SALINONG, ANNINIWAN
Linong nga ipaay ti maysa a napasdok a bato (Isa 32:2), maysa nga ulep (Isa 25:5), maysa nga abong-abong (Isa 4:6), maysa a kayo (Sol 2:3; Eze 17:23; Os 4:13), wenno sabali pay a kita ti mula (Jon 4:5, 6). Mabalin a mangipaay dayta iti makaay-ayo a pannalaknib manipud napudot nga init. Gapuna, piguratibo a maikuna a ti maysa a tao ket immay iti “salinong” daydiay agserbi kas wenno pangnamnamaan maipaay iti salaknib, talimeng, kinatalged, wenno kamang. Ngarud, maipapan kadagiti ganggannaet nga innalana iti pagtaenganna, kinuna ni Lot kadagiti lallaki ti Sodoma: “Isuna laeng ta dikay aramiden ti aniaman a banag kadagitoy a lallaki, agsipud ta dayta ti makagapu nga immayda iti salinong ti atepko.” (Ge 19:8) Ket ni Jehova, babaen ken mammadtona nga Isaias, nangisawang iti kinaay-ay kadagidiay agkamkamang iti “salinong ti Egipto,” kayatna a sawen, mangin-inanamada iti Egipto maipaay iti pannalaknib. (Isa 30:1-3; kitaenyo met ti Un 4:20; Eze 31:6, 12, 17.) Nangnangruna a nadeskribir ni Jehova kas mangipapaay iti mangsalaknib a linong wenno salinong iti ilina (Sal 91:1; 121:5; Isa 25:4) wenno mangmangted kadakuada iti kasla salinong a pannalaknib iti sidong ti ‘imana’ wenno dagiti ‘payakna.’ (Sal 17:8; 36:7; 57:1; 63:7; Isa 49:2; 51:16) Iti sabali a bangir, ti “napuskol a kinasipnget” wenno napuskol nga anniniwan ket nainaig iti daguyemyem, peggad, uray pay iti tanem—ti “daga ti kinalidem.”—Job 10:21, 22; 24:17; 38:17; Sal 23:4.
Ti wagas a panagbalbaliw ti rukod ti anniniwan ken kamaudiananna awanen kas resulta ti itatangkayag ti init ket naaramat kas pangipadis iti kinaababa ti biag wenno kinaapagbiit ti tao. (1Cr 29:15; Job 8:9; 14:1, 2; Sal 102:11; 144:4; Ec 6:12; 8:13) Ti panagbalin ti al-aldaw ti maysa a tao a “kasla iti anniniwan a nagpukaw” ipasimudaagna nga asidegen ti ipapatayna. (Sal 102:11; 109:23) Nupay dagiti anniniwan a parnuayen ti init kanayon nga agbalbaliw ti rukod ken turongda bayat ti panagpusipos ti daga, di agbalbaliw ni Jehova. Kas insurat ni adalan a Santiago: “Kenkuana awan ti panagbaliw ti pagturongan ti anniniwan.”—San 1:17.
Ti anniniwan, wenno nangisit a ladawan, nga iyanninaw ti maysa a banag ket saan nga agpaypayso, saan nga isu ti pudpudno a banag. Kaskasdi makaipaay iti pamalatpatan iti pakabuklan a sukog wenno disenio ti pudpudno a banag a nangyanninaw iti dayta. Mainaig iti daytoy, inlawlawag ni Pablo a ti Linteg, agraman dagiti piesta, tabernakulo, ken sakripisiona, addaanda iti anniniwan a nangiladawan iti daddadakkel a bambanag nga umay. Insuratna: “Ti pudpudno kukua ni Kristo.”—Col 2:16, 17; Heb 8:5; 9:23-28; 10:1.
Maipapan iti namilagruan a panagbalbaliw ti anniniwan a nadakamat iti 2 Ar-ari 20:9-11 ken Isaias 38:8, kitaenyo ti INIT.