolbar dagiti problema babaen iti panangikalinteganna a kas iti panangsolbar iti jigsaw puzzle, ti maysa saan a sumuko gapu laeng ta ti maysa wenno dua a piesa saanda a maibagay iti damo. Isut’ mapnek nga aguray ken Jehova maipaay iti ad-adda a panangilawlawag. Ngem idi agangay, inako ni David a saannan a mapnek ti bagina iti dayta a pamay-an. Inlusulosna ti bagina manipud kadagiti pribilehiona iti serbisio, di nagbayag pinanawanna ti kinapudno. Aniat’ makagapu iti panagbalbaliw ti pampanunotna?
Sigurado, makapasennaay a makita dagidiay ing-ingungotentayo a sumuko iti lumba a maipaay iti biag. Di pagduaduaan, kayattay nga aramiden ti amin a kabaelentayo tapno matulongan ida (2 Corinto 12:15; Galacia 5:7) Ngem ania a talaga ti makagapu iti iyiikay ti maysa a tao manipud iti kinapudno? Aniat’ maaramidan tapno matulongan ti kasta nga indibidual tapno sumubli iti lumba? Ket aniat’ masapul nga aramiden ti maysa no mangrugi a tumanor dagita a pagannayasan iti bagina?
Puso, Konsiensia, ken Pammati
Adda maysa a nakadidillaw a banag maipapan kadagidiay nangilusulos iti kinapudno. Kaaduan kadakuada dida aramiden dayta gapu iti saandan a panamati iti kinapudno. Iti kasumbangirna ketdi, adu kadakuada ti agkuna, “Ammok a daytoy ti kinapudno, ngem . . . ” wenno, “No adda man ti kinapudno, ammok nga isu daytoyen.” Iti kaunggan ti puspusoda, adu kadakuada patienda pay laeng a ti naadalda manipud iti Biblia ket isut’ kinapudno. Ngem nupay kasta kimmapuyda ket napukaw ti regtada. Ni Santiago kunana: “Ti pammati nga awan ar-aramidna natay.”—Santiago 2:26.
Ti pudno a pammati iramanna ti ad-adda pay ngem basta pannakaadda iti pannakaammo wenno panamati a pudno ti maysa a banag. Imbes a basta panagtignay laeng iti panunot, ti pammati iramanna ti piguratibo a puso, ta ti Biblia kunana: “Ta buyogen ti puso no mamati ti tao tapno makagun-od iti kinalinteg.” (Roma 10:10) Nainkalintegan, ngarud, ti Biblia itudona ti puso kas gubuayan ti problema no ti maysa a tao mangrugin nga umikay. Kas impakdaar ni Pablo: “Kitaenyo ngarud, kakabsat, di la ket ta addanto iti siasinoman kadakayo ti maysa a puso a dakes a saan a mamati nga umadayo iti Dios a sibibiag.”—Hebreo 3:12.
Maipaay iti ebidensia a ti puso ket dakkel pannakairamanna, dumngegtayo ken ni Diane, nga isut’ immikay. Idi isut’ kinalikaguman a tulongan dagiti padana a Kristiano, prangko a simmungbat, “Diak mabalin ti agsubli ken Jehova. Diak ay-ayaten isuna!” Ammona a ti kakaisuna laeng a makatulong kenkuana nga agtalinaed a nasinged ken Jehova a Dios ket isut’ ayat para kenkuana kas maysa a Persona ken kas Daydiay maikari iti debosionna. Kinapudnona, daytoy a klase ti ayat ti nangtignay kenkuana a mangidedikar iti biagna ken Jehova idi damona. Ngem nupay kasta awanen ti mariknana a kasta nga ayat. No awan dayta, ammona a basta sumursurotto laeng no aniat’ aramiden no isut’ agsubli. Ngem kasano a mapukaw ti maysa ti ayatna a dati nakaun-uneg ti pannakairamutna?
