Panaggiginnutugot iti Ayat ken Nasayaat nga Ar-aramid​—Kasano?

‘Agpipinnanunottayo koma iti maysa ken maysa tapno manggutugot iti ayat ken nasayaat nga ar-aramid, . . . nga agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.’ ​—HEBREO 10:24, 25.

1, 2. (a) Apay a nasken nga aglilinniwanliwa ken agpipinnaregta dagiti nagkauna a Kristiano iti panagtataripnongda? (b) Aniat’ imbalakad ni Pablo maipapan iti kinapateg ti panagtataripnong?

SILILIMED a nagsasarakda, a naguurnongda iti nabalunetan a siled. Iti ruar, agur-uray ti peggad iti uray sadinoman. Kapappapatay iti imatang dagiti tao ti Panguloda, ni Jesus, ken pinakdaaranna idi dagiti pasurotna a mairurumendanto met a kas kenkuana. (Juan 15:20; 20:19) Ngem bayat a sitatanang a pinagsasaritaanda ti patpatgenda a ni Jesus, uray kaskasano nataltalged la ketdi ti riknada iti panaguummongda.

² Bayat a naglabas dagiti tawen, naipasango dagiti Kristiano iti amin a kita ti pakasuotan ken pannakaidadanes. Kas kadagidiay immuna nga adalan, naliwliwa ken naparegtada iti panagtataripnongda. Gapuna, insurat ni apostol Pablo iti Hebreo 10:24, 25: ‘Agpipinnanunottayo koma iti maysa ken maysa tapno manggutugot iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.’

3. Apay a maikunayo a ti Hebreo 10:24, 25 ket saan laeng a maysa a bilin a dagiti Kristiano rumbeng nga agtataripnongda?

³ Saan laeng nga ibilbilin dagita a sasao ti kankanayon a panagtataripnong. Mangipaay dagita iti impaltiing ti Dios a pagalagadan kadagiti amin a Nakristianuan a panaggigimong​—ken kinaagpaysuanna, iti aniaman nga okasion a panagtitipon dagiti Kristiano. Itatta, bayat a silalawag a makitkitatayo nga umasidegen ti aldaw ni Jehova, dagiti panagtataripnongtayo rumbeng nga ad-adda nga agbalinda a kasla natalged a pagkamangan, gubuayan ti kired ken pammaregta para iti amin gapu kadagiti pakarigatan ken peggad iti daytoy dakes a sistema. Aniat’ maaramidantayo tapno masigurado daytoy? Bueno, usigentay a siaannad dagiti sasao ni Pablo, a yimtuodtay dagiti tallo a kangrunaan a saludsod: Aniat’ kayat a sawen ti ‘panagpipinnanunot iti maysa ken maysa’? Aniat’ kayat a sawen ti ‘panaggiginnutugot iti maysa ken maysa iti ayat ken nasayaat nga ar-aramid’? Kamaudiananna, kasanotay a ‘makapagpipinnaregta iti maysa ken maysa’ kadagitoy narikut a panawen?

‘Panagpipinnanunot iti Maysa ken Maysa’

4. Aniat’ kayat a sawen ti ‘panagpipinnanunot iti maysa ken maysa’?

⁴ Idi indagadag ni Pablo kadagiti Kristiano nga ‘agpipinnanunotda iti maysa ken maysa,’ inaramatna ti Griego a verbo a ka·ta·no·eʹo, ti intensive a porma ti kadawyan a termino a “maawatan.” Kuna ti Theological Dictionary of the New Testament a ti kayulogan dayta ket “iturong amin a panunot iti maysa a banag.” Sigun ken W. E. Vine, mabalin a kayuloganna met, “tarusan a naan-anay, usigen a naimbag.” Isu a no ‘agpipinnanunot [dagiti Kristiano] iti maysa ken maysa,’ saan laeng a ti adda iti ruar ti kitaenda no di ket ipakatda ti amin a kabaelanda nga agpanunot ken ikagumaanda ti maaddaan iti naun-uneg a pannakaawat.​—Idiligyo ti Hebreo 3:1.

