Dagiti Saludsod Manipud Kadagiti Managbasa

Kasano a dagiti gunggona ti panagserbi ni Kristo Jesus kas nangato a padi, a nadakamat iti Hebreo 4:15, 16, agaplikar iti “sabsabali a karnero” ita?

Nupay ti akem ni Jesus kas Nangato a Padi kangrunaanna nga agaplikar kadagidiay kaduananto idiay langit, dagiti Kristiano nga addaan naindagaan a namnama magunggonaanda uray itan iti panagserbi ni Jesus kas padi.

Manipud ken Adan, agsagsagaban dagiti tattao gapu iti basol. Agsagabatayo gapu iti natawid a kinaimperpekto, kas kadagiti Israelita. Nangnamnamada iti maysa nga atiddog a linea dagiti nangato a padi ken kakadua a papadi, a nangipaay kadagiti daton para iti basbasolda met laeng kasta met iti basol dagiti umili. Dimteng ti panawen, napulotan ni Jesus kas maysa a padi “maitunos iti kasasaad ni Melquisedec.” Kalpasan a napagungar, nagparang ni Jesus iti saklang ni Jehova tapno idatag ti pateg ti perpekto a datonna kas tao.​—Salmo 110:1, 4.

Ania ti kaipapanan daytoy kadatayo ita? Iti suratna kadagiti Hebreo, insalaysay ni Pablo ti panagserbi ni Jesus kas Nangato a Padi. Iti Hebreo 5:1, mabasatayo: “Tunggal nangato a padi a maala kadagiti tattao madutokan maigapu kadagiti tattao kadagiti bambanag maipapan iti Dios, tapno mangidaton kadagiti sagut ken kadagiti sakripisio maipaay iti basbasol.” Kalpasanna, iti Heb 5 bersikulo 5 ken 6, impakita ni Pablo a nagbalin ni Jesus a maysa a nangato a padi, a mangiturong kadagiti gunggona para kadatayo.

Kasano? Insurat ni Pablo: “Nupay isu ket Anak, nasursurona ti panagtulnog manipud kadagiti bambanag a sinagabana; ket kalpasan a napagbalinen a naan-anay nagbalin a makinrebbeng iti agnanayon a pannakaisalakan amin dagidiay agtultulnog kenkuana.” (Hebreo 5:8, 9) Iti damo, nalabit a pagpanunotennatay dayta a bersikulo no kasano a magunggonaantayo iti baro a lubong, inton dagidiay nasungdo iti Dios ken ni Jesus maikkat ti kinamanagbasolda ken gumun-od iti biag nga agnanayon. Manamnama dayta, maibatay iti makasubbot a pateg ti daton ni Jesus ken ti panagserbina kas Nangato a Padi.

Ngem iti kinaagpaysuanna, magunggonaantay itan manipud iti akem wenno panagserbina kas Nangato a Padi. Usigenyo ti Hebreo 4:15, 16: “Addaantayo kas nangato a padi, saan a ti maysa a dina mabalin ti makipagrikna kadagiti kinakapuytayo, no di ket ti maysa a nasuboken kadagiti amin a banag kas kadatayo, ngem awanan basol. Ngarud, buyogen ti wayawaya iti panagsao umadanitay koma iti trono ti di kaikarian a kinamanangaasi, tapno makagun-odtayo iti asi ken makasaraktayo iti di kaikarian a kinamanangaasi a kas tulong iti umiso a tiempo.” Kaano ti “umiso a tiempo”? Daytoy ket no agkasapulantayo iti asi ken di kaikarian a kinamanangaasi. Amintayo, gapu iti kinaimperpektotayo, rumbeng a makarikna iti daytoy a panagkasapulan ita.

Ipakita ti Hebreo 4:15, 16 a ni Jesus​—a maysa itan a padi idiay langit​—nagbalin met a tao, gapuna ammonat’ makipagrikna. Iti siasino? Kadatayo. Kaano? Itan. Idi isut’ maysa a tao, nagpasar ni Jesus kadagiti pakakumikoman ken pakarigatan a kadawyan kadagiti tao. Naminsan, nabisinan ken nawaw ni Jesus. Ken iti laksid ti kinanaan-anayna, isut’ nabannog. Dayta koma ti mangpatalged kadatayo. Apay? Agsipud ta nagpasar ni Jesus kadagiti gagangay a panagkapsut, ammona ti masansan a marikriknatayo. Laglagipenyo met a nakidangadang ni Jesus iti addaan ilem a panagsusupiat dagiti apostolna. (Marcos 9:33-37; Lucas 22:24) Wen, napadasanna dagiti pannakapaay. Saan aya a daytat’ mangpatibker kadatayo a maawatanna no mapaay, maupaytayo? Awan duadua a kasta.

