“Kasapulanyo ti Panagibtur”

“KASAPULAN[TA]YO ti panagibtur,” tapno maawattayo “ti kaitungpalan ti kari.” (Hebreo 10:36) Ilawlawag ti maysa nga eskolar ti Biblia a ti Griego a sao para iti “panagibtur” nga inaramat ni apostol Pablo iti daytoy a teksto no dadduma maaramat a mangiladawan “iti abilidad ti maysa a mula nga agbiag iti sidong dagiti narigat ken di makaay-ayo a kasasaad.”

Idiay kabambantayan ti Europa, adda agtubo sadiay a kasta a mula. Karkarna, naawagan daytoy a live-forever. Siempre, saan nga agbiag nga agnanayon daytoy alpino a mula, ngem talaga nga agpaut daytoy iti adu a tawen, nga agsabong iti makaay-ayo kada kalgaw. Ilawlawag ti The New Encyclopedia Britannica a naited ti nagan a live-forever iti mula gapu iti “kinaandur ken kinatibkerna.” (Ti sientipiko a nagan para kadagitoy a mula ti kita ti Sempervivum kaipapananna met ti “live-forever.”)

Ti naisangsangayan iti daytoy naandur a mula isut’ panagtubona kadagiti natikag a lugar. Masarakan daytoy iti tuktok dagiti bakras ti bantay a mababaut ti angin, a sadiay ti temperatura mabalin a bumaba agingga iti 35° C iti las-ud laeng ti 24 nga oras. Makapagramut daytoy iti rekka ti bato nga addaan bassit a daga. Ania dagiti sumagmamano a makagapu iti panagbayagna iti kasta a naririgat a kasasaad?

Natubbog dagiti bulong ti live-forever, a siaannad nga agurnong iti danum. Daytoy ti gapuna no apay a gundawayanna ti amin a magun-od nga agneb manipud iti tudo wenno marunaw a niebe. Maysa pay, agririmmuok no agtubo daytoy a mamagkaykaysa iti bilegda tapno siiirut a makakapetda iti nabato a pagbatayanda. Iti kaadda ti ramut kadagiti rekka, masalakniban daytoy maibusor iti kinadawel ti panniempo, nupay bassit laeng ti daga. Iti sabali a pannao, agbiag daytoy babaen ti panangusar iti kasayaatan iti karirigatan a kasasaad.

Iti naespirituan a pamay-an, mabalin a masarakantayo ti bagitayo nga adda iti kasasaad a mangsubok iti kalidad ti kinaandurtayo. Aniat’ tumulong kadatayo nga agandur iti sidong ti pannubok? Kas iti mula a live-forever, mabalintayo nga urnongen ti mangted-biag a danum ti Sao ti Dios ken sidedekket a makikadua kadagiti pudno a Kristiano maipaay iti suporta ken pannalaknib. Kangrunaan iti amin, kas ti sabong ti alpino, masapul a kumpettayo iti ‘batotayo,’ ni Jehova, kasta met iti Saona ken iti organisasionna.​—2 Samuel 22:3.

Pudno a ti mula a live-forever maysa a makaay-ayo a pammalagip nga, uray iti di-makaay-ayo nga aglawlaw, makapagibturtayo no gundawayantayo dagiti magun-odan a probision. Ipatalged ni Jehova kadatayo a ti kasta a panagibtur iturongnatayo iti ‘pananggun-od kadagiti kari,’ nga iti literal kaipapanannat’ panagbiag nga agnanayon.​—Hebreo 6:12; Mateo 25:46.