5. Ania dagiti sumagmamano nga aspeto ti maysa a tao a mabalin a nakalemmeng, ket apay a rumbeng a panunotentayo dagitoy?

⁵ Nasken a laglagipentayo nga ad-adu pay ti maammuantayo maipanggep iti maysa a tao ngem iti narabaw a panangmatmat iti langa, aramid, wenno personalidadna. (1 Samuel 16:7) Masansan a ti kinaulimek ilingedna ti pudno a karirikna wenno ti makaay-ayo a kinaparato ti maysa a tao. Kasta met, nagduduma dagiti nalikudan. Napasaran ti dadduma dagiti nakaro a pakasuotan iti biagda; ib-ibturan ti dadduma dagiti kasasaad ita a pulos a ditay ipagpagarup. Anian a masansan a mapukaw ti rurodtayo iti ugali ti maysa a kabsat no ad-adut’ maammuantayo maipapan iti nalikudan wenno kasasaadna.​—Proverbio 19:11.

6. Ania dagiti pamay-an a makapagiinnammotayo a nasaysayaat, ket aniat’ nasayaat a mabalin nga ibungana?

⁶ Siempre, di kayat a sawen daytoy a makibiangtayo iti biag ti sabali. (1 Tesalonica 4:11) Kaskasdi, mabalintay nga ipakita ti personal nga interes iti maysa ken maysa. Ad-adu pay ti ramanen daytoy ngem ti basta panangkablaaw laeng idiay Kingdom Hall. Apay a dikay mangpili iti maysa a tao a kayatyo a maam-ammo a nasaysayaat ken makapatang iti sumagmamano a minuto sakbay wenno kalpasan ti gimong? Nasaysayaat pay, “surotenyo ti kurso ti kinamanagpadagus” babaen ti panangawisyo iti maysa wenno dua a gagayyem nga agmerienda iti pagtaenganyo. (Roma 12:13) Ipakitayo ti interes. Umimdengkayo. Ti panangdamag laengen no kasano a naammuan ti maysa a tao ni Jehova ken nasursurona nga ayaten mabalin nga adut’ ipalgakna. Nupay kasta, mabalin nga ad-adu pay ti maammuanyo babaen ti pannakipagtrabaho kenkuana iti ministerio a panagbalaybalay. Ti panagpipinnanunot iti kakasta a pamay-an tulongannatayo a mangpatanor iti pudpudno a pannakipagrikna, wenno empatia.​—Filipos 2:4; 1 Pedro 3:8.

‘Panaggiginnutugot iti Maysa ken Maysa’

7. (a) Kasano nga inapektaran ti panangisuro ni Jesus dagiti tattao? (b) Aniat’ namagbalin iti panangisurona a nabileg unay?

⁷ No agpipinnanunottayo iti maysa ken maysa, ad-adda a nakasaganatayo nga aggiginnutugot, agdidinnagadag nga agtignay. Nagpateg ti akem nangruna dagiti Kristiano a panglakayen iti daytoy a banag. Iti naminsan a nagpalawag ni Jesus iti publiko, mabasatayo: “Ti imbungana ket nagsiddaaw unay dagiti bunggoy iti wagas ti panangisurona.” (Mateo 7:28) Iti sabali a gundaway, uray ti sumagmamano a soldado a naibaon a mangtiliw kenkuana pimmanawda a kunkunada: “Awan pay a pulos sabali a tao a nagsao iti kastoy.” (Juan 7:46) Aniat’ namagbalin iti panangisuro ni Jesus a nabileg unay? Panangipakita iti emosionalismo? Saan; nagsao ni Jesus a sidadayaw. Kaskasdi, kanayon a pinagreggetanna a danonen ti puso dagiti dumdumngeg kenkuana. Gapu ta maseknan kadagiti tattao, ammona no kasano a gutugoten ida. Nagaramat kadagiti nalawag, simple a pangngarig a mangiladawan kadagiti inaldaw a pasamak iti biag. (Mateo 13:34) Kasta met, dagidiay addaan paset kadagiti gimongtayo rumbeng a tuladenda ni Jesus babaen ti panangipaayda iti nabara, narayray a presentasion a makagutugot. Kas ken Jesus, ikagumaantay ti mangsapul kadagiti pangngarig a maibagay kadagiti dumdumngeg kadatayo ken dumanon iti pusoda.

