Inaramidda ti Pagayatan ni Jehova

Nagunggonaan ti Pammati Dagiti Nagannak

KADAGITI Israelita, pakaragsakan unay idi ti pannakayanak ti ubing a lalaki. Kaipapananna ti panagtultuloy ti kapuonan ken agtalinaed iti pamilia ti tawid a daga. Ngem idi agarup tawen 1593 K.K.P., kasla ad-adda a lunod imbes a bendision kadagiti Hebreo ti panangipasngay iti anak a lalaki. Apay? Agsipud ta ti Faraon iti Egipto, a madanagan iti napartak nga iyaadu dagiti Judio iti teritoria a masakupanna, imbilinna a mapapatay amin a kaipaspasngay nga annakda a lallaki.​—Exodo 1:12, 15-22.

Naaddaan da Amram ken Jocabed, agassawa a Hebreo, iti nalibnos a maladaga a lalaki kabayatan daytoy nakaap-aprang a panangikisap iti puli. Mapanunottayo a dagus no kasano a ti rag-oda mabalin a narimbawan iti buteng idi malagipda ti bilin ni Faraon. Ngem, bayat a miningmingan da Amram ken Jocabed ti anakda a lalaki, natibker ti pangngeddengda a dida baybay-an, aniaman ti mapasamak.​—Exodo 2:1, 2; 6:20.

Panagtignay a Buyogen iti Pammati

Iti tallo a bulan inlemmeng da Amram ken Jocabed ti anakda. (Exodo 2:2) Ngem napeggad daytoy yantangay agaassideg ti pagnanaedan dagiti Hebreo ken Egipcio. Mapapatay ti asinoman a matakuatan a mangpadpadas a mangsalungasing iti bilin ni Faraon​—ken mapapatay met ti ubing. No kasta, ania ti aramiden dagitoy napasnek a nagannak tapno agbiagda ken ti anakda?

Nangala ni Jocabed kadagiti sagibsib ti papiro. Ti papiro ket nalagda a runo, kasla kawayan, ken addaan iti leppak a tallo ti bilidna a kas iti kapuskol ti ramay. Makapagtayag agingga iti 6 a metro. Inusar dagiti Egipcio daytoy a mula a pagaramid iti papel, ikamen, layag, palloka, ken babassit a barangay.

Babaen kadagiti papiro, nangaramid ni Jocabed iti basket nga umdas a paggianan ti anakna. Kalpasanna pinulupuluanna iti alkitran ken galagala a mamagkakamang iti basket ken tapno di makastrek ti danum. Kalpasanna inkabil ni Jocabed ti anakna iti uneg ti basket sa impanna iti karunuan iti igid ti Karayan Nilo.​—Exodo 2:3.

Nasarakanda ti Ubing

Nagpuesto ti anak a babai ni Jocabed, a ni Miriam, iti asideg tapno kitaenna ti sumaganad a mapasamak. Idi kuan dimteng ti babai nga anak ni Faraon iti Nilo tapno agdigus.a Nalabit ammo ni Jocabed a masansan a mapan ti prinsesa iti daytoy a paset ti Nilo ket inrantana nga imbati ti basket iti lugar a nalaka a makita. Aniaman ti napasamak, nakita ti anak a babai ni Faraon ti basket nga adda iti karunuan, ket impaalana iti maysa kadagiti babaonenna. Naasian idi makitana ti agsangsangit nga ubing iti uneg ti basket. Nalasinna a Hebreo daytoy nga ubing. Ngem, kasano a maipapatayna ti kasta a naglibnos nga ubing? Malaksid iti natauan a kinamanangngaasi, nalabit naimpluensiaan ti anak a babai ni Faraon iti nalatak a pammati dagiti Egipcio a ti ipapan idiay langit agpannuray iti naaramidan a kinamanangngaasi kabayatan ti panagbiag ti maysa a tao.b​—Exodo 2:5, 6.

Ni Miriam, nga agbuybuya iti asideg, inasitganna ti anak a babai ni Faraon. “Innakto ayaban nga agpaay kenka ti maysa a babai a Hebrea a mangtagibi iti ubing a gapu kenka?” insaludsodna. Simmungbat ti prinsesa: “Inka!” Nagdardaras ni Miriam a napan ken nanangna. Di nagbayag, sitatakderen ni Jocabed iti sanguanan ti anak a babai ni Faraon. “Alaem daytoy nga ubing, ket tagibiem gapu kaniak,” kinuna ti prinsesa kenkuana, “ket itedkonto kenka ti gunggonam.” Nalabit nabigbig idin ti anak a babai ni Faraon a ni Jocabed ti ina ti ubing.​—Exodo 2:7-9.

Tinagibi ni Jocabed ti anakna agingga a napusot.c Daytoy ti nangipaay iti adu a napapateg a gundawayna a mangisuro kenkuana maipapan iti pudno a Dios, a ni Jehova. Idi kuan insubli ni Jocabed ti ubing iti anak a babai ni Faraon, a nangpanagan iti ubing iti Moises, kayatna a sawen ‘iti danum ti nakaalaanna.’​—Exodo 2:10.

Ti Maadaltayo

Naan-anay a ginundawayan da Amram ken Jocabed ti ababa a panawenda a mangisuro iti anakda kadagiti prinsipio ti pudno a panagdayaw. Kasta koma met ti aramiden ita dagiti nagannak. Kinapudnona, nasken a kasta ti aramidenda. Ni Satanas a Diablo “agsursursor a kasla leon a ngumerngernger, nga agsapsapul iti asinoman nga alun-onenna.” (1 Pedro 5:8) Maay-ayatan a makabiktima kadagiti napapateg nga agtutubo​—lallaki ken babbai​—a manamnama nga agbalin a nasasayaat nga ad-adipen ni Jehova. Saan a maasian iti kinaubingda! Maigapu iti daytoy, sanayen dagiti masirib a nagannak dagiti ubbingda nga agbuteng iti pudno a Dios, a ni Jehova.​—Proverbio 22:6; 2 Timoteo 3:14, 15.

Iti Hebreo 11:23, ti panangikagumaan da Amram ken Jocabed a mangilemmeng iti anakda iti immuna a tallo a bulanna ket nairekord kas maysa nga aramid ti pammati. Dagitoy a managbuteng iti Dios a nagannak nagtalekda iti pannakabalin ni Jehova a mangisalakan babaen ti dida panangbaybay-a iti anakda, ket naparaburanda gapu iti daytoy. Ipakitatayo met koma ti kinamatalektayo a mangsurot kadagiti linteg ken prinsipio ni Jehova, a mangnamnamatayo nga aniaman nga ipalubos ni Jehova a mapasarantayo ket agbanagto kamaudiananna iti agnanayon a pagimbagan ken kinaragsaktayo.​—Roma 8:28.

[Dagiti Footnote]