No maup-upaykayo, ania ti maaramidanyo? Kinuna aya ni Pablo nga aguraykay laengen agingga iti baro a lubong, a tulongannakay ti Nangato a Padiyo, a ni Jesus, nga agbalin a naan-anay iti isip ken bagi? Saan. Kinuna ni Pablo: “Makagun-odtayo iti asi ken makasaraktayo iti di kaikarian a kinamanangaasi a kas tulong iti umiso a tiempo,” ket mairaman dita ti agdama. Maysa pay, idi tao ni Jesus, nagsagaba ken nagrigat, a ‘nasubok kadagiti amin a banag kas kadatayo.’ Gapuna no maipasangotayo iti kakasta a banag, isut’ sisasagana a tumulong kadatayo, maibatay iti pannakaawatna iti mapaspasarantayo. Saan aya a dayta ti mangyadani kadakayo kenkuana?

Ita usigenyo ti Heb 4 bersikulo 16. Kuna ni Pablo a datayo​—ken mairaman ditoy agpadpada ti napulotan ken dagiti sabsabali a karnero​—makaadani iti Dios buyogen ti wayawaya ti panagsao. (Juan 10:16) Di kayat a sawen ti apostol a mabalintay a dakamaten ti aniaman a banag a kayattayo iti kararag, uray ti pungtot, nakababain a bambanag. Imbes ketdi, maibatay iti daton ni Jesus ken akemna kas Nangato a Padi, makaadanitayo iti Dios nupay managbasoltayo.

Maysa pay a pamay-an a pakagunggonaantayo uray itan manipud kadagiti panagserbi ti Nangato a Paditayo, ni Jesu-Kristo, ramanenna dagiti basol, wenno pagkamkamaliantayo. Agpayso a ditay manamnama nga iti agdama a sistema ipakat ni Jesus kadatayo ti naan-anay a kaikarian ti datonna. Aramidenna man daytoy, saantay pay laeng a magun-odan ti biag nga agnanayon. Malagipyo kadi ti pasamak a nailanad iti Lucas 5:18-26, maipapan iti lalaki a paralisado a ti langkapina ket naipababa iti abut iti atep? Imbaga ni Jesus kenkuana: “Lalaki, dagiti basolmo mapakawanda.” Di tuktukoyen dayta ti sumagmamano nga espesipiko a basol a nakaigapuan ti paralisis. Kaipapananna ketdi ti pangkaaduan a basol ti lalaki, ken nalabit agramanen ti natawidna a kinaimperpekto, a pakaigapuan dagiti sagsagabaenna.

Maibatay iti daton nga intukonna, mabalinan ni Jesus nga awiten dagiti basol ti tao, kas ti kalding maipaay ken ni Azazel a nangawit kadagiti basol ti Israel iti Aldaw ti Panangabbong. (Levitico 16:7-10) Nupay kasta, tao pay laeng ti paralisado. Mabalin nga agbasol manen, ken natay idi agangay, kas kadagiti managbasol. (Roma 5:12; 6:23) Ti kinuna ni Jesus dina kaipapanan a dagus a naaddaan ti lalaki iti biag nga agnanayon. Ngem nagunggonaan ti lalaki iti maysa a kasasaad ti pannakapakawan iti dayta a panawen.

Ita usigentay ti kasasaadtayo. Gapu iti kinaimperpekto, inaldaw nga agbidduttayo. (Santiago 3:2) Aniat’ maaramidantayo iti dayta? Bueno, idiay langit addaantayo iti maysa a naasi a Nangato a Padi a babaen kenkuana makaadanitayo ken Jehova iti kararag. Wen, kas insurat ni Pablo, mabalintay amin ti ‘umadani a buyogen ti wayawaya iti panagsao iti trono [ti Dios] ti di kaikarian a kinamanangaasi, tapno makagun-odtayo iti asi ken makasaraktayo iti di kaikarian a kinamanangaasi a kas tulong iti umiso a tiempo.’ Gapuna, amin ita a karaman iti sabsabali a karnero awan duadua a makagunggun-odda kadagiti nakaskasdaaw a gunggona, agraman ti maysa a nadalus a konsiensia, manipud kadagiti panagserbi ni Kristo kas nangato a padi.

Amin a Kristiano nga addaan naindagaan a namnama ti mangnamnama kadagiti ad-adda a grande a bendision iti um-umayen a baro a lubong. No kasta naan-anay a yaplikarton ti nailangitan a Nangato a Paditayo ti pateg ti datonna, a mangituggod iti naan-anay a pannakapakawan ti basol. Mangipaayto met iti ad-adu a bendision babaen ti panangaywanna iti pisikal ken naespirituan a salun-at dagiti tao. Ken naan-anay nga isaknapto ni Jesus ti panangisuro iti ili ti Dios ditoy daga, tangay ti panangisuro iti Linteg ti kangrunaan a rebbengen dagiti padi iti Israel. (Levitico 10:8-11; Deuteronomio 24:8; 33:8, 10) No kasta, kabayatan a magunggonaantayo iti panagserbi ni Jesus ita kas padi, ad-adu pay ti agur-uray kadatayo!