8. Kasanot’ pananggutugot ni Jesus babaen ti ulidan, ket kasanotay a matulad iti daytoy a banag?

⁸ Iti panagserbi iti Diostayo, makapaggiginnutugottay amin babaen ti ulidan. Awan duadua a ginutugot ni Jesus dagiti dumdumngeg kenkuana. Pagaayatna ti Nakristianuan a ministerio ken intan-okna ti ministerio. Kinunana a dayta ti pannakataraonna. (Juan 4:34; Roma 11:13) Makaakar ti kasta a kinagagar. Maipakitayo met kadi ti rag-oyo iti ministerio? Bayat a siaannad a liklikanyo ti agpalangguad, iranudyo dagiti nasayaat a kapadasanyo kadagiti sabsabali iti kongregasion. No awisenyo dagiti dadduma a makipagtrabaho kadakayo, kitaenyo no matulonganyo ida a makasarak iti pudpudno a ragsak iti pannakisarsarita kadagiti sabsabali maipapan iti Naindaklan a Namarsua kadatayo, ni Jehova.​—Proverbio 25:25.

9. (a) Ania ti sumagmamano a pamay-an a pananggutugot kadagiti sabsabali a kayattay a liklikan, ken apay? (b) Aniat’ rumbeng a mangtignay kadatayo a mangipaay iti bagbagitayo iti panagserbi ken Jehova?

⁹ Nupay kasta, agannadkayo a dikay gutugoten dagiti dadduma iti di umiso a pamay-an. Kas pagarigan, mabalin a di mapupuotan a maipariknatay kadakuada a saan nga umdas ti ar-aramidenda. Mabalin a di inggagara a mapabainantay ida babaen ti panangidilig kadakuada kadagiti sabsabali a pagaammo nga aktibo, wenno mabalin a mangipasdektay pay ketdi kadagiti nainget a pagalagadan satay babalawen dagidiay saan a mangan-annurot kadagitoy. Mabalin a tignayen ti aniaman kadagitoy a pamay-an ti dadduma iti apagbiit, ngem saan nga insurat ni Pablo, ‘Aggiginnutugotkayo iti pannakariknat’ basol ken nasayaat nga ar-aramid.’ Saan, masapul nga aggiginnutugottayo iti ayat, ket sumarunonto dagiti aramid nga agtaud iti nasayaat a motibo. Awan koma ti magutugot gapu laeng iti pangipagarupan kenkuana ti dadduma iti kongregasion no dina maaramid ti namnamaenda kenkuana.​—Idiligyo ti 2 Corinto 9:6, 7.

10. Apay a rumbeng a laglagipentayo a saan a datayo ti agturay iti pammati dagiti sabsabali?

¹⁰ Ti panaggiginnutugot dina kaipapanan nga iturayantayo ti maysa ken maysa. Nupay dakkel ti autoridadna nga inted ti Dios, sipapakumbaba a pinalagipan ni apostol Pablo ti kongregasion sadi Corinto: ‘Saan a dakami dagiti agturay iti pammatiyo.’ (2 Corinto 1:24) No kas kenkuana sipapakumbaba a bigbigentayo nga awan karbengantayo a mangikeddeng no kasanot’ kaadu ti rumbeng nga aramiden dagiti sabsabali iti panagserbi ken Jehova, wenno mangiturong iti konsiensiada iti dadduma pay a personal a desision, maliklikantay ti agbalin a “nalinteg nga aglablabes,” awanan rag-o, nainget, negatibo, wenno manangipaannurot iti linteg. (Eclesiastes 7:16) Saan a makagutugot ti kakasta a kababalin; mangirurumenda.

11. Aniat’ nangtignay iti panagabuloy idi tiempo a pannakabangon ti tabernakulo ti Israel, ket kasano a mabalin a pudno met dayta iti kaaldawantayo?