Bueno, dinakamat ni Pablo ti “dakes a puso nga agkurang iti pammati.” Iti sumagmamano a kaso, ti kasta a kinakurang iti pammati dumteng babaen iti panangipalubos iti puso a mangtarigagay iti iparit ni Jehova a Dios wenno panangbusor iti maysa a banag nga ibilinna. Iti kasta ti puso mabingbingay ket saanen a naan-anay a maipaay ken Jehova. Kalpasanna, iti pannakarikna a ti tigtignay ti maysa ket saanen nga anamongan ti Dios, ti nalaka a pamay-an tapno maliklikan ti ad-adda pay a panagsinnuppiat isut’ ‘iyaadayo manipud iti pudno a Dios.’ (Idiligyo iti Genesis 3:8-10.) Imbes nga agbabawi, ti “dakes a puso” tignayenna ti maysa tapno ikkatenna ni Jehova ken ti panggepna manipud iti biagna. Ti awanan-pammati a tao ngarud isukona ti kinapudno.
Iti dadduma a kaso, imbes nga agsagaba iti pannakaburibor ti konsiensia gapu iti maysa a kurso, ti maysa palubosanna ti pusona a sigugulib a mangtignay kenkuana a sumapul iti nainsiriban a pangliklikan babaen iti panagduadua, pammabasol, wenno uray pay apostasia. No makumbinsirna ti bagina a ti sibubukel a pamunganayan ti pammatina ket kamali, dinanton marikna ti obligasion nga agbiag iti sidongna. Dagita nga indibidual iwalinda ti nasayaat a konsiensia ket ‘sagrapenda ti pannakarba ti pammatida.’—1 Timoteo 1:19.
Siempre, mabalin nga isuko ti maysa a tao ti kinapudno gapu iti dadduma a rason. Ngem aniaman ti gapuna, ngangngani napamaysa nga iramanna ti puso. Gapu itoy a rason, pudno a naintiempuan ti balakad nga: “Igagam ta pusom iti amin a regtam, ta aggapu kenkuana dagiti gubuayan ti biag.”—Proverbio 4:23.
Posible ti Yiimbag
Ti panangadmitir a dagiti bukodtayo a dakes a pagannayasan isudat’ ramut ti pannakapukaw ti pammati ket kasapulanna ti kinatured. Ngem ti panangaramid iti dayta isut’ umuna nga addang iti panangikagumaantayo a sumubli iti natibker a relasiontayo ken Jehova. Ti kapadasan ni Steve, maysa a payunir idiay Inglatera, iyilustrarna daytoy a punto.
Nupay no ni Steve saan a pimmanaw iti kinapudno, iti maysa a punto nangrugi a nariknana ti kinaongaong ken kinaawan natibker a pammati. No mangasaba kadagiti dadduma, dagiti sasaona ket saan a makapainteres a mismo iti lapayagna. No ni Steve ket adda kadagiti naespirituan a kakabsatna a babbai ken lallaki, mariknana nga isut’ maiwalwalin, a kasla isut’ saan a maysa kadakuada.
Nasayaat ta ni Steve, nabigbigna a ti problema ket adda kenkuana. “Diak nagbiddut a mangiputputong iti bagik tapno panunotek dagiti bambanag, a kasla kettay adda gubuayan iti panangipaltiing iti imperpekto a lasag a mangipaay kadgiti umiso a sungbat,” linagip ni Steve. (Idiligyo ti Roma 7:18.) Imbes ketdi, nabigbigna a masapul a sukisokenna ti pusona ket ikkatenna dagiti makaallilaw a tarigagay a mangituggod iti isisiasi iti kinapudno. Manipud iti mismo a pundasion, inkagumaanna a patibkeren manen ti relasionna iti Dios ken ti pammatina iti Saona. Itatta, siraragsak nga agserserbin ni Steve a kas misionero.
No Kasano a Makatulong dagiti Dadduma
Saan a tunggal maysa a nakapukaw wenno makapukpukawen iti panangpetpetna iti kinapudno ket makitana dagiti banag a kas iti kinalawagna ken ni Steve. Kinapudnona, masansan a daytoy kinaawan ti nalawag a panangmatmat iti naespirituan ti mangiturong iti kamaudianan a pannakaabak. Ditoy a makaipaay ti tulong dagiti pada a Kristiano. (Roma 15:1; Galacia 6:1) Ngem kasano ti kasayaatan a panangaramid itoy?
