Itultuloyyo ti Magna a kas iti Pannagna ni Jesu-Kristo
“Ti agkuna nga isu agtalinaed a naikaykaysa [iti Dios] pagrebbenganna met a mismo ti agtultuloy a magna kas iti pannagna [ni Jesus].”—1 JUAN 2:6.
1, 2. Ania ti kaipapanan ti kumita a sipapasnek ken ni Jesus?
“BUYOGEN ti panagibtur tarayentayo ti lumba a naikabil iti sanguanantayo,” insurat ni apostol Pablo, “bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” (Hebreo 12:1, 2) Tapno masurottayo ti dana ti kinamatalek, masapul a kumitatayo a naimbag ken ni Jesu-Kristo.
2 Ti orihinal a sao para iti ‘kumita a sipapasnek,’ kas nausar iti Kristiano a Griego a Kasuratan, kaipapananna “iturong ti atension a di masinga,” “ipamaysa ti atension.” Kuna ti maysa a reperensia: “Apaman a ti Griego a tumataray iti estadium ibaw-ingna ti atensionna kadagiti agbuybuya a bunggoy, bumuntog ti panagtarayna. Kasta met laeng kadagiti Kristiano.” Dagiti pakasingaan lapdanda ti naespirituan a panagrang-aytayo. Masapul a kumitatayo a sipapasnek ken ni Jesu-Kristo. Ket ania ti kitaentayo iti Kangrunaan nga Ahente? Ti Griego a termino a naipatarus kas “kangrunaan nga ahente” kaipapananna “kangrunaan a lider, daydiay mangidadaulo iti aniaman a banag ket iti kasta, mangipaay iti pagwadan.” Ti sipapasnek a panangkita ken ni Jesus kalikagumanna ti panangtulad iti ulidanna.
3, 4. (a) Ania ti aramidentayo tapno matuladtayo ti pannagna ni Jesu-Kristo? (b) Ania a salsaludsod ti nasken nga usigentayo?
3 “Ti agkuna nga isu agtalinaed a naikaykaysa [iti Dios] pagrebbenganna met a mismo ti agtultuloy a magna kas iti pannagna [ni Jesus],” kuna ti Biblia. (1 Juan 2:6) Nasken nga agtalinaedtayo a naikaykaysa iti Dios babaen ti panangtungpaltayo kadagiti bilin ni Jesus, no kasano a tinungpalna met dagiti bilin ni Amana.—Juan 15:10.
4 Gapuna, ti panangtulad iti pannagna ni Jesus kalikagumanna a sipapasnek a kumitatayo kenkuana kas ti Kangrunaan a Lider ken surotentayo a naimbag dagiti addangna. Napateg nga usigentayo dagitoy a saludsod: Kasano ti panangiturong ni Kristo kadatayo ita? Ania ti rumbeng nga epektona kadatayo ti panangtuladtayo iti pannagnana? Ania dagiti gunggona nga iyeg ti panangtulad iti padron ni Jesu-Kristo?
No Kasano nga Iturturong ni Kristo Dagiti Pasurotna
5. Sakbay a nagpalangit, ania ti inkari ni Jesus kadagiti pasurotna?
5 Sakbay a nagpalangit, ni napagungar a Jesu-Kristo ket nagparang kadagiti adalanna ken intalekna kadakuada ti maysa a napateg a trabaho. Kinunana: “Inkayo ngarud ket mangaramidkayo iti ad-adalan kadagiti tattao iti amin a nasion.” Iti dayta a gundaway, inkari met ti Kangrunaan a Lider nga isu ket kaduadanto bayat nga itungpalda daytoy nga annongen, idi a kinunana: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:19, 20) Kasano nga adda ni Jesu-Kristo kadagiti pasurotna bayat daytoy tiempo ti panungpalan ti sistema ti bambanag?
6, 7. Kasano nga us-usaren ni Jesus ita ti nasantuan nga espiritu a mangidaulo kadatayo?
6 “Ti katulongan, ti nasantuan nga espiritu, nga ibaonto ti Ama iti naganko,” kinuna ni Jesus, “isuronto dayta kadakayo ti amin a bambanag ket ipalagipna kadakayo ti amin a bambanag nga imbagak kadakayo.” (Juan 14:26) Iwanwan ken pabilgennatayo ti nasantuan nga espiritu, a naibaon iti nagan ni Jesus. Mangted dayta iti naespirituan a lawag ken tumulong tapno matarusantayo “uray pay ti nauneg a bambanag ti Dios.” (1 Corinto 2:10) Maysa pay, “bunga ti espiritu” dagiti nadiosan a galad a kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Galacia 5:22, 23) Babaen ti tulong ti nasantuan nga espiritu, mapatanortayo dagitoy a galad.