¹¹ Kayattay a maaramid amin a panagregget iti panagserbi ken Jehova iti umasping nga espiritu a kas iti nagkauna nga Israel idi kinasapulan dagiti donasion iti pannakabangon ti tabernakulo. Kuna ti Exodo 35:21: “Iti kasta immayda, tunggal maysa a natignay ti pusona, ken inyegda, tunggal maysa a natignay ti nakemna, ti sagut ken Jehova a maipaay iti trabaho.” Saan ida a pinilit ti siasinoman no di ket natignayda manipud iti kaungganda, manipud iti puso. Kinapudnona, sigun iti literal a pannakabasa dayta iti Hebreo, nangipaay iti kakasta a sagsagut ti “tunggal maysa a ginutugot ti pusona.” (Kuami ti italiko.) Isu nga ikagumaantay met koma ti aggiginnutugot iti puso no agtataripnongtayo. Ti espiritu ni Jehova ti makaammon iti dadduma pay.

‘Panagpipinnaregta iti Maysa ken Maysa’

12. (a) Ania ti sumagmamano a kayulogan ti Griego a sao a naipatarus a ‘paregtaen’? (b) Kasano a napaay dagiti kakadua ni Job a nangparegta kenkuana? (c) Apay a rumbeng a liklikantay ti agiinnukom?

¹² Idi insurat ni Pablo a rumbeng nga ‘agpipinnaregtatayo iti maysa ken maysa,’ inaramatna ti maysa a porma ti Griego a sao a pa·ra·ka·leʹo, a kayuloganna met ‘papigsaen, liwliwaen.’ Iti Griego a Septuagint version, naaramat daytoy umasping a sao iti Job 29:25, a sadiay nailadawan ni Job kas manangliwliwa kadagiti agdungdung-aw. Ngem unayen ta idi naglak-am ni Job a mismo iti nakaro a pakasuotan, awan a pulos ti naawatna a kasta a pammaregta. Manguk-ukom ken mangbabbabalaw laeng ti inaramid dagiti tallo a ‘manangliwliwa’ kenkuana, a dida man la tinarusan wenno nakipagrikna kenkuana. Kinapudnona, iti intero a panagsaoda, pulos a saanda man la nga inawagan ni Job iti naganna. (Idiligyo ti Job 33:1, 31.) Nalawag nga ad-adda nga imbilangda [ni Job] a maysa a buong ti ulo imbes a maysa a tao. Di pakasdaawan a sisasaem nga inyasug ni Job kadakuada: “No ta kararuayo nagsaad koma iti saad ti kararuak”! (Job 16:4) Kasta met itatta, no kayatyo a paregtaen ti maysa a tao, makipagriknakayo! Dikay mangukom. Kas kuna ti Roma 14:4, “siasinoka a mangukom iti adipen iti balay ti sabali? Iti bukodna nga apo isu sitatakder wenno maikulbo. Kinapudnona, isu mapagtakderto, ta kabaelan ni Jehova a patakderen.”

13, 14. (a) Ania a napateg a kinapudno ti nasken nga ipaganetgettayo kadagiti kakabsattayo tapno maliwliwada? (b) Kasano a pinapigsa ti maysa nga anghel ni Daniel?

¹³ Naipatarus ti maysa a porma ti pa·ra·ka·leʹo ken ti nainaig a nombre daytoy kas “liwliwa” iti 2 Tesalonica 2:16, 17: “Mainayon pay, ni Apotayo a Jesu-Kristo a mismo ken ti Dios nga Amatayo, a nagayat kadatayo ken nangted iti agnanayon a liwliwa ken naimbag a namnama babaen ti di kaikarian a kinamanangaasi, mangliwliwa koma iti puspusoyo ken mangpatibker kadakayo iti tunggal naimbag nga aramid ken sao.” Paliiwenyo ta innaig ni Pablo ti pannakaliwliwa dagiti pusotayo iti nagpateg a kinapudno nga ay-ayatennatay ni Jehova. Isu nga agpipinnaregta ken aglilinniwanliwatayo koma babaen ti panangipatalged iti dayta napateg a kinapudno.