Nalawag, di umdas ti panangawis wenno panangpabileg kadagita nga agsubli. Kasapulan a mailasin ken maikkat dagiti lapped. Masapul a dagiti panagregget maaramidda a mangkayaw iti puso ti kimmapuy wenno inaktibo nga indibidual. Prangko, ngem naasi, ti puso-iti-puso a pannakisarita mabalin a makatulong iti indibidual. Ti panagusar iti kasuratan a kas iti 1 Timoteo 1:19, Hebreo 3:12, ken Jeremias 17:9, 10 ti mabalin a makatulong kenkuana a mangsukisok iti kaunggan ti pusona ket kitaen no ania ti makagapu kenkuana nga ‘umadayo manipud iti pudno a Dios.’
Apaman a nailasinen dagiti makagapu, masapul nga ipamaysa dagiti panagregget iti panangtaming kadakuada. Ti masaksakit a pisikal a puso kasapulanna ti panangaywan ken nalabit naut-ot a pannakaopera tapno agbiag ti pasiente. Umasping dayta iti masaksakit a piguratibo a puso. Dagiti di umiso a tarigagay, pagannayasan nga agwaywayas, wenno dadduma pay a banag a makaigapu iti puso nga agsukir ket masapul a maikkat tapno agbalin manen a sensitibo. Dagiti aktibo a Kristiano nasayaat no makipagkararagda iti inaktibo a tao, uray pay makipagadal iti Biblia kenkuana no ibilang dagiti panglakayen a daytat’ nasken. Babaen laeng kadagita a pamay-an a mabiag manen ti puso ket ti indibidual ayatenna manen ni Jehova.—Proverbio 2:1-5.
Pudno daytoy iti kaso ni Diane. Ti pannakisarita kadagiti nataengan a Kristiano ti nakatulong kenkuana a makabigbig no aniat’ masapul nga aramidenna tapno mapasged manen ti ayatna ken Jehova. Iti pannakabigbigna a kasapulan nga am-ammuenna manen a nasinged ni Jehova, inakseptar ni Diane ti tulong a naipaay. Kalpasan ti panagadal iti Biblia iti agarup maysa a tawen, isu ken ti asawana nagbalinda manen nga aktibo a managdaydayaw ken Jehova.
Yantangay ti ayat iramanna ti panagtignay, masansan a ti panangaramid iti ibaga ni Jehova ken ti pannakasagrap iti naayat a tulongna isudat’ napaneknekan a pinakaepektibo. Wen, ti panagtrabaho tulonganna ti maysa a mangpasubli iti ayatna a dati a nangtignay iti pusona. (Salmo 34:8) Mabalin a mangrugi daytoy iti panangala kadagiti aktibo nga addang a mangparmek kadagiti dakes a tarigagay wenno mangpalinteg kadagiti di umiso a pagannayasan ti puso. Tunggal panagballigi iti daytoy a pannakidangadang ket addang nga umas-asideg iti panangisubli manen iti puso ken Jehova. (Proverbio 23:26; 1 Pedro 2:1-3) Bayat a madaeg ti puso, dumakkel ti tarigagay agturong iti panangiburay iti linaonna kadagiti dadduma. Gapuna, no makakualipikaren dagiti dati nga inaktibo a managibumbunannag iti Pagarian, masapul koma a matulonganda a makiraman iti panangaskasaba a trabaho, ta “buyugen ti puso no mamati ti tao tapno makagun-od iti kinalinteg, ket iti ngiwat iti panangaramid iti panangipaduyakyak maipaay iti pannakaisalakan.”—Roma 10:10.
Maipaay iti asinoman a makarikna nga awanen panagayatda ken Jehova, ti dalan nga agsubli iti nadiosan a panagbiag agbalin a nawatiwat ken narigat. Kaskasdi, dagiti naespirituan nga iyiimbag da Steve ken Diane ket ebidensia a mabalin a mapasamak ti panagbalbaliw iti puso. Wen, ti pannakaisubli ket mabalin babaen iti tulong ti espiritu ni Jehova, ti panagipakat iti Saona, ken ti napabaro a pannakitinnulong iti organisasionna. Sipapasnek nga in-inanamaenmi ken ikarkararagmi a matulongan koma ti kakasta a tattao tapno agrag-oda manen iti panagdayaw ken Jehova ken iti nasagraduan a panagserbi a kas kadagidiay naimpusuan nga agayat ken Jehova.—Marcos 12:30; 1 Corinto 13:8; 3 Juan 1-4.