7 Bayat a sukimatentayo ti Kasuratan ken ikagumaantayo nga iyaplikar dagiti maad-adaltayo, tulongannatayo ti espiritu ni Jehova a rumang-ay iti sirib, panangilasin, pannakaawat, pannakaammo, panangikeddeng, ken abilidad nga agpanunot. (Proverbio 2:1-11) Tulongannatayo met ti nasantuan nga espiritu a mangandur kadagiti sulisog ken pakasuotan. (1 Corinto 10:13; 2 Corinto 4:7; Filipos 4:13) Naidagadag kadagiti Kristiano a ‘dalusanda koma ti bagbagida iti tunggal pakatulawan iti lasag ken iti espiritu, nga an-anayenda ti kinasanto.’ (2 Corinto 7:1) Kabaelantayo kadi a tungpalen ti kalkalikaguman ti Dios a kinasanto, wenno kinadalus, no awan ti tulong ti nasantuan nga espiritu? Ti maysa nga us-usaren ita ni Jesus a mangidaulo kadatayo isu ti nasantuan nga espiritu, nga intalek ni Jehova a Dios iti Anak tapno usarenna.—Mateo 28:18.
8, 9. Kasano a mangidadaulo ni Kristo babaen “ti matalek ken masirib nga adipen”?
8 Usigentayo ti sabali pay a pamay-an nga idadauluan ni Kristo ti kongregasion ita. No maipapan iti kaaddana ken iti panungpalan ti sistema ti bambanag, kinuna ni Jesus: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo? Naragsak dayta nga adipen no iti idadateng ni apona masarakanna nga ar-aramidenna ti kasta! Pudno kunak kadakayo, dutokannanto nga agaywan kadagiti amin a sanikuana.”—Mateo 24:3, 45-47.
9 Ni Jesu-Kristo dayta nga ‘apo.’ Ti “adipen” isu ti grupo dagiti napulotan a Kristiano ditoy daga. Naitalek iti daytoy a klase adipen ti panangaywan kadagiti naindagaan nga interes ni Jesus ken panangipaay iti naintiempuan a naespirituan a taraon. Maysa a bassit a grupo dagiti kualipikado a manangaywan manipud iti grupo ti “matalek ken masirib nga adipen” ti mangbukel iti Bagi a Manarawidwid, nga agserserbi kas pannakabagi ti klase adipen. Iturturongda ti sangalubongan a trabaho a panangikasaba iti Pagarian ken panangipaay iti naespirituan a taraon iti umiso a tiempo. Iti kasta, iturturong ni Kristo ti kongregasion babaen ti napulotan iti espiritu a “matalek ken masirib nga adipen” ken ti Bagi a Manarawidwidna.
10. Ania ti nasken a panangmatmattayo kadagiti panglakayen, ken apay?
10 Mangidadaulo met ni Kristo babaen dagiti “sagut a tattao”—dagiti Kristiano a papanglakayen, wenno manangaywan. Naipaay dagitoy a lallaki “iti panggep a panangatur kadagiti sasanto, maipaay iti trabaho a panagministerio, maipaay iti pannakapabileg ti bagi ti Kristo.” (Efeso 4:8, 11, 12) No maipapan kadakuada, kuna ti Hebreo 13:7: “Laglagipenyo dagidiay mangidadaulo kadakayo, isuda a nangisao kadakayo ti sao ti Dios, ket bayat nga ut-utobenyo ti pagbanagan ti kababalinda tuladenyo ti pammatida.” Dagiti panglakayen ti mangidaulo iti kongregasion. Gapu ta tultuladenda ni Kristo Jesus, maikari a tuladen ti pammatida. (1 Corinto 11:1) Maipakitatayo nga apresiarentayo ti urnos mainaig kadagiti panglakayen no agtulnog ken agpasakuptayo kadagitoy a “sagut a lallaki.”—Hebreo 13:17.
11. Kadagiti ania a pamay-an nga idadauluan ni Kristo dagiti pasurotna ita, ken kasano a makapagnatayo a kas iti pannagnana?