¹⁴ Naminsan, kasta unay ti pannakariribuk ti mammadto a ni Daniel kalpasan a nakakita iti nakabutbuteng a sirmata ta kinunana: “Ti taknengko nagbalin kaniak a panagrupsa, ket awan ti nabati kaniak a pigsa.” Nangibaon ni Jehova iti maysa nga anghel a maulit-ulit a nangipalagip ken Daniel nga isut’ “makaay-ayo unay” iti imatang ti Dios. Ti resultana? Kinuna ni Daniel iti anghel: “Pinapigsanak.”​—Daniel 10:8, 11, 19.

15. Kasanot’ rumbeng a panangtimbeng dagiti panglakayen ken agdaldaliasat a manangaywan iti komendasion ken pannubngar?

¹⁵ Adtoy, ngarud, ti maysa pay a pamay-an a panangparegta kadagiti sabsabali. Komendaranyo ida! Nakalaklaka ti mangbabalaw, agbalin a nagubsang. Ipapantayon, adda dagiti tiempo a mabalin a kasapulan ti pannubngar, nangruna babaen kadagiti panglakayen ken agdaldaliasat a manangaywan. Ngem pagsayaatanda no malaglagip ida gapu iti naimpusuan a pammaregtada imbes a gapu iti kinamanangbabalawda.

16. (a) No mangparparegta kadagiti malmaldaang, apay a masansan a saan nga umdas ti basta panangidagadag a ganetgetanda ti agserbi ken Jehova? (b) Kasano a tinulongan ni Jehova ni Elias idi malmaldaang daytoy?

¹⁶ Nangnangruna a kasapulan dagidiay malmaldaang ti pammaregta, ket namnamaen ni Jehova kadatayo a kas kapadada a Kristiano agbalintay koma a gubuayan ti tulong​—nangruna no papanglakayentayo. (Proverbio 21:13) Aniat’ maaramidantayo? Saan nga umdas ti panangibaga a ganetgetanda ti agserbi ken Jehova. Apay? Agsipud ta mabalin nga ipasimudaag dayta a malmaldaanganda gapu ta saan nga umdas ti ar-aramidenda. Masansan a saan a kasta ti kasasaad. Naminsan, kasta unay ti leddaang ti mammadto a ni Elias ta kayatnan ti matay; kaskasdi, dimteng daytoy iti tiempo nga okupado unay iti panagserbi ken Jehova. Kasanot’ pannakilangen ni Jehova kenkuana? Nangibaon iti maysa nga anghel tapno mangipaay iti praktikal a tulong. Imbukbok ni Elias ti linaon ti pusona ken Jehova, nga impakitana a mariknana nga awan serserbina a kas kadagiti natayen nga ammana, nga awan mamaay ti trabahona, ken naan-anay nga agmaymaysa. Dimngeg ni Jehova ket liniwliwana babaen ti nakaskasdaaw a parangarang ti pannakabalinna ken pammatalged nga isu ket saan nga agmaymaysa ken mairingpaston ti trabaho a rinugianna. Inkari met ni Jehova nga ikkanna ni Elias iti kadua tapno sanayenna ket isunto ti sumukat kenkuana iti kamaudiananna.​—1 Ar-ari 19:1-21.

17. Kasano a maparegta ti maysa a panglakayen ti maysa a tao a nakarot’ panangbabalawna iti bagina?

¹⁷ Anian a makaparegta! Paregtaentay met koma dagiti kakaduatayo a madukdukotan. Ikagumaanyo a tarusan ida babaen ti panagimdengyo! (Santiago 1:19) Mangipaaykayo iti Nainkasuratan a liwliwa a maitutop iti indibidual a kasapulanda. (Proverbio 25:11; 1 Tesalonica 5:14) Tapno maparegta dagidiay nakarot’ panangbabalawda iti bagbagida, mabalin a siaayat a mangipaay dagiti panglakayen iti Nainkasuratan a pammaneknek nga ay-ayaten ken patpatgen ida ni Jehova.a Ti panangsalaysay iti subbot mabalin a dakkel ti maaramidanna iti panangparegta kadagidiay makarikna nga awan serserbida. Mabalin a maipakita iti maysa a malmaldaang gapu iti napalabas a basol nga isut’ dinalusanen ti subbot no pudpudno a nagbabawin ken pinaglikudannan a naan-anay ti aniaman a kasta nga aramid.​—Isaias 1:18.

18. Kasano a maaramat ti sursuro maipapan iti subbot a mangparegta iti maysa a rinanggasan ti sabali, kas iti pannakarames?

¹⁸ Siempre, rumbeng a panunoten a naimbag ti maysa a panglakayen ti kasasaad tapno maaramatna a siuumiso dayta a sursuro. Usigenyo ti maysa a pagarigan: Dagiti daton nga animal iti Linteg Mosaiko, a kasapulan iti pannakaabbong dagiti amin a basol, inladawanda ti daton a subbot ni Kristo. (Levitico 4:27, 28) Nupay kasta, awan ti linteg a masapul a mangidatag ti maysa a biktima ti panangrames iti kasta a daton gapu iti basol. Sagudayen ti linteg nga ‘awan ti aramidenda’ a kas pannusa kenkuana. (Deuteronomio 22:25-27) Kasta met itatta, no naranggasan ken narames ti maysa a kabsat a babai, a mariknana nga isu ket narugit ken awan serbina gapu itoy a napagtengna, maitutop kadi nga ipaganetget ti panagkasapulanna iti subbot tapno madalusan iti dayta a basol? Nabatad a saan. Awan basolna iti pannakaranggasna. Ti manangrames ti nakabasol ket masapul a madalusan. Nupay kasta, ti ayat nga impakita da Jehova ken ni Kristo iti panangipaay iti subbot ket mabalin nga aramaten kas pammaneknek nga isu ket awan mulitna iti imatang ti Dios gapu iti basol ti sabali no di ket napateg ken ni Jehova ken agtalinaed iti ayatna.​—Idiligyo ti Marcos 7:18-23; 1 Juan 4:16.

19. Apay a di rumbeng a namnamaentayo a makaparegta amin a pannakitimpuyog kadagiti kakabsattayo, ngem ania komat’ determinado nga aramidentayo?

¹⁹ Wen, aniaman ti kasasaad ti biag ti maysa a tao, uray pay kasanot’ kasaem ti napalabasna, rumbeng a makasarak iti pammaregta iti kongregasion dagiti tattao ni Jehova. Ket pudno a makasarak no ikagumaan ti tunggal maysa kadatayo ti agpipinnanunot, aggiginnutugot, ken agpipinnaregta iti maysa ken maysa no agtitipontayo. Nupay kasta, gapu ta imperpektotayo, saantay a maaramid dayta no dadduma. Di maliklikan a makapagiinnupay ken makapagpipinnasakittayo pay ketdi no maminsan. Ikagumaanyo a palabsen ti pagkurkurangan dagiti sabsabali iti daytoy a banag. No dagiti laeng pagkapuyan ti kitkitaenyo, mabalin nga agtungpalkayto a manangbabalaw unay iti kongregasion ken matnag pay ketdi iti mismo a palab-og a kayat ni Pablo a liklikantayo, nga isu ti panangliway iti panagtataripnongtayo. Saan koma pulos a mapasamak dayta! Bayat a pumegpeggad ken rumangranggas daytoy daan a sistema, sititibker a determinadotay koma a mangikagumaan a pagbalinen ti panagtitipontayo kadagiti gimong a makapabileg​—nangruna ta makitatayo nga umasidegen ti aldaw ni Jehova!

[Footnote]

Kasanoyo a Sungbatan?

◻ Apay a nasken a makaparegta dagiti gimong ken panagtitimpuyogtayo kadagitoy maudi nga al-aldaw?

◻ Aniat’ kayat a sawen ti panagpipinnanunot?

◻ Aniat’ kayat a sawen ti panaggiginnutugot?

◻ Aniat’ ramanen ti panagpipinnaregta?

◻ Kasano a maparegta dagiti malmaldaang ken maup-upay?

[Ladawan iti panid 16]

Ti kinamanangsangaili tulongannatay nga agiinnammo a nasaysayaat

[Ladawan iti panid 18]

Idi malmaldaang ni Elias, siaayat a liniwliwa ni Jehova