Saan a komportable ti adu a pagsaritaan ti maipapan iti seks. Nupay kasta, no adda dakamaten ti Biblia maipapan iti seks, ibagana dayta iti prangka ngem nadayaw a pamay-an. Makatulong kadatayo ti ibagbagana maipapan iti dayta gapu ta ti Biblia ket naggapu ken Jehova, ti Namarsua kadatayo. Ammona ti kasayaatan para kadatayo. Isursurona no ania ti aramidentayo tapno maparagsaktayo isuna, ken no ania ti makatulong kadatayo tapno agbiagtayo a naragsak iti agnanayon.

1. Ania ti panangmatmat ni Jehova iti seks?

Ti seks ket regalo ni Jehova. Impaayna dayta ta kayatna a maragsakan ti agassawa a lalaki ken babai. Gapu iti daytoy a regalo, saanda la a maaddaan iti annak. Maipariknada pay ti ayatda iti maysa ken maysa​—banag a mangparagsak kadakuada. Dayta ti rason nga ibagbaga ti Sao ti Dios: “Agragsakka koma iti asawam iti kinaagtutubom.” (Proverbio 5:18, 19) Kayat ni Jehova a matalek dagiti Kristiano nga agassawa iti maysa ken maysa tapno saanda a pulos makikamalala.​—Basaen ti Hebreo 13:4.

2. Ania ti seksual nga immoralidad?

Ibagbaga ti Biblia a “dagiti agar-aramid iti seksual nga immoralidad . . . saandanto a tawiden ti Pagarian ti Dios.” (1 Corinto 6:9, 10) Inusar dagiti mannurat ti Biblia ti Griego a sao a por·neiʹa para iti seksual nga immoralidad. Ramanen dayta ti (1) seksual a relasiona ti dua a tao a saan a nagkasar, (2) homoseksualidad, ken (3) pannakiseks iti animal. Maparagsaktayo ni Jehova ken pagsayaatantayo no ‘adaywantayo ti seksual nga immoralidad.’​—1 Tesalonica 4:3.

AMMUEM TI AD-ADU PAY

3. Adaywam ti seksual nga immoralidad

Determinado idi ti matalek a lalaki nga agnagan Jose nga agtalinaed a nadalus iti moral. Basaen ti Genesis 39:1-12, sa pagsaritaan dagitoy a saludsod:

• Apay a nagtaray ni Jose?​—Kitaen ti bersikulo 9.

• Panagkunam, husto kadi ti inaramid ni Jose? Apay?

VIDEO: Adaywanyo ti Immoralidad (5:06)

Kayat ni Jehova nga adaywantayo amin ti immoralidad. Basaen ti 1 Corinto 6:18, sa pagsaritaan dagitoy a saludsod:

• Ania dagiti situasion a mabalin a makaaramid ti maysa iti seksual nga immoralidad?

• Kasanom a maadaywan ti immoralidad?

4. Malabanam ti sulisog

VIDEO: Makatulong ti Panagbasa iti Biblia Tapno Malabanam ti Sulisog (3:02)

• Iti video, ania ti inaramid ti brother idi nabigbigna a ti pampanunoten ken ar-aramidenna ket mabalin a mangdadael iti relasionda nga agassawa?

No dadduma, uray dagiti matalek a Kristiano ket makapanunot kadagiti narugit a bambanag. Kasanom a maliklikan a sangkapanunot dagiti immoral a bambanag? Basaen ti Filipos 4:8, sa pagsaritaan dagitoy a saludsod:

• Ania dagiti bambanag a masapul a pampanunotentayo?

• Kasano a makatulong ti panagbasa iti Biblia ken ti panagtalinaed a busy iti panagserbi ken Jehova tapno malabanantayo ti tendensiatayo nga agbasol?

5. Pagsayaatantayo dagiti estandarte ni Jehova

VIDEO: Saan a Masirib (9:31)

• Ania ti inaramid ti agtutubo a lalaki a nangiturong kenkuana iti makapasulisog a situasion?​—Kitaen ti Proverbio 7:8, 9.

• Sigun iti Proverbio 7:23, 26, adda dagiti nakaro nga epekto ti seksual nga immoralidad. Ania dagiti problema a maliklikantayo no agtalinaedtayo a nadalus iti moral?

• Kasano a makatulong ti kinadalus iti moral tapno agbiagtayo a naragsak iti agnanayon?

Pampanunoten ti dadduma a tattao a ti ibagbaga ti Biblia maipapan iti homoseksualidad ket saan a panangipakita iti ayat. Ngem ni Jehova, a naayat a Dios, kayatna nga agbiag ti amin a naragsak iti agnanayon. Tapno maysatayto kadagiti agbiag nga agnanayon, masapul a surotentayo dagiti estandartena. Basaen ti 1 Corinto 6:9-11, sa pagsaritaan daytoy a saludsod:

• Dagiti laeng kadi homoseksual nga ar-aramid ti ibilang ti Dios a dakes?

Tapno maparagsaktayo ti Dios, kasapulantayo amin ti mangaramid iti panagbalbaliw. Sulit kadi dayta? Basaen ti Salmo 19:8, 11, sa pagsaritaan dagitoy a saludsod:

• Panagkunam, rasonable kadi dagiti moral nga estandarte ni Jehova? Apay, wenno apay a saan?

SUMARIO

Ti seks ket regalo ni Jehova kadagiti agassawa a lalaki ken babai tapno agbalinda a naragsak.

Rebiu

• Ania dagiti karaman iti seksual nga immoralidad?

• Ania ti makatulong kadatayo a mangliklik iti seksual nga immoralidad?

• Kasano a pagsayaatantayo no surotentayo dagiti moral nga estandarte ni Jehova?

AGDISKOBREKA PAY

Ammuem no apay a kayat ti Dios nga agkasar nga umuna ti lalaki ken babai sakbay nga agkabbalayda.

“Ania ti Kuna ti Biblia Maipapan iti Panag-live-in?” (Artikulo iti website)

Kitaem no apay a ti isursuro ti Biblia maipapan kadagiti homoseksual nga ar-aramid dina kayat a sawen a kaguratayo dagiti homoseksual.

“Dakes Kadi ti Homoseksualidad?” (Artikulo iti website)

Ammuem no kasano a proteksion kadatayo dagiti linteg ti Dios maipapan iti amin a seksual nga aramid.

“Talaga Kadi a Pannakiseks ti Oral Sex?” (Artikulo iti website)

Iti kapadasan a “Nadayaw ti Panangtratoda Kaniak,” kitaem no ania ti nakatulong iti maysa a homoseksual a mangbalbaliw iti biagna tapno maparagsakna ti Dios.

“Ti Biblia Balbaliwanna ti Biag” (Ti Pagwanawanan, Abril 1, 2011)

Iti dadduma a kultura, patien dagiti tattao a naragsak laeng ti maysa no makiasawa. Ngem saan nga amin nga adda asawana ket naragsak, ken saan nga amin nga awan asawana ket saan a naragsak. Ti agpayso, ibagbaga ti Biblia nga agpada a regalo ti kinaawan asawa ken ti panagasawa.

1. Ania dagiti pagsayaatanna no single-ka?

Kuna ti Biblia: “Nasayaat ti pagbanagan ti asinoman a mangasawa, ngem nasaysayaat ti pagbanagan ti asinoman a saan a mangasawa.” (Basaen ti 1 Corinto 7:32, 33, 38.) Apay a nasaysayaat ti “pagbanagan” dagiti awan asawana? No single ti maysa, awan ti asawa nga asikasuenna isu a nawaywaya. Adda dagiti single nga adu ti maar-aramidanda para ken Jehova. Kas pagarigan, makapanda iti sabali a lugar tapno ikasaba ti naimbag a damag. Kangrunaan iti amin, adu ti tiempoda a mangpadekket iti relasionda ken Jehova.

2. Ania dagiti pagsayaatanna no nagkasar ti agassawa?

Kas iti kinaawan asawa, adda met dagiti naidumduma a pagsayaatanna no adda asawam. Ibagbaga ti Biblia a “nasaysayaat ti dua ngem ti maysa.” (Eclesiastes 4:9) Agpayso dayta lalo kadagiti Kristiano a mangsursurot kadagiti prinsipio ti Biblia iti panagasawada. Dagiti agassawa a nagkasar nagkinnarida nga ayaten, respetuen, ken ipategda ti maysa ken maysa. Isu a mas nataltalged ti riknada ngem kadagiti agkabkabbalay a saan a nagkasar. Kasta met, nataltalgedto ti rikna dagiti agbalin nga annakda.

3. Ania ti panangmatmat ni Jehova iti panagasawa?

Idi kinasar ni Jehova ti umuna nga agassawa, imbagana: “Panawanto ti lalaki ti ama ken inana ket makitiponto iti asawana.” (Genesis 2:24) Kayat ni Jehova nga aginnayat ti agassawa ken agkaduada agingga a sibibiagda. Ipalubosna laeng ti diborsio no nakikamalala ti maysa kadakuada. No mapasamak dayta, ikkan ni Jehova ti inosente nga asawa iti wayawaya nga agdesision no makidiborsio wenno saan.a (Mateo 19:9) Saan a kayat ni Jehova ti poligamia ta kayatna a maysa laeng ti asawa ti maysa a Kristiano.​—1 Timoteo 3:2.

AMMUEM TI AD-ADU PAY

4. Usarem ti kina-single-mo iti kasayaatan a pamay-an

Imbilang ni Jesus ti kinaawan asawa kas maysa a regalo. (Mateo 19:11, 12) Basaen ti Mateo 4:23, sa pagsaritaan daytoy a saludsod:

• Kasano nga inusar ni Jesus ti regalo a kinaawan asawa nga agserbi ken Amana ken tumulong iti dadduma?

Kas ken Jesus, mabalin a ma-enjoy dagiti Kristiano ti kinaawan asawada. I-play ti VIDEO, sa pagsaritaan ti sumaruno a saludsod.

VIDEO: Dagiti Matalek nga Awanan Asawa (3:11)

• Ania dagiti nasayaat a pamay-an a mausar dagiti Kristiano ti kina-single-da?

Ammom kadi?

Saan nga ibaga ti Biblia ti edad a mabalinmon ti makiasawa. Ngem iparparegtana nga urayen ti maysa ti tiempo a “limbesen iti kinaagtutubona,” wenno ti tiempo a napigsa ti seksual a tarigagayna a mabalin a mangapektar iti panagaramidna iti umiso a desision.​—1 Corinto 7:36.

5. Piliem a naimbag ti pakiasawaam

Ti panagpili iti pakiasawaan ti maysa kadagiti kapatgan a desision nga aramidem iti biagmo. Basaen ti Mateo 19:4-6, 9, sa pagsaritaan daytoy a saludsod:

• Apay a saan koma nga agdardaras ti maysa a Kristiano a makiasawa?

Matulongannaka ti Biblia tapno ammom no ania dagiti kualidad ti nasayaat nga asawa. Kapatgan iti amin, ti koma pakiasawaam ket daydiay mangay-ayat ken Jehova.b Basaen ti 1 Corinto 7:39 ken 2 Corinto 6:14. Kalpasanna, pagsaritaan dagitoy a saludsod:

• Apay a kapammatiantayo laeng koma ti pakiasawaantayo?

• Panagkunam, ania ngata ti marikna ni Jehova no makiasawatayo iti saan a mangay-ayat Kenkuana?

6. Kas koma ken Jehova ti pangibilangam iti panagasawa

Iti nagkauna nga Israel, adda dagiti lallaki a nangidiborsio kadagiti assawada gapu kadagiti awan patpategna a rason. Basaen ti Malakias 2:13, 14, 16, sa pagsaritaan daytoy a saludsod:

• Apay a kagura ni Jehova no agdiborsio ti agassawa gapu kadagiti rason a saan a suportaran ti Biblia?

I-play ti VIDEO, sa pagsaritaan ti sumaruno a saludsod.

VIDEO: Ti Panagassawa ket Permanente a Panagtipon (4:30)

• No saan nga agdaydayaw ken Jehova ti asawam, ania ti mabalinmo nga aramiden tapno naragsak latta ti panagasawayo?

7. Surotem dagiti estandarte ni Jehova para iti panagasawa

VIDEO: Kayam a Suroten Dagiti Estandarte ni Jehova iti Panagasawa (4:14)

Basaen ti Hebreo 13:4, sa pagsaritaan dagitoy a saludsod:

• Panagkunam, rasonable kadi dagiti estandarte ni Jehova para iti panagasawa? Apay, wenno apay a saan?

Kayat ni Jehova nga irehistro dagiti Kristiano ti kasar ken diborsioda ta dayta met ti kidkiddawen ti gobierno ti kaaduan a pagilian. Basaen ti Tito 3:1, sa pagsaritaan daytoy a saludsod:

• No adda asawam, siguradoka kadi a nakarehistro ti kasaryo?

SUMARIO

Ti kinaawan asawa ken panagasawa ket regalo ni Jehova. Aniaman kadagita ti piliem, agbalinka a naragsak no surotem ti pagayatan ni Jehova.

Rebiu

• Kasano a mausar ti maysa ti kina-single-na iti kasayaatan a pamay-an?

• Apay nga ibagbaga ti Biblia a makiasawatayo laeng kadagiti kapammatiantayo?

• Ania ti ibagbaga ti Biblia a kakaisuna a rason ti panagdiborsio?

AGDISKOBREKA PAY

Ibagbaga ti Biblia nga iti laeng “adalan ti Apo” ti pakiasawaantayo. Ania ti kayat a sawen dayta?

“Salsaludsod Dagiti Agbasbasa” (Ti Pagwanawanan, Hulio 1, 2004)

Buyaem ti dua a video a makatulong kenka nga agdesision maipapan iti pannakideyt ken panagasawa.

Panagsagana a Makiasawa (11:53)

Ammuem no apay a marikna ti maysa a brother nga adayo a napatpateg ti inted kenkuana ni Jehova ngem iti insakripisiona.

Nangnamnamaak nga Agadal iti Biblia (1:56)

Ania dagiti masapul a panunoten ti maysa sakbay a makidiborsio wenno makisina?

“Raemen No Ania ti ‘Pinagsinnangol ti Dios’” (Ti Pagwanawanan, Disiembre 2018)