11 Wen, iturturong ni Jesu-Kristo dagiti pasurotna ita babaen ti nasantuan nga espiritu, ‘ti matalek ken masirib nga adipen,’ ken kadagiti panglakayen iti kongregasion. Tapno makapagnatayo a kas iti pannagna ni Kristo, masapul a maawatantayo ti wagas ti panangidaulona ken agpasakuptayo iti dayta. Masapul met a tuladentayo ti wagas ti pannagnana. “Naayabankayo iti daytoy a dana,” insurat ni apostol Pedro, “agsipud ta uray ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Iti ania a pamay-an a maipakitatayo a sursurotentayo ti perpekto nga ulidan ni Jesus?
Sititimbeng nga Usaren ti Autoridad
12. Ania nga aspeto ti ulidan ni Kristo ti nangnangruna a paginteresan dagiti panglakayen iti kongregasion?
12 Nupay immawat ni Jesus iti awan makaartap nga autoridad manipud ken ni Amana, natimbeng ti panangusarna iti dayta. Amin a kameng ti kongregasion—nangnangruna dagiti manangaywan—nasken a ti ‘kinanainkalinteganda maammuan koma dagiti amin a tattao.’ (Filipos 4:5; 1 Timoteo 3:2, 3) Gapu ta adda autoridad dagiti panglakayen iti kongregasion, nasken a tuladenda ni Kristo no ipakatda dayta.
13, 14. Iti ania a pamay-an a dagiti panglakayen matuladda ni Kristo bayat a paregtaenda dagiti sabsabali nga agserbi iti Dios?
13 Inkabilangan ni Jesus dagiti limitasion dagiti adalanna. Dina kinalikaguman ti nalablabes ngem iti kabaelanda. (Juan 16:12) Saanna a pinilit ida no di ket pinaregtana dagiti pasurotna a ‘pingetanda’ nga aramiden ti pagayatan ti Dios. (Lucas 13:24) Inaramidna dayta babaen ti panangidaulona ken pananggutugotna iti pusoda. Umasping iti dayta, dagiti Kristiano a panglakayen ita dida piliten dagiti sabsabali nga agserbi iti Dios babaen ti panangpabain wenno panangkonsiensia. Imbes ketdi, paregtaenda dagitoy nga agserbi ken ni Jehova gapu iti panagayatda kenkuana, ken ni Jesus, ken agraman kadagiti padada a tattao.—Mateo 22:37-39.
14 Saan nga inabuso ni Jesus ti autoridad a naitalek kenkuana babaen ti dina panangtengngel iti biag dagiti tattao. Saan met a nangipasdek kadagiti imposible a maannurot a pagalagadan wenno nangipaulog iti nakaad-adu a pagannurotan. Imbes ketdi, ginutugotna dagiti tattao babaen ti panangitukitna iti pusoda dagiti prinsipio nga adda iti likudan dagiti linteg a naipaay babaen ken ni Moises. (Mateo 5:27, 28) Kas panangtuladda ken ni Jesu-Kristo, liklikan dagiti panglakayen ti mangaramid kadagiti bukodda a pagannurotan wenno ipilitda dagiti personal a panangmatmatda. No maipapan iti panagkawkawes ken panaglanglanga wenno iti pagpalpaliwaan ken panaglinglingay, ikagumaan dagiti panglakayen a danonen dagiti puso babaen ti panangusarda kadagiti nadiosan a prinsipio, kas iti naibalabala iti Mikias 6:8; 1 Corinto 10:31-33; ken 1 Timoteo 2:9, 10.
Agbalin a Mannakipagrikna ken Manangpakawan
15. Kasano a tinaming ni Jesus dagiti nagkamalian dagiti adalanna?
15 Nangipasdek ni Kristo iti pagwadan a tuladentayo no maipapan iti panangtamingna kadagiti nagkurangan ken nagkamalian dagiti adalanna. Usigentayo ti dua a pasamak iti maudi a rabiina ditoy daga kas tao. Idi dimtengda idiay Getsemani, “inkuyog [ni Jesus] da Pedro ken Santiago ken Juan” ket kinunana kadakuada nga ‘agtultuloyda nga agbantay.’ Kalpasanna, ‘idi immadayo pay bassit nagkul-ob iti daga ket rinugianna ti nagkararag.’ Idi nagsubli, “nasarakanna ida a matmaturog.” Ania ti inaramid ni Jesus? Kinunana: “Ti espiritu, siempre, sigagagar, ngem ti lasag nakapuy.” (Marcos 14:32-38) Imbes a sigugubsang a tubngarenna da Pedro, Santiago, ken Juan, impakitana a maawatanna ida! Iti dayta met laeng a rabii, namitlo nga inlibak ni Pedro ni Jesus. (Marcos 14:66-72) Kasano ti panangtrato ni Jesus ken ni Pedro kalpasan dayta? “Ti Apo naibangon ket nagparang ken Simon [Pedro].” (Lucas 24:34) “Nagparang ken Cefas,” kuna ti Biblia, “kalpasanna iti sangapulo ket dua.” (1 Corinto 15:5) Imbes nga agsakit ti nakemna, pinakawan ni Jesus ti agbabbabawi nga apostol ket pinabilegna. Idi agangay, intalek ni Jesus ken ni Pedro ti dadakkel nga annongen.—Aramid 2:14; 8:14-17; 10:44, 45.
16. Kasanotayo a matulad ti pannagna ni Jesus no adda kapammatiantayo a mangupay wenno mangsair kadatayo?
16 No adda kapammatiantayo a mangupay wenno mangsair kadatayo gapu iti kinaimperpekto, saan kadi a rumbeng nga agbalintayo met a mannakaawat ken manangpakawan a kas ken ni Jesus? Indagadag ni Pedro kadagiti kapammatianna: “Agkakapanunotankay koma amin, a mangipakitakayo iti pannakipagmaymaysa ti rikna, addaan iti nainkabsatan a panagayat, nadungngo a mannakipagrikna, napakumbaba iti panagpampanunot, a saan nga isupapak ti panangdangran iti panangdangran wenno panangrabngis iti panangrabngis, no di ket, iti kasupadina, mangipaay iti pamendision.” (1 Pedro 3:8, 9) Kasano no ti maysa a tao ket saan a mannakaawat wenno manangpakawan, a dinatay tratuen iti wagas a panangtrato koma kadatayo ni Jesus? Obligadotayo latta a mangtulad ken ni Jesus ket agtignaytayo iti wagas a panagtignayna koma.—1 Juan 3:16.
Iyun-una Dagiti Interes ti Pagarian
17. Ania ti mangipakita a nakasentro ti biag ni Jesus ti panangaramid iti pagayatan ti Dios?
17 Adda sabali pay a benneg a masapul a tuladentayo ti pannagna ni Jesu-Kristo. Naisentro iti biag ni Jesus iti panangipakaammo iti naimbag a damag maipapan iti Pagarian ti Dios. Kalpasan a kinasabaanna ti Samaritana iti asideg ti Sicar idiay Samaria, kinuna ni Jesus kadagiti adalanna: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Napakired ni Jesus gapu iti panangaramidna iti pagayatan ni Amana; kasla taraon dayta a makapasalun-at, makapnek, ken makapabang-ar kenkuana. Sigurado a maaddaan iti pudpudno a kaipapanan ken pannakapnek ti biagtayo no tuladentayo ni Jesus a nangipamaysa iti biagna iti panangaramid iti pagayatan ti Dios.
18. Ania dagiti matagiragsak a bendision no iparegta kadagiti annak a sumrekda iti amin-tiempo a panagserbi?
18 No dagiti nagannak paregtaenda dagiti annakda a sumrek iti amin-tiempo a panagserbi, adu a bendision ti magun-odda ken dagiti annakda. Maysa nga ama ti nangiparegta sipud kinaubing dagiti singin nga annakna nga aramidenda a kalat ti panagpayunir. Idi nagturposda iti panageskuelada, nagpayunir dagitoy a singin. No maipapan kadagiti rag-o a nasagrapna, insurat daytoy nga ama: “Saandakami a pinaay dagitoy nga annakmi. Siyayaman a maikunami, ‘Ti annak ket tawid manipud ken Jehova.’” (Salmo 127:3) Ken kasano a makagunggona kadagiti annak ti panangragpatda iti amin-tiempo a panagserbi? Kuna ti ina nga addaan iti lima nga annak: “Ti panagpayunir tinulonganna ti amin nga annakko a maaddaan iti nadekket a relasion ken ni Jehova, pinasayaatna ti personal a panagadalda, tinulonganna ida a mangusar a nainsiriban iti tiempoda, ken tinulonganna ida a mangyun-una kadagiti naespirituan a bambanag iti biagda. Nupay kasapulanda amin ti mangaramid iti adu a panagbalbaliw, dida pagbabawian ti dana a pinilida a suroten.”
