PAKAPILAWAN
Depekto iti pisikal wenno moral, kinaimperpekto; kasasaad a saan a nasayaat; “aniaman a dakes.”—De 17:1.
Ti Hebreo a sao maipaay iti “pilaw” iti pisikal wenno moral ket mum. (Le 21:17; Job 31:7) Ti Griego a moʹmos kaipapananna ti “pakapilawan,” idinto ta ti nainaig nga aʹmo·mos kaipapananna ti “awan pakapilawanna.” (2Pe 2:13; Efe 1:4) Agpada a nainaigda iti sao a mo·maʹo·mai, kaipapananna ti ‘mangsarak iti biddut.’—2Co 6:3; 8:20.
Ti Israel ket naiduma ken Jehova, a ‘naan-anay iti aramidna [“awan pakapilawan (di namulitan) ti ar-aramidna,” Sy],’ kas ipakita ti kinuna ti Dios maipapan iti Israel: “Nagtignayda iti makadadael iti biangda a mismo; saanna ida nga annak, adda kadakuada a mismo ti pilaw.”—De 32:4, 5.
Ti Levitico a padi nga agserserbi iti sanguanan ti perpekto a Dios ket masapul ngarud nga awanan kadagiti pisikal a pakapilawan a kas iti kinabulsek, pilay, nagisgis nga agong, saan a normal a kasasaad a kas iti at-atiddog nga ima, kubbo, nablo nga ima, kinakuttong gapu iti sarut, sakit iti mata wenno kudil, natukkol nga ima wenno saka, ken narumek wenno nataltal nga ukel-ukel. (Le 21:18-20) Gapu iti kinaawan ti kakasta a pakapilawan ti nangato a padi ti Israel, mayanatup nga inrepresentarna ti Naindaklan a Nangato a Padi a Jesu-Kristo, nga “awanan allilaw, di natulawan.”—Heb 7:26.
Ti kinasalun-at, kaawan pakapilawan, ket nakalikaguman kadagiti maisakripisio nga animal iti sidong ti Mosaiko a Linteg. (Ex 12:5; Le 4:3, 28; De 15:21) Kasta met laeng ti nakalikaguman kadagiti maidatag a sakripisio mainaig iti mangiladawan a templo a nasirmata ni Ezequiel. (Eze 43:22, 23) Iti umasping a pamay-an, kas “awan pakapilawanna ken di namulitan a kordero,” “indaton [ni Kristo] ti bagina nga awan pakapilawanna iti Dios.”—1Pe 1:19; Heb 9:14.
Karaman kadagiti tattao a nadeskribir nga “awan pamilawan” iti pisikal a langada ket isu ni Absalom, ti Sulamita a babai, ken ti sumagmamano nga annak ti Israel idiay Babilonia. (2Sm 14:25; Sol 4:7; Da 1:4) Ti tunggal maysa nga adda iti sidong ti Linteg ket naparegta a mangbantay ken mangsalaknib iti maysa ken maysa, ta no saan amangan no maaddaanda iti pakapilawan. “No kas pagarigan ti maysa a tao mangparnuay ti pilaw iti katimpuyogna, ngarud kas iti inaramidna, kasta ti rebbeng a maaramid kenkuana. Dunor iti dunor, mata iti mata, ngipen iti ngipen; ti isu met laeng a kita ti pilaw a maparnuayna iti tao, dayta ti rebbeng a maparnuay kenkuana.” (Le 24:19, 20) Inyebkas ti apostol ti pannakaseknanna iti pannakapagtalinaed nga awanan ti kongregasion Kristiano kadagiti naespirituan a pakapilawan.—Efe 1:4; 5:27; Col 1:22; kitaenyo met ti Jud 24.