Malagipyo Kadi?

Binasayo kadi a naimbag dagiti nabiit pay a ruar Ti Pagwanawanan? Kitaenyo no masungbatanyo dagiti sumaganad a saludsod:

No adda dagiti instruksion nga aggapu iti organisasion ti Dios, ania koma ti aramiden dagiti kakabsat, kas kadagiti manangaywan iti sirkito ken panglakayen?

Masapul nga agtulnogda a dagus. Isaludsodda iti bagida: ‘Mapabpabilegko kadi ti espiritualidad dagiti adda iti aglawlawko? Natulokak kadi a mangawat ken mangsuporta kadagiti instruksion?’​—w16.11, p. 11.

Kaano nga arig inadipen ti Babilonia dagiti pudno a Kristiano?

Napasamak dayta di unay nabayag kalpasan ti ipapatay dagiti apostol. Timmaud idi dagiti papadi a mangipagarup a nangatngatoda ngem iti kaaduan. Ti Simbaan ken ti Gobierno ti nangisungsong iti panagapostata ken inkagumaanda a pasardengen dagiti arig-trigo a Kristiano. Ngem kadagiti dekada sakbay ti 1914, nangrugi a mawayawayaan dagiti napulotan.​—w16.11, p. 23-25.

Apay a napateg ti inaramid ni Lefèvre d’Étaples?

Idi 1520’s, impatarus ni Lefèvre ti Biblia iti French tapno maawatan dagiti ordinario a tattao. Dakkel ti impluensia ti panangilawlawagna kadagiti linaon ti Biblia kada Martin Luther, William Tyndale, ken John Calvin.​—wp16.6, p. 10-12.

Ania ti nagdumaan ti “panangpampanunot iti lasag” ken “panangpampanunot iti espiritu”? (Roma 8:6)

Daydiay mangpampanunot iti lasag ket nakapokus iti tarigagay ken pagannayasan ti imperpekto a lasag, ken kanayon nga ibagbaga ken iparparegtana ti bambanag maipapan iti lasag. Daydiay met mangpampanunot iti espiritu ket nakasentro ti biagna iti bambanag maipapan iti Dios ken kadagiti panggepna; agpapaituray dayta a Kristiano iti nasantuan nga espiritu. Agturong iti ipapatay ti immuna a nadakamat, biag ken talna met ti naud-udi.​—w16.12, p. 15-17.

Ania ti dadduma a pamay-an a maksayan dagiti pakadanagam?

Iyun-unam dagiti napatpateg a banag, agbalinka a realistiko iti namnamaem, inaldaw a mangiwayaka iti panawen a makapagmaymaysaka, tagiragsakem dagiti parsua ti Dios, agkatawa ken agpakatawaka, regular nga agehersisioka, ken umdas koma ti turogmo.​—w16.12, p. 22-23.

“Nayalis ni Enoc tapno saanna a makita ni patay.” (Heb. 11:5) Kasano?

Agparang nga in-inut a pinaturog ti Dios ni Enoc agingga a natay, a dina napupuotan dayta.​—wp17.1, p. 12-13.

Apay a napateg latta ti kinaemma agingga ita?

Ammo ti naemma a tao ti kabaelanna ken ti limitasionna. Masapul a nasiputtayo iti mabalin nga epekto ti kababalintayo iti dadduma ken saan koma a nangato ti panagkitatayo iti bagitayo.​—w17.01, p. 18.

Ania ti ebidensia nga indalan ti Dios ti bagi a manarawidwid idi umuna a siglo a kas iti panangiwanwanna iti Bagi a Manarawidwid ita?

Iti tulong ti nasantuan nga espiritu, naawatanda dagiti kinapudno iti Biblia. Indauluanda ti panangasaba iti tulong dagiti anghel, ken imbasarda iti Sao ti Dios dagiti instruksion nga intedda. Kasta met laeng ita.​—w17.02, p. 26-28.

Ania ti makatulong tapno makitatayo a nagpateg ti subbot?

Adda uppat: No asino ti nangted, no apay a naited, no ania ti naisakripisio, ken no apay a kasapulantayo dayta. Masapul a panunotentayo a naimbag dagita.​—wp17.2, p. 4-6.

No nakapagdesisionen ti maysa a Kristiano, mabalinna kadi pay a baliwan dayta?

Tungpalentayo koma ti ibagatayo. Ngem no dadduma, addada desision a masapul a pagpanunotan manen. Idi nagbabawi dagiti taga-Nineve, binaliwan ti Dios ti desisionna. No dadduma, adda met dagiti baro a situasion wenno impormasion a mabalin a rason a masapul a baliwantayo ti desisiontayo.​—w17.03, p. 16-17.

Apay a delikado ti tsismis?

Mabalin a dayta ti mangpakaro ken mangrubrob iti problema. Hustotayo man wenno saan, awan a pulos ti maitulong ti makapasakit a sasao.​—w17.04, p. 21.