19. Ania a plano iti masanguanan ti nainsiriban nga usigen dagiti agtutubo?
19 Ania ti planoyo iti masanguanan dakayo nga agtutubo? Ikagkagumaanyo kadi ti agbalin a naballigi iti maysa a sekular a propesion? Wenno pagregreggetanyo ti sumrek iti amin-tiempo a panagserbi? “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao,” imbalakad ni Pablo, “a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” Innayonna: “Gapu itoy sardenganyo ti panagbalin a di nainkalintegan, no di ket itultuloyyo a lasinen no ania ti pagayatan ni Jehova.”—Efeso 5:15-17.
Agbalin a Nasungdo
20, 21. Iti ania a wagas a nasungdo ni Jesus, ken kasanotay a matulad ti kinasungdona?
20 Tapno matuladtayo ti pannagna ni Jesus, masapul a tuladentayo ti kinasungdona. No maipapan iti kinasungdo ni Jesus, kuna ti Biblia: “Nupay adda idi iti langa ti Dios, saanna a pinanunot ti panangagaw, kayatna a sawen, nga isu makipada koma iti Dios. Saan, no di ket inuksobanna ti bagina ket innalana ti langa ti maysa nga adipen ket nagbalin a kaas-asping ti tattao. Ad-adda pay ngem dayta, idi nasarakanna ti bagina iti langa a kas maysa a tao, impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” Sisusungdo nga intandudo ni Jesus ti kinasoberano ni Jehova babaen ti panagpasakupna iti pagayatan ti Dios para kenkuana. Nagtulnog uray pay masapul a matay iti maysa a pagtutuokan a kayo. Nasken a salimetmetantayo dayta a “kababalin ti isip” ket sisusungdo nga aramidentayo ti pagayatan ti Dios.—Filipos 2:5-8.
21 Nasungdo met ni Jesus kadagiti matalek nga apostolna. Iti laksid dagiti pagkapuyanda, inayat ida ni Jesus “agingga iti panungpalan.” (Juan 13:1) Umasping iti dayta, ditay koma agbalin a manangkritikar no adda dagiti pagkapuyan dagiti kakabsattayo.
Tuladenyo ti Pagwadan nga Impasdek ni Jesus
22, 23. Ania dagiti pagimbagan ti panangtulad iti pagwadan nga impasdek ni Jesus?
22 Siempre, kas imperpekto a tattao, ditay naan-anay a masurot dagiti addang ti perpekto a Pagwadantayo. Nupay kasta, mabalintay a sisisinged a suroten dagiti addangna. Maaramidtayo dayta no maawatan ken agpasakuptayo iti wagas ti panangidaulo ni Kristo ken itultuloytayo a suroten ti pagwadan nga impasdekna.
23 Mangyeg iti adu a bendision ti panangtulad ken ni Kristo. Ad-adda a naragsak ken makapnek ti biagtayo gapu ta naipamaysatayo iti panagaramid iti pagayatan ti Dios imbes nga iti pagayatantayo. (Juan 5:30; 6:38) Maaddaantayo iti nadalus a konsiensia. Agbalin met a mapagwadan ti pannagnatayo. Aw-awisen ni Jesus amin dagidiay mabambannogan ken madagdagsenan nga umasidegda kenkuana tapno magin-awaan dagiti kararuada. (Mateo 11:28-30) No tuladentayo ti ulidan ni Jesus, makapagin-awa met kadagiti sabsabali ti pannakilangentayo kadakuada. Itultuloytayo ngarud a tuladen ti pannagna ni Jesus.
Malagipyo Kadi?
• Kasano nga idadauluan ni Kristo dagiti pasurotna ita?
• Kasano a matulad dagiti panglakayen ti panangidaulo ni Kristo no maipapan iti panangusarda iti inted ti Dios nga autoridadda?
• Kasanotay a matulad ti pagwadan ni Jesus no iti panangtaming kadagiti pagkamalian dagiti sabsabali?
• Kasano a dagiti agtutubo mayun-unada dagiti interes ti Pagarian?
[Ladawan iti panid 23]
Dagiti Kristiano a panglakayen tulongandatayo a sumurot iti panangidaulo ni Kristo
[Dagiti Ladawan iti panid 24, 25]
Dakayo nga agtutubo, ania dagiti planoyo tapno maaddaankayo iti makagunggona a biag kas